Matiu 14
14
Joni Papitisita Kwamajina
(Maka 6:14-29; Ruku 9:7-9)
1'E'eme vea kajino ea ka'ene Karari ara kwaa 'ajohi'ina ka'ene Herotina 'wavujaho Jesuni pinana henana. 2'Enarena hu huni pwehwaha Jesu rona ijá 'iama Ijaho Joni Papitisita kwamana'omo kú'o 'urina jihuna'e Huni harura ni'ima'ura rene 'ee emaa areri pavehuna venu 'iamana. 3Herotira Joniho kamoma ranavume tipurai hinana. Hu ija'ina ka'ene venajihuni maijaho Herotiasiho Piripu ka'ene Heroti oni 'u'uijihuni napara'omo ijí 'waravumakame tipurai ranamana. 4Ijihuni maijaho Jonira Heroti ijá 'wama Ara hu 'wahajaho niho'o 'unama maa pana 'wamana. 5'Ejumakame Herotira Joni 'anaa kwa'amarono ura renana kaivo hu eaka mapokijihija'e juhamana. Ijihuni maijaho pu ea mapokijija Joniho poropeti rojujihuna'e pa'anaara. 6'Enakaivo vea ka'ene Heroti nahejari veijara rejuma kamarena Herotiasi oni 'apajijara eaka mapokijihi puni una'i javavumakame Heroti niho'o teamama paranana. 7'Ejumakame Herotira ijí napara kajaho nahama 'waramarena ijá 'wama Na ura a iraki ura rena'amajaho nahama 'warivakame na ma'uta 'wamana. 8'Ejume oahi 'apajaha nimarako 'warama jihuna'e hu ijá 'wama Iviamajai Joni Papitisita oni húmatiji tevua 'ahi ranama miha 'wamana. 9'Enakaivo Herotiho ijí henarena temumana kaivo hura ea mapoka puni una'i nahama 'warama jihuna'e apena roe ma'avarono 'waramana. 10'Ejume hu ea irechamiume va'e Joni oni húmata'e tipura ari vaji 'uhuara. 11'Enareja pu 'uhue tevua 'ahi raname apena roe napara kaji mahume hura apena va'e oaha mahana. 12'Ejume huni tisaiporuepo roe huni hahijaho apena va'e kwanana'i kaivo va'e Jesuho 'waravara.
Jesura Ea Mapoka (5,000) Túasamahajina
(Maka 6:30-44; Ruku 9:10-17; Joni 6:1-14)
13'Ejumakame Jesuho ijí vu'a kaji henarena Hu kwaa kajaho are'i kaivo sisima 'ahi huhusumano kwaa ea pa'ajino va'ana. 'Ejumakame ea mapoka ijí henareja pu Hu 'arariha va'ara. 14'Ejumakame Hu sisima vaji rena arihi'i eaka mapoka kaji kimarena oja tura'i 'ahaana. 'Ejumakame Hu puni ea ka'ene atami 'uniravi'inijija vejume sonahiara. 15'E'eme ijihuni nusireijino Huni tisaiporuepo roe Hu ijá 'wava Vea nipa'arena paranukúne eakija irechamie pu ari va'e puni 'iruma opuipo 'imeja 'wavara. 16'Ejume Jesura ijá 'iama Pu pavahunakúne jara 'iruma vajihakame pu ija 'iamana. 17'Ejume pu Hu ijá 'wava Núra 'iruma ka'ene irechama hijujaho puretia iropune 'ee kija no'ohe'ineruna 'wavara. 18'Ejume Jesura ijá 'iama 'Eka Nuni roha 'iamana. 19'Ejume Hura eaka mapoka kajija 'waravume mwe'i hijasavara. 'E'eme Hu puretia iropune 'ee kija no'o 'eke kahi ichutoi niri'i Godi teimani 'wavi'i tuchame Huni tisaiporua vajihume pu 'eke ea mapoka kajija vajihara. 20'Ejumakame ea mapoka kajija ijume tú'ama parajumakame Huni tisaiporuepo ijí pwina ka'ene irechavajaho 'ekareja katija iropu ropu no'ohe'i vejume itusahara. 21Vea kajino parua ka'ene 'iruma kaji ijajija niho'o mapoka mapoka (5,000) kaivo napara 'ee kasima patahara.
Jesura Toa 'Ahi Namina Va'ajina
(Maka 6:45-52; Joni 6:15-21)
22'E'eme Jesuho eaka mapoka kajihi irechamia va'avaro ijí hi'i kaivo Huni tisaiporu irechamiume pu sisima 'ahi ajime toa ropuna'i urana va'ara. 23'E'eme Hu eaka mapoka kajija irechamiume va'eme Hu Huhusu va'e huri'i ajime hine siporua 'o'i va'ana. 'Enarena vea nutui venajaho Jesuho ijino Huhusu hinana. 24'E'ejume ijihuni vea kajakaro sisimaijaho va'u va'ume toa rira karohi areri pava'i kaivo ijí apene karohi kahi ruva'eme puuri hiramarena niho'o sisera'i venana. 25Ijá renajihuni veijaho nitunituha'omo Jesuho puni ro'i 'ahaume toa 'aha kajino mumori roana. 26'Ejumakame Huni tisaiporuepo ka'eme Hu toa 'aha kajino mumori rouma pu kamareja oja hwa'usahume ijá 'wava 'Avena sisei rou kavu 'wamareja pu niho'o juma emaavaravara. 27'Ejume ni'aha kwino Jesura pu ijá 'iama Naranakúne juvujaho areha 'iamana. 28'Ejumakame Pitara ijá 'umena Natohwe ijaho nimaae Arana re'amajaho 'warive na toa 'ahakino vu'uma 'umenana. 29'Ejume Jesura ijá 'wama Ijinakúne roa 'wamana. 'Ejume Pitaho ni'aha kwino sisima vaja kaji rene arihe toa 'aha kajino Jesuni va'ana. 30'Enarena va'e Huni rori vai'i puura ka'ene hiramaji kamarena jumajaho ni'aha kwino ijí toa vaji tusama 'onana. 'Enarena hu ijá 'umena Natohwe ni'ajiha 'umenana. 31'Ejume Jesura ni'aha kwino ija joranajaho 'unavi'i ijá 'wama A ma'uako nimaa ronana kaivo irakijihuna'e ara nimaa ronajaho aremane? 32'Ene pu no'o sisima vaji aji'eme puura ka'ene hiramajaho aremana. 33'Ejumakame ea ka'ene sisima vaji hijajipo Hu oja mahi'i ijá 'wava A nimaa'e Godoni Hariha 'wavara.
Jesura Kenesareti Atama Rukina Vejume Maraniajina
(Maka 6:53-56)
34'E'ikaivo pu sua va'e kara'i Jenesarati usevara. 35'Ejume parua mapoka ara kajiupo Hua hena kamareja 'ona vejume ara rora kajino atakina mapoka ka'ene hijujaho aherama Huni roara. 36'Enareja Hu pu maki'eje Huni ateha urijino 'unave atama sonahi'amarono pu jariravara. 'Enareja ea irahipo Huni ateha kaji 'unavajaho atama puna maho'o sonahiara.
Valið núna:
Matiu 14: mcq
Áherslumerki
Deildu
Afrita
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.