Popular Bible Verses from Gênesis 1

Deildu

Hiyrun-koxa wane htshina Hoyakalu: — Xawakni yineru wkamhanu, wyáholu wkamhinru hixa pixka rixanu. Yineru towutanro chima, kamejiru koxa, ptowruka pantshi hajeru, ptowru hixatshri hocha hajeru, ptowru hixatshri yosrolotatshri, mtserutu, tsrur-koxa, ptowru hixatshri htowutanu psoltshijyako. Hiyáhoni Hoyakalu kamhalu yineru waleko hyáholuya. Wanna hkamha jeji, suxo.

Waneya Hoyakalu kihlewaka htshinanwakatna yine, waneya wane htshina: — Kwuhenpatkahi, hixolewnanu htsepoxyawakaplu tshiji, tsru hixikatshinepwahi tshiji. Yine tshinanu twa chima mar powha hwatshri hixanupa, kamejiru teno hajeru hixanupa hiyrun-koxa ptowru hixatshri hiwekatshri tshiji yanatshri hixanupa htowuxyawakaplu.

Hyinuwakle Hoyakalu hiyakotlu tenhohne, tshiji koxa.

Tshiji hi hwapa, male rixapa mapchahalu tsonu hima honha tenohalu hichyatlu tshiji. Waneyakni Hoyakalu hchinikanu honha hohwaka hyapjeta.

Waneya wane htshina Hoyakalu: — Katalu hwanu. Waneya rakanhatka katalu.

Waneya Hoyakalu hetlu ptowruka hkamhaleru, retlu ptowruka kihler-potuko. Waneya kayi, yetshpotukawa hiknohatka seis hohne rixinritkani.

Waneya Hoyakalu hetlu katalu hikamtutkalu. Waneya hkotspalatlu katalu, mapchahaluyma.

Waneya Hoyakalu wan-tshinna yine: — Nenekatkahi ptowru hixatshri hitaklu hitataji hiptshejikatshri hiyrunu ptowru hixatshri hejnuji hisahi hiptshejikatshri, nikkalurupa.

Waneya Hoyakalu katalu rutakhiwakata hohi htshinru, mapchahalu hoyetshno htshinru. Waneya kayi sreta hiyrunu yetshpotukawa sreta walekni mitshikananu hohne tshinkatka.

Waneya Hoyakalu wan-tshina: — Rawanu malehohnephawaka honha kanipretatshripa.

Peklo hiyrunu ptowru hixatshri hocha ptshe hakanhikatshri nenekatkalu ptowru hocha hajeru, ptowru kamejiru, ptowru yosrolotatshri, tsruru, mtserut-koxa niklerupa. Waneya wane rix-hakanhaleta.

Waneya wane htshin-koxa Hoyakalu: — Katalune hakanhanu tenhohneya, hkotspalaxyawakaplu hohi hoyetshno, hmarkaxyawakaplu kapapkolu rixyawakapa, hohi, hihwalapu

Waneya wane htshina Hoyakalu: — Hocha hiptshekanu tshij-hohoya, ptowru hixatshri hitaklu hitataji hiptshejini, hiyrunu wale neru pixkayakako, hixatshri hahmuna hisahi hiptshejikatshri hiyrun-koxa wale neru pixkayakako hixatshri hiptshekanu. Hiyáhoni rakanhatka.

Waneya Hoyakalu kamhalu malehohnewaka. Waneya psoji honha malehohnewaka hpuko rutaka, psojha wane rohowaka rutaka. Hiyáhoni rakanhatka.

Waneya ruptshekatka tshij-hohoya ptowru hixatshri hitaklu hitataji hiptshejikatshri hiyrunu wale nerukni, hiyrun-koxa ptowru hixatshri hahmuna hisahi hiptshejikatshri hiyrun-koxa wale nerkaka hiptshekatka tshij-hohoya. Waneya Hoyakalu hetlu kihle rixyawakatka.

Waneya Hoyakalu hepi katalu hkamha. Tkatshi hohohne hatatatshripa, ksuru hoyetshno hatatatshripa. Hkamhakoxlo katahiri.

Waneya wane htshin-koxa Hoyakalu: — Honha tenhohne hpuko hapatjehaxini wane tsonu rawhatanu. Popriwaka hiphujewnanu. Hiyáhoni rakanhatka. Hoyakalu tshiji tshinru popriwaka. Rapatjehaxyawaka honha hhiwakatlu mar powha. Waneya Hoyakalu hetlu kihle rixyawakatka.

Waneya Hoyakalu kihlewaka htshinanwakatna wane htshinna: — Honha hwatshri hwuhenewatanu htsepoxyawakaplu honha, kamejirune hixolewniywakap-koxa.

Waneya wane htshin-koxa Hoyakalu: — Ptowru hixatshri hiwekatshri tshiji hajeru hiyrunu wale neruko hakanhanu. Ptowru hixatshri kammanruru, ptowru hixatshri kmatsyiru hocha hajeru, ptowru hixatshri yosrolotatshri, mtserutu, tsrur-koxa hiyrun-koxa wale neruko hakanhanu. Wane rix-hakanhaleta.

Waneya wane htshina Hoyakalu: — Ptowru hixatshri honha hajeru tsepotanru honha hiyrunu tenhohne ptowru hixatshri kamejirune tsepotanu.

Hiyáhoni Hoyakalu wane hix-kamhaletlu ptowru hixatshri kmatsyiru hocha hajeru, ptowru hixatshri kammanruru, hiyrunu ptowru hixatshri yosrolotatshri mtserutu, tsrur-koxa satkaka waleko hinerupni. Waneya Hoyakalu hetlu kihle rixyawakatka ptowruka.