Popular Bible Verses from ወንጌል ዘማቴዎስ 5

Deildu

ወኢያኀትዉ ማኅቶተ ከመ ያንብርዋ ታሕተ ከፈር አላ ያነብርዋ ዲበ ተቅዋማ ወታበርህ ለኵሎሙ እለ ውስተ ቤት። ከማሁኬ ይብራህ ብርሃንክሙ በቅድመ ሰብእ ከመ ይርአዩ ምግባሪክሙ ሠናየ ወይሰብሕዎ ለአቡክሙ ዘበሰማያት።

አንትሙ ውእቱ ብርሃኑ ለዓለም ኢትክል ተከብቶ ሀገር እንተ ተሐንጸት መልዕልተ ደብር።

ብፁዓን ንጹሓነ ልብ እስመ እሙንቱ ይሬእይዎ ለእግዚአብሔር።

ብፁዓን እለ ይርኅቡ ወይጸምኡ በእንተ ጽድቅ፤ እስመ እሙንቱ ይጸግቡ።

ወአንሰ እብለክሙ አፍቅሩ ጸላእተክሙ ወባርክዎሙ ለእለ ይረግሙክሙ ወሠናየ ግበሩ ለእለ ይጸልኡክሙ ወጸልዩ በእንተ እለ ይትዔገሉክሙ ወይሰድዱክሙ።

ብፁዓን ነዳያን በመንፈስ እስመ ሎሙ ይእቲ መንግሥተ ሰማያት።

ብፁዓን ገባርያነ ሰላም እስመ እሙንቱ ውሉደ እግዚአብሔር ይሰመዩ።

ብፁዓን እለ ይላሕዉ ይእዜ እስመ እሙንቱ ይትፌሥሑ።

ብፁዓን እለ ይሰደዱ በእንተ ጽድቅ እስመ ሎሙ ይእቲ መንግሥተ ሰማያት።

ብፁዓን መሓርያን እስመ ሎሙኒ ይምሕርዎሙ።

ብፁዓን አንትሙ ሶበ ይሰድዱክሙ ወይዘነጕጉክሙ ወይነቡ ኵሎ እኩየ ላዕሌክሙ እንዘ ይሔስዉ በእንቲኣየ። ተፈሥሑ ወተሐሠዩ እስመ ብዙኅ ዕሴትክሙ በሰማያት እስመ ከመዝ ሰደድዎሙ ለነቢያት እለ እምቅድሜክሙ።

ብፁዓን የዋሃን እስመ እሙንቱ ይወርስዋ ለምድር።

አንትሙ ውእቱ ጼዉ ለምድር ወእመሰ ጼው ለስሐ በምንትኑ እንከ ይቄስምዎ አልቦኬ እንከ ዘይበቍዕ ዘእንበለ ዘይገድፍዎ አፍኣ ወይከይድዎ ሰብእ በእገሪሆሙ።

አንትሙሰ ኩኑ ፍጹማነ ከመ አቡክሙ ሰማያዊ ፍጹም ውእቱ።

ባሕቱ ይኩን ነገርክሙ እመሂ እወ እወ ወእመሂ አልቦ አልቦ ወፈድፋደሰ እምእሉ እምእኩይ ውእቱ።

ሰማዕክሙ ዘተብህለ ለቀደምትክሙ ዐይን ቤዛ ዐይን ወስን ቤዛ ስን። ወአንሰኬ እብለክሙ ኢትትቃወምዎ ለእኩይ በእኩይ ወለዘሂ ጸፍዐከ መልታሕቴከ እንተ የማን ሚጥ ሎቱ ካልእታሂ።

እመኒ ዐይንከ እንተ የማን ታስሕተከ ምልሓ ወግድፋ እምላዕሌከ እስመ ይኄይሰከ ነቋረከ ትባእ ውስተ መንግሥተ ሰማያት እምትባእ ምስለ ክልኤሆን አዕይንቲከ ውስተ እሳተ ገሃነም። ወእመኒ እዴከ እንተ የማን ታስሕተከ ምትራ ወግድፋ እምላዕሌከ እስመ ይኄይሰከ ይትኀጐል አሐዱ እምነ አባልከ እምኵሉ ሥጋከ ይትወደይ ውስተ እሳተ ገሃነም ወእመኒ እግርከ ዘየማን ታስሕተከ ምትራ ወግድፋ እምላዕሌከ እስመ ይኄይሰከ ሐንካሰከ ትባእ ውስተ መንግሥተ ሰማያት እምትባእ ምስለ ክልኤሆን እገሪከ ውስተ እሳተ ገሃነም።