Popular Bible Verses from San Mateo 28

Deildu

Isonga ikowan ko son si‐kayo ey daw kayo shi emin na ili shiya dobong, jet itoshoyo i maypangkep son si‐kak say memati ira. Bonjagi jo ira shi ngaran nen Apo Shiyos ja Amak, shi ngaran ko ja Anak to, tan shi ngaran ni Ispirito Santo. Jet itod‐iyo pay ira say emin sota inbilin ko son si‐kayo, si‐kato ngoy pati‐en sha. Jet nemnemnem jo ey ẃara‐ak ni olay son si‐kayo, ingkatod pantepos niya dobong.” Kowan nen Jesus.

Jet si Jesus, imesop son si‐kara, jet kowan to ey, “Say inkowan nen Apo Shiyos, si‐kak i mengitoshay ni emin na ẃared dangit tan shiya dobong.

Nem sota anghil, kowan to so nonta bibii ey, “Karekayo ontakot; amtak ey say piyan jon on‐an, si Jesus ja naydansa shi koros. Nem enshid jay, nan‐ongal da! Nemnem jo kari: inkowan to met nontan da. Kalejo, jo asas sota istay inparokolan sha so.

Jet kowan nen Jesus son si‐kara ey, “Karekayo ontakot. Daw kayo, jo ikowan so nonta ira took ja naka ikarin a‐akik ey ondaw ired Galilia, jet ikowan jo ey shiman i asanan sha‐ak so.” Kowan nen Jesus.

Jet esa‐nop ira sota apo ni papashi, tan sota ira eshom ma pangolo ni Hodiyos, jet nantatabtabal ira ni pesing sha. Jet nontan ma, ninemnem sha ey i‐aknan sha ira sota solsharon nanbantay nonta diyang ni ebadeg ga pilak, asan shaka ira bilina, ja kowan sha ey, “Ikowan jo so ni totoo ey sota ira too nen Jesus, dimaw ira di nonta edabin nasjep kayo ni ogip, jet kinibot sha sota bakdang to. Jet no bilang ey amta‐an nen gobinarol iyay, si‐kamiy mismon mekitbal son si‐kato; enshiy jo panshanagan.” Jet sota ira solsharo, indara sota pilak jet pinatiren inkowan sotan na inbilin ni pangolo ni Hodiyos son si‐kara. Jet ingkato niman, sotan i kaikokowan ni eshom ma Hodiyos maypangkep ni inka‐enshi nen Jesus shima diyang.