Popular Bible Verses from Ubwandilo 17

Deildu

Bo Abụlamụ agonịle ifyinja amalōngo mahāno na mana ni fyinja fịhāno na fịna (99), UNTWA alinkunsetukila, alinkummbūla alinkuti: Jo une ne Kyala ugwa maka gōsa, gwendege nanịne kangi ujege mpelelesye.

Lilino po utịkujobịgwaga kangi īngamụ ja Abụlamụ, mma, kujaga gwe Abụlahamụ; papo ngupelịle ukuja gwịse gwa bāndu ba fịkolo fịfịngị.

Nịsakusịbōmba syosa isị mfị̄ngịle ukukubōmbela ugwe pamopēne naba nndujụ̄ngụ lwako, aba bịkwịsaga pānyụma pamyako, mụ̄ngulilo jābo; lolukujaga lufị̄ngo lwa kujako bwịla; ukuti une nịsakujaga ne Kyala gwako kangi Kyala gwa ba nndujụ̄ngụ lwako aba bịsakwịsaga pānyụma pamyako

Kēta nịkufị̄nga ulufị̄ngo nanụngwe, ukuti ugwe kwịsakujaga gwịse gwa fịkolo fị̄ngị.

Kyala alinkummbūla alinkuti: Mma, Sāla unkasịgo jo isakumpāpaga umwana unndumyana, jo gwịse umpege ingamụ ja Ịsịhaka. Nisakulukolekelaga ulufị̄ngo lwangu mmyake; ukuti lujege lwa bwịla bwịla pamopēne naba nndujụ̄ngụ lwake aba bịsakwịsaga kūnyụma kumyake.

Nịsakukupaga ugwe na ba nndujụngụ lwako aba bịsakwịsaga pānyụma pamyako, ikị̄su iki ulịmo lilino ikya mbuhēsya, pamopēne ni kya ba Kanānị kyosa, ukuti kijege kilīngo kya bwịla ịtolo kangi une nịsakujaga ne Kyala gwabo.

Buno buno lelo Abụlahamụ alinkufụgama pāsi, bo ịkusị̄nogona alinkuseka mwene ịtolo alinkuti: Ngīmba nalolị abagị̄le ukupāpa umwana, umụ̄ndu uju akangēle ali ni fyinja imịa jimo 100? Sāla uju lilino ali nifyinja amalōngo mahāno na mana (90), kali abagị̄le ukupāpa lelo?

Po papo Kyala alinkummbūla Abụlahamụ alinkuti: Ukufụma lilino unkasịgo ajilekịle ingamụ ja Salai, ingamụ jāke jo Sāla.

Mwịsa kubụtịgwangako unngubo gwa kusụlo ku kyenị, ukubụtịgwa kwinụ kwịsakujaga kyo kimanyilo kya lufịngo lululu ulu mfị̄ngịle nanụmwe

Lolị nịsakulukolekelaga ulufị̄ngo lwangu mwa Ịsịhaka uju Sāla ịsakukupāpilaga nkyinja iki kịkwịsaga nndapāpāpa.

Mụli aba bịkupāpịgwa mfịkolo fya kūnyụma, bōsa abāna abanyambala aba bafịkịle pa masịku lwele aga bukusị, bịsakubụ̄tịgwaga, nalinga jo uju apāpị̄gwe nnyụ̄mba jāko pamo uju ūlị̄gwe ni ndalama, ukufụma mbāndu abahēsya aba bakaja ba kikolo kyako. Bōsa bo babīli, umpāpigwa nnyụ̄mba jāko na uju ūlị̄gwe ịtolo ni ndalama bịsebabūtịgwege. Buno buno ulufị̄ngo lwangu lwịsakubonekelaga mmịbili gyinụ, ukuja lufị̄ngo lwa bwịla.