Popular Bible Verses from GENESI 17

Deildu

Ya re ge Aborama e le monna wa nywaga e masome a senyane le nywaga e senyane, Morena a iponatša go yena, a bolela le yena a re: Ke nna Modimo Ramaatlaohle; sepela pele ga sefahlogo sa ka, o be e a se nago bosodi.

Bjalo leina la gago e ka se hlwe e eba Aborama; leina la gago e tlo ba Aborahama; ka gobane ke go beile go tlo ba tatago bontši bja ditšhaba.

Ke tlo tiiša kgwerano ya ka le bana ba gago, le bana ba gago ba mehleng e tlago, le ditlogolo tša bona, gore e be kgwerano ya neng le neng, gore ke be Modimo wa gago le wa bana ba gago ba mehleng e tlago.

Nna ge ke gwerana le wena, ke go re o tlo ba tatagobontšhi bja ditšhaba.

Modimo a re: Go tlo ba bjalo. Sara mosadi wa gago ke yena e a tlogo go belegela morwa e o tlogo mo reela leina la Isaka, e ke tlogo tiiša kgwerano ya ka le yena, ya tlo ba kgwerano ya neng le neng, le ya bana ba gagwe ba mehla e tlago.

Mme wena le bana ba gago ba mehleng e tlago, ke tlo le nea naga ye ya madiilelo a gago, naga ka moka ya Kanana, e be ya bona neng le neng; mme nna ke tlo ba Modimo wa bona.

Aborahama a lotšha mme, a sega; mo pelong ya gagwe a re: Afa monna wa nywaga e lekgolo a ka tswalelwa ngwana! Le Sara a ka belega mola e le mosadi wa nywaga e masome a senyane!

Modimo o boletše le Aborahama a re: Sarai mosadi wa gago o se ke wa hlwa o mmitša ka leina la Sarai, ka gobane leina la gagwe ke Sara.

Le bolotšwe, e be leswao la kgwerano ye ke e dirago le lena.

Kgwerano ya ka yona ke e tiišetša Isaka, e a tlogo belegwa ke Sara išago pakeno.

Go lena, mošimanyana ge a na le matšatši a seswai, a bolotšwe, ba batona ka moka, go iša le ditlogolong tša lena, ba ba tswaletšwego gae, le mang le mang e a rekilwego ka tšhelete, e le o šele, e se ngwana wa gago. A a bolotšwe, le ge a tswaletšwe motseng wa gago, le ge o mo rekile ka tšhelete ya gago. Ke mo kgwerano ya ka e tlogo ba mebeleng ya lena, ya ba kgwerano ya neng le neng.