Popular Bible Verses from Ioane 15

Deildu

“Ko au te vine, ko kōtou te au rārā. Ko tei tōpiri mai ki āku nei ē ko au ki aia, ko ia te ka 'ua ma'ata; mē takakē rā kōtou mei āku nei, kāre rava 'e mea e rauka i a kōtou i te rave.

Ko kōtou ka tōpiri mai ki āku nei, ē ko au, ka tōpiri atu au ki a kōtou. Mē kore te rārā e tōpiri ki te vine ra, kāre e rauka kia 'ua mai aia ra, pērā katoa kōtou mē kore kōtou e tōpiri mai ki āku nei.

Mē tōpiri mai kōtou ki āku nei, ē tāku nei au tuatua i te vai mārie'anga ki roto i a kōtou na, e pati 'ua kōtou i tā kōtou e 'inangaro ra, ē ka 'ōronga'ia mai 'oki ki a kōtou.

Kāre 'oki ko kōtou tei 'iki mai i āku, ko au rā tei 'iki i a kōtou, ē tei 'akataka i a kōtou kia 'aere ē kia 'ua, ē kia tinamou rāi tā kōtou 'ua. 'Ei reira, tā kōtou e pati atu ki te Metua ra i roto i tōku ingoa, nāna ia e 'ōronga mai ki a kōtou.

Ko tēia te 'akaperepere ma'ata rava atu: kia tuku tēta'i tangata i tōna ora'anga nō tōna au 'oa.

Te au rārā 'uakore katoa i roto i āku nei, nāna ia e tīpū kē, ē te au rārā 'ua katoa nāna ia e tope kia mā, kia ma'ata 'ua atu te 'ua.

Tēia tāku 'akaue'anga: ka 'akaperepere kōtou tēta'i ki tēta'i, mei āku i 'akaperepere atu i a kōtou.

E 'akakakā'ia 'oki taku Metua mē ma'ata tō kōtou 'ua'anga, nō te mea 'oki, 'e pipi kōtou nāku.

“Ko au te vine mou, ē ko taku Metua te tanu kai.

Ko te tangata tei kore e tōpiri mai ki āku nei, mei te rārā 'akaātea'ia aia ra, ē marō atura; ē ka 'akaputuputu'ia 'oki, titiri'ia atura ki roto i te a'i, pou atura i te kā.

“Kua tuatua 'oki au i tēianei au mea ki a kōtou na, kia vai rāi tōku mareka'anga i roto i a kōtou, ē kia kore e 'ope tō kōtou mareka'anga.

Ka vai rāi kōtou ma te 'akaperepere'ia atu e au mē 'ākono kōtou i tāku au 'akaue'anga, mei āku 'oki i 'ākono i te au 'akaue'anga a taku Metua ra, ē kua vai rāi au ma te 'akaperepere'ia mai e ia.

Ko tēia tāku e 'akaue atu ki a kōtou: e 'akaperepere kōtou tēta'i ki tēta'i.

Nāringa kōtou nō tēianei ao, kua 'inangaro mai tō tēianei ao i tōna 'ua'orāi. Kāre 'oki kōtou nō tēianei ao, ē nāku i 'iki i a kōtou nō roto mai i te ao nei, ko te tumu ia i mākitakita mai ei tō te ao nei i a kōtou.