If you have would like a copy of this version please contact info@davarpartners.org

Sar Old Testament

Bibəl ta Sar̄ © L'Alliance Biblique du Tchad, 2006, 2010.

Jakob oō najə̄ kɔr̄ ngán Laban gə̄ ń ədan̄ na ni na taā yá̰a̰ yā bɔbə̄də́ malang ō, na ənge yá̰a̰ i kə ta kūl̄ yá̰a̰ kənge yā bɔbə̄də́ ō ní. Ni əndā ma̰ȳ dɔ kum Laban anī, a̰a̰ kadə̄ dɔ kumən to tītə̄ kə́ kété seneé alé. Anī Kɔ́ɔ̄ɓē əda Jakob na kə tél kə aw̄ gogə́ dɔ nang yā bɔbə̄n gə̄ tə́, ɓē kojən tə́, na ni na i seneé naā tə́.
Jakob ɓāŕ Rasel nin̄ kə Leaá, adə̄ reēn̄ gōn tə́ bembeé loo ń yá̰a̰ kul̄ yān gə̄ i tū tə́ tə́ ní, ba ədadə́ na:
M-á̰a̰ dɔ kum bɔbə̄sí to tītə̄ kə́ kété seḿ alé, banī Nə́ɓā yā bɔbə́ḿ i seḿ. Sḭḭ̄ kɔ́ gə̄ ī-gerī kadə̄ m̄-rāā kəla m-ādə̄ bɔbə̄sí i kə tɔ́gə́ḿ malang. Ba bɔbə̄sí lurəm̄, tūr̄ gír kəgā yāḿ nja kutə, tā ba Nə́ɓā adə̄n ta róbə rāā yá̰á̰ kə́ gōtə́ aĺ seḿ alé. Ré bɔbə̄sí əda na kəgā yāḿ na i dā̰ kə́ rāā ɓál gə̄ anī, kó̰o̰ batə̄ gə̄ ojən̄ i batə̄ kə́ rāā ɓál gə̄ malang, ba ré əda na kəgā yāḿ na i dā̰ kə́ yḛrḛ̄ gə̄ anī, kó̰o̰ batə̄ gə̄ ojən̄ i ngán batə̄ kə́ yḛrḛ̄ gə̄ malang. I Nə́ɓā n taā yá̰a̰ kul̄ yā bɔbə̄sí adə̄m̄ ní. Dan ń dā̰ gə̄ a tálə̄n̄ naā ní, nī rāām̄ adə̄ m-á̰a̰ kadə̄ bal batə̄ gə̄ kə bal bə̄yā̰ gə̄ ń a tálə̄n̄ kə kó̰o̰ gə̄ ní i kə́ yḛrḛ̄ gə̄ ō, kə́ ndang gə̄ ō. Nge kəla yā Nə́ɓā reē dɔḿ tə́ kə nīí ɓārə́m̄ na: Jakob! Anī m̄-ndigən na: Mā n toó! Anī ədam̄ na: Á̰a̰ bal batə̄ gə̄ kə bal bə̄yā̰ gə̄ ń ra a tálə̄n̄ kə́ kó̰o̰ gə̄ ní i kə́ yḛrḛ̄ gə̄ ō, kə́ gán̄g ɓāl̄ gə̄ ō, kə́ ndang gə̄ ō. Tɔdɔ̄ yá̰a̰ malang ń Laban rāā seí ní m-á̰a̰ā̰. Mā i Nə́ɓā ń ndɔ̄bī Betel, loo ń úr yibə̄ dɔ mbal̄ tə́ ɔ̄rəń kamə̄n ō, ə̄niń ndūí tū tə́ ādə̄m̄ ō ní. Ń toō tā a ī-teē kɔ̄ɔ́ kem ɓē ń toō tə́, ī-tél āw̄ ɓē kojií tə́.
Rasel nin̄ kə Leaá tél ədan̄ Jakob na yá̰a̰ ndəbā yādə́ kə́ jī bɔbə̄də́ tə́ na gətóo. Ni na rāādə́ na i tə̄rā gə̄ tə́, na igə sedə́ ō, nar ń kadə̄ téləń adə̄də́ ní na əsa kɔ̄ɔ́ ō. Yá̰a̰ kənge ń Nə́ɓā taā jī bɔbə̄də́ tə́ malang kɔ̄ɔ́ ní na i yādə́ ō, yā ngáńdə́ gə̄ ō. Ní, kə rāā yá̰a̰ malang ń Nə́ɓā ədan ní.
Jakob ḭḭ dɔɔ́ ɔy ngánən gə̄ kə nə̄yá̰n gə̄ dɔ jámbal gə̄ tə́. Ni ɔy yá̰a̰ kul̄ yān gə̄ ō, yá̰a̰ gə̄ ń ni ənge Mesopotami ní ō malang, ba aw̄ kə̄ rɔ̄ bɔbə̄n Isaak tə́ dɔ nang kə́ Kanaan tə́. Laban aw̄ kəja bḭḭ̄ batə̄ yān gə̄ tə́, anī Rasel ɓogə ɓesə̄ terapim yān gə̄ gotən tə́. Jakob gól̄ Laban kə́ Aram tɔdɔ̄ ni ədan najə̄ ka̰ȳn alé. Ni a̰ȳ kə yá̰a̰ yān gēé malang, teē bā ba aw̄ kumən sɔɔ̄ mbal̄ kə́ Galaad gə̄.
Kə ndɔ̄ kə́ nge ko̰ mətá anī, ədan̄ Laban na Jakob na a̰ȳ kɔ̄ɔ́. Anī ni ɔy ngákó̰o̰n gə̄ ba sōngə̄n̄ gōn ndɔ̄ sīrí, aw̄ əngenən̄ dan mbal̄ kə́ Galaad gə̄ tə́. Banī Nə́ɓā reē dɔ Laban tə́ kə nīí ndɔ̄ɔ́, ədan na kə lōō rāā yá̰á̰ kógə̄ḿ kə Jakobó.
Laban aw̄ ənge Jakob dan mbal̄ kə́ Galaad gə̄ tə́ ń udə kújə tandā yān tū tə́ ní. Laban nin̄ kə ngákó̰o̰n gēé reē udən̄ yādə́ loo ní tə́ ō. Laban əda Jakob na:
Ī-rāā i rí kə́ beé n toó? Ī-gólə̄m̄ ō, āw̄ kə ngánə́ḿ kə́ dəyá̰ gēé tītə̄ kə́ ə́hɔ́də́ i ta rɔ̄ɔ̄ tə́ beé ō, i tām̄ rí tə́? Ā̰ȳ loo ɓɔ̄ɔ̄ rɔ̄ tə́ jəke i tām̄ rí tə́? Ī-gólə̄m̄ beé i tām̄ rí tə́? Ədam̄ ādə̄ m̄-ger̄ gō aĺ i tām̄ rí tə́? Nə́ngē tə́ ə́dam̄ i mbée a, m-ā m̄-dānī kə pā rɔ̄nelēé ō, kə kɔdɔɔ́ ō, kə kəndeé ō. Ba ḭ̄ ādə̄m̄ ta róbə kəhɔ ngánə́ḿ kə́ dəyá̰ gə̄ kə ngán kaaḿ gə̄ kə̄ rɔ̄ḿ tə́ alé. Kə́ ɓōó ń toō ī-rāā yá̰a̰ i tītə̄ de kə́ kur̄ dɔn gətóo. M-ásə rāāsí yá̰á̰ kə́ tōr̄ ɓá tā ba Nə́ɓā yā bɔbí ədam̄ ndɔ̄ɔ́ laā na kə m̄-lōō rāā yá̰á̰ kógə̄ḿ seí. Majə, ɓō kaw̄ ɓē bɔbí rāāī ngá̰ý ní āw̄, ba ī-ɓogə ɓesə̄ gə̄ ń i nə́ɓā yāḿ gə̄ ní i tām̄ rí tə́?
Jakob tél əda Laban na:
m̄-ɓōĺ najə̄ kadə̄ ī-taā ngání kə́ dəyá̰ gə̄ jīḿ tə́ kɔ̄ɔ́. Ba deē ń ā ə́nge ɓesə̄ yāí gə̄ jīn tə́ ní, ādə̄ kɔ́ɔ̄ oy! Ī-gó̰ō̰ yá̰a̰ yāí, ɔ́y dan yāḿ gə̄ tə́ ta kum ngákó̰ó̰jí gə̄ tə́.
Jakob ger̄ kadə̄ Rasel ɓogə ɓesə̄ terapim gə̄ ní alé.
Laban udə kem kújə yā Jakob tə́ ō, yā Lea tə́ ō, yā ngé kəla kə́ dəyá̰ kə́ jōó gə̄ tə́ ō, ba ənge yá̰á̰ kógə̄ḿ alé. Ni teē kem kújə yā Lea tə́ udə kújə yā Rasel tə́. Rasel ɔy ɓesə̄ terapim gə̄ ní ɓōkə́ gíŕ síŕdí gidə jámbal tə́ ba ndi dɔ tə́. Laban gó̰ō̰ kem kújə malang ba ənge yá̰á̰ kógə̄ḿ alé. Rasel əda bɔbə̄n na:
Bɔbə́ḿ, ré m-ḭ́ḭ dɔɔ́ noí tə́ aĺ anī ādə̄ wōn̄g rāāī seḿ alé, tɔdɔ̄ yá̰á̰ ń a rāā dəyá̰ gə̄ ní rāām̄.
Laban sāā ɓesə̄ terapim gə̄ ní sétə́, ənge alé. Wōn̄g rāā Jakob adə̄ kɔ̄l̄ seneé ədan na:
Yá̰á̰ kə́ gōtə́ aĺ ń m̄-rāā ní i rí? Yá̰á̰ kə́ majaĺ ń m̄-rāā ní i rí á ī-sōngəń gōḿ kə ngangá ngá̰ý ní? Dan ń ī-ndúr̄ kem yá̰a̰ yāḿ gə̄ malang ní ə́nge i rí yāí? Ré ə́ngé yá̰a̰ anī ī-teēń kə̄ laā ta kum ngákó̰ó̰ḿ gə̄ tə́ ō, ta kum ngákó̰ó̰í gə̄ tə́ ō, ādə̄ nin̄ tá gāngə̄n̄ sarya kə́ dɔ dáńjí tə́ seí jōó. m̄-rāā ɓāl̄ kutə jōó ɓēé looí ní, kó̰o̰ batə̄ yāí gə̄ ō, kó̰o̰ bə̄yā̰ yāí gə̄ ō, tɔ́rə̄n̄ ngán gə̄ alé. M-ə́sa bal batə̄ kə́ dan yá̰a̰ kul̄ yāí gə̄ tə́ aĺ ō. m̄-tél kə yá̰a̰ kul̄ kə́ dā̰ əhɔn m-āwń m-ādī alé, mə̄kɔ́ m-ādə̄ yāḿ kum gotə. Ká ɓogən̄ yá̰a̰ kul̄ jīḿ tə́ i ndɔ̄ɔ́ aláa i kadaá gə̄gē anī, ḭ̄ ā ī-dəjem̄ i kə̄rā. Mbang ɔsəm̄ kadaá ō, kūl̄ o̰o̰m̄ ndɔ̄ɔ́ ō, m-á̰a̰ loo ɓīī aĺ ō, m̄-rāā ɓāl̄ kutə jōó ɓēé looí ō, m̄-rāā kəla m-ādī gíŕ ngání kə́ dəyá̰ kə́ jōó gə̄ tə́ ɓāl̄ kutə gidə i sɔ́ ō, m̄-rāā kəla ɓāl̄ mehḛ́ gír yá̰a̰ kul̄ gə̄ tə́ ō, ba ī-tūr̄ gír kəgā yāḿ nja kutə. Ré Nə́ɓā yā kaaḿ Abəraham, nge ń Isaak a ɓōlə́n ní i seḿ aĺ anī, ā ī-tə̄ɓām̄ i jīḿ karī. Nə́ɓā a̰a̰ tápə̄ yāḿ ō, a̰a̰ kəla ń m̄-rāā kə jīḿ ní ō, adə̄ ndɔ̄ɔ́ laā ni gān̄g i sarya kə́ majə tām̄ yāḿ tə́.
Laban tél əda Jakob na:
Dəyá̰ gə̄ ń noō i ngánə́ḿ gə̄, ngáńdə́ gə̄ i ngán kaaḿ gə̄, yá̰a̰ kul̄ gə̄ ń toō i yá̰a̰ kul̄ yāḿ gə̄, yá̰á̰ ń á̰a̰ā̰ malang toó i yá̰a̰ yāḿ. Ba ɓōólaā yá̰á̰ ń m-ásə rāā tām̄ yā ngánə́ḿ kə́ dəyá̰ gə̄ tə́ ō, tām̄ yā ngán gə̄ ń ojən̄ tə́ ō ní i rí? Ī-reē jə-rāā madə̄ naā ba ādə̄ yá̰á̰ kógə̄ḿ i kə́ kum tə́ dɔ dáńjí tə́ seí.
Jakob un mbal̄ kógə̄ḿ udə dɔɔ́ kadə̄ i yá̰a̰ kəga kem dɔ najə̄ tə́. Gō tə́ anī əda de gə̄ yān gə̄ na kə ɔyn̄ kūbə̄rū mbal̄ gə̄. Nin̄ ɔyn̄ kánə̄n̄ dɔ naā tə́, ba əsan̄ yá̰a̰ dɔ tə́ malang. Laban əndā rī mbal̄ kə́ kán̄ dɔ naā tə́ ní na i Yegar Sahaduta, ba Jakob tá əndā rīn na i Galed. Laban əda na ɓōólaā mbal̄ kə́ kán̄ dɔ naā tə́ ń toō i yá̰á̰ kə́ kum tə́ dɔ dáńdə́ nin̄ kə Jakobó tə́. I tām̄ najə̄ ń noō tə́ n əndānəń rīn na i Galed ní. Əndān̄ rīn na i Misəpa ō, kumən na i loo ngɔ̄m̄ loo, tɔdɔ̄ Laban əda ɓáý to̰ na:
Ādə̄ Kɔ́ɔ̄ɓē əndā kumən gōí ḭ̄ tə́ ō, gōḿ mā tə́ ō, dan ń j-a j-a̰a̰ń naā to̰ aĺ ní. Ré ī-rāā ngánə́ḿ kə́ dəyá̰ gə̄ majaĺ ō, ī-táā dəyá̰ kə́ rang gə̄ ɓáý to̰ ō anī, i deē ndul n i kə́ kum tə́ yājí ní alé, ba i Nə́ɓā n i kə́ kum tə́ yājí ní.
Laban əda Jakob na:
Á̰a̰ kūbə̄rū mbal̄ kə́ kán̄ dɔ naā tə́ ń to dɔ dáńjí tə́ toō ō, mbal̄ kə́ kudə kə nja kə́ dɔɔ́ yā kəgań kem dɔ najə̄ tə́ ń m-údə dɔ dáńjí tə́ seí toō ō. Nin̄ i kə́ kum tə́ yājí gə̄ kadə̄ m-ā m̄-mān̄ dɔ tə́ yā kaw̄ rāāiń yá̰á̰ kə́ majaĺ aĺ ō, ḭ̄ ā ī-mān̄ dɔ tə́ yā reē rāām̄ yá̰á̰ kə́ to kum kaȳ aĺ ō. Ādə̄ Nə́ɓā yā Abəraham ō, Nə́ɓā yā Nahor ō, gāngə̄n̄ sarya kə́ dɔ dáńjí tə́.
Loo ń noō tə́ Jakob túbə kə rī Nə́ɓā ń bɔbə̄n Isaak a ɓōlə́n ní. Gō tə́ anī ni-*tun̄ yá̰a̰ adə̄ Nə́ɓā dɔ mbalá ba mēr̄ ngákó̰o̰n gə̄ kəsa yá̰a̰ seneé. Nin̄ əsan̄ yá̰a̰ ō, ɓīīn̄ kə̄ dɔ mbalá noō ō.

Listen to TA KƏLA 31