Mewari 2010-2017 NLCI; Non-Drama (NT)

Mewari 2010-2017 NLCI; Drama (NT)

ईंका केड़े ईसू नगर-नगर अन गामाँ-गामाँ में परमेसर का राज को हव हमच्यार हुणाता तका फरबा लागा। अन वीं थरप्या तका बारा चेला भी वाँका हाते हा। अन हुगली आत्मा अन मांदकीऊँ हव वी तकी नरी लुगायाँ भी वाँका हाते ही। वाँका मूँ हात हुगली आत्माऊँ हव वी तकी मरियम मगदलीनी नाम की एक लुगई भी ही। अन हेरोदेस का दरबार का एक अदिकारी खुजा की लुगई योअन्ना अन सुसन्ना अन घणी हारी दूजी लुगायाँ ही। ईं आपणी धन-दोलतऊँ ईसू अन वाँका चेला की सेवा-चाकरी करती ही।


जद्याँ नगर-नगर का लोग-बाग वाँका नके आरिया अन नरई मनक भेळा वेग्या हा, तो ईसू वाँकाऊँ केणीऊँ आ बाताँ किदी के, “एक दाण एक करसाण हो, वो बीज बोवा ने ग्यो। तो कई व्यो बोती दाण थोड़ाक बीज गेला का कनारे पड़या, ज्यो घसरई ग्या, अन उड़बावाळा जीव-जनावर वाँने चुगग्या। अन थोड़ाक बीज काँकरा में पड़्या, वीं उग्या पण गारो ने मलबाऊँ वीं हूँक ग्या। थोड़ाक बीज झाड़क्याँ में पड़्या अन झाड़क्याँ हाते–हाते वदन वाँने दबा दिदा। अन थोड़ाक बीज हव जगाँ में पड़्या, अन वीं उग्या अन हो गुणा फळ लाया।” यो केन वणा ज्योरऊँ क्यो, “जिंके हुणबा का वाते कान्दड़ा हे, वीं हुणे।”


पछे चेला ईसुऊँ पूँछ्यो, “अणी केणी को अरत कई हे?”
ईसू वाँने क्यो, “थाँने परमेसर का राज का भेद ने हमजबा की हमज दिदी गी हे, पण दूजाँ ने ईं बात ने केणी में हुणई जावे हे के,
“‘वीं देकता तका भी ने देके
अन हूणता तका भी ने हुणे।’”


अणी केणी को अरत यो हे, बीज तो परमेसर की वाणी हे। ज्यो बीज गेला का कनारा पे पड़्या, ईं वीं मनक हे के, जद्याँ वणा बचन हुण्या, तद्याँ सेतान आन वणा का मन मेंऊँ वणा बचनाँ ने निकाळ लेवे हे, ताँके वी विस्वास ने कर सके अन बंचाया ने जावे। काँकरा वाळी जगाँ का बीज वणा मनकाँ का जस्यान हे के, जद्याँ वी हुणे, तो वी आणन्द का हाते परमेसर की वाणी ने माने हे। पण वीं जड़ ने पकड़वा का मस थोड़ीक दाण विस्वास करे हे अन परक की दाण वी भाग जावे हे। अन ज्यो बीज झाड़क्याँ में पड़्या वी वणी मनक का जस्यान हे, जी बचन माने तो हे, पण वीं चन्ता-फिकर अन मो-माया अन जीवन का भोग-विलास में दब जावे हे अन वाँके फळ भी ने पाके हे। पण हव जगाँ वाया तका बीज वी मनक का जस्यान हे, जी बचन हुणे वी आपणाँ हव अन हाँचा मन में हमाळी राके अन हमेस्यान वींके जस्यानीस चालन वी हव फळ लावे हे।


“कुई भी मनक दिवाण्या ने ठामड़ा का रेटे ने मेले हे, अन नेई माचा का रेटे राके हे, पण वींने आल्याँ में मेले हे ताँके में आबावाळा ने उजितो मले। कई भी छाने ने हे ज्यो परगट ने वेई। अन ने कई ढाक्यो तको हे ज्यो चोड़े ने वेई। ईं वाते ध्यानऊँ हुणो के, थाँ कस्यान हुणरिया हो? जणी का नके हे, वींने ओरू भी दिदो जाई। अन जिंका नके ने हे, वींकाऊँ वो भी ले लिदो जाई, जिंने वीं आपणाँ खुद को हमजे हे।”


तद्याँ ईसू की बई अन भई वाँका नके आया, पण भीड़ का मस वीं वाँका नके ने जा सक्या। ईं वाते कणी ईसू ने क्यो के, “थाँकी बई अन थाँका भई बारणे ऊबा हे थाँकाऊँ मलणा छारिया हे।”
पण ईसू वींने जवाब दिदो के, “मारी बई अन मारा भई तो ईं हे, ज्यो परमेसर की बात ने हुणे हे अन माने हे।”


पसे एक दन अस्यो वे के, वीं आपणाँ चेला का हाते नाव में बेट्या अन वाँकाऊँ क्यो के, “आवो, समन्द का पेली पाल्ड़े चाला, तो वीं चाल पड़्या।” पण जद्याँ नाव चालरी ही, जद्याँ ईसू हूँ ग्या हा। तद्याँ अणाचेत की समन्द में ज्योरऊँ डूँज चालबा लागी, अन नाव में पाणी भरबा लागग्यो अन वी घणी अबकी टेम में आग्या। जद्याँ वी ईसू नके आया अन वाँने नींदऊँ जगान केबा लागा, “हो परबुजी आपीं डुबरिया हा।”
तद्याँ वी उठा वेन डूँज अन लेराँ ने हाँको करन तापड़ी अन वी रकगी अन च्यारूँमेर सान्ती वेगी। अन वणा वाँकाऊँ क्यो, “थाँको विस्वास कटे हो?”
पण वीं दरपग्या अन अचम्बा में आग्या अन एक-दूजाऊँ केबा लागा, “ईं कूण हे? ज्यो डूँज अन पाणी ने भी आग्या देवे हे, अन वी अणाको केणो माने हे।”


पसे वीं नावऊँ समन्द ने पार करन गरासेनिया का परदेस में पूगा ज्यो गलील का समन्द के पेले पाल्ड़े हो। जद्याँ ईसू कनारे उतरियो, तो वणी नगर को एक मनक वाँकाऊँ मल्यो, जिंमें हुगली आत्मा ही अन वो घणा दनाऊँ नागो-पुगो फरतो हो वो घरे ने रेतो हो, पण कबराँ मेंईस रेतो हो। अन जद्याँ मनक वींका हात-पगाँ ने हाँकळा अन बेड़्याऊँ बांदता हा, तो वो वणा ने तोड़ नाकतो हो, अन हुगली आत्मा वींने हुन्ना काकड़ में ले जाती ही। वो ईसू ने देकन हाको करबा लागो अन धोग देन केबा लागो, “हो परम-परदान परमेसर का बेटा ईसू, मने थाँकाऊँ कई लेणो-देणो। मूँ अरज करूँ हूँ, मने दुक मती दो।” काँके, ईसू वणी हुगली आत्माने वणी मनक मेंऊँ निकळबा की आग्या दे रिया हा। ईसू वींने पूँछ्यो, “थारो नाम कई हे?” वणी क्यो, “मारो नाम टोळी हे।” काँके नरी हुगली आत्मा वींका में ही। अन वणी ईसुऊँ अरज किदी के, माने पाताळ में जावा को हुकम मती दो।
वीं टेम में मंगरा का माते हूँरा की एक रेवड़ चररी ही। ईं वाते वणा हुगली आत्मा ईसुऊँ अरज किदी के, वो वाँने हूँरा में जाबा दे। तो ईसू वाँने हूँरा में जाबा की हाँ कर दिदी। तद्याँ हुगली आत्मा की टोळी वणी मनकऊँ निकळन हूँरा की रेवड़ में गी अन वाँ घाटी मेंऊँ पड़ता-गुड़ता तका भागन समन्द में जान डुबगी अन मरगी। गवाळ ज्यो व्यो हो, वो देकन भागग्या अन वणा नगर अन गामाँ में जान आ आक्याँ देकी बात बतई दिदी। अन लोग-बाग ज्यो व्यो हो वींने देकबा वाते आया, अन ईसू का नके आन वणी मनकऊँ हुगली आत्मा निकळी ही, वींने ईसू जी का चरणा बेट्यो तको अन वणी मनक गाबा पेरिया तका हा अन वींको दिमाग सई वेग्यो हो। यो देकन वीं मनक दरपग्या। अन जणा यो देक्यो हो वणा वाँने बतायो के, वो हुगली आत्मा धस्यी तकी मनक कस्यान हव व्यो। तद्याँ गरासेनिया परदेस का अड़े-भड़े का हाराई लोगाँ ईसुऊँ अरज किदी के, माकाँ अटूँ परोजा। काँके वीं घणा दरपग्या हा, ईं वाते वीं नाव में बेटन पाच्छा जाबा लागा। तद्याँ जणी मनकऊँ हुगली आत्मा निकळी ही वणी ईसुऊँ अरज किदी के, “मने भी थाँका हाते ले जावो।”
पण ईसू जी वींने यो केता तका गेले किदो के, “आपणाँ घरे जा अन ज्यो कई मोटो काम परमेसर थाँरा वाते किदो हे, वो बता।” ईं वाते वो पाछो जान, ज्यो कई ईसू वींका हाते किदो, वींने नगर में हाराई ने केतो रियो।


ईंका केड़े जद्याँ ईसू पाच्छा पेला पाल्डेऊँ उले पाल्डे आया तो एक घणी भीड़ वाँके आवभगत का वाते अई, काँके वीं वाँकी वाट नाळरिया हा। अन वटे याईर नाम को मनक आयो, ज्यो परातना घर को हाकम हो। अन वो ईसू का पगा में पड़न अरज करबा लागो के, “मारे घरे आवो।” काँके वींके एकीस छोरी ही ज्या बारा वर की ही। अन वाँ मरबा के जस्यान वेरी ही।
जद्याँ ईसू वींका घरे जारिया हा, तद्याँ मनक वाँके ऊपरे च्यारूँमेरऊँ पड़बा लागा। अन वाँका मूँ एक लुगई ही जिंके बारा सालऊँ परदा को रोग हो, अन जणी आपणी हारी धन-दोलत वेदऊँ एलाज करबा में खरच कर नाकी, तद्याँ भी वींके आराम ने पड़्यो हो। वाँ लुगई ईसू का पाच्छे आन वाँके पेरिया तका अंगरखा की कोर के हात अड़ायो अन तरत वींके परदा को रोग हव वेग्यो। अतराक में ईसू जी क्यो, “मारे कणी हात अड़ायो हे?” तद्याँ हाराई नटबा लागा, तो पतरस अन वाँका हण्डाळ्याँ वाँकाऊँ क्यो, “हो मालिक, थाँने तो भीड़ च्यारूँमेरऊँ गेर मेल्या हे अन हाराई थाँके ऊपरे पड़रिया हे।”
पण ईसू क्यो, “कणी तो मारे हात अड़ायो हे, मने खबर पड़ी हे के, मारा मेंऊँ तागत निकळी हे।” जद्याँ वणी लगई देक्यो के, मूँ भाग तो ने सकूँ हूँ, तो वाँ धूजती तकी ईसू का हामे अई अन वाँके पगाँ में पड़न हाराई लोगाँ का हामे बतायो के, में किंका वाते अणाके हात अड़ायो अन कस्यान फटाकऊँ हव वेगी। ईसू वणी लुगईऊँ क्यो, “हे बेटी थाँरे विस्वासईस थने हव किदी हे, राजी खुसीऊँ परी जा।”
ईसू यो केईसरिया हा अन परातना घर का हाकम का घरऊँ कुई वटे आयो अन हाकम ने क्यो, “थारी बेटी मरगी हे, अबे गरुजी ने दुक मती दे।”
ईसू जी यो हुण लिदो अन वणीऊँ क्यो, “दरपे मती, बेस विस्वास राक, तो वा बंच जाई।”
जद्याँ ईसू घर में आया तो वणा पतरस, यहुन्ना, याकूब अन छोरी का बई-बापू ने छोड़न दूजो कणी ने आपणाँ हाते घर में ने आबा दिदा। अन हाराई वींका वाते रो-रोन छाती-माता कुटरिया हा, पण ईसू वाँकाऊँ क्यो, “रोवो मती, वाँ मरी ने हे बेस हूँती हे।”
अणी बातऊँ मनक वाँकी मजाक करबा लागा। काँके लोग जाणता हा के, वाँ मरगी हे। पण ईसू वींको हात पकड़्यो अन जोरऊँ क्यो, “हे बेटी उटी वे।” तद्याँ वींको जीव पाछो अई ग्यो अन वाँ तरत उटी वेगी, पछे ईसू वींका बई-बापूऊँ क्यो, “ईंने खाबा वाते कई दो।” अणीऊँ वींका बई-बापू ने घणो अचम्बो व्यो, पण ईसू वाँने आग्या दिदी के, ज्यो कई व्यो हे, वो किंने केज्यो मती।

Listen to लूका 8