If you have would like a copy of this version please contact info@davarpartners.org

Kulvi New Testament, CC-BY-SA-4.0, The Love Fellowship (Text) Kulvi New Testament Audio Bible, CC-BY-SA-4.0, Davar Partners International, 2022 (Audio)

Kulvi New Testament

This work is licensed under Creative Commons Attribution-ShareAlike 4.0 License.

एक रोज़ यीशुऐ आपणै बारा च़ेले आपु हागै शाधै होर तिन्हां बै बुरी आत्मा पैंधै हक धिना, कि तिन्हां बै खोलै होर लोकै री हर किस्मै री बीमारी होर कमज़ोरी बै दूर केरलै। होर तिन्हां बारा प्रेरिता रै नाँ ऐ सी; शमौन ज़ौसा बै पतरस बोला सी तेइरा भाई अन्द्रियास, जब्दी रा बेटा याकूब होर तेइरा भाई यूहन्ना। फिलिप्पुस, बरतुलमै, थौमा, च़ुँगी लेणू आल़ा मत्ती, हलफई रै दुई बेटै याकूब होर तद्दै। शमौन कनानी, यहूदा इस्करियोती ज़ुण यीशु बै ढौकणै द्या सा।

इन्हां बारा च़ेले बै यीशुऐ ऐ हुक्म धिना, कि तुसै होरी ज़ाति रै बिच़ा न हेरीत् ज़ाँदै, होर सामरी रै ग्राँ बै हेरीत् ज़ाँदै। पर राठैंदै इस्राएली लोकै रै बीच़ा न ज़ाईत्। ज़ाँदै-ज़ाँदै ऐ प्रचार केरीत् कि स्वर्गा रा राज्य नेड़ आऊ सा। बीमार लोका बै ठीक केरा, मूँऐंदै बै ज़िन्दै केरा, कोढ़ी बै ठीक केरा, लोकै री बुरी आत्मा खोली। तुसाबै परमेश्वरा न मुफ्ती न मिलू सा ता मुफ्ती न दैआत्।
“आपु हागै सुना, रूपा होर ताँबा हेरीत् रखदै। बौतै री तैंईंयैं न झ़ोल़ा, न दूई कुरतै, न दूई ज़ोड़ी बूट होर न शोठा हेरीत् पान्दै, किबैकि मज़दूरा बै तेइरी मज़दूरी मिलणी ज़रूरी सी।”
“ज़ुणी भी नगरा होर ग्राँ न ज़ालै ता पता लात् कि तौखै कुण काबिल सा? होर ज़ैबै तैंईंयैं तौखै न नेइ निकलै, तेई घौरा न रौहित् होर तौखै न विदा होईत्। घौरा आँध्रै ज़ाँन्दी घेरै तेई घौरा बै होर तौखै रौहणु आल़ै लोका बै आशीष देईत्। तेई घौरा न अगर आशीष पाणै लायक कोई होला ता तुसरी आशीष तिन्हां पैंधै ठहरनी नी ता तेसा आशीष तुसा हागै वापस ऐणा। ज़ुण तुसाबै ग्रहण नी केरला होर तुसरी गैला बै नी शुणला ता तेई ग्राँ न निकलदी घेरै आपणै ज़ोंघै रै धूड़ै बै ठुड़केइत्। हांऊँ तुसाबै सच़ बोला सा, कि न्याय रै रोज़ा न तेई ग्राँ री हालत सदोम होर अमोरा देशा न भी बुरी होंणी।”

“शुणा, हांऊँ तुसाबै भेड़ा सांही भेड़ियै रै बिच़ा न भेज़ा सा। तुसै साँपा (कीड़ै) सांही होशियार होर कबूतरा सांही भोलै बैणा। पर लोका न साबधान रौहा, किबैकि तिन्हां तुसै महासभा न खड़ै केरनै होर आपणी आराधनालय न कोड़ै मारनै। तुसा मेरै गुआह होंणै री तैंईंयैं राज्यपाला होर राज़ै सामनै तिन्हां पैंधै होर होरी ज़ाति रै लोका सामनै पजाइणै। ज़ैबै ते तुसाबै ढोकणै द्यालै ता चिन्ता हेरित्त् केरदै कि आसा कि केरना होर कि ढुणना किबैकि ज़ो किछ़ तुसा ढुणना होला सौ तेसा घड़ियै तुसाबै दसिणा। किबैकि बोलणु आल़ै तुसै नी होंणै पर परमेश्वरै री आत्मा तुसा आँध्रै न बोलणा।”
“भाई-बैहणा दुज़ै भाई-बैहणा बै धोखा देणा। बेटै आपणै बापू बै धोखा देणा होर तिन्हरी औलादा बी आपणै आमा-बापू सैंघै विश्वासघात केरना। मेरी बजहा न सैभी लोका तुसा सैंघै नफरत केरनी पर ज़ुण आखरी तैंईंयैं धीरज रखला तेइयै मुक्ति पाणी। ज़ैबै ते तुसाबै एकी ग्राँ न सतालै ता तुसै दुज़ै ग्राँ बै भैगेईत्। हांऊँ तुसाबै सच़ बोला सा, तुसै इस्राएलै रै सैभी शैहरा न आपणा कोम मांहणु रै बेटै रै ऐणै न पैहलै पूरा नैंई केरी सकदै।”
“च़ेले आपणै गुरू न बड़ा नी होंदा होर न नोकर आपणै मालका न। च़ेले रा गुरू रै बराबर, होंणा होर नोकरा रा आपणै मालका रै बराबर होणाऐ बड़ी गैल सा: ज़ैबै तै घौरा रै मालका बै ही शैताना बोला ती, ता तेइरै घौरा रै लोका सैंघै होर भी बुरा वर्ताव केरना।”

पर तिन्हां न मतेईत् डौरदै किबैकि किछ़ भी गैला छुपीदी ती, एक रोज़ सैभी लोका ते गैला ज़ाणनी, होर ज़ो किछ़ छुपीदी सा एक रोज़ सैभ लोका ते पूरै प्याशै न हेरणा। ज़ो हांऊँ तुसाबै निहारै न बोला सा तेइबै तुसै प्याशै न बोला होर ज़ो तुसै कोनै न सुल्हे शुणी सा तेइबै तुसै उथड़ी ज़ैगा न प्रचार केरा। ज़ो देही रा नाश केरा सी, पर आत्मा रा नी, तिन्हां न मता डौरदै पर तेईन डौरा ज़ुण आत्मा होर देह दुही बै नरका न नाश केरी सका सा। च़िड़ू रै बारै न सोच़ा तिन्हरी कीमत कम सा कि तुसै एक ढैबुऐ न दूई च़िड़ू बै खरीदी सका सी। पर ज़ैबै कोई च़िड़ू ज़मीना बै औल़ा सा होर मौरा सा, तुसरा परमेश्वर ज़ाणा सा, कि सौ हर चीज़ै री परवाह केरा सा। औखै तैंईंयैं कि तुसरै च़ोह्ढ़ै रै बाल़ बी गिणुऐ दै सी। तुसै डौरदै मता तुसै बोहू च़िड़ू न बी ज़ादा कीमती सी।

ज़ुण बोहू मांहणु सामनै मुँभै मैना सा, तेइबै मूँ बी सौ आपणै स्वर्गीय बापू रै सामनै मनणा। पर ज़ुण मांहणु सामनै मेरा नाँह केरा सा तेइबै मूँ भी आपणै स्वर्गीय बापू रै सामनै तेइरा नाँह केरना।

“ऐ मता बूझ़दै कि हांऊँ धौरती पैंधै मेल करांदा आऊ सा; हांऊँ मेल करांदा नी पर तलवार च़लांदा आऊ सा।” “हांऊँ ता आऊ सा,
बेटै बै बापू न,
बेटी बै तेसरी आमा न,
होर नूशा बै तेसरी शौशू न अलग केरदा आऊ सा।
मांहणु रै बैइरी तिन्हरै घौरकै मांहणु होंणै।”
“ज़ुण आमा-बापू बै मूँ न ज़ादा झ़ुरी डाह सा होर ज़ुण आपणै बेटै बेटी बै मूँ न ज़ादा झ़ुरी डाह सा सौ मेरै काबिल नी ऑथि। आपणै दु:ख सौहणै री तैंईंयैं त्यार रौहला, सौ मेरा च़ेला बणी सका सा। ज़ुण आपणै प्राण बच़ाणा च़ाहला तेई सौ खोणा होर ज़ुण मेरी तैंईंयैं आपणै प्राणा बै खोआ सा तेई ते बच़ाणै।

“ज़ुण तुसाबै ग्रहण केरा सा सौ मुँभै ग्रहण केरा सा होर ज़ो मुँभै ग्रहण केरा सा सौ मेरै भेज़णु आल़ै बै ग्रहण केरा सा। ज़ुण भविष्यवाणी केरनु आल़ा बै भविष्यवाणी केरनु आल़ा ज़ाणिया ग्रहण केरा सा तेइबै भविष्यवाणी केरनु आल़ा सांही ईनाम मिलणा होर ज़ुण धर्मी बै धर्मी ज़ाणिया ग्रहण केरा सा तेइबै धर्मी सांही ईनाम मिलणा। ज़ुण इन्हां हौछ़ै मौंझ़ै एकी बै भी मेरा च़ेला ज़ाणिया सिर्फ़ एक गलास ठँडा पाणी पियाला हांऊँ तुसाबै बोला सा तेई आपणा ईनाम कौसी रीतियै भी नी खोणा।”

Listen to मत्ती 10