Text: © The Bible Society in Liberia, 1999 Audio: ℗ 2010 Hosanna

Krahn, Western - 1998 Edition (NT)

The New Testament in Western Krahn published as KU̍O̍ DELEE © The Bible Society in Liberia, 1999.

Dode̍-ɛ, nɛ̀ Jusu ke ɔ̍ kòà na iě u̍h-a jii dě klè due di̍i̍, nɛ̀ mɔ̌-a nu̍ u̍h i̍. Wɛ̀ ɔ̍ kòà gbǎn kwǐ kɛnɛ̌ u̍h-a di̍. Nɛ̀ ɛ̍ nu̍ Juu-a wlè-weɛ̍. Jɛ Fɛlesii nyɔ̍ jě-a u̍h-ɛ, iě u̍h la̍a̍ dě Jusu we̍, “Gbɛ̀n-e, dɛ̍ àn kòà-a nu̍-aɛ, nɛ̀ u̍h-a wa̍ wlè-weɛ̍-a telě.”
Wɛ̀ Jusu sà u̍h-a wlu̍ pɔ̀n we̍, ɔ̍ la̍a̍, “Ti̍ mɔ̌-a nu̍-a Depe ke ɔ̍ na-nyɔ̍-ɛ, dɛ̍ ɔ̍ nu̍-a mɔ̀-ɔ se̍a ɛ̍ slè dě Nyɔsoa-a wlu̍ di̍i̍ ae? Dě à telě di̍i̍-ɛ, blèe̍ jɛ u̍h sà-ɛa Nyɔsoa kwlǎ-ɛ, nɛ̀ nyɔ̍ dɔɔ-ɔ di̍ ɛ̍ dɛ. Nɛ̀ slaǎ sà nyɔ̍ nɛ due bo ɔ̀ di̍ ɛ̍. Jɛ Depe pa̍-a dě Nyɔsoa-a gbò sɔ̀n-ɛ, iě ɔ̍ ke ɔ̍ ba̍ᵻ di̍ blèe̍ laa̍. Mɔ̀-ɔ se̍a Nyɔsoa-a telě la slè sàǐtòò ae? Ɛ̍ la̍ slaǎ sà nyɔ̍ ùh nɛ-a dě Nyɔsoa-a slaǎ sà gbò sɔ̀n-ɛ, pò u̍h wa̍ wlè-weɛ̍-a telě-ɛ, nɛ̀ u̍h se̍-a dɛ̍ sɔ̀n nu̍-ɛ, mɔ̀-ɔ se̍a ɛ̍ slè ae? Jɛ ǎn sèàɛ̍ mɔ̀ wlùh, jɛ nɛ-a da̍a-ɛ, ɛ̍ ku̍ wɔ̍n ɛ̍ sìì slaǎ sà gbò. Wlu̍ la ɛ̀ la̍a̍, ‘Wɔɛ bo ǎn pɔ̀n, ǐn se̍ slaǎ sà-a pɔ̀n,’ pò mɔ̀ juo ɛ̍ gbɔ̀ de-ɛ, nɛ̀ nyɔ̍ se̍-a dɛ̍ sɔ̀n nu̍-ɛ, mɔ̀ se̍ u̍h tìh dlǔ po̍ mu̍ de. Ɛ̍ tìh-ɛ, Nyi̍ɔ̍-a Jǔ bo ɔ̀ nu̍ Joi dǒ wlè-weɛ̍ we̍.”


Wɛ̀ Jusu wlǔh-i gbààn, iě ɔ̍ mu̍ dě Juu nyɔ̍-a wɛɛ sà gbò sɔ̀n. Ɔ̍ iě-a mu̍-ɛ, nɛ̀ jɔ̍gbau due nɛ dě gbò-a chɛ̀ sɔ̀n ɔ̍ sɔ̍n kɔ̌ i̍. Nɛ̀ nyɔ̍ duuh nɛ deě u̍h-a pɔ̀n jii la̍ i̍ u̍h iě Jusu tìh gbɛ̍n-ɛ. Wɛ̀ u̍h tèle ɔ̍ i̍ u̍h la̍a̍, “Pò ɛ̍ nu̍ wlè-weɛ̍ wɛ̀ nyɔ̍ iě nyɔ̍ pǔh-i dǒ ɛ̍ di̍i̍-ɛ, nɛ̀ ɔ̍ wa̍ telě ae?”
Iě ɔ̍ la̍a̍, “Pò mɔ̀-a nyɔ̍ blě blawɛ̌ wɛ̀ ɛ̍ iě biě gbǎ dǒ wlè-weɛ̍ di̍i̍-ɛ, nɛ̀ ɔ̍ se̍ ɛ̍-e sà mu̍ ae? Nɛ̀ nyi̍ɔ̍ ke blawɛ̌ ke jɔwe̍ gbǎ dɛ̍kɛ̍n ɔ̀ sìì ɔ̍ ba̍ ɛ? Ɛ̍ tìh-ɛ, à telě sà à wlu̍ kɛ̍n à iě dɛ̍ chɛ̀ nu̍ dǒ wlè-weɛ̍ di̍i̍.” Iě ɔ̍ la̍a̍ dě jɔ̍gbau laa̍ we̍, “Slɛ̌ɛ àn kɔba i̍.”
Wɛ̀ ɔ̍ slɛ̌ɛ ɛ̍ i̍, iě ɔ̍ kɔba nmɔ jii̍ dode̍, wɛ̀ ɛ̍ ke jɛ sie-a dǒ de̍-ɛ wɔ̀ɛ. Jɛ Fɛlesii nyɔ̍ sǐ-a dǒ sɔ̀n i̍-ɛ, iě u̍h sɔ̌ u̍h iě Jusu dbǎ.

Jɛ Jusu juo-ao dɛ̍ i̍-ɛ, iě ɔ̍ wlǔh-i gbààn ɔ̍ sɔ dǒ tà-a chɛ̀. Wɛ̀ nyɔ̍ dɔu wɔ̀ dǒ ɔ̍ de̍e̍, iě ɔ̍ bɔ̌-ɛ u̍h-a wɛ̌ᵻ kli̍hgbɛ̍. Wɛ̀ ɔ̍ nɛ̌ɛ jeědih laa̍ wlu̍ dounᵻ i̍ i̍h-i je̍e ɔ̍ nynɛ̌ wlɔ̀ we̍ po̍. Dɛ̍ Nyɔsoa-a tu̍owli po̍ nyɔ̍ Asaia bla̍-aɛ, ɛ̍ iě tìh-a taǐn nu̍. Ɛ̍ kɔn we̍ wlu̍ bo Jusu bla̍-a.
Nyɔsoa wlu-ia dě Asaia ja̍a̍-ɛ, ɔ̍ la̍a̍,
“Ǎn pòi̍ju ǐn tba̍-a chèɛ̀-ɛ la,
ǐn kma ɔ̍ tìh iě ǎn wlùh tè i̍ dǒ ɔ̍ we̍.
Ǎn mu̍ ǎn Sùù dě ɔ̍ ja̍a̍ po̍,
wɛ̀ ɔ̍ iě i̍ slɛ̌-ɛ tìh bla̍ dě kmɔ̌-nyɔ̍ we̍.
Ɔ̍ se̍ chɛ̀ mu̍, ɔ̍ se̍-e i̍ wǐi mu̍ ke,
nyɔ̍ se̍ ɔ̍ wlu̍ wɔ̌n mu̍ dǒ wlɔ̀gbàɛ̀.
Pelu̍u̍hgbau ɛ̀ klǐ-aɛ, ɔ̍ se̍ ɛ̍ chlà mu̍.
Nɛ̀ nape̍ ɛ̀ po̍-a daluh ɛ̀ iě-a mɔ̌-ɛ, ɔ̍ se̍ ɛ̍ mɔ̌-ɛ mu̍.
Ɛ̍ bo ɔ̍ mu̍-u nɛ te̍e̍ wɛ̀ ɔ̍ i̍ slɛ̌-ɛ iě tu̍h du̍.
Ɔ̍ nynɛ̌ bo kmɔ̌ kli̍hgbɛ̍-a mu̍ wlì tè.”


Wɛ̀ u̍h ja jɔ̍gbau due dǒ Jusu we̍ nɛ̀ jeědih nɛ ɔ̍ de̍e̍. Ɛ̍ nu̍ ɛ̍ wɛ̀ ɔ̍ dɔ̌, iě ɔ̍-ɔ wlu. Wɛ̀ Jusu pǔh-i ɔ̍, sɔ ɔ̍ jě i̍, iě ɔ̍ wlu. Sɔ ɛ̍ wlǔh i̍ nyɔ̍ kli̍hgbɛ̍ de̍e̍, iě u̍h la̍a̍, “Ɔ̀ la wɛ̀ ɔ̍ iě Depe-a Jǔ nu̍ ae?”
Jɛ Fɛlesii nyɔ̍ wɔ̌n-a pɔ̀n la-ɛ, iě u̍h la̍a̍, “Jeědih-a dlǔtu u̍h-a dǎɛ-a Biɛsibo-ɛ, ɛ̍ bo ɛ̀ nyǐ jǔ la gbǐh wɛ̀ ɔ̍ sà nyɔ̍ jeědih de̍e̍ i̍.”
Sɔ Jusu juo dɛ̍ u̍h-a naɛ-a wlùh i̍-ɛ, iě ɔ̍ la̍a̍, “Pò blǔh nyɔ̍-a sǔh ja fɔ̀n-ɛ, nɛ̀ blǔh laa̍ ɛ̍ mu̍ wa̍. Nɛ̀ pò wlɔ̀ nyɔ̍-a sǔh ja fɔ̀n-ɛ, nɛ̀ wlɔ̀ laa̍ ɛ̍ mu̍ wa̍. Pò gbò nyɔ̍-a sǔh ja fɔ̀n-ɛ, nɛ̀ u̍h se̍ i̍ nyna mu̍ dǒ u̍h-a chɛ̀ we̍. Nɛ̀ pò Setɔn ja la̍ ɛ̍ chɛ̀ we̍ fɔ̀n-ɛ, nɛ̀ ɛ̍ gblè-e ɛ̍ chɛ̀ i̍ wɛ̀ bo. Nɛ̀ ɛ̍ bloa̍-a mu̍ la̍ wa̍. Nɛ̀ pò ɛ̍ tù Biɛsibo iě jeědih i̍ nu̍-iɛ, nɛ̀ nyɔ̍we̍ bo ɔ̀ nyǐ mɔ̀ naɛ nyɔ̍ gbǐh ke wɛ̀ u̍h-a nu̍ jeědih i̍ ɛ? Ka ɛ̍ nɛ-a ka-ɛ, mɔ̀-a chɛ̀-a nyɔ̍ bo ùh-a mu̍ tìh-a chɛ̀ i̍ chɛ̍n. Jɛ pò ɛ̍ tù Nyɔsoa-a Sùù-a gbǐh iě jeědih i̍ nui-ɛ, nɛ̀ mɔ̀ juo ɛ̍ ka Nyɔsoa-a kmɔ̌ wlu̍ i̍ kɔn-ɛ nɛ-a da̍a mɔ̀ we̍ wɛ̀-ɛ.
“Ɛ̍ se̍ nyɔ̍ kɔn ɔ̍ iě dě kmu-nyɔ̍ blǐ gbò pa̍ wɛ̀ ɔ̍ iě ɔ̍ kɔn-dɛ̍ᵻ dǔ. Pò ɔ̍ iě ɛ̍ nu̍-ɛ, nɛ̀ ɔ̍ mu̍ kmu-nyɔ̍ laa̍ gbɛ̍n ɔ̍ iě ɔ̍ sa̍n ke̍ sàǐtòò, wɛ̀ ɔ̍ iě ɔ̍ gbò wa̍-a dǔ.
“Nyɔ̍ jɔ ɔ̀ se̍-a ǎn dɛ kɛ̍n nɛ-ɛ, nɛ̀ ɔ̍ tbaɛ ǐn bu̍hᵻ i̍ dɛbo. Nɛ̀ nyɔ̍ ɔ̀ se̍-a ǐn we̍ gbǎ à iě-a dɛ̍ tàdùè po̍-ɛ, nɛ̀ ɔ̍ gbà dɛ̍ ja̍i̍. Jɛ ǎn sèàɛ̍ mɔ̀ wlùh, gblɛ̍n sɔ̀ɛ̀n ke Nyɔsoa-a nynɛ̌ jii̍ nyni-ɛ kli̍hgbɛ̍ i̍h-a tìh-a mu̍ i̍ tǎli-ɛ. Jɛ nyɔ̍ ɔ̀ mu̍-a Nyɔsoa-a Sùù wɔ̍n blaɛ-ɛ, nɛ̀ ɔ̍ gblɛ̍n sɔ̀ɛ̀n-a tìh se̍ i̍ tǎli la̍ kɔn. Nyɔ̍ ɔ̀ mu̍-a Nyi̍ɔ̍-a Jǔ wlu̍ sɔ̀n pùn po̍-ɛ, ɔ̍ gblɛ̍n sɔ̀ɛ̀n-a tìh-a mu̍ i̍ tǎli-ɛ. Jɛ nyɔ̍ ɔ̀ mu̍-a Nyɔsoa-a Sùù wɔ̍n blaɛ-ɛ, nɛ̀ ɔ̍ gblɛ̍n sɔ̀ɛ̀n-a tìh se̍ i̍ tǎli-ɛ mu̍ kaka ke nɔ̌ kmɔ̌-a kmɔ̌.”


Jusu la̍a̍, “Pò ìn blě tu̍ chɛ̀-ɛ, nɛ̀ àn mu̍ tu̍-a buǒ chɛ̀ blě. Pò ìn blě tu̍ sɔ̀n-ɛ, nɛ̀ àn mu̍ tu̍-a buǒ sɔ̀n blě. Dɛ̍nu̍ɛ, tu̍-a buǒ bo nyɔ̍-a juo-e ɛ̍ i̍. Mɔ̀ wɔ̀ sɛ̍ᵻ, mɔ̀-a nu̍-a dɛ̍ᵻ sɔ̀nᵻɛ́, nɛ̀ ka mɔ̀-a mu̍ dɛ̍ chɛ̀-ɛ sà-a nu̍ ɛ? Dɛ̍nu̍ɛ, dɛ̍ ɛ̀ nɛ-a dě nyɔ̍ wlùh di̍i̍-ɛ, ɛ̍ bo wɔ̍n-a sà-a. Dě nyɔ̍ chɛ̀ ja̍a̍ bo dɛ̍ chɛ̀-a sɔ-ɛ, dɛ̍nu̍ɛ, dɛ̍ chɛ̀ bo ɔ̍ naɛ wlùh i̍. Nɛ̀ dě nyɔ̍ sɔ̀n ja̍a̍ bo dɛ̍ sɔ̀n-a sɔ-ɛ, dɛ̍nu̍ɛ, dɛ̍ sɔ̀n bo ɔ̍ naɛ wlùh i̍.
“Jɛ bɔ̌ ǐn sèàɛ̍ mɔ̀ wlùh, ti̍ ɛ̍ mu̍-a sàwi̍h sì ti̍ nu̍ dǒ Nyɔsoa jǔ-ɛ, nyɔ̍ kli̍hgbɛ̍-a mu̍ tìh we̍ i̍ sèàɛ̍ dǒ se̍o̍nɛ kli̍hgbɛ̍ u̍h bla̍-a we̍. Nɛ̀ dǒ àn chɛ̀-a wlu̍ kɛ̍n bo àn kɛ̀n nyǐ-ɛ ke àn kɛ̀n sà-a mu̍ sɔ.”


Wɛ̀ Fɛlesii nyɔ̍ ke telě nǎ poe nyɔ̍ la̍a̍ dě Jusu we̍, “Dlǔtu, po̍ jbaɛdih à iě jě.”
Iě ɔ̍ la̍a̍, “Ti̍laa nyɔ̍ la u̍h nyni gblɛ̍n-ɛ, iě u̍h-a blaɛ Nyɔsoa wɔ̍n. U̍h-a pɔ̀n jbaɛdih i̍, jɛ i̍h se̍ poe-ɛ mu̍. Jbaɛdih u̍h-a mu̍-a jě sǔh-ɛ, i̍h bo ìh nɛ-a Nyɔsoa-a tu̍owli po̍ nyɔ̍ Jona pùn. Ka Jona nu̍-a sɔ̀n-wǐh ta̍a̍n ke wlù-wǐh ta̍a̍n dě smìɛ̍ klaa di̍i̍ nu̍-ɛɛ, kǎ Nyi̍ɔ̍-a Jǔ-a mu̍ sɔ̀n-wǐh ta̍a̍n ke wlù-wǐh ta̍a̍n nu̍-ɛ nu̍ ke dě wlù. Ti̍ ɛ̍ mu̍-a sàwi̍h sì ti̍ nu̍-ɛ, nɛ̀ Ninifa nyɔ̍-a mu̍ i̍ nyna u̍h iě ti̍laa nyɔ̍ la tìh dlǔ po̍. Dɛ̍nu̍ɛ, u̍h nɔ̀ɔ̍, ti̍ Jona bla̍-a tìh dě u̍h we̍-ɛ, wɛ̀ u̍h bǐi i̍. Jɛ kaka la̍, dɛ̍ ɛ̀ ku̍-a wɔ̍n ɛ̀ sìì-a Jona-a, ɛ̍ nɛ da̍a wɛ̀. Ti̍ ɛ̍ mu̍-a sàwi̍h sì ti̍ nu̍-ɛ, nynɔ̌ ɔ̀ kɔn-a Siba bloa̍ wlu̍ i̍-ɛ, nɛ̀ ɔ̍ mu̍ i̍ nyna ɔ̍ iě ti̍laa nyɔ̍ la tìh dlǔ po̍. Dɛ̍nu̍ɛ, ɔ̍ sɔ dě bloa̍-a kɔ̍ la̍-a, wɛ̀ ɔ̍ ji̍ blǔh baa Sɔlɔma-a flɔ̍nwlùh dounᵻ we̍ po̍ la̍. Jɛ kaka la̍, dɛ̍ ɛ̀ ku̍-a wɔ̍n ɛ̀ sìì-a Sɔlɔma-a, ɛ̍ nɛ da̍a wɛ̀.”


Jusu la̍a̍, “Pò jeědih sɔ dǒ nyɔ̍ de̍e̍ wɛ̀ ɛ̍ iě tǐn la̍ i̍ pɔ̀n la̍ mu̍ dě pòɛ̍ɛ̍ kɛ̍n wɛ̀ ɛ̍ se̍-e tǐn la̍ jě-ɛ, nɛ̀ ɛ̍ mu̍ ka dǎ, ‘Gbò kɔn di̍i̍ ǐn sɔ-aɛ, ǎn mu̍-e de̍ mu̍.’ Ɛ̍ iě-a de̍ mu̍-ɛ, nɛ̀ dě gbò-a chɛ̀ wo̍lo-ɛ i̍, nyɔ̍ dɔɔ se̍-a deě tǐn, iě dɛ̍ᵻ kli̍hgbɛ̍ po̍-eɛ gba̍a̍. Wɛ̀ ɛ̍ mu̍ iě ɛ̍ ja jeědih mɛ̀sɔɔ̌n diih ìh kɔn gblɛ̍n nyni-a jii̍ ìh sìì-a ɛ̍ chɛ̀-ɛ. Wɛ̀ i̍h mu̍ iě i̍h tǐn deě. Sɔ tu̍ jɔ̍gbau laa̍ ɔ̍ bɔ̌ɛ-a dě di̍i̍ nɛ-ɛɛ, ɛ̍ nyni jii̍ ɛ̍ sìì sàì naɛ. Kǎ ɛ̍ mu̍ nɛ ke dǒ ti̍laa nyɔ̍ la ùh kɔn gblɛ̍n nyni-a jii̍-ɛ we̍.”


Jusu nɛ dǒ nyɔ̍ tlùgbei̍ laa̍ we̍ wlu la̍ sǔh, iě ɔ̍ de̍ ke ɔ̍ de̍di̍i̍ᵻ ji̍ u̍h nyna i̍ dě sɔ̀n u̍h-a pɔ̀n ɔ̍ we̍ wlu-ɛ i̍. Wɛ̀ nyɔ̍ sèàɛ̍ ɔ̍ wlùh, u̍h la̍a̍, “Ìn de̍ ke ìn de̍di̍i̍ᵻ nyna i̍ dě sɔ̀n u̍h-a pɔ̀n dě ìn we̍ wlu-ɛ i̍”.
Iě ɔ̍ la̍a̍, “Nyɔ̍ bo ɔ̀ nu̍ ǐn de̍ ɛ? Nyɔ̍ bo ùh nu̍ ǐn de̍di̍i̍ᵻ ɛ?” Wɛ̀ ɔ̍ te ɔ̍ kòà chèɛ̀ i̍, iě ɔ̍ la̍a̍, “Ùh la bo ùh nu̍ ǐn de̍ ke ǐn de̍di̍i̍ᵻ jɔ̍gbauᵻ. Dɛ̍nu̍ɛ, nyɔ̍ ɔ̀ nu̍-a ǐn Baa nɛ-a dě ja̍i̍wlɔ̀-ɛ ɔ̍ wlùh dɛ̍-ɛ, nɛ̀ ɔ̍-ɔ bo ɔ̀ nu̍ ǐn de̍di̍i̍ jɔ̍gbau ke ǐn de̍di̍i̍ nynɔ̌gbaɔ ke ǐn de̍.”

Listen to Matio 12