Northern Katang: ປັຣນາຍ ເຢືາງ ເຈົາຣາຊີ

ປັຣນາຍ ເຢືາງ ເຈົາຣາຊີ  ປັຣຄັນ ຕາໄມ ປັຣນາຍ ກາຕາງ (ພາສາກາຕາງ)

ມັຮ ກອນ ຣາມອນ ເອີຍ! ອຶງເຄາະ ເຍືາ ຕະ ຕາປູ່ນ ຊັນຕອຍ໌ ອຶມປໍ່ ປາຕັບ ເຍືາ.
ອຶງເຄາະ ເຍືາ ຊາງັດ ໂອນ ກຣັ່ກ, ເຈີ່ ເຍືາ ເຕ່ອ໌ ຊາປຸ່ຮ.
ເກົາ ອາຕີ ເຍືາ ແອີງ ຣານະ ອໍ.
ຍ່ອນ ນ່ະກັອຍ, ອຶງເຄາະ ເຍືາ ອຶນໂຈຍ ຕັຮ.
ບັອງ ເກົາ ອຶນນັ່ອງ ກັຣແນນ, ອຶມເປ່ອ໌ ອຶມປໍ່ ເກົາ ເບີນ ແອີງ ມານະ ເກົາ,
ກະ ໄລ່ ອາໂຢ່ະ ລາລື່ ເກົາ;
ອຶມປໍ່ ເກົາ ອາຕີ ເກົາ ປາຍ:
“ອຶງເຄາະ ໄມ່ ຊາແຍີ, ກະ ອຶນໂຈຍ ຊາລີຣ ມັຮ ຊັນຕອຍ໌ ເກົາ ປາຕັບ.
ອຶງເຄາະ ໄມ່ ຕະ ຕາປູ່ນ ໂອນ ກຣັ່ກ ມັຮ ປັຣນາຍ ເກົາ ອາຕີ, ເຈີ່ ໄມ່ ເບີນ ອາມົ່ງ.
ອຶງເຄາະ ໄມ່ ຣຍານ ໂອນ ແກີດ ກວາຍ ຣາໄງ່ອ໌ ຣາລັ່ງ ກະ ຊາປຸ່ຮ.
ອຶນໂຈຍ ຊາລີຣ, ແຕີລາ ງວາຍ ຕັຮ ຊັອງ ແຕ ມັຮ ປັຣນາຍ ເກົາ ປາຕັບ.
ອຶນໂຈຍ ຕັຮ ໂລ່ ເມືາດ ຣາໄງ່ອ໌ ຣາລັ່ງ, ຍ່ອນ ອັນ ເຕ່ອ໌ ກຸ່ມກຍາອ໌ ໄມ່;
ອຶງເຄາະ ໄມ່ ປາຊິ ຣາໄງ່ອ໌ ຣາລັ່ງ, ເຈີ່ ເຕ່ອ໌ ອັນ ກູຣຍາອ໌ ໄມ່ ໂອນ ແອີດ ອໍ.
ຣາໄງ່ອ໌ ຣາລັ່ງ ລາ ປື່ດ ກາເລີຍ ອຶນແຍ່ະ ແຕ ການໍ່ອ໌.
ນ່ະກັອຍ, ອຶງເຄາະ ໄມ່ ຈີວ໌ ປິ່ດ ມັຮ ມູ່ນ ກູ່ ຣາມຶ່ຮ ໂອນ ເຕ່ອ໌ ໄມ່ ເບີນ ຣາໄງ່ອ໌ ຣາລັ່ງ.
ອຶງເຄາະ ໄມ່ ປາຊິ ຣາໄງ່ອ໌ ຣາລັ່ງ, ເຈີ່ ລື່ ຣາໄງ່ອ໌ ຣາລັ່ງ ຕະ ໂອນ ໄມ່ ແກີດ ຊະເຢືາງ.
ອຶງເຄາະ ໄມ່ ຊັນຕັ່ບ ດໍອ໌ ຣາໄງ່ອ໌ ຣາລັ່ງ, ຍ່ອນ ຣາມຶ່ຮ ກັອຍ ເຕ່ອ໌ ຕະ ໂອນ ກວາຍ ການໍ່ອ໌ ຢຳນັ່ບ ໄມ່.
ຣາໄງ່ອ໌ ຣາລັ່ງ ໄມ່ ແກີດ ນ່ະ ກຸນຕຣວາອ໌ ອາງອື່ຣ ລາລື່ ກາ ເນົ່າ ອາປື່ງ ໂຈະ ຕຶ່ງ ແປຼີ ໄມ່.”

ກອນ ເອີຍ! ຊາງັດ ເກົາ! ອຶງເຄາະ ໄມ່ ຢຳ ອຶນແຍ່ະ ຣາງຶ່ຮ ຣາແຮີ ມັຮ ຊັນຕອຍ໌ ເກົາ ປາຕັບ,
ໂອນ ໄມ່ ເຕ່ອ໌ ເບີນ ແກີດ ກົງ ອາມົ່ງ ດູ່ນ.
ເກົາ ອາຕີ ໄມ່ ແຕ ຣາໄງ່ອ໌ ຣາລັ່ງ
ກະ ເງ່ ຕະ ເປາະ ຕຶ່ງ ຣານາ ຕານັ່ອງ.
ຄັນ ໄມ່ ຕະ ນ່ະກັອຍ, ຕາ ເບີນ ມວຍ ຣາມຶ່ຮ ອຶນເຕົ່າ ເຕ່ອ໌ ກາຕັງ ຣານາ ໄມ່ ເປາະ.
ແຕີ່ອ໌ ໄມ່ ຕາລຸ່ຮ, ໄມ່ ຕາ ເບີນ ກູຕົ່ຮ ອຶນເຕົ່າ.
ອຶງເຄາະ ໄມ່ ເຈີ ເລືອຍໆ ມັຮ ຣາມຶ່ຮ ກາ ໄມ່ ຣຍານ ເຈີ່.
ມັຮ ຣາມຶ່ຮ ກັອຍ ເຕ່ອ໌ ອາໂຢ່ງ ແດີຍ ອາມົ່ງ; ອຶງເຄາະ ໄມ່ ຢຸມ ຈັບ ມັຮ ຣາມຶ່ຮ ກັອຍ.
ອຶນໂຈຍ ຕາປູ່ນ ເງ່ ກວາຍ ຕາ ອໍ;
ອຶນໂຈຍ ຕະ ນ່ະ ກວາຍ ແຣັ່ງ ດຸ ຕະ.
ອຶນໂຈຍ ຕະ ນ່ະກັອຍ! ອຶງເຄາະ ໄມ່ ວຍາຣ ເຢີ່ງ ແຕ ມັຮ ຣານະ ຕາ ອໍ!
ອຶງເຄາະ ໄມ່ ແວັ່ຮ ຕັຮ ແຕ ຣານາ ກັອຍ, ກະ ເປາະ ຕຶ່ງ ຣານາ ຕານັ່ອງ.
ກວາຍ ຕາ ອໍ ແກີດ ຊາແຮລ ຊາໂຮຍ໌ ຄັນ ໄລ່ ຕາ ຢວາຮ ເບີນ ຕະ ຣານະ ໂລ່ຍຮ.
ໄລ່ ມູ່ດ ບິ ມາ ມັ່ດ ໄລ່ ລູລົງ ລູໂລຍ໌ ເລືອຍໆ ຄັນ ໄລ່ ຕາ ຢວາຮ ຕະ ກວາຍ ການໍ່ອ໌.
ຣານະ ຕາ ອໍ ກະ ແຣັ່ງ ແກີດ ນ່ະ ຊັຣນາ ກະ ແດີອ໌ ງ່ອຍ໌ ໂອນ ໄລ່.
ຣານາ ມັຮ ກວາຍ ຕານັ່ອງ ອໍ ແກີດ ນ່ະ ເທຣີງ ມັ່ດ ມານາງ ຕາແບິ ລັ່ອຮ,
ແກີດ ປັ່ງ ອາຊັອຮ ເຕົ່າ ແຕີ່ອ໌ ຕາໄງ.
ມາ ຣານາ ມັຮ ກວາຍ ຕາ ອໍ ເປາະ ແກີດ ນ່ະ ການຳ ປິງ.
ໄລ່ ແດິມ, ມາ ໄລ່ ຕາ ເບີນ ດັງ ອຶນເຕົ່າ ໄລ່ ກູຕົ່ຮ.

ກອນ ເອີຍ! ອຶງເຄາະ ໄມ່ ຊາງັດ ມັຮ ປັຣນາຍ ເກົາ ປາຍ.
ອຶງເຄາະ ໄມ່ ປາແຈງ ກູຕູຣ ຊາງັດ ປັຣນາຍ ເກົາ.
ອຶນໂຈຍ ໂອນ ປັຣນາຍ ກັອຍ ປິ່ດ ເມືາດ ແຕ ໄມ່.
ອຶງເຄາະ ໄມ່ ເຈີ ດໍອ໌ ມັຮ ປັຣນາຍ ກັອຍ ຕຶ່ງ ຣາງຶ່ຮ ຣາແຮີ.
ອາແລ່ະ ກາ ຊາອຳ ປັຣນາຍ ກັອຍ ເບີນ ແດີຍ ອາມົ່ງ ອໍ;
ກະ ປັຣນາຍ ກັອຍ ຕະ ໂອນ ຈະຈັ່ນ ອັນ ແກີດ ບັນ ເຣ່ງ.
ອຶງເຄາະ ໄມ່ ກຍາອ໌ ອໍ ມັຮ ຣາງຶ່ຮ ໄມ່ ຄຶ່ດ,
ຍ່ອນ ມັຮ ຣານະ ໄມ່ ຕະ ລາ ແຕີ່ອ໌ ແຕ ຣາງຶ່ຮ.
ອຶງເຄາະ ໄມ່ ຕັຮ ຊັອງ ປັຣນາຍ ຕະ ອຶນຕີ ຕາ ເບີນ ລື່.
ອຶນໂຈຍ ຣາບູລ ກະ ມັຮ ຣານະ ຣາໂລ່ບ.
ອຶງເຄາະ ໄມ່ ເນ່ ຕານັ່ອງ ເລືອຍໆ ປໍ ເມືາງ ບັອງ ໄມ່ ເປາະ ຕຶ່ງ ຣານາ,
ກະ ອຶນໂຈຍ ລົ່ບລີ່ ກຼີມັ່ດ ປໍ ໄນ່ ປໍ ກັອຍ.
ອຶງເຄາະ ໄມ່ ຕາຕ່ອຍ໌ ເປາະ ຕຶ່ງ ຣານາ ຕານັ່ອງ,
ເຈີ່ ເຕ່ອ໌ ໄມ່ ຕະ ແກີດ ແປີດ ແຮີຍ ຕຶ່ງ ກູ່ ຣາມຶ່ຮ ໄມ່ ອີ ຕະ.
ອຶງເຄາະ ໄມ່ ວຍາຣ ແຕ ມັຮ ຣານະ ໂກ່ະ;
ອຶນໂຈຍ ກູຢາວ ອາລັ່ອຮ ແຕ ຣານາ ປຍາຍ໌.

Listen to ປັຣນາຍ ປາລີ່ ພາຍາ 4