Akara Njirimara YouVersion
Akara Eji Eme Ọchịchọ

HAGONEGAHANI 29

29
O Jakobo ki ata i pasina o Labani
1O Jakobo ki uruia na râha iana ma ki bêkê tanga i Mesopotamia. 2Matena i rârâ, ngaia ki tariha igê na ve karu igê na masusu. Na totoha ni sipi gi oru ka hetâhi rihia. Ga hagatonomira tenia na vekaru. Na bagahê raha ka buhia renia na maana. 3Matena na ara ni totoha ni sipi ka hakuhaku i ngekana, na enoni ga bâsuri sipi ka gurua râ na bubuhina ma ka hagatonomira ma hemuri ka buhia aporo.
4O Jakobo ki hagatera na enoni ga bâsuri sipi, ki vi: “Bamane, i pasimi kani i he?”
Ngaira ka arami, ka vi: “I Harane.”
5Ngaia ki hagatera, ki vi: “Igamu kamu girara vari o Labani o karena o Nagore?”
Ngaira ka arami, ka vi: “Ua, mi girara.”
6Ngaia ki hagatera, ki vi: “I hega, ngaia ki gâga bâkoro ma?”
Ngaira ka arami, ka vi: “Ua, ngaia ki gâga bâkoro ma. Sira râ! Ka Ragele ka karena kani merarâ me na totoha ni sipi iana ikana.”
7O Jakobo ki vi: “E, na tangiana raha mênga ngekê. I mamênga na matena tanga vige torera me na totoha ni sipi. Tanu hega mu hagatonomira ma kamu meraporo ka ngêngê go nikâ?” 8Ngaira ka arami, ka vi: Mareha! Igami kami merâ ga rârâ, mataro me ka arâ me haku me na totoha ni sipi ma kami gurua râ na bubuhina na vekaru. Ma hemuri kami kahu hagatonomira.
9Matena o Jakobo ki meratamasi mênga, ka Ragele ki merataha me na totoha ni sipi iana o Labani o mona o Jakobo. 10Matena o Jakobo ki rigia ka Ragele henia na totoha ni sipi, ngaia ki râ tanga na vekaru ma ki gurua râ na bubuhina ma ki hagatonomira na sipi. 11Ma hemuri ngaia ki siginia ka Ragele ma ki angi, suria i vagevagesia. 12Ngaia ki vi tanga, ki vi: “Bâ, o moku ka vaemamu. Kenaku kani ka Rebeka.”
Ka Ragela ki tango ki râ ki hagarongoa o vaemana. 13Matena o Labani ki rongoa, vi o Jakobo o mona ki râme, ngaia ki tango vurusia, ki ruia ma ki siginia ma ki merâ i ruma iana. Matena o Jakobo ki hagarongoa hato o Labani renia na râha iana, 14o Labani ki vi: “Monari, igerua ka na ruma gi tage!” O Jakobo ki oga i ngekana suria na hageha hagenani.
O Jakobo ki tagara suri gete i pasina o Labani
15O Labani ki vi tanga o Jakobo, ki vi: “I pe ararigo, vigu tagara purua ma tangê, suria vi igo ka no moku. Hoi, gi hita ko obania, vigê vurigo renia?” 16O Labani ki nahunirerua ka karena gi rua. Na gete hagenago ka hêtana vi ka Lea ma na gete i muri ka hêtana vi ka Ragele. 17Ka Lea ki bâ mamêruga na maana ma ka Ragele ki na tohona na gete.
18O Jakobo ki takuia ka Ragele. Tahema ngaia ki vi tanga o Labani, ki vi: “Manga go hagamarumungenia ka Ragele tangê, hoi, gê tagara tangago surigi na harisi gi pi.”
19O Labani ki arami, ki vi: “Tangê inê, ki koro ngavê, manga vi igo nga kanigo auragia, mareha vi na mane getea. I koro era. Go gâga so ma ko tagara tangê.” 20O Jakobo ki tagara suria ka Ragele surigi na harisi gi pi. Na harisi gi pi ngegana ka mangagi na kere tangiani haritamani ma tanga, suria i takuia ngavê ka Ragele.
21I murini na harisi gi pi o Jakobo ki vi tanga o Labani, ki vi: “Hoi, i hato na matena ni tagaraha iaku. Gu nakê be êragia ka karemu.” 22Vikê o Labani ki hagarêa na ngêra na hagataku ma ki harora na enoni hato. 23Igê na bungiana ngekana o Labani ki tagarenia râ ka Lea tanga o Jakobo ma ki mareha vi ka Ragele. O Jakobo ki memêru ka Lea. 24O Labani ki tagarenia ka Silipa na kare vurivuri iana tanga ka Lea ka karena, hanana i tagara tanga. 25Matena i tangi, o Jakobo, ki kahu girara, vi ngaia kani ka Lea. Tahema ngaia ki râ ki vi tanga o Labani, ki vi: “Tanu hega go katoê vikana? Inê kê tagara suria ka Ragele. Tanu hega go hagaparuê?”
26O Labani ki arami, ki vi: “Na tauhamami ikê: na kere gete i muri ki pe araria, vige auragi bêso renia keogana. 27Gu naka ke hato na tangiani gi pi ni ngêra na hagataku, ma hemuri kê kahu naka vê tangago ka Ragele, manga vi igo ma ko tagara suria akê nikâ surigi na harisi gi pi.”
28O Jakobo ki agana ma. Matena ga hato na tangiani gi pi ni ngêra ni hagataku, o Labani ki tagarenia ka Ragele ka karena tanga o Jakobo ki êragia. 29O Labani ki tagarenia ka Biliha tanga ka Ragele ka karena, hanana i tagara tanga. 30O Jakobo ki memêru nogana ka Ragele ma ki takuia bâraha teharia ka Lea. Ma ngaia ki kahu tagara akê nikâ tanga o Labani surigi na harisi gi pi.
Na Karena O Jakobo
31Matena na Araha ki girara, vi o Jakobo ki takuia bâraha ka Ragele teharia ka Lea, ngaia ki katoa ka Lea ki girara i apara kare ma ka Ragele ki ama ni gomara nga mênga. 32Ka Lea ki atui ma ki apara na kare mane. Ngaia ki vi: “God ki bâsiê, vi inê kê maki ma i ngekê o vaniaku ki page takuiê!” Tahema ngaia ki hêtana renia vi o Rubeni, i vivi ‘Ngaia ki bâsia na makiha iaku.’
33Ngaia ki atui kê nikâ ma ki apara nikâ ta na kare mane. Ngaia ki vi: “Na Araha ki vateê nikâ na kare ikê, suria ngaia ki rongoa, vi o vaniaku ki pe takuiê.” Tahema ngaia ki hêtana vi o Simeone, i vivi ‘Rongoa.’
34Ngaia ki atui kê nikâ ma ki apara nikâ ta na kere mane. Ngaia ki vi: “I ngekê o vaniaku ki page têtê suriê nga, suria inê kê aparara na kare mane gi oru.” Tahema ngaia ki hêtana vi o Levi, vivi ‘Têtêsuria.’
35Ngaia ki atui kê nikâ ma ki apara nikâ ta na kare mane. Ngaia ki vi: “I ngeke inê kê hagarahasia na Araha.” Tahema ngaia ki hêtana vi o Juta i vivi ‘Hagarahasia.’ Hemuri ngaia ki oga te na aparaha ni kare.

Nke Ahọpụtara Ugbu A:

HAGONEGAHANI 29: KCB

Mee ka ọ bụrụ isi

Kesaa

Mapịa

None

Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye