HAGONEGAHANI 27
27
O Jakobo ki hagaparua o Isako o vaemana
1Matena o Isako ki gemêa ma ki guru, ngaia ki kasi tamasinga tanga o Esau na bêbê ni kare iana, ma ki vi tanga, ki vi: “O kareku.”
Ngaia ki arami, ki vi: “Oi, na ta?”
2O Isako ki vi: “Bâ, inê kê gemêa ma ki sugia ma vari ve meme. 3Gu tora na epage ma na mage iamu, ku râ i bemu, ma ku hanasia me na ganiana tangê. 4Go hagamakoa na ganiana na ani gê obania bâraha ma ko torea me tangê. Matena gê ngaua hato, inê kê nungia God, hanana i haganahunigo renia na ramana ma hemuri kê kahu meme.”
5Ka Rebeka ki karinga, matena o Isako ki tamasi tanga o Esau. Tahema matena o Esau ki râ ki gagari, 6ma ka Rebeka ki vi tanga o Jakobo, ki vi: “Inê kê rongoa o vaemamu ki tamasi tanga o Esau, ki vi, 7‘Gu hanasia na ganiana ma ku hagamakoa tangê. Matena gê ngaua hato, inê kê têbuhigo i maana God ma hemuri kê kahu meme.’ 8Hoita o kareku, gu karingê maninga, ma ku arâ suria na marâ gê visia tangago. 9Go arâ ma ko torererua me na bêhâgaterua binibinikaga na goti tenia na totoha, hanana gê hagamakorerua ma kê hagarêa na ngêra, o vaemanu ki obania bâraha. 10Igo kanigo totora tanga ki ngêngê, ma hanana i page têtêbuhigo ma hemuri ki kahu meme.”
11O Jakobo ki vi tanga kenana, ki vi: “Bâ, inê ki pe varevarehuga na apeku manga o Esau. 12Manga o vaemaku ma ki hatariê, ngaia ki page girara ototo râ, vi inê kê hagaparua. Manga gê kato ngekana, ngaia ki asa vige têbuhiê ma ki kuasiê ma vari.”
13Na kenana ki arami, ki vi: “O kareku, manga vi na kuasiha ki mareha vi tangago ma ki tangê hete inê. Go arâ suria nga na marâ gê visia. Gu râ nga ku torererua me na goti.” 14Vikê ngaia ki râ ma ki torererua me tanga kenana. Ma kenana ki hagamako ma ki hagarêa na ngauha, o vaemana ki obania bâraha. 15Ma hemuri ngaia ki tavogi na ani koro ngavê na marâ o Esau ki tuguni re ma ki naka so i ruma. Ngaia ki hagatugunia o Jakobo renigi. 16Ngaia ki tuguni na rimana igê na gavota na goti ma ki naka nikâ pusia na riona suria i pe varevarehuga. 17Ngaia ki tagarenigi tanga o vaemana na ngêra i obanigi bâraha henigi na bereti i bani hahigi.
18Ngekana o Jakobo ki râ i pasina o vaemana ma ki vi: “Mama!.”
Ngaia ki arami, ki vi: “Oi, na anita o kareku kani igo?” 19O Jakobo ki arami, ki vi: “O Esau kani inê, na bêbê ni kare iamu. Na marâ go visia, ea ikê. Gu aharaga ma ku ngêa na ganiana, gê torea me tangago, hanana vi go têtêbuhiê.” 20O Isako ki hagate, ki vi: “O kareku, go rêrête taraha renia?”
O Jakobo ki arami, ki vi: “Na Araha God go rahesia, kani tamaniê kê hata ni tarahua.”
21O Isako ki vi tanga o Jakobo, ki vi: “Guru me hagarangiê o kareku, be hatarigo, manga vi o Esau monari kanigo.” 22O Jakobo ki ura hagarangi. O vaemana ki têtêgi na apena ma ki vi: “E, igo ko rongo manga o Jakobo ma na rimanu ki hata manga o Esau.” 23Ngaia ki pe girara, vi ngaia ki no Jakobo surigi na rimana ki varevarehuga manga o Esau. Matena i sugia ma vige têtêbuhia, 24ngaia ki hagate noga nikâ, ki vi: “O Esau monari kanigo?” O Jakobo ki arami, ki vi: “Mako, inê nga.”
25O Isako ki vi: “Me tani na ganiani. Gê ngaua hato ma kê kahu têtêbuhigo.” O Jakobo ki vatea nikâ na vaini ki tono. 26Hemuri o vaemana ki vi tanga, ki vi: “O kareku, guru me hagarangi ma ku siginiê.” 27Matena i guru me, hanana vi siginia, o Isako ki siginia na vanuhani na tuguni. Vikê ngaia ki têbuhia, ki vi: 28“Na unuhana koro o kareku
ki manga na unuhana na mu,
na Araha ki katoa ki ganora.
God ke haganahunigo renia na kâropu tenia ni vavearo
renigi na mu ga ganora ngavê.
Na koni ma na vaini ke aharêsigo!
29Na hakuta ninuni ke tê viteamu
ma ke nakara mareta i ruguhana na arahanga iamu.
Gu marungira na goamu hato
ma ngaira ke aganarigo, go raha tangara.
Na eraha ke tarahura na ani ga kuasigo.
Na ramana ke tarahura na ani
ga nungia na ramana tenia God tangago.”
O Esau ki nungia vaemana ki têtêbuhia
30Matena o Isako ki têbuhia hato o Jakobo mo Jakobo ki hura vê ki râ. Mo Esau o veogana ki ata me tenia na hagavasinga. 31Ngaia ki hagamako nogana na ngêra i obania bâraha o vaemana ma ki tora râ tanga. Ngaia ki vi: “Mama, aharaga, ku ngêa na ganiana gê torea me tangago, hanana vi go têtêbuhiê.”
32O Isako ki hagate, ki vi: “Ti kanigo?” O Esau ki arami, ki vi: “O Esau kani inê, na bêbê ni kare iamu!” 33O Isako ki gasuga ma ki haganega ki tata, ma ki hagate, ki vi: “Ma o ti kani bani torea me tangê na ganiana i nahuia? Inê kê kahu ngêa râ ma, ma kanigo ata me akini. Inê kê bani têbuhia. I pe arari, vi ve katoa nikâ na ta? I tâ vikana i tâ.”
34Matena o Esau ki rongo vikê, ngaia ki angi raha ngavê ma ki obaera ngavê, ma ki vi: “Mama, gu têbuhiê nogaku!”
35O Isako ki arami, ki vi: “O vesimu ki râ me ki hagaparuê kê bani têbuhia ngaia.” 36O Esau ki vi: “Na ruata na matena i hagahagaparuê ngekê. Tahema ga hêtana vi o Jakobo. Hagenago ngaia ki hanagoa teniê na tarana na bêbê ni kare, ma i ngekê ngaia ki hagaparugo ko têbuhia ngaia. I hega, i arari ma, vigu têbuhiê nogaku?”
37O Isako ki arami, ki vi: “Inê kê bani naka ngaia ki raha tangago ma ki marungira na goana hato. Inê kê bani vatea renigi na koni ma na vaini. Hetaki o kareku. I bara tangê, ve katoa ta na marâ tangago.”
38O Esau ki ama ni nungia nga o vaemana, ki vi: “I hega, na ani gi tage ma kani ararigo, go têtêbuhia, ma inê ki mareha? Mama, gu têbuhiê nogaku!” Ma ngaia ki haganega ki angi nikâ.
39O Isako ki vi tanga, ki vi:
“I vavearo ki mareha rârâ na kârupu tangago.
I mareha rârâ na mu vige ganora tangago.
40Igo ko page hagêguria na tatapa borahu iamu.
Na goamu ki page marungigo.
Matena gu usitenia na tarana ngekana,
igo ko page musigi na varo i rakugo renigi.”
41O Esau ki merongasia ngavê o Jakobo, suria o vaematerua ki têbuhia ngaia. Ngaia o Esau ki tako ki vi: “Matena o vaemaku ki meme ki hatohato na hagahunu bungi, oi, inê kê page nahunahu hunia o Jakobo.”
42Matena ka Rebeka ki rongoa na katoha iana o Esau, ngaia ki kasi tamasinga tanga o Jakobo ki râ me, ma ki vi tanga, ki vi: “Bâ, o veogamu o Esau ki naka na siva tangago, hanana vi nanahuigo ko meme. 43Hoi o kareku, go arâ surigi na marâ gê visigi. Gu gavagava nga i ngekê tanga i Harani i pasina o veogaku o Labani. 44Gu gâga vê noga i pasina, mataro me ki soso na mangariaganiha iana o veogamu, 45ma ki bonotenia na tarana go katoa tanga. Ma hemuri inê kê kasia vê ta na enoni ki mego aporo me. I era ma kê magari renigamurua igê na tangiana gi tage.”
O Isako ki kasia râ o Jakobo i pasina o Labani
46Ka Rebeka ki vi tanga o Isako, ki vi: “Inê ki usi na apeku renira na gete na Hitita iana o Esau. Inê ki araria ma vi ve me râ, manga vi o Jakobo ma ki êragia nogana na hitangita na kare viru na Hitita.”
Nke Ahọpụtara Ugbu A:
HAGONEGAHANI 27: KCB
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2011 Bible Society of the South Pacific