Akara Njirimara YouVersion
Akara Eji Eme Ọchịchọ

HAGONEGAHANI 25

25
Na ani getera na karena o Abarahamo
(1 Sihonga 1.32-33)
1O Abarahamo ki êragia nikâ ta na gete, na atana ka Ketura. 2Ngairerua karu aparara o Simirani, o Josesani, o Metana, o Mitiani, o Isibako mo Suaga. 3O Jokesani ki apararerua o Seba mo Tetano. Ma na raraha iana o Tatano ngaira ka na Asurita, na Letusita ma na Leumita. 4Na karena o Mitiani ngaira ka no Epa, o Epere, o Ganoke, o Abita mo Eleta. Ngaira hato ngegê ka na raraha iana ka Ketura.
5O Abarahamo ki me tenigi na ara ni nahuniga hato iana tanga o Isako. 6Ma na matena i tahitahi mênga, ngaia ki vatera renigi o karena i aparara i pasita kaniana getera. Ma hemuri ngaia ki kasira o karena ngegê igê na agua i kerekê hagatê tenia o Isako o karena.
O Abarahamo ki me ma ka bagia
7-8O Abarahamo ki gemêa ki araria ma ki me. Ngaia ki tonga 175 na harisi iana. Ngaia ki obakoro renia na ogaha me iana ma ki me ma ki hakunira na êvarina. 9O Isako mo Isimaele o karena karu bagia igê na vaba i Makapela igê na mu kerekê i Mamere, na agua iana i nago o Eperoni karena o Sogare na Hitita. 10Ngaia ki na mako i bani vuria tenira na Hitita. Ngairerua hato o Abarahamo ma ka Sara kaniana ka bagirerua i ngekana. 11I murina i me o Abarahamo, God ki koro tanga o Isako, i oga hagarangia na vekaru i Lagairoi, i vi vekaru iana na ani i mamauri i bâsiê.
Na raraha iana o Isimaele
(1 Sihonga 1.28-31)
12O Abarahamo ma ka Hagara na kare vurivuri iana ka Sara karu apara o Isimaele. 13O Isimaele ki aparara o karena ga vora hesurisuri ngaira igê, o Nabaiote, o Ketare, o Atabele, o Mibisama, 14o Misima, o Tuma, o Masa, 15o Gatata, o Tema, o Jeture, o Napisi mo Ketema. 16Ngaira ka na êvarita na varo ni nuni tangahuru matarerua. Na atata ka hêtani renigi na hinua ma na tênga iata. 17O Isimaele ki tonga na 137 na harisi iana ma ki kahu me. 18Na raraha iana o Isimaele ka oga i na apanena i berarogaterua i Gavila me Sure, kerekê i Esipito tanga i Asure. Ngaira ka oga hagatêrira na ani getera na raraha iana o Abarahamo.
Garu vora na kare papa o Esau mo Jakobo
19Ikê ki na sihonga renia o Isako o karena o Abarahamo. 20O Isako ki tonga na 40 na harisi iana ma ki kahu êragia ka Rebeka ka karena o Betuele na mane ni Arama i Mesopotamia ma kesina o Labani. 21Suria ka Rebeka ki gomara, o Isako ki avarasia na Araha tanga, hanana i apara kare. Na Araha ki aganaria na avarasiha iana, ma ka Rebeka ki atui. 22Ngaia ki obarangenirerua na kare papa. Matena i mamênga vigaru voravora me, ngairerua karu gusurenirerua heri i obana kenaterua. Ka Rebeka ki tako ki vi: “Tanu hega ki manga ikê tangê?” Vikê ngaia ki hagatea na Araha.
23Na Araha ki aramia, ki vi: “Na hakuta ninuni gi rua karu oga i obamu.
Matena garu voravora me, ngairerua karu page hehanehane.
Na ani i voravora hagenago
ki page oga i ruguhana na ani i muri.”
24Ka Rebeka ki riki na gerina ma ki apararerua o karena na karepapa. 25Na ani i vora hagenago, ngaia ki mahui na apena ma ki varevarehuga ngavê manga na goti. Tahema ga hêtana vi o Esau. 26Na ani i vora hemuri ki têa gatagata na popona ni ugana o Esau, matena i vora me. Tahema ga hêtana vi o Jakobo. O Isako ki tonga na 60 na harisi iana, matena garu vora me igê.
O Esau ki naka o Jakobo ki vora vi na bêbê ni kare
27Ngairerua karu raha. O Esau ki aresuria ngavê na hagavasinga ma ki magemagesia na bemu. O Jakobo ki pe manga o Esau. Ngaia ki gâga tonge so ma i hinua. 28O Isako ki takuia o Esau teharia o Jakobo, suria i vagevagesia na ngauha ni ganiani i nanahuira o Esau. Ma ka Rebeka ki takuia hete o Jakobo.
29I ta na tangiana o Jakobo ki hagagobo na pini, ma o Esau ki hagavasi rârâ ki ata me. Ngaia ki magê ngavê, 30ma ki vi tanga o Jakobo, ki vi: “E, gê mesi hioronga! Me tani na ngêra merameraga ngegana.” Tahema ga hêtana nikâ vi o Etome: O Merameraga. 31O Jakobo ki arami, ki vi: “Inê kê girara ma gê vatego, manga vi igo ma ko nakê kê manga vi na bêbê ni kare.”
32O Esau ki vi: “Hoita!, i koro ma! Inê kê haga ni me ngekê. Manga ve me, na tarana vi na bêbê ni kare ki asa ma vige tamaniê!”
33O Jakobo ki arami, ki vi: “Hoi, gu tohe hagenago, vi igo ko nakê, kê manga vi na bêbê ni kare.”
O Esau ki tohe ma ki naka o Jakobo ki vora vi ne bêbê ni kare. 34Ma hemuri o Jakobo ki vatea tani na bereti henigi na pini. Ngaia ki ngê ma ki tono, ma ki aharaga vê nikâ ki râ. Ngekana nga hanana o Esau i pe tako raha renia na tarana na bêbê ni kare.

Nke Ahọpụtara Ugbu A:

HAGONEGAHANI 25: KCB

Mee ka ọ bụrụ isi

Kesaa

Mapịa

None

Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye