Masmur 3
3
Ransyeran rikiny dai no awatan ngkov arono marova umarovave rinai
1Masmur Daud po ratoe, arono sarar ti to, weye apa kavo Absalom pare be marovave ai.#3:1 2Sam. 15:13-17:22
2Sya AMISY, wakoe! Sya marova wanui rave!
Vatano ubesea ti umarovave rinai wanui rave!
3Vatane wanui wo inaura ware:
‘‘Amisye pamo indati Po apaya irati marova mai ramu.’’
4Weramu sya AMISY, Winyirati ndarino rinaora,
maisyare naite apa vakano po raijaro aora ramaisy,
Winyirati Nyo anasineko raunande rinai,
muno Nyo inanuga so raveti mbambunin.
5Syo AMISY winanonae inanamoto manakoeve rai,
muno nai Sion, unato ndandinit terave taune ntuna rai,
Winyo sya ana idanonae raveti mamaisyo rinai.
6Arono naman ribeaje niki muno rinikito mariraave,
muno awatan ngkov ribeseo akato weye AMISY Winyo rinayaranande.
7Vatano wo rinawariki ra umarovave rinai awa wanui mamo ratore kakai,
weramu risyamo syo masyanive ramu.
8AMISY, mbeseo!#3:8 mbeseo: Maisyare muno Pemasmur po apa marova maeno ubesea ti umarovave ai no anemo 1 rai, weti soamo po Amisye awain indamu beseo ra Po apaya irati mai.
Sya Amisy, syare Nyo rinapaya irati kakai rai!
Tugae, Winyi Nyo mangke raude sya marova mai tenambe,
Winyi Nyo vatano mamune umaso awa vambunine radaut.#3:8 Ayao Ibrani maisyare so: ‘‘Tugae, Winyi Nyo sya marova matamo tenambe mawamona rai. Winyi Nyo vatano mamun awa matomokane radaut bintabo.’’ Ama ine mamo maisyare ratoe no aneme so rai wemaisy.
9AMISY, Winyirati Nyo reansapaya irati reama marova mai,
syare Nyo Nya kove raugaje Nya kawasae reansai.
Nke Ahọpụtara Ugbu A:
Masmur 3: yva
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)