Matáyɔ 4
4
Tombaga á Yéso
(Ɔna phɔtɔ Mkɔ 1.12-13; Lók 4.1-13)
1Mbusa á ɓatisa á Yéso, Měma á kanga ɓojeɗe áonsɔndɔɛa ka nkanda, ka gea nketi ántombɛgɛ. 2Mbusa á Yéso ika kángá á eaga ka nyɔngɔ á mɛma á Mokonga esa nkama gena (40), keiphe n'esa, nja áɔmbɛɗa. 3Kó, Ntombigi áɔsɛkɛɗa bíbí á Yéso, áongoɗea: «Aoɓá n'onde Muna-Mokonga, sosea phɔ́ ɛtɛ nde, áɓɛ mokati.» 4Yéso áonsikisia: «Ɓáɗundu suɓi á Ɓuku á Mokonga ɓe: ‹Nkpa nna tɔndɔ oenda ka nyɔngɔ á ea mokati, a ndiu ka nyɔngɔ bui nde Mokonga aɔyɔnga#Ɔna Tɔl 8.3.›»
5Mbusa, nketi áonga ně na Yɛusalɛ́ma, nji á kanga ɓojeɗe. Áombisa Yéso ka ntɔndɔ á endu á Mokonga, 6áongoɗea Yéso: «Aoɓá n'onde Muna-Mokonga, ócicima phɔ́ ka oɗo. Ka nyɔngɔ nde, ɓáɗundu suɓi á Ɓuku á Mokonga gea:
‹Mokonga ěsoseande ɓamalaéka nɛkɛ ka phɔa akɔ,
na ɓákokumbande ka njaga aɓɔ ka gea,
ecinji akɔ kaɓɛtɛkanɛmbɛ k'ɛtɛ#Ɔna Jab 91.11-12.›»
7Mpɔ Yéso áongoɗea: «Ɓáɗundu phɔtɔ suɓi á Ɓuku á Mokonga gea: ‹Kóntombɛgɛ mɔnɔ Mɔkɔta Mokonga nɛkɔ.#Ɔna Tɔl 6.16›» 8Mbusa, nketi â goto onga na Yéso ka ntɔnga á mamba éndǎ. Kó, áɔmɔnisa koɓoamɛ bui á ka mokonda na ɓoombia í. 9Áongoɗea Yéso te: «Nekophande kema nde bubui, akoɓá n'ogbuki muanku akɔ mosá ani ka ɗokomisa ani.» 10Mpɔ Yéso áongea: «Tóka wa, Sɛtáni! Ɓáɗundu suɓi á Ɓuku á Mokonga ɓe: ‹Onɗokomisande Mɔkɔta, Mokonga nɛkɔ na yɛ sasakɛ tɔndɔ aámbé ombebande#Ɔna Tɔl 6.13.›» 11Mpɔ, nketi áonsaga Yéso, ɓamalaéka ɓáobika ɔmbɛɗaneaga.
Ɓɔphɛi ndea Yéso ka Galiláya
(Ɔna phɔtɔ Mkɔ 1.14-15; Lók 4.14-15)
12Cɔ, ɓî Yéso ɗáɔ́ki gea, ɓámmaki Yoáni-Mɓatisi ka mekakɔ, áoga na Galiláya. 13Áotóka ka ntanga-nji á Najalɛ́ti, áoga oika ka ntanga-nji á Kapɛɛnaúmu, ka motii á etǔ Galiláya ka nji á Jebulúni na Naphutáli. 14Cɔ, ɗágeani ɓo, ka tɔtɔkisa nyɔngɔ nde Isaya mɔtu-nyɔngɔ ndea Mokonga ɗáyɔngi gea:
15«Nji á Jabulúni na Naphutáli,
k'aphe nde age n'oɓenge, kubi á Yɔɔdáni.
Nji á Galiláya ɔma nde ɓakpa nde ɓáná Ɓayúda ɓáiki ɓei!
16Ɓakpa nde ɓáiki ka keiphe
ɓáɔni owanga ángbó.
Ɓakpa nde ɓáiki ka nji nde iimbiɔ á kukuwa a kau,
owanga ángbó a ye ojegia#Ɔna Isa 8.23—9.1.»
17Ka mbenɔ ndɔ tɔ, Yéso áokpanga phɛá ɓe: «Kětiani tambea anu ájeɗe nga, koɓoamɛ ndea na koba a bíbí!»
Yéso aɛɓɔphani ɓagoigi gena á k'ama mosá-mosá
(Ɔna phɔtɔ Mkɔ 1.16-20; Lók 5.1-11)
18Yéso ɗátúotamba ka ɔɓɛɛ á etǔ Galiláya, áɔ̌ɓɔna ɓaɔphigi ɓaɓɛ, ɓato á ka sɔphɔ moci, na ɓáomaka moaɓɔ nɛɓɔ ka etǔ. Ina aɓɔ ɗátú: Simɔ́ni, mmbɔ ɓáɔmɔphana Pɛ́tɛɛ, na muna-makɛ Andeé. 19Yéso áǒngoɗea: «Ómoɓeani nenóbisande ɓaɔphigi á ɓakpa.» 20Kɛ̌kɛndɔ tɔ, ɓáosaga moaɓɔ nɛɓɔ, ɓáomɓea. 21Yéso áɔsɛkɛɗa mosá, â goto ɔ̌ɓɔna ɓato á komunamema ɓunɛngbo ɓaɓɛ, Yakɔ́ɓɔ na muna-amakɛ Yoáni, ɓana Jɛbɛdáyɔ. Ɓɔ, ɗáɓátú ka koko kimoci na abaɓɔ Jɛbɛdáyɔ na ɓáɔɓɔngisiaga moaɓɔ nɛɓɔ. Yéso áɔ̌ɓɔphana. 22Kɛ̌kɛndɔ tɔ, ɓáoɗeketa koko, n'abaɓɔ, ɓáomɓea.
Yéso aogoisaga na amisa á ɓakpa
23Yéso ɗátɔmbigi nji bui á ka Galiláya, n'aogoisaga suɓi éndu nɛɓɔ á madondanɔ ndea Ɓayúda ka nyɔngɔ á Mokonga na phɛá Mbino-Ánjá á koɓoamɛ. Kó, ɗáoamisa esambɔ ɗanga-ɗanga na kiɗɔti ka ɔlɔ á ɓakpa. 24Ɓoombia akɛ áɔɔ́kɛkana ka nji á Sulía bui. Ɓáombikia Yéso na ɓato á esambɔ ɗanga-ɗanga, na ɓunde ɓáotambanga na kukuwa ɗanga-ɗanga: kukuwa á ɓansombo, kukuwa á egǎ, na ɓaɗɔti. Yéso áǒamisa ɓɔbu. 25Usɛsɛ á ɓakpa ɓáomɓea na ɓátóki ka nji ndee: Galiláya, Yɛusalɛ́ma, Yudɛ́a, Ntanga-nji nkama, na kubi á Yɔɔdáni.
Nke Ahọpụtara Ugbu A:
Matáyɔ 4: KMW
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2021, Wycliffe Bible Translators, Inc.