Matayo 10
10
Avatume vanyikyumi na vavili viitumwa
(Maluko 3:13-19; 6:7-13; Luka 6:12-16; 9:1-6)
1Neke uYesu avakemeelage avanyigendwa vaakwe vanyikyumi na vavili (12), avapeelage uwutawulilwe wa kulosa imibepo imiviifu nu wa kuvananiya avanya wulemwa na vanya fitamwa fyonda. 2Amataawa ga vatume#10:2 Vatume Lole Avatume ku Figanulo. vanyikyumi na vavili ge aga: uva kutala ye Simoni, ilitaawa ilingi Petulo, nu Andeleya umunyalukolo vaakwe, uYakobo nu Yohana avaswamuve va Sebedayo, 3uFilipo, uBatolomayo, uTomasi, uMatayo umuhaki-pembe, uYakobo umuswamuve va Alufwayo, uTadayo, 4uSimoni uMukananayo#10:4 USimoni uMukananayo Ilitaawa lyakwe ilingi ye Simoni uMuselote. AVaselote kyali kiwungu mugati mwa Vayahudi avaagalwike ukuhuma ku wutemi wa Wuloma, pakuva vaasakaga uwutemi waawo. nu Yuda Isikalyote,#10:4 Isikalyote Ili lyali litaawa lya wudzenge kwe aahumaga uYuda. ye amusutuwe uYesu.
5UYesu avatumile vanyikyumi na vavili avo, akuvalagidzaga iitigilaga, “Mutanage ukuhelela ku avasili Vaisilaheli, kangi mutanage ukwingila mu ndzenge dza Vasamalya. 6Nda haamu, muvahelelelage aVaisilaheli ávayagile ngita ngʼolo. 7Pe mwihelela, mudalikage ukutigila, ‘Uwutwa wa kukyanya wúhegeliye.’ 8Muvananiyage avatamwa, muvadzulubusage ávafuwe, muvavaladzage avanya kinyamuvili nu kulosa imibepo imiviifu. Lino muvatangage avangi kitahombwa, pakuva na yuunye musaahombiye ifyo fye mwanukiye. 9Mutanage ukunyamula amagoobeli gagavedzaga mu mikandalo gyenyo, 10ibogolo nambe mingila givili, nambe ndaatu, nambe musagi, pakuva umulima-malimo iivagila ukwanukila ifya kuponela. 11Uwudzenge wuwuvedzaga enewuli uluvala luluvedzaga lwe mwikwingila, mukamutemulage umuunu ye iivagila ukuvaanukila unyeenye. Neke mukiikalage ukwakwe ukufikila pe mwihega umo. 12Pe mwikwingila mu kaaya, muvapeelage avanyakaaya uluhungilo lwa lutengamaso. 13Ngana muwone avaanu va mu kaaya iyo vakuvaanukila, apo uluhungilo lwenyo luvapeelage avo ulutengamaso. Neke kangi, ngana vasikuvaanukila, apo uluhungilo lwenyo lutanage ukuvapeela ulutengamaso. 14Ngana muwone umuunu ye avedzaga asikuvaanukila nambe kupulikidza amadzwi geenyo, apo mupumuunage ulufuuna mu magulu geenyo#10:14 Mupumuunage ulufuuna mu magulu geenyo Wugendela wa kimanyilo ikyo, avanyigendwa vakwiyefya nu kuwuleka uwoolesi ukutigila, uNguluvi alavahiga avaanu va wudzenge uwo, ávakaanile iMola iNofu. pe mwihuma mu kaaya iyo, enewuli mu wudzenge uwo. 15Ndakyene ndikuvalongela ndiitigila, mu kigono ikya luhigo, ulupumuko lwa wudzenge uwo lulaavedza lukomi ukulutila ulwa wudzenge wa Sodoma nu wa Gomola!#10:15 Sodoma…Gomola UNguluvi awuhigile uwudzenge wa Sodoma nu wa Gomola wiimila wa ndzanangifu dzaawo, Wutalilo 19:1-29.
Imumuko idziikwadza
(Maluko 13:9-13; Luka 21:12-17)
16“Lolage, ndikuvatuma ngita ngʼolo pagatinagati pa makekeeva. Lino muvedzage vasugu ngita ndzoka, kangi muvedzage vangaya nongwa ngita ngundya indzelu. 17Mwiyangalilage na vaanu, pakuva valavasindika unyeenye mu nyigilo nu kuvatova mu nyolanilo dzaawo. 18Pakuva unyeenye nye vanyigendwa vangu, valavasindika ku vatemi na vatwa, ukuta muvedze voolesi ukwawo na ku avasili Vayahudi. 19Neke kangi pe valavasindika unyeenye, mwali mutanage ukoogopa ukutigila, mulaalonga kiki enewuli mulaahiga kiki. Umusika guugo, mulaapeelwa ulwa kulonga, 20pakuva si yuunye ye mulaalonga, yu Mubepo va Nguluvi uDadiinyo ye mwene ye alaalonga wugendela weenyo. 21Umaamiye alamusutula umunungʼuve ukukomwa, udaadiye alamusutula umwana vaakwe ukukomwa, avaana valavagalukila avavaha vaawo, na vavaha valaasindikwa ukukomwa. 22Avaanu vonda valavasuula, pakuva unyeenye muli vanyigendwa vangu. Neke kangi umuunu ye aliigugumidza ukufikila ku wusililo, uyo alaapokwa. 23Umusika pe vakuvapumusa unyeenye mu wudzenge wumwinga, munyililage ku wudzenge uwungi. Ndakyene ndikuvalongela ndiitigila, musilaamala ukugendela indzenge idza ku Isilaheli pe asinaa aadza uMuswamuve va Muunu.
24“Umuwulanidzwa asikumulutila umuwulanidzi vaakwe. Umulimila-vangi nave asikumulutila umutwa vaakwe. 25Lúkwiliye ngana umuwulanidzwa iilingʼaana nu muwulanidzi vaakwe nu mulimila-vangi iitegana nu mutwa vaakwe. Ngana viitambula umukomi va nyumba ukutigila ye Belisebuli,#10:25 Belisebuli Ili lyali litaawa ilingi lya Setano. ongo, vasivatambula amataawa amaviifu ukulutila avaanu avali mu nyumba yaakwe?
UNguluvi mwene ye iivagila ukoogopwa
(Luka 12:2-9)
26“Lino mutanage ukuvoogopa avaanu avo. Dzonda idzili ku kinyele, dzilaavedza pa weelu, kangi dzonda ídzifihamiike, dzilaakagulika. 27Dzonda dze ndikuvalongela unyeenye mu kiisi, mudzilongage pa lumuli. Kangi dzonda dze ndikuvapwepela mu masiikidza, mudzidalikage pa miiho ga vaanu vonda. 28Mutanage ukuvoogopa avo aviikoma umuvili, neke kangi viilemwa ukukoma umubepo. Nda haamu, mumoogopage uNguluvi ye iitipula umuvili nu mubepo mu mooto ugusiidzima mbeepali. 29Isoodzi dzivili sidziigudzwa akagoobeli akadebe hela? Sikooyili nambe yimwinga mu idzo iyiiguwa paanyi ngana uDadiinyo asikeeliye. 30Nadzi fwili dza mituwe gyenyo, mbalile nu Nguluvi. 31Luli ewo, mutanage ukoogopa, pakuva muli nu wutalamu ukulutila isoodzi ndzoloofu. 32Umuunu ye avedzaga ye akuundzidika pa miiho ga vaanu ukutigila akuuniniila, na yuune ndihadza ndikumwidika pa miiho ga Daada ye ali kukyanya ukutigila, uyo munyigendwa vangu. 33Neke kangi ye avedzaga ye akuungʼaana pa miiho ga vaanu, na yuune ndihadza ndikumukaana pa miiho ga Daada ye ali kukyanya ukutigila, uyo si munyigendwa vangu.
Uwutalamu wa kumuniniila uYesu
(Luka 12:51-53; 14:26-27)
34“Mutanage ukuhoodza ukutigila ndaadzile kwe naanyi ukuleeta ulutengamaso. Nambi! Nda haamu, ndaadzile mu kuleeta amagoha. 35Ndaadzile mu kugaluungʼasa umuswamuve nu daadiye, umwalive nu ngʼina, mukamwana nu ngʼinafyala. 36Kangi avaanu va mu nyumba yaakwe vahadza viivedza vatavangwa vaakwe.#Mika 7:6 37Umuunu ye akumwenda udaadiye, enewuli ungʼina ukulutila uneene, uyo asiivagila ukuvedza munyigendwa vangu. Kangi ye akumwenda umuswamuve, enewuli umwalive ukulutila uneene, uyo nave asiivagila ukuvedza munyigendwa vangu. 38Umuunu ngana asiitegula ikipindulihidzo kyakwe#10:38 Asiitegula ikipindulihidzo kyakwe Ukutegula ikipindulihidzo kyakwe kwe kutigila, avedzage íitawuliye ngʼaani nde kuvedzage kufuwa, pakuva imisika igyo, avaanu vaakomwaga pa kutovelelelwa pa kipindulihidzo. nu kuuniniila, uyo asiivagila ukuvedza munyigendwa vangu. 39Umuunu ye avedzaga ye iisaka ukuwupoka uwuumi waakwe, uyo alawuyadza. Neke kangi ye akuwuyadza uwuumi waakwe wiimila wa neene, uyo alawupoka.
Ukuvaanukila avanyigendwa va Yesu
(Maluko 9:41)
40“Umuunu ye akuvaanukila unyeenye vanyigendwa vangu, akuundzanukila uneene. Kangi ye akuundzanukila uneene, akumwanukila uyo ye áanumile uneene. 41Ye akumwanukila umuvidzi, pakuva muvidzi, uNguluvi ahadza akumupeela uluhombo ngita lwa muvidzi. Kangi ye akumwanukila umuunu umugolofu, pakuva mugolofu, ahadza akumupeela uluhombo ngita lwa mugolofu. 42Ndakyene ndikuvalongela ndiitigila, umuunu ye avedzaga ye akumupeela nambe kinywelo ikinya lulenga ludzidzimu yumwinga mu vadebe ava, pakuva ali munyigendwa vangu, uNguluvi asilaaleka ukumupeela uluhombo lwakwe umuunu uyo.”
Nke Ahọpụtara Ugbu A:
Matayo 10: BEZ
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2022 Wycliffe Bible Translators, Inc. All rights reserved.