KARARIADI 14
14
I Abram nutul᷊ung i Lot
1Pia ratu sire pa, e'e ko: i Amrafel bou Babilonia, i Ariokh bou Elasar, i Kedorlaomer bou Elam, l᷊au i Tideal bou Goyim 2nuparang nundoka l᷊ima ratu ko wal᷊inge, i Bera bou Sodom, i Birsya bou Gomora, i Syinah bou Adma, i Semeber bou Zeboim, l᷊au ratu bou Bela ko nisigho l᷊ai si Zoar. 3I sire l᷊ima ratu e'e nusingkanaung dang nangomol᷊i sordado ngi sire su wal᷊ang u Sidim, ko su orasi i'i isigho L᷊auri Nate. 4L᷊iwuenge mapul᷊odua su taunge i sire nikawasa ngu Ratu Kedorlaomer, kateho su taung kapul᷊otilunge i sire nanulu nundoka si sie. 5Su taung kapul᷊opae i Kedorlaomer l᷊au manga singkongkolie nusumongo dingang u manga sordado ngi sire dang namata tau Refaim su Asyterot-Karnaim, tau Zusim su Ham, tau Emim su Syawe-Kiryataim, 6l᷊au tau Hori su manga wul᷊uri u Edom, bou e'e nanahusu si sire karaung u El-Paran su wiwihi u tana l᷊inggi. 7Bou e'e manga mananahusu sau nusul᷊e dang nakoa sarang En-Mispat su orasi i'i nisigho Kades. I sire nangawasa kal᷊abo u tana Amalek dang namata tau Amori ko natana su Hazezon-Tamar.
8Bou e'e manga ratu bou Sodom, Gomora, Adma, Zeboim l᷊au u Bela nangatori barisang u sordado ngi sire su wal᷊ang u Sidim mbuhue nuparang 9nundoka manga ratu bou Elam, Goyim, Babilonia, l᷊au u Elasar; inau i sire l᷊ima ratu nundoka si sire pa. 10Wal᷊ange e'e napene u pahighi ngu aspal, dang su tempo ngu manga ratu bou Sodom l᷊au Gomora mukakal᷊ika tumal᷊ang bou puseketang, i sire nanawo su l᷊al᷊ung u manga pahighi e'e. I sire tilu ratu ko wal᷊inge nakatal᷊ang dang nutumal᷊ang sarang manga wul᷊uri. 11I sire pa ratu ko nakauntung, nangaho kaul᷊i u patiku su Sodom l᷊au su Gomora, su l᷊al᷊ung e'e manga l᷊aidopi, bou e'e mbuhue nul᷊umal᷊eng. 12I Lot ana u tuari ngi Abram natana l᷊ai su Sodom, ual᷊ingu e'e i sie l᷊ai niwawa u roka dingang u patiku rarotonge.
13Kateho singkatau ko nakatal᷊ang nupakatitong kaul᷊i u ko nariadi e'e si Abram, tau Ibrani e'e. I Abram natana masandighi u manga kau maal᷊amati tampa u pukakal᷊iomanengang koa i Mamre, tau Amori. I Mamre l᷊au u manga ana u singkataunge, i Eskol l᷊au i Aner e'e ko manga ghawe ngi Abram. 14Su tempo ngi Abram nakaringihi himoneu ana u tuaringe nitaweng, nikomol᷊i apang taumata su l᷊al᷊ung u kemae, ko papande muparang, tiluhasumapul᷊owal᷊u su kataunge, bou e'e nanahusu ratu sire pa e'e nurating sarang soa ngu Dan. 15Su se'e i Abram namahia manga taumatange pirang kamonang, bou e'e nangalo roka i sire su tempo ngu huwi dang namata si sire. I sie nanahusu si sire nurating sarang Hoba su simbuka ngu sawunahi soa ngu Damsyik. 16I Abram nakapangaho apang rarotong ko seng nihampasi sire, l᷊au i Lot dingang u manga rarotonge, l᷊au manga kowawine dingang u manga ko nitaweng ko wal᷊inge.
I Melkisedek nangal᷊amati si Abram
17Bou namata ratu Kedorlaomer dingang u manga ratu singkongkolie, i Abram nusul᷊e. Bou e'e ratu ngu Sodom natamai nanomahi si sie su Wal᷊ang Syawe ko nisigho l᷊ai Wal᷊ang Ratu. 18#Ibr. 7:1-10 I Melkisedek, ratu ngu Salem ko kapuhinggo nge l᷊ai pangkati imam u Mawu Ruata Ko Karangetange, numbawa boroti l᷊au anggori guna ngi Abram, 19bou e'e nangal᷊amati si Abram, angkunge, “Mal᷊umbako Mawu Ruata Ko Karangetange, ko seng nundiadi l᷊angi l᷊au dunia, mangal᷊amati si Abram! 20Dalo su Mawu Ruata Ko Karangetange, ko seng nangonggo si kau kal᷊auntung su rokau.” Bou e'e i Abram nangonggo si Melkisedek simbahageang mapul᷊o bou patiku rarotong ko nihampasi ko seng niwawae napul᷊e.
21Bou e'e ratu ngu Sodom nangul᷊i si Abram, “Al᷊ae rarotong ko nipal᷊aho e'e, kateho kere botonge sul᷊eko si sia kaul᷊i u taumataku.”
22Kateho i Abram nusumimbahi, “Ia mutewa su saruang u Mawu, Mawu Ruata Ko Karangetange, ko nundiadi l᷊angi l᷊au dunia, 23himoneu ia ta mangal᷊a sarang singkodo bou rarotong u, maneng l᷊ai banang simbua arako l᷊ai tal᷊i ngu sandaleng simpoto mang ta. Dingang kere'e i kau ta makapudidato, ‘Seng ia nakakoa si Abram nakala.’ 24Ia tawe mo mangal᷊a manga apa guna ngu watangengku. Ia kitang mo manarima apang ko seng nipake u manga taumataku. Kateho walate manga ghaweku ko singkongkoli, i Aner, i Eskol, l᷊au i Mamre, mangal᷊a bahageang i sire.”
Nke Ahọpụtara Ugbu A:
KARARIADI 14: PLT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye