Jɛnɛsis 23
23
Sera Day ɛn Ebraam Bay Bɛriŋrɔn
1Sera bin ol wan ɔndrɛd ɛn twɛnti-sɛvin ia we i day, 2ɛn i day na Ɛbrɔn we na Kiriath Aba insay Kenan. Ebraam fil am bad ɛn kray fɔ am. 3Ebraam kɔmɔt usay in wɛf in dedebɔdi bin de, ɛn go to di Itayt pipul dɛn. 4I beg dɛn fɔ sɛl ples gi am fɔ bɛr in wɛf as in na fɔrina.
5Dɛn ansa am se, 6“Duya lisin to wi, sa. Na yu na bigman pan wi ɔl, go bɛr yu wɛf na di bɛst grev we wi gɛt, sa. Nɔn pan wi nɔ go se yu nɔ fɔ bɛr de.”
7Na de Ebraam grap ɛn baw bifo dɛn, 8i se, “If una gri fɔ mek a bɛr mi wɛf na ya, duya una beg Ɛfrɔn, Zoa in bɔypikin 9mek i sɛl Makpila kev, we de nain land, gi mi. Una tɛl am mek i sɛl am gi mi di ɛgzakt prayz bifo una ɔl na ya, so dat i go bi mi yon fɔ bɛriŋrɔn.
10Da sem tɛm de Ɛfrɔn insɛf bin sidɔm wit sɔm ɔda Itayt pipul dɛn bifo di siti in get; so i ansa Ebraam bifo ɔlman we bin de de se, 11“Lisin, sa, a gi yu di wanol fil ɛn di kev sɛf we de de. Bifo ɔl mi pipul dɛn, a de gi yu am fɔ mek yu bɛr yu wɛf de.”
12Na de Ebraam baw bifo di Itayt pipul dɛn 13ɛn tɔk fɔ mek ɔlman go yɛri se i go pe fɔ di wanol fil. I beg Ɛfrɔn duya mek i tek di mɔni, mek i go bɛr in wɛf.
14Ɛfrɔn ansa am se, 15“Pa, da grɔn de na fo ɔndrɛd silva kɔpɔ#23:15 Fo ɔndrɛd silva kɔpɔ Na lɛkɛ tɛn pawn wet silva nɔmɔ fɔ am. Ɔmɔs na da mɔni de bitwin mi ɛn yu? Go bɛr yu wɛf.”
16Ebraam si wit am bɔt i stil pe am fo ɔndrɛd silva kɔpɔ fɔ di kev bifo ɔl di pipul dɛn lɛkɛ aw dɛn biznɛsman bin fɔ sɛl am.
17Na so Ebraam tek gɛt Makpila kev we na bin Ɛfrɔn in yon prɔpati nia di istɛn pat na Mamrɛ. Di land, di kev we de nia di land, ɛn ɔl di tik dɛn we de de bi in yon. 18Ɛn na bifo ɔl di Itayt pipul i bay am.
19Afta ɔl dis, Ebraam bɛr in wɛf Sera na di kev we de na Kenan we i bay. 20Di fil ɛn di kev kam bi Ebraam in yon, ɛn di Itayt pipul dɛn gri fɔ lɛ de bi in yon bɛriŋrɔn.
Nke Ahọpụtara Ugbu A:
Jɛnɛsis 23: KRIO13
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Krio Bible © The Bible Society of Sierra Leone, 2013.