Tekang Kbuten 6
6
Kegsalà tau
1Deng le gotu mból bè klamangen benwu ne yó kem tau ne wen kem ngà le libun. 2Timbow ton yó kem gel nô bè longit#6:2 Yó kem gel nô bè longit tulónen bè nim bérs ni, wen mon du bè dumu udél Dwata, kem ngà Dwata. tey knóón yó kem ngà le libun yó nmò le, tódô nwa le yóm kul nóyô bélê le mò yehen le.
3Yó gónó Dwata mudél, monen, “Là bude móyô ne ke henlósu htahà klowil le yó kem tau, yakà olo le tau te tonok. Lenwóten ni ne, laen dù bélê le ke gulé bè 120 halayen.”
4Bè yóm kul kdaw yó ne balù bè yóm kogolen, tey wen kem tau lembang nô talak tonok, kem tau semfu gu bè yó kem libun te tonok yehen yó kem lemwót gu bè longit yó koni. Tey wen gendeng le yó kem tau lembang yó ne tey le tótól bè yóm kul kdaw.
5Bè yóm kton Dwata du yóm alì kmò le sidek yó kem tau talak tonok ne yóm là kólós yó kem gel nô lem hendem le, 6tey keblat nawahen bè yóm tehe kmoen kul ne yóm kehnóen kul talak tonok. Lemwót bè yóm tey kegselen, 7yó gónón mon du, “na gotu genlà lu dé ni kem tau deng nmou ni, dalang se yó kem ógóf ne yó kem onuk koyu, abay se gsele bè yóm kmou kul.” 8Okóm wen sotu tau boluyen Nuwa gónón hol hyu nawa Dwata.
Nuwa
9,10Ni se kun tutul Nuwa. Nim Nuwa ni, wen tlu ngaen logi. Yó boluy le Sém ne Ham ne Jafit. Bè yóm kun kdaw Nuwa, tek són du yóm tau tedeng kton Dwata du ne tau tey hyu kmoen. Tey tilob kesetngón le Dwata.
11Bede yó kem dumu tau, laen kô dù hyu ton Dwata bélê le. Kihu gónó le nô, sónmò le hemsidek kem dumu le. 12Laen dù tau ton Dwata talak tonok ke nô bè nawahen yóm hyu. Tódô kdê le gotu mò sidek. 13Ne yó gónó Dwata mudél ebè Nuwa, monen, “Ó Nuwa, deng hendemu ne kmou són le yó kem tau. Angat gotu genlau lu abay se hono sidek yóm gel nmò le bè klamangen benwu. 14Bong kóm du, moi kafal bong, nngomem koyu mtétél. Nmoem kem dfélen, denketem yóm sotu kay litok koyu gu lemen ne gu bè lewaen. 15Yóm ktahà lówóhen yóm kafal yó, 133 mitruhen ne yóm klamangen, 22 mitruhen ne yóm kegetahen 13 mitruhen. 16Nmoem ketefen, sóól mitru klayuk ketefen bè bengen. Tlu sodò sneelen, ne nmoem bak dólen bè gónón sóól lówóhen.
17Naw na hlumfak e talak tonok yóm tey dunuk anì gotu meglà kentihen deng mowil talak tonok. Angat le gotu matay yóm kdéen nô talak tonok. 18Okóm béléem, wen fasadu kóm là kô homongu kóm. Angat nitem elem yóm kafal nmoem yehenem ne yó kem ngaem logi ne yó kem towuhem. 19,20Miti ket stengeb bè yó kem kentihen ógóf lemowil talak tonok ne kentihen onuk koyu anì gomong le mowil bélê ye. 21Ne elesi se mit elemen mò ken ye ne mò ken yó kem ógóf.
22Tahu se, gotu nmò Nuwa yóm kdê deng hmò Dwata du.”
Nke Ahọpụtara Ugbu A:
Tekang Kbuten 6: tbl
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2007, Wycliffe Bible Translators, Inc. All rights reserved.