Mark 7
7
Hunkawicaye Ki Ṫawounspe
(Matthew 15.1-9)
1Pharisees eya epi na wooṗe ogna wauƞspewiċakiye eya Jerusalem etaƞhaƞ Jesus el hipi na okṡaƞ igluwitapi. 2Hipi ki lena eċa Jesus ihakab-unpi ki nape glujaja ṡni wotapi ki awiċablezapi.
3Pharisees na uƞma Jew oyate ki ṫunkaṡilawicaunyapi heċel uƞspewiċakiyepi keyapi: He tohaƞl wotapi kta ċaƞna ṫokaheya nape glujajapi 4naiƞṡ woyute oṗeṫuƞpi ki hena na taku uƞ yutapi hena k̇o ṫokaheya taƞyaƞ yujajapi, eċin taku ki iyuha leċel wooṗe yuk̇e.
5Ċa Pharisees na wooṗe ogna wauƞspewiċakiyapi ki Jesus iyuƞġapi, “Takuwe ċa nihakab-unpi ki wauƞspeuƞkiyapi ki he ogna eċuƞpi ṡni hwo? Takuwe nape glujajapi sni eyaṡ uƞ wotapi hwo?”
6Jesus awiċayupte, “Leċetu kta ċa wiċaṡa-wak̇aƞ-waayaṫaƞiƞ Isaiah ehaƞni oyakelo, na eċel owa;
‘Wak̇aƞṫaƞka heye: “Oyate ki lena woeye ṫawapi ki uƞ eċela mayuonihaƞpelo
Eyaṡ ṫawaċinpi ki lila miiṫehaƞyaƞ uƞpelo.
7Lena ċemakiyapi kte ki okihipi ṡni,
Iċiƞ wiċaṡa ṫawooṗe ogna wauƞspewiċakiyapi ki
Hena miṫawooṗe keċinpelo.’”
8“Wak̇aƞṫaƞka ṫawooṗe ki eyagnakapi na wiċaṡa ṫawooṗe ec̄ela anayaġoptaƞpelo.”
9Na Jesus ake leye, "Wak̇aƞṫaƞka ṫawooṗe ki wayupiya ipayeḣ eyagnakapi ċa wiċaṡa ṫawooṗe ki yuwaƞkal luzapi ktelo. 10Moses ṫawooṗe ki le e, ‘Niyate na nihuƞ tewiċaḣila yo,’ na ‘Tuwa huƞku na atkuku ki hena awiċaċaƞzeke ki haƞtaƞṡ he ktepi ktelo.’ 11Eyaṡ leċel waunspewiċayakiyapi, atewiċayapi na inawiċayapi ki taku iwaċiƞniyaƞpi ki he wiċayakʹu yaċinpi ṡni, iċiƞ le Wak̇anṫanka ehaƞni yak̇'upi ċa tawa kehapi, 12he niyate na nihuƞ ki owiċayakiye yaċin ṡni ċa awiċaluṡtaƞ. 13Leċel waunspewiċayakiyapi ki he Wak̇anṫanka ṫawoiye ki lutakunipi ṡni, na taku ota heċel eċanupi ki hena nakun heċetu sni."
Taku Ċa Oyate Ki Wiċayuṡiċe
(Matthew 15.10-20)
14Hehaƞl Jesus oyate ki ik̇aƞyela u wiċaṡi na hewiċakiye, “Anamaġoptaƞpo na omakaḣniḣ waċinpo. 15Takuni wiċoḣ'aƞ etaƞhaƞ ṫaƞmahetakiya iyaye ki he ṡape ṡni yelo. E e wiċaṡa ki ṫaƞmahetanhaƞ taku i etaƞhaƞ hinaṗe ki ec̄ela ṡapelo,” ewiċakiye.#7.15 Wowapi hunḣ oegle 16 oṗayapi: Nuġe niyuk̇aƞpi hec̄i, anaġoptaƞ po.
17Wicota ki awiċayuṡtaƞ na tipi wan el ihakab-unpi ki ob timahel iyaye ċa woiye ki le ake taƞyaƞ oyakeṡipi. 18“Wauƞspepi ṡni ki iyehaƞ wauƞispepi ṡni yelo,” Jesus ewiċakiye. “Oyakaḣniġapi hwo? Taku yatapi ki hena uƞ ṫaƞmahel niṡapapi kte ṡni yelo. 19Iċiƞ ċaƞtemahel iyaye ṡni, eyaṡ tezi ektaċa mahel iyayelo, na hetaƞ hinaṗelo.” (Le Jesus eye ki he woyute ki hena ṡape ṡni ċa yutapi okihipi kta ċa he k̇e.)
20Na ake heye, “Ċante etaƞhaƞ taku u ki hena eċa un wiċaṡapelo. 21Ṫaċaƞ ki mahel, ċantepi ki etaƞhaƞ ċa wowiyuk̇caƞ ṡikṡic̄e ki hinaṗe, na heuƞ tiwiċaktepi, naiƞṡ wamanupi, 22ṫawaċiƞ ṡic̄api, inakiciḣmapi, na taku ṡic̄e ki hena eċuƞpi, wiċagnayaƞpi, igluonihaƞpi ṡni, wakipajiƞpi, iwaṡteicʹilapi, na owak̇aƞk̇aƞpi. 23Lena iyuha ċante etaƞhaƞ u, na hena heċetuṡniyelo.”
Wiƞyaƞ Waƞ Ṫawowiċala
(Matthew 15.21-28)
24Hehaƞl Jesus iyaye na mak̇oce waƞ Tyre oṫunwahe ikiyela ki ekta i. Tuwa ti el tima iyayiƞ na oyate ki slolyapi ċin ṡni eyaṡ inawiċakiḣma okihi ṡni. 25Winyan wan ċuƞwiƞtku ki wak̇aƞ ṡic̄a waƞ ṫaƞmahel uƞ ċa Jesus oƞaḣ'uƞ na el hi. Wiƞyaƞ ki waƞcag Jesus iṫokab iḣpeicʹiye. 26Wiƞyaƞ ki Gentile oyate hec̄a na mak̇oc̄e waƞ Syria eċiyapi ċa el oṫuƞwahe waƞ Phoenicia eyapi ċa el ṫuƞpi. Jesus el i na wak̇aƞ sic̄a ki wicincala ki ṫaƞmahel uƞ ki kaḣeyab iyeya ċiƞ. 27Tk̇a Jesus leye, "Wakaƞyeja ki ṫokeya wowiċakʹupi kte! Wakaƞyeja ki woyute wic̄ayakipi na ṡuƞka ki wic̄ayakʹu kta heċetu ṡni yelo."
28Winyan ki ayupte, "Iṫaƞcaƞ, suƞk̇a ki ekayeṡ wakaƞyeja woyute gluṡnapi ki hena yutapi."
29Jesus leye, "Heċel amayalupte ki heuƞ gni na niċuƞk̇ṡi wak̇aƞ ṡic̄a ki ayuṡtan ki he iyekiyayo."
30Kihuƞni yuƞk̇an ċuƞwiƞtku ki oyunke el ḣpaye na wak̇an ṡic̄a ki iḣeyab iyaye ċa waƞyaƞke.
Wic̄aṡa Waƞ Iyeṡni Na Nuḣc̄aƞ Ċa Jesus Asniye
31Oyaƞke waƞ Tyre oṫuƞwahe eyapi ċa etaƞhaƞ Jesus ḣeyab iyaye, na Sidon oṫuƞwahe ogna ble waƞ Galilee eyapi ċa ekta iyaye. Yeki ogna mak̇oċe waƞ Oṫuƞwahe Wikc̄emna eyapi ċa ogna iyaye. 32Wiċaṡa waƞ taƞyaƞ iyeṡni na nuḣcaƞ ċa Jesus kahipi, na nape ki uƞ eyuṫaƞ ṡipi heċel akisni kta ċa. 33Ċa Jesus wiċaṡa ki le ic̄u, na kiċila blayetakiya iyayiƞ na nuġe oyujuƞte, ṫaṡoṡiƞ na uƞ ċeji ki eyuṫaƞ. 34Hehaƞl Jesus waƞkatakiya etuƞwiƞ, na ṫaƞmahel ċaƞyaƞkiƞ na heye, "Ephphatha", he “Naġaƞpo!” k̇api.
35Waƞcagna wiċaṡa ki taku uƞ naḣʹuƞ okihi ṡni na woglake ṡni ki he yuḣeyab icupi ċa taƞyaƞ woglake na naḣʹuƞ. 36Na hehaƞl Jesus oyate ki tuweni le okiyake ṡni wiċaṡi; eyaṡ heċena isamya oyagyag omanipi. 37Na tona le naḣʹuƞpi ki hena lila inihaƞpi na heyapi, “Taku taƞyaƞ eċuƞ welo,” eyapi. “Nakuƞ nuḣc̄aƞ ki asniwiċaye, na iyeṡni ki k̇o asniwiċayelo,” eyapi.
Nke Ahọpụtara Ugbu A:
Mark 7: LKTNT20
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© American Bible Society