Marcos 2
2
Jesus suchu runata aliyachiskamanta
(Mt. 9.1-8; Lc. 5.17-26)
1Shu punchakunawasha Jesus kuti Capernaum llaktama rirka. Paktapi runakuna shukratu yachanakurka pay paktana wasima paktaskata. 2Chayrayku achka runakuna Jesuspama shamunakurka, wasi huntakta. Punku kanchamapas tapakta runakuna tiyarka. Jesus runakunata rikusa Dios kishpichi shimita yachachirka. 3Chasna yachachiraskapi chusku runa suchu runata katanapi sirichiskata apamusa shamunakurka. 4Jesus kaskama paktankapa mana ushasa chay balla wasi kancha parti chakanata sikanakurka. Hawamanta Jesus kaska kuskalla hutkuta allanakurka. Chay hutkuta pasachisa unku runata hawamanta Jesuspa ñupama uraykuchinakurka. 5Jesus chay unkuta apakama runakunata rikusa paywa sinchikunakuskata, chay unku runata rimarka:
—Wawkilla, kan huchakunamanta pichay tukusa sakirinki.—
6Dios ñupa uras killkachiska killkata kutillata killkakamakunamanta maykankuna chaypi kanakurka. Jesus rimaskata uyasa paykunapa shunkupi yuyarinakurka:
7—Paylla yalikta kanayasa chasna rima kan. Diosshina tukunayasa Diosta piñachiran. Dioslla ñukanchita huchakunamanta pichanata ushanmi.—
8Killkakamakuna chasna yuyariraskapi Jesus paykunapa yuyayta riksisa tapurka:
—Imaraykuta waklita yuyarinkichi. 9Ñuka unku runata rimarkani: —Kan huchakunamanta pichay tukusa sakirinki— nisa. Ashwan ushaypachu unku runama rimankapa: —Hatari kanpa katanata apasa purisa ri— nisa. Imata rimawankichi.
10Kankuna yachankapa ñuka, Dios mantamuska runa kasa kay allpapi kawsa runakunapa huchakunata pichanata ushayu kaskata rikuchinkapa rahuni.—
Chasnapi muyurisa suchu runata nirka:
11—Hatari. Kanpa katanata apasa wasima ri.—
12Chay uralla hatarirka. Paypa katanata hapisa tukuykuna rikuraskapi chay wasimanta llukshirka. Chayta rikusa tukuy mancharinakurka. Diosta kushiyachisa pakrachunakurka:
—Mana ima uraspas chasna ruraskata rikuskanchichu— nisa.
Jesus Levi shutiyu runata pay yachachiskata katikama tukunkapa maskaskamanta
(Mt. 9.9-13; Lc. 5.27-32)
13Jesus suchu runata hampiskawasha kutillata yaku patama rirka. Yaku patama paktapi achka runakuna paypama shamusa munturinakurka. Chasnapi Jesus paykunata Diospa shimita yachachirka. 14Chaypawasha puriraskapi Alfeopa churi Levi niskata rikurka. Levi Romamanta hatun apurayku kullkita kobra kasa kobrana wasipi tiyararka. Jesus payta rikusa rimarka:
—Shamuy ñuka yachachiskata katikama tukunkapa.—
Chayta uyasa hatarisa Jesuswa rirka pay yachachiskata katikama tukunkapa.
15Washa Jesus pay yachachiskata katikamakunawa Levipa wasipi mikunakurka. Runakuna yuyariskapi —mana ali rura kanakun— niskakunamanta achka Jesuswa parihu mikunakurka. Chay mana ali rurakunamanta achka kanakurka Roma hatun apurayku kullkita kobrakuna. Achka chay laya ñupa mana ali rura runakuna Jesus yachachiskata katikamakuna tukunakuskawasha chaypi munturisa kanakurka. 16Chay wasi kanchapi maykan Dios ñupa uras killkachiska killkata kutillata killkakamakuna shayarisa kanakurka. Chay killkakamakuna Fariseokuna niska wankuriska runa bulamanta kanakurka. Romamanta hatun apurayku kullkita kobra runakunawa, shuk mana ali rurakunawapas Jesus parihu mikuraskata rikusa chay killkakamakuna Jesus yachachiskata katikamakunata tapunakurka:
—Imarayku kankunata yachachikamaka Romamanta hatun apurayku kullkita kobra runakunawa, shu mana ali rura runakunawapas parihu mikun.—
17Jesus paykunata uyasa rimarka:
—Mana unkurisa kawsakunaka hampikamata mana minishtinakunchu. Ranti unkukunaka hampikamata minishtinakunmi. Ñukaka mana shamurkanichu —ali kani— nisa rimakunata maskankapa. Ranti mana ali rura runakunata maskankapa shamurkani Diosta uyasa kawsakuna tukunkapa.—
—Imarayku mana sasinkichi— nisa Jesusta tapunakuskamanta
(Mt. 9.14-17; Lc. 5.33-39)
18Shu puncha Bawtisa Juan yachachiskata katikamakuna mana imata mikusa sasina puncha paktarirka. Fariseokuna niska wankuriska runa bulapas sasina puncha karka. Paykuna mana imata mikusa sasinakupi shu runakuna Jesuspama shamunakurka payta tapunkapa:
—Juan yachachiskata katikamakuna, Fariseokuna niska wankuriska runa bulamanta runakunapas sasi kanakun. Imarayku kan yachachiskata katikamakuna mana sasinakunchu.—
19Chasna payta tapunakupi Jesus kutiparka:
—Kasarana hishtama kayaskakuna kari tukuna paykunawa tiyarapi sasinachu kanakun. Kari tukunawa parihu hishtapi kaskapi nima kari tukuna sasinchu, nima hishtama kayaska runakuna sasinakunchu 20Kari tukuna pushay tukuna puncha paktaripi mana mikusa sasinakunkami— nisa pay kikin chay kari tukuna kaskata yuyachisa Jesus rimarka.
21-22Chaypawasha yachachisa katirka:
—Yuyarichi. Mana pi mawka churarinata mushu churana pitiwa rimintanchu. Chasna rapika mushu churana piti wankuyasa mawka churarinata aysasa astawa likichinka. Chasnallata mana pipas mushu vinu putskuyaraskata mawka wiwa karamanta rurariska purupi huntachinchu. Mawka purupi huntachipi mushu vinuka chay mawka kara puruta tukyachisa talirinka. Chasna tukusa ishkaynti mana ña sirbinakunchu. Mushu vinuka mushu kara purupi huntachinami kanchi.—
Chasna nisa ñupa urasmanta rukukuna kamachiskata pay mushu kamachiskakunawa parihu mana ishkayntita kasuypa kaskata Jesus yuyachirka.
Samana punchapi ruraypa kaskamanta mana ruraypa kaskamanta Jesus fariseokuna niska bulawa mana shu yuyayllawa kanakuskamanta
(Mt. 12.1-8; Lc. 6.1-5)
23Shu samana punchapi Jesus pay yachachiskata katikamakunaynti shu trigo chakra ukuta puriranakurka. Chayta pasasa pay yachachiskata katikamakuna trigo muyu wankukunata pallasa mikunakurka. 24Fariseo bulamanta maykan runa chayta rikusa piñarisa Jesusta rimakrinakurka:
—Manachu rikunki kan yachachiskata katikamakuna samana puncha samana kaskata mana kasusa trigo muyuta pallasa puriranakuskata.—
25Samana puncha samana kaskata kasunarantimanta yalikta runata kuna kanchi pay minishtiskata Jesus yuyachinkapa paykunata kutiparka:
—Killkariska kaskapi manachu leyiskankichichu ñukanchi yapa balichiska ñupa uras kawsa apu David paywa kaska runakunaynti yarkaranakuskapi ruraskata. 26Chay uras Abiatar pakrikunapa hatun apu karka. David paypa runakunawa yarkasa Diosta mañana wasima yaykunakurka mikunata maskankapa. Chaypi Diosta rikuchina mesapi kaska pankunata chay pakri Davidta kupi mikurka. Chay laya pankunatami pakrikunalla mikukuna kanakurka. Chasna kapipas David chay pankunata mikurka. Mana chayllachu. Paywa puri runakunatapas kararka mana huchalisa.—
27Jesus paykunata rimasa katirka:
—Samana punchaka runarayku raskami kan. Runa mana raskachu kan samana puncharayku. 28Chasna kapi ñuka tukuypa ayllu kankapa Dios mantamuska runa kasa tukuyta manta apumi kani. Rimanata ushani imami ali kan samana punchapi rurankapa, imami mana ali kan rurankapa.—
Nke Ahọpụtara Ugbu A:
Marcos 2: BKN
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2020, Wycliffe Bible Translators, Inc.