Actes 16
16
Tiimootee céeǹ Pɔɔl nì Siilasi
1Pɔɔl bàn̄ Deebi nì Liistee, Kriisitoo yɔu ubɔ nìn bí niin, bi yíì-u Tiimootee. U-na nìn sá Ujuudanimpu ní ki fōō ki kíí, ní u-baa sá Ugreekija. 2Nnabiyaamu mun nìn bí Liista nì Ikooniyumee nìn sòoǹ kijapaayee pu yii u sá unimɔnti. 3Pɔɔl nìn là Tiimootee ń nīn bí u-ceeyee, ní u kpáaǹ-u. Juuda yab bin nìn kóò niinee puee, u nìn gíí-u dikpancandi, kun puee bi kɔkɔ nìn nyí yii Tiimootee baa sá Ugreekija. 4Ntimu mun kɔkɔwoooo poon bi jītée, bi sòoǹ ki tùkù Kriisitoo yab yii Yeesu kpambaliŋ nì Jeerusaleem kpilib nín nìn kpáfì ki ká tiŋyee, bí nīn ŋúb́-tì tiŋan. 5An nìn yāntì Kriisitoo nikitiŋ nìn mɔ̀tīi fòol̄ ki kíikí ní bi-wíiŋŋu gbēentí kutaa sá kamaa.
Pɔɔl ká dileedakal Troowaasi tiŋkin
6Circir Fam nìn yíì yii Pɔɔl ń taa sòoǹ Unimbɔti bɔti Asii tiŋkinee, ní bi dūu dī Friijii nì Galaati timmun watil. 7Bi tóob́ Miisii tiŋkee ki bàà mākafì kí cù Bitinii, ama ní Yeesu Fam tí yíì, yii bí taa dī niin. 8Niinee ní bi dūu dī Miisii ki nín sìntī Troowaasi. 9Kunyeeuee ní Unimbɔti ŋúbitì Pɔɔl nimbiliŋ, u ká umaseeduwaanja ubɔ yú ki gbàam̄-u yii: «Dīń Maseeduwaan kí dāá jòoń-ti!» 10Pɔɔl ká mimmee, ní ti béè yii Unimbɔti di yíì-ti tí cùú sòoǹ u-bɔmɔntiiti Maseeduwaan. Dicilpu niinee ní ti bɔ́ntì ki nín cá.
Liidiya fōō Yeesu ki kíí Fiiliipi tiŋkin
11Ti kɔ́ meela ki yíkì Troowaasi, ní ki túĺ dicancaal ki búntì Samootraasi. Kutaa wúntèe, ti nín cá Neeyapooliisi, 12ní ki dāa yíkì niin ki búntì Fiiliipi, kitiŋkpaaŋŋi kin bí Maseeduwaan tiŋkin, ki bí Room yab ŋaanee. Ti nìn kāl̀ kitiŋ gbantin iwiŋkaaŋkaa iba. 13Ŋwiŋŋuŋfikaa dalee, ti nyáń kitiŋ kpaanceetiŋu ŋkpin ŋubɔ caŋin, ki nyàab̀ laakin bi kpáfí ki mèé Unimbɔtee. Ti kāl̀ee, ní ki sòon̄ nì binimpoobi bin nìn kpáfì niinee. 14Unimpu ubɔ nìn bí bin nìn bíi pílifée kansikin, bi yíì-u Liidiya. U nìn nyánní Tiyatiir tiŋkin ki sá unyampu ki nyáfí bisatamambi. U nìn tɔ́ Unimbɔti marab, ní ti-Dindaan pīitì u-pɔbil ki yāntì u fōō Pɔɔl bɔti. 15Unimpuee yāntì ti fùl̄ u nì u-samaau Unimbɔti nyim. Ní u mēē-ti yii: «Ni yaa lafun nyí yii tiŋman m fōō ti-Dindaan ki kíí, ní dāan̄ kí nīn kóò m-dumpu.» Ní u páb́-ti áli ti lafun cūtì u-dumpu.
Bi cúú Pɔɔl nì Siilasi ki tɔ́ sarkan
16Dalba ti nìn cá ŋwimmeem paaŋŋu puee, ti tú uyumbusapɔɔn ubɔ. U nìn cáá arasinii ubɔ u-ni ki wāĺ. An di nìn yì-tì u kāntí animbil tikpil ki cāabìń u-dindambi. 17Ní usapɔɔnee kíǹ ki nóó ti nì Pɔɔl, ki tátí yii: «Bininjab nee sá yilpu Nimbɔtiu tɔntɔnliibi ní, bi bíi sòoǹ nì ni min ní ni làá dī kí ká difiilee ní!» 18U dū iwiin tikpil ki nóó-ti ki sòoǹ an bɔti. Pɔɔl dāa gīīyee, ní ki fātìi bí arasiniiyee yii: «Nì Yeesu Kriisitoo yindi pu ní m bí yii á nyā usapɔɔn nee ni.» Ní arasiniiyee kpáàa nyáń niin dicilpu. 19Uyumbuee dindambi ká yii Pɔɔl bíil̀ nsan ŋun pu bi dì ki kāntí animbilee, ní bi cúú u nì Siilasi ki dáaĺ-bi ki cáa cūnnì bikpilib nimbiin laakin kunipaau nìn kpáfée, 20ní ki dāa yōoǹ-bi ki cūnnì biyidambi cee ki bí yii: «Binib nee di bíiĺ kitiŋ. Bi sá Juuda yab ní. 21Marab bin bi dàkèe, timbi Room yab kaa ŋūǹ kí fōōyaaa, kaa ŋūǹ kí dī-bi mun.»
22Niinee ní kunipaauee kɔkɔ dɔ́miń ki kútì bi-pu, ní bi kpáfì Pɔɔl nì Siilasi pu, ní biyidambi dáaĺ Pɔɔl nì Siilasi bɔkutiŋ ki pēetì, ní ki bí yii bí gbá-bi anaalab. 23Bi yāntì bi tāfì-bi míǹ ki dóòyee, ní bi cáá-bi ki tɔ́ sarkan, ní ki bí yii sooja un cí bisarkadambee ń nīn kpèé-bi tiŋan. 24Bi kpáafì soojee míǹ ki dóòyee, ní u fōō-bi ki cáa tɔ́ kusarkadii poon ki bá-bi abaa. 25Kunyataasiiu nyɔkɔmee, Pɔɔl nì Siilasi bíi mèé ki gà ilan ki nyɔ́ŋkí Unimbɔti, ní bisarkadambi bin kíǹee bíi pílifí. 26Kpalaa kpalaa niinee, kitiŋ cīŋkì ki kpáaǹ kusarkadii. Dicilpu niinee, mpunyɔmu kɔkɔ cúu pīitì, ní tin bi bóob́ bisarkadambee kɔkɔ cúu bútì. 27Sooja un cí bisarkadambee nín fīntì, mpunyɔmu wāāyee, u dàkafī yii bisarkadambi kɔkɔ sáǹ ki kátì dee, ní u dáaĺ ki fɔ́fì u-tàataajiki kí bàà kpɔ̀ u-ba. 28Niinee ní Pɔɔl téeń mpɔn yii: «Taa kpɔ̀ a-ba! Ti-kɔkɔ sèé doo.» 29Ní soojee bí yii bí pɔ̄ń-u ŋŋmi. Niinee ní u tóotì malaa ki cūtìi gbāaǹ Pɔɔl nì Siilasi nimbiin, tiwun jìkì. 30Ní u cáá-bi ki nyántì mmɔŋki, ní ki bālifì-bi yii: «M-dindambi, m làá ŋá mana ní kí nín ká difiil dee?» 31Ní bi kíí-u yii: «Fōō ti-Dindaan Yeesu kí kíí, a làá ká difiil, sii nì a-dicaŋku kɔkɔ.» 32Niinee ní bi bíi sòoǹ nì u nì bin kɔkɔ nìn bí u-dumpuee ti-Dindaan nyɔɔbundi. 33Ní soojee yōoǹ-bi kunyeeu kukúluu gbanti poon ki fíntì bi-buuŋyi. Niin dicilpu ní bi fùl̄ u nì u-dicaŋku kɔkɔ Unimbɔti nyim. 34Boonee ní u yōoǹ-bi ki cáa jɔ́m̀ u-dumpu yilpu, ní ki ŋá-bi tijin. Ní u nì u-dicaŋku kíǹ ki bí dipɔɔpindin bi nín fōō Unimbɔti ki kííyee pu.
35Kutaa wúntèe ní biyidambee túnní pilisib ń dāá tùkù soojee ú líí binibee. 36Ní soojee cūtìi tùkū Pɔɔl yii: «Biyidambi túnní yii ḿ líí-ni. Míǹ puee, nyā kí nīn cámaan nì ŋgbansɔŋfi.» 37Ní Pɔɔl bí pilisibee yii: «Bi cúú timbi bin sá Room tindambiyaamuee, kaa sòon̄ ti-bɔti ki ká ti-bɔkpil ní ki gbáń-ti samaa kɔkɔ nimbiin ki cáań-ti ki pīiǹ kudii. Ní kɔŋkɔnnee, bi là kí báĺ soooo kí nyāntí-taaa#16.37 Room yab marab kaa nìn pú nsan unil ń gbá Room tindambiki, an dàkà yii bí gbá-u anaalab.? Ti yíì kpataaa, see biyidambi bi-ba ń dāan̄ kí nyāntí-ti!» 38Pilisib cáá dinyɔɔbundee ki fātìi bàn̄ biyidambee cee. Bi nín gbìl̄ yii njapaamu gbanti sá Room tindambiyaamuee, tifaandi kɔ́-bi. 39Ní bi dɔ́miń ki sɔ̄ŋkì bi-pɔbiliŋ ki nín nyántì-bi, ní ki gbāam̀-bi yii bí yīkì kitiŋ gbanti poon. 40Bi nyáń kusarkadiinee, ní ki cūtìi kɔ́ Liidiya cee ki ká nnabiyaamu ki kútì-bi tibɔti, ní ki nín yíkì niin.
Nke Ahọpụtara Ugbu A:
Actes 16: BASSARDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
BIBLE EN N'TCHAM (Bassar) © Alliance Biblique du Togo, 2013.