Actes 13
13
Circir Fam lēē Baarnaabaasi nì Sɔɔl
1Unimbɔti bɔnaatiliibi nì bidakaliibi biba nìn bí Kriisitoo nikitil din bí Antiyɔɔsee kansikin. Bíǹ di sá: Baarnaabaasi, Simeeyɔn un bi nìn páaǹ diyindi yii Niijeeree, nì Lusiyusi un sá Siireen tiŋkinee, nì Manayeen un nì Eeroodi, Galiilee gɔminau nìn jíń tibiyati mbaantiimee nì Sɔɔl. 2Ŋyunti ŋun bi bóob́ kinyɔkɔ ki bíi nyɔ́ŋkí ti-Dindaanee, ní Unimbɔti Fam bí yii: «Gàntīmaan Baarnaabaasi nì Sɔɔl kí yóoń-mi ditundi din pu m yíiń-bee pu.» 3Bi bóob́ kinyɔkɔ ki mēē ki dóòyee, ní bi dū bi-ŋalii ki páaǹ Baarnaabaasi nì Sɔɔl pu, ní ki yāntì bi búntì.
Baarnaabaasi nì Sɔɔl bí Siipiri
4Baarnaabaasi nì Sɔɔl bin Unimbɔti Fam nìn túee nín sìntī Seelusii ki bàn̄ee, ki kɔ́ meela ki nín cá Siipiri. 5Bi bàn̄ Salamiinee, ki bíi sòoǹ Unimbɔti bɔti Juuda yab kpafidiiŋŋin. Yoowaneesi-Maarki nìn bí bi-cee kí nīn tútúǹ-bi. 6Ní bi cōom̀ Siipiri timmu kɔkɔn, áli ki tin bàn̄ Pafɔsi. Niin ní bi tin ká ujuudaja ubɔ, u sá ukpaŋkpanti bi yíì-u Baar-Yeesu, u mɔ́ntí yii u sá Unimbɔti bɔnaatiliu. 7Gɔmina Seegusi Poolusi uciŋfiti cee ní u nìn bí. Gɔminee là kí pīlifì Unimbɔti nyɔɔbundee ní ki yíiń Baarnaabaasi nì Sɔɔl. 8Ama Eelmaasi ukpaŋkpantee - u-yindi dee greeki sooŋyi poon - nìn mɔ́tí, ki là kí pìkiliǹ gɔmina ń taa fōō Unimbɔti bɔti kí kíí. 9Niinee, Unimbɔti Fam gbí Sɔɔl un bi gíti yíì Pɔɔlee#13.9 Sɔɔlnìn sá dikpambal yindi eebru sooŋyin ní Pɔɔlsá Room yab sooŋyin (kpèè 22.27-29)., ní u kpēē-u soooo, 10ní ki bí-u yii: «Sitaan biki, unyimɔndaan un bí nee! A kíiĺ binib ki jáà nì ibaamɔn kɔkɔ. Aa làá gbèen̄ ki gbíntìi bíiĺ Unimbɔti sàmbiyaamu mun tèen̄eeee? 11Too, kɔŋkɔnnee, Unimbɔti làá yàntī á kpántí ujɔfu. Aa làá ti wāl̀ ŋwìiń iyunti iba poon.» Dicilpu niinee, u kpántì ujɔfu, ní u kíǹ ki bíi táfí ki nyàab̀ un làá dàtī-uee. 12Gɔminee nín ká tin jítèe ní u fōō ki kíí. Kun puee ti-Dindaan bɔti tin bi dàkèe kɔ́-u tiŋan.
Pɔɔl nì Baarnaabaasi bí Antiyɔɔsi tiŋkin, Piisidii watil
13Ní Pɔɔl nì bin nìn cēentí-uee kɔ́ meela ki yíkì Pafɔsi ki bàn̄ Peeji, Paŋfilii watil. Ní Yoowaneesi-Maarki gbēeǹ niin ki nín gítiń Jeerusaleem. 14Bi yíkì Peeji, ki nín nìkì bi-saŋŋu ki tin bàn̄ Antiyɔɔsi tiŋki, Piisidii watil. Ŋwiŋŋuŋfikaa dalee, bi kɔ́ Juuda yab kpafidiikun ki kāl̀. 15Bi nín kàan̄ mara nì Unimbɔti bɔnaatiliibi gbɔnti poon ki dóòyee, ní kukpafidii kpilib túnní bi-cee yii: «Nnabiyaamu, ni yaa cáá isaŋki iba kí tīī samaa, ní sòoǹ.» 16Ní Pɔɔl yíkì ki yōoǹ u-ŋal yilpu ki jáam̀-bi, ní ki bí-bi yii: «Nimbi Isirayeel yab, nì nimbi bin fàŋkí Unimbɔtee, pīlifìmaan! 17Isirayeel yab Nimbɔtiu nìn lēē ti-naanjab ki yāntì bi būtì ŋyunti ŋun bi nìn bí kunicaŋu Eejipiti tiŋkinee. Unimbɔti nìn dū u-pɔŋŋu ki nyántì-bi, 18ki jíń bi-pu kimɔtii bi-bimbim pu ki ŋúb́-bi abin imuŋku ili nyɔkɔm kuteeun#13.18 B. 17-18: kpèè Disa 1.7, 12.51, Dikà 14.34, Ditee 1.31.. 19U nìn jáń ki kúntì atimbun aluli Kanaan tiŋkin, ní ki dū Isirayeel yab ki kāaǹ bi kpántì bitindambi#13.19 Kpèè Ditee 7.1, Joos 14.1.. 20Bi kāl̀ niin kii abin tilaafati tili nì imuŋku ili nì saalaa.
«Boonee ní u tīī-bi bikpilib bin làá nīn kpòotī-bee ki tin sāā Unimbɔti bɔnaatiliu Samiyeel yuntiŋu#13.20 bikpilib bin làá nīn kpòotī-bee: Bibɔ 2.16. - Samiyeel : kpèè 1 Sami 3.20.. 21Ŋyunti gbanti ní bi bí yii bi là ubɔti. Niinee, Unimbɔti tīī-bi Sayuul, Kiisi jipɔɔn un nyánní Beenjameen naakookunee, u jíń dibeel abin imuŋku ili. 22Boonee, Unimbɔti dū-u ki fá, ní ki dū Daafiidi ki kāaǹ. Úǹ pu ní u sòon̄ yii: <M ká Daafiidi Jeesee jipɔɔn. Úǹ di fáatì m-pɔbil. U làá dāá ŋá min kɔkɔ m lèe#13.22 B. 21-23: 1 Sami 8.5,19, 10.21, 13.14, 16.12. Dūú ŋmàntī nì Ilan 89.21..>» 23Ní Pɔɔl nìkī ki lī yii: «U-maaliŋu poon ní Unimbɔti yāntì bi màl̄ Ufiil ubɔ ki tīī Isirayeel yab, kii u nín nìn pōoǹ puee: úǹ di sá Yeesu. 24Kí wàatī ú bàńee, Yoowaneesi nìn sòon̄ nì Isirayeel yab kɔkɔ bí fá bi-kpitii kí yàntī bí fàl̀-bi Unimbɔti nyim#13.24 Kpèè Maar 1.4, Luuki 3.3.. 25Ŋyunti ŋun Yoowaneesi nìn làá dóó u-tundee, ní u bí-bi yii: <Ŋma ní ni dàkafī yii m sá ní? Maa sá un ní ni dàkafī yii m sée! Ama ubɔ dòoń man boon, maa kpántì kí bútí u-naataaŋmiii gba#13.25 Kpèè Yoow 1.20, Maat 3.11, Maar 1.7, Luuki 3.16, Yoow 1.27..>
26«Nnabiyaamu, nimbi Abraam maaliŋun biyaamu, nì nimbi binicambi bin fàŋkí Unimbɔtee, timbi ní Unimbɔti dū dinyɔɔbundi nee ki tīiń, tí ká difiil. 27Binib bin kóò Jeerusaleemee nì bi-bɔtiibi kaa nìn béè un ní Yeesu sée, kaa béè Unimbɔti bɔnaatiliibi bɔti tin bi kàaǹ ŋwiŋŋuŋfikaa sá kamaa dalee taapu mun. Bi nín yāntì bi kūū Yeesu puee, bi ŋá min Unimbɔti bɔnaatiliibi nìn sòon̄ ki yóoǹee dee. 28Nì min sá kamaa ní baa ká tin u ŋá ki máaǹ ŋkúmee, bi mēē Piilati yii ú kpɔ̀-u. 29Bi ŋá tin kɔkɔwoooo bi nìn ŋmàn̄ ki síiǹ u-puee, ní bi kpákatìń-u ndɔpuntikaa pu, ki dū-u ki ŋá dikaakulin#13.29 B. 28-29: kpèè Maat 27.22-23,57-61, Maar 15.13-14,42-47, Luuki 23.21-23,50-56, Yoow 19.15,38,42.. 30Ama Unimbɔti fīkitì-u ditaŋkpiilin. 31Boonee, bin nìn nyánní Galiilee ki céeǹní-u Jeerusaleemee nìn ká-u iwiin tikpil poon. Kɔŋkɔnnee, binibee di kíǹ ki sá seeradambi ki lèekī seera u-pu ki tìì samaa. 32«Míǹ pu ní timbi bíi tùkù-ni tibɔmɔntiil yii, dipoondi din Unimbɔti nìn pōoǹ ti-naanjabee, 33u nín fīkitì Yeesuee, u ŋá min u nìn pōoǹee ki tīī timbi bi-naantiibi dee. A lì kii an nín ŋmàn̄ Ilan gbɔŋku poon ayil 2 puee, yii:
<A sá m-Jipɔɔn,
m dàkā díǹ yii man di màl̄-si.>
34Unimbɔti nìn sòon̄ ki síiǹ yii u làá fìkitī-u ditaŋkpiilin ní u-wunti ń taa sūū. U nín nìn sòon̄ puee di sá yii:
M làá dāá tīī-ni tin m nìn pōoǹ Daafiidee,
tin bí circir ki sá tiŋmanee.>
35Míǹ puee ní Daafiidi lī u-gbɔŋku poon laaba Yeesu pu yii:
<Aa làá yàntī a-circir tɔntɔnliu wunti ń sūū#13.35 B. 33: Ilan 2.7. - B. 34: Yees 55.3. - B. 35: Ilan 16.10..>
36Daafiidi yuntiŋuee u nìn sá Unimbɔti tɔntɔnliu ní ki ŋáań min ní Unimbɔti lēē ki síiǹee. U dāa kpíì, ní bi síb́-u ki kɔ́ĺ u-naanjab, ní u-wunti sūū#13.36 Kpèè 1 Bib 2.10.. 37Ama Yeesu un Unimbɔti fīkitèe, úǹ wunti kaa sūū. 38Nnabiyaamu, béémaan yii tin tin ní ti sòoǹ ki tùkù-ni nee di sá, úǹ pu ní ni kpántí deedeedambi Unimbɔti nimbiin. Ni nín nìn nóó Mooyiisi marabee, naa nìn ŋūǹ kí kpántí deedeedambi Unimbɔti nimbiin. 39Ama un yaa fōō Yeesu ki kííyee, Unimbɔti dù u-kpitii kɔkɔ ní kí pɔ̄-u. 40Ní kpèèmaan tiŋan, tibɔti tin Unimbɔti bɔnaatiliibi nìn sòon̄ee ń taa bàń-ni, yii: 41Unimbɔti bí yii:
<Kpeefandambi kpèèmaan,
bàkatīmaan kí wāŋkìmaan!
Di sá yii ni-yuntii nee poon m làá tɔ̄ ditundi diba
din bi yaa láa bíi máafí-ni gba, naa làá fōō kí kííyee#13.41 Kpèè Abak 1.5..>»
42Pɔɔl nì Baarnaabaasi nyáń kukpafidiinee, ní bi mēē-bi yii ŋwiŋŋuŋfikaa ŋun dòońee, bí dāá gíti sòoǹ tibɔti gbanti pu. 43Binib kɔkɔ yāaǹ ki nín kùǹee, Juuda yab nì binicambi bin fōō Juuda yab marabee tikpil nìn nóó Pɔɔl nì Baarnaabaasi, ní bíǹ bíi sòoǹ ki tìì-bi kunyannyaau, yii bí nīn yú deedee ki ŋúb́ diyimɔɔl din Unimbɔti tīī-bee.
44Ŋwiŋŋuŋfikaa dal fātìi bāańee, kitiŋ yab kɔkɔ ŋman nìn pée kóoǹní ní, kí dāá pīlifì Unimbɔti bɔti. 45Juuda yab ká kunipaauee, ní ki kíǹ ki bíi ŋáań Pɔɔl nì Baarnaabaasi ipoompoon, ki bí yii Pɔɔl nín sòon̄ tiŋyee kaa sá míǹ, ní ki sìí-u. 46Ní Pɔɔl nì Baarnaabaasi tùkū-bi ibaamɔn, kaa fāŋkì, yii: «An sá nimbi cee ní ti máaǹ kí péé kí sòoǹ Unimbɔti bɔti. Ama, kii ni nín yíì tibɔti gbanti ki dàkafī yii naa máaǹ dimaŋfal din kaa cáá dikúntilee, an puee ti làá nīn kíǹ ki sòoǹ bin kaa sá Juuda yabee cee ní. 47Kun puee ti-Dindaan nín bí tí ŋá miŋyee dee. Ti-Dindaan bí yii:
<M lēē-si á nīn sá ŋwalifi
kí cùnnì difiil áli kitiŋgbeennyɔkɔ#13.47 Kpèè Yees 49.6..>»
48Bin kaa sá Juuda yabee gbìl̄ mimmee, ní ki bíi fàal̀ ki pàkà ti-Dindaan nyɔɔbundi. Ní bin kɔkɔ nìn sá bin làá ká dimaŋfal din kaa cáá dikúntilee fōō ki kíí. 49Ní ti-Dindaan nyɔɔbundi gbītì kitiŋ gbanti kɔkɔn. 50Ama Juuda yab téé binimpukpaambi bin tɔ́ Unimbɔti marabee nì kitiŋ poon yidambi, ní bi yíkì ki páb́ Pɔɔl nì Baarnaabaasi áli ki jìn̄-bi bi-tiŋki pu. 51Ní Pɔɔl nì Baarnaabaasi gbáfì bi-taaŋi kpɔŋkpɔm#13.51 Kpèè Maar 6.11., ní ki búntì Ikooniyum. 52Ama bin nìn fōō Yeesu ki kíí Antiyɔɔsi tiŋkinee nìn gbí dipɔɔpiŋkpaandi nì Circir Fam.
Nke Ahọpụtara Ugbu A:
Actes 13: BASSARDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
BIBLE EN N'TCHAM (Bassar) © Alliance Biblique du Togo, 2013.