Actes 12
12
Bi kūū Yakubu ki pīiǹ Peetroo sarka
1Ŋyunti gbantee, ubɔti Eeroodi kíĺ ki bíi sàantí Kriisitoo yab biba, 2ní ki yāntì bi dū kitàataajiki ki kūū Yakubu un sá Yoowaneesi maanee. 3U ká yii an ŋān̄ Juuda yab ceeyee, ní u yāntì bi cúú Peetroo mun. An nìn sá iwiin in poon bi ŋmóò kpɔnɔb bin baa ŋá ŋkpɔnɔnyɔkɔee ní#12.3 Kpèè Disa 12.1-27.. 4Bi cúú-u ki tɔ́ sarkanee, ní ubɔti lēē asoojakiti anaa, dikitil kamaa cáá soojab binaa, bí nīn cīití-u ki kpántí. U là yii, bi yaa jíń Dilákatil jiŋaaliu ki dóòyee, ú cáań-u samaa nimbiin kí sòoǹ u-bɔti. 5Ŋyunti ŋun Peetroo nìn bí kusarkadiinee, Kriisitoo nikitil nìn bí ki mèé Unimbɔti u-pu, kaa gbèentí.
Ntuun nyántì Peetroo kusarkadiin
6Kutaa ń wúntí Eeroodi ń cáá-u ibɔsoon samaa nimbiinee, kunyeeuee, Peetroo nìn sáká soojab bili kansikin ki dɔ̄ ki gèeǹ. Bi nìn bóob́-u ikusaka ili, ní soojab bili yú kipunyɔkɔpu ki cí kusarkadii. 7Kpalaayee, Unimbɔti tuuŋŋu ŋubɔ dɔ́miń, ní kusarkadiin wál̀ nyáka nyaka. Ní ntuun fáá Peetroo takakal ki fīntì-u, ní ki bí yii: «Yīkì malaa!» Ní ikusakee cúu fɔ́fì u-ŋaliiyin ki lítì. 8Ní ntuun bí yii: «Gbìn̄ a-dambalau kí táká a-naatakaŋ.» Ní u ŋá míǹ. Ní ŋu gíti bí yii: «Dū a-satau kí pèen̄, kí nīn nóó-mi.» 9Ní Peetroo nóó-u ki nyánní kusarkadiin, kaa nyí min ntuun bíi ŋáańee sá tibɔŋman. Úǹ nìn dākafì yii an sá kudamintiiu ní. 10Bi jítì soojapeekaabi pu ki tin jítì bililiitiibi mun pu, ní ki dūu bàn̄ tikúti punyɔkɔki kin túĺ kitiŋinee. Kipunyɔkɔee cúu pīitì ki-ba bi-nimbiin, ní bi nyáń ki tākaǹ didandi diba pu. Kpalaayee, ntuunee yíkì Peetroo cee.
11Niinee ní Peetroo béè tin bāań-uee ní ki bí yii: «Kɔŋkɔnnee, tiŋman, m nyí yii ti-Dindaan di túnní u-tuuŋŋu ŋú dāá nyāntí-mi Eeroodi ŋaan nì tin kɔkɔwoooo Juuda yab bàà cí kí ŋá-mee.»
12U yúl̀ ki dākafèe, ní ki nín dòoń Maarii, Yoowaneesi un bi páaǹ diyindi yii Maarkee na dumpu. Niin ní binib tikpil nìn kpáfì ki bíi mèé. 13U bàn̄ ki fáá kunaakoou punyɔkɔ, ní utɔntɔnli ubɔ, u sá unimpu bi yíì Roodee sútìń kí pīlifì. 14U béè Peetroo neenee, ní an mɔ́ɔkiǹ-u. Ú bàà pìitī-uee, ní u sáǹ ki cūtìi lī yii Peetroo yú kipunyɔkɔpu. 15Ní bi bí-u yii: «A wáatì níii?» Ní u bí yii: «An baasii sá ibaamɔn ní!» Niinee ní bi bí yii: «An làá nīn sá Unimbɔti tuuŋŋu ŋun cí-uee ní!» 16Ŋyunti gbantee, Peetroo pée gbíntìi fátí. Bi cúu pīitì ki ká-uee, ní ki bākatì sèeee. 17Ní Peetroo dū u-ŋal ki téefì-bi yii bí ŋmīĺee, ní u máafì-bi Unimbɔti nín nyántì-u kusarkadiin puee. Ní u bí-bi yii: «Cùú tùkùmaan Yakubu nì nnabiyaamu mun kíǹee.» Ní u nyáń ki búntì laaba mun. 18Kutaa wúntèe, soojab pɔbiliŋ bíil̀ tikpil, ní bi bíi bàlifī tɔb yii: «Ba di nín ŋá Peetroo dee?» 19Eeroodi tú bí nyàab̀-u, ama ní baa ká-u. Ní u bí yii bí bàlifì soojab tibɔti, ní ki pú nsan bí kpɔ̀-bi. Míǹ boonee ní Eeroodi yíkì Juudee ki cūtìi kāl̀ Seesaaree ŋyunti ŋubɔ poon.
Eeroodi kúm
20 Eeroodi nìn fōō Tiir nì Siidɔn yab pu diŋuul, ní bíǹ kpáfì dicilpu kí cùú ká-u. U-tiŋkin ní bi nìn tūntí tijin ki cāabìń bíǹ cee. Míǹ puee, bi píí ubɔti Eeroodi cindin kpiliu Blaastuusi kubɔɔtiiu ki wāatì, ní ki cūtìi gbāam̀ ubɔti Eeroodi. 21Ŋwiin ŋun bi nìn síiǹee bāańee, Eeroodi pēeǹ u-beebɔkutil ki kā u-beejal pu ki bíi sòoǹ nì bi tibɔti. 22Ní samaa bíi kūuntí yii: «An sá unimbɔti ubɔ di sòoǹ, an kaa sá unil#12.22 Dūú ŋmàntī nì Eesee 28.2.!» 23Dicilpu niin ní Unimbɔti tuuŋŋu ŋubɔ cáań iween ki tɔ́ u-pu, kun puee waa tīī Unimbɔti tinyool. Ní akoosibil aba kɔ́ u-ni ki ŋmɔ́ ki kūū-u#12.23 Dūú ŋmàntī nì Dani 5.20..
24Ŋyunti gbantee, Unimbɔti nyɔɔbundi mɔ̀tīi gbìtī, ní bin fòol̄ ki kíikée wíiŋŋu gbēentí. 25Baarnaabaasi nì Sɔɔl dóò bi-tuuŋŋi Jeerusaleemee, ní ki fātìi gítìń, ki kpáaǹní Yoowaneesi un bi páaǹ diyindi yii Maarkee.
Nke Ahọpụtara Ugbu A:
Actes 12: BASSARDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
BIBLE EN N'TCHAM (Bassar) © Alliance Biblique du Togo, 2013.