San Juan 19
19
1Kuthimejan Pilato kuetuꞌan bintja na̱ Jesús. 2Ko xi soldado kuaa xa ntha nchaꞌa ko binchekjinga xa jaa Jesús ko binchengaa xa naa luntho jatse suji. 3Kuthimejan binthekunchieꞌen xa ngain Jesús ko kjuanua xa ko ndache xa:
—¡Kainxin nchaꞌon darichon jaꞌa, thi Rey thetuꞌen ni judío!
Ko xrangii xa thon ngakon Jesús.
4Kuthimejan Pilato bachrje inaa, ko ndachro:
—Tsjexin ra, jaꞌan bantsje xa nthiꞌi, ixin jaꞌan xruꞌin thi jianꞌa dithja ngain xa.
5Ko bachrje Jesús ko jichjinga ntha nchaꞌa dika̱a̱ xa ko jitsaa luntho jatsje. Kuthimejan Pilato ndachro:
—Tsjeꞌe ra, nthiꞌi jii xa.
6Are bikon xi dinthenda niꞌngo ko xi daana thetuꞌen icha xi daana binthekuyao xa ko suji ndachro xa:
—¡Thenganito ra ntha cruz! ¡Thenganito ra ntha cruz!
Ko Pilato ndachro:
—Sathjiꞌo ra ko jaꞌa ra thenganito ra ntha cruz, ixin jaꞌan xruꞌin jianꞌa dithjaa xa.
7Aro chujni judío ndachro na̱:
—Jaꞌan ná chunda ná naa ley thi jitaxin ixin xii yaa rugunda seꞌen xa, ixin ndachro xa ixin jeꞌe xa Xeꞌen Ndo Dio xa.
8Are Pilato kuiꞌin jiꞌi, jeꞌe icha xraon. 9Jeꞌe bixiꞌin inaa ngain nchia nchexin jie̱ ko banchiangiꞌi Jesús:
—¿Thinoo rajnaa?
Aro Jesús ixruꞌin ndachro.
10Ko Pilato ndachro:
—¿Unda dathenaꞌa? ¿Anuaꞌa ixin jaꞌan chunda juachaxin tsetuan chujni tsanchrjanda na̱ o tsenganito na̱ ntha cruz?
11Kuthimejan Jesús ndachro:
—Jaꞌa, xruꞌin juachaxin ruarichunda ixin sincheꞌe jie̱ ngajin, ja̱ Ndo Dio ruchjaꞌa juachaxin. Mexinxin icha jié jianꞌa bincheꞌe thi chujni bajon na ngajin ke thi jianꞌa rincheꞌe jaꞌa.
12Are Jesús juexin nichja jiꞌi, Pilato kjuee kexreen runcheꞌe ixin rukanchrjanda Jesús, aro chujni judío kuyauthe na̱ ko ndachro na̱:
—¡Ja̱ tsanchrjanda Jesús, jaꞌa jeꞌa naa thi jian xrakao César, xi emperador! ¡Kexeꞌo chujni ndachro ixin kjan rey, chujni mee kjan naa thi ningakuꞌen xi emperador!
13Ko are Pilato kuiꞌin jiꞌi, jeꞌe bachrjekaꞌo Jesús ko betaꞌa ngain xintaon nchexin jie̱, ko ngigua hebreo diꞌin Gabata, ko ruchro thi dikea na̱ xro. 14Ko jiꞌi kuꞌen inchin ngusine nchaꞌon ko nduexin urukii thi kiai diꞌin pascua. Kuthimejan ndachro Pilato ngain chujni judío:
—¡Nthiꞌi chunda ra thi rey thetuꞌan ra!
15Aro jeꞌe na̱ kuyao na̱ ko suji ndachro na̱:
—¡Thjioꞌo ra! ¡Thjioꞌo ra! ¡Thenganito ra ntha cruz!
Ko Pilato ndachro:
—¿A jaꞌan tsenganito ntha cruz thi Rey thetuꞌan ra?
Aro xi daana thetuꞌen icha xi daana binthendachro xa:
—Jaꞌan ná chundaꞌa ná inaa rey, jeꞌo César, xi emperador.
16Ko Pilato ndabajon Jesús ngain na̱ ixin tsenganito na̱ ntha cruz, ko sabikao na̱.
Jesús kuenganito na̱ ntha cruz
(Mt. 27:32-44; Mr. 15:21-32; Lc. 23:26-43)
17Ko Jesús bachrjexin nthi̱ꞌa̱ ko jiyama ntha cruz ko sabikao na̱ ngain thi banchegiꞌin na̱ Ntha Luro Jaa Chujni, ko ngain ngigua hebreo diꞌin Gólgota. 18Nthi̱ꞌa̱ kuenganito na̱ Jesús ngain ntha cruz. Ko kai iyoo chujni kuenganito ntha cruz, naa no rakjunxin ko inaa no rajianxin, ko Jesús beꞌe ngusine. 19Ko Pilato kuetuꞌan benganito ngadathexin jaa Jesús naa thi jitaxin unda jinganito ntha cruz, ko ndachro:
“Jesús thi juixin Nazaret, Rey thetuꞌen chujni judío.”
20Ko tsjé chujni judío tsjeꞌe na̱ thi betaxin nganito ntha cruz ixin thi kuenganituxin na̱ Jesús ntha cruz jii chrika rajna Jerusalén, ko dikji̱nxin na̱ ngigua hebreo, griego ko latín. 21Mexinxin xi daana baketuꞌan ngain icha xi daana ndachro xa ngain Pilato:
—Rukentaxinꞌa “Rey thetuꞌen chujni judío”; icha jian rukentaxin “Thi ndachro ixin jeꞌe Rey thetuꞌen chujni judío.”
22Aro Pilato ndachro:
—Thi jaꞌan kuentaxin, jañaa sithuꞌe.
23Are xi soldado juexin kuenganito xa Jesús ngain ntha cruz, noo xi soldado kunchjeyeꞌe choo xa lunthue Jesús. Kuthimejan kuaa xa luntho jini jingaa, ko luntho mee dikjaonꞌa na̱ luntho ixin nakua dika̱a̱ na̱ luntho. 24Mexinxin xi soldado ndache choo xa:
—Tsinchjeꞌa ná luntho, icha jian rutsuntaon ná ixin sukon ná kensen sacha ko sithuꞌe luntho.
Jañaa bikuꞌen thi jitaxin ngain Xruen Ndo Dio thi ndachro: “Chjeyeꞌe na̱ lunthuna, ko tsuntaon na̱ ixin kensen rugithuꞌe luntho.”
25Ngaka ntha crue Jesús beꞌe janee, ko nchri choo janee, ko María, thi kjui chriꞌi Cleofas ko María Magdalena. 26Ko are Jesús bikon janee, ko ngaka jan tajingathjen naa ni bakao Jesús thi anto bathjueꞌe. Jesús ndachro ngain janee:
—Yaa richunda xaꞌan.
27Kuthimejan Jesús ndachro ngain thi anto bathjueꞌe:
—Yaa chunda janaa.
Ko are juexin nichja Jesús, jeꞌe xi jiꞌi bayée jan inchin janee ko sabikao jan nchianduꞌa xa.
Beꞌen Jesús
(Mt. 27:45-56; Mr. 15:33-41; Lc. 23:44-49)
28Ko are ujuexin jiꞌi, Jesús ubenuꞌe ixin kainxin ukuꞌen, ko jaꞌin xethjaxin thi jitaxin ngain Xruen Ndo Dio, ko are mee Jesús ndachro:
—Beꞌen na jinda.
29Nthi̱ꞌa̱ beꞌe naa chi beria vino san dikjan inchin vinagre, kuthimejan biruee xa naa thi datse jinda inchin chjon, ko xrangi xa vinagre ko kuenkjin xa kon naa nthaa diꞌin hisopo ko tsiin xa nui ngain ruꞌa Jesús ixin rugiꞌi. 30Ko Jesús kjuengayaxin vino san mee, kuthimejan ndachro:
—Kainxin ukuꞌen.
Ko kuinsee jaa ko ndabeꞌen.
Ntha nthakuin Jesús binchegathudoꞌo na̱ naa lanza
31Ko nduexin urukii kiai diꞌin pascua, mexinxin chujni judío binaoꞌa na̱ ixin rugithuꞌe kanio chujni mee nganito ntha cruz, ixin nchaꞌon mee, naa nchaꞌon anto banchesaaya na̱. Mexinxin ndache na̱ Pilato ruketuꞌan ixin rukunthai xa nthatsao chujni ixin icha daka ndaruginthegeꞌen na̱ ko ruginthjianxin na̱ na̱ ngain ntha cruz. 32Kuthimejan xi soldado binthekji xa ko kunthai xa nthatsao thi saꞌo benganito ntha cruz, kuthejan thi yuixin beꞌe chrikee Jesús. 33Ko are binthekunchieꞌen xa ngain Jesús ko bikon xa ixin undadigeꞌen, ikundaiꞌa xa nthatsao.
34Aro naa xi soldado kuenchria xa lanzee xa ngain ntha nthakuin Jesús ko bachrjedoꞌo jni ko jinda. 35Thi bikon jiꞌi, nichja thi ndua bikon. Ko jeꞌe nuꞌe ixin jinichja thi ndua, ixin jaꞌa ra kai sithikaon ra. 36Ko kain jiꞌi kuꞌen ixin xethjaxin thi jitaxin ngain Xruen Ndo Dio, thi ndachro: “Xruꞌin ntha lurue kunthai na̱.” 37Ko kai jii inaa thi ndachro ngain Xruen Ndo Dio: “Sikon ra thi binchegathudoꞌo na̱ lanza.”
Xrabaa Jesús
(Mt. 27:57-61; Mr. 15:42-47; Lc. 23:50-56)
38Kuthimejan José, thi juixin rajna Arimatea banchieꞌe juachaxin Pilato ixin runcheganianxin Jesús ngain ntha cruz, ko Pilato bajon juachaxin. Mexinxin binchegania Jesús ko sabikao. Ko José kjui naa chujni bagithikaon Jesús, aro jeꞌe binaoꞌa ixin rukunuꞌe chujni ixin baxraguen ni judío. 39Kai Nicodemo, thi kjui binichjee Jesús naa thie, bijikao inchin naa kan ko the kilo mirra ko áloes digithekjan. 40Ko José ko Nicodemo tse na̱ Jesús ko kuensia na̱ kunixin manta ko bisiakauxin kayui ka xrajni, jañaa inchin ncheꞌe chujni judío are tjabaa choo na̱. 41Ko thi kuenganituxin na̱ Jesús ntha cruz, nthi̱ꞌa̱ beꞌe naa jngi ntha thuchjuin, ko ngain jngi mee beꞌe naa thjao jichrjadoꞌo, thi xra xruꞌin chujni dixrabaa. 42Ko ixin uchiaon rukexiꞌin nchaꞌon nchejugaꞌa chujni judío, mexinxin nthi̱ꞌa̱ kjuabaa na̱ Jesús, ixin chinthi mee chiaon beꞌe.
Nke Ahọpụtara Ugbu A:
San Juan 19: plsNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2017, Wycliffe Bible Translators, Inc. All rights reserved.