KEYUM KERO 12
12
Shédíke Abramme Tomname
1 Ruutum bí Abramme poto, “No agíke amolok, nok abu ekumlok, nok edung-eranglok lenla; ngok among lengkannamlo gílangka. 2Nom ngo botteruna opín kope imoyé. Ngo nom utepooroem ruulíkla, nok amínem bottemoyé, depe ikolok no utepooro leríng amipe iyé.
3“Séko nome utepooro políkyédí,
dem ngo utepooroem ruulíkyé.
Delokke séko nome péyédí,
deme ngo péyé,
delokke nokkelok tani among sokke opín kídí tabunge,
ngok utepooroem paayinyé.”
4 Ruutum ke pokampe Abrambí gílento delokke Lotkom gímín geto. 5Abrambí bíkke mime Sarai melang bík bíro oo Lotme delokke buluke erang tabung emlang Haranlo ami paanam takamem Kanaan amope gílenboto.
Edílo bulu Kanaanlo píítodí, 6Abram bulu among raadang delok gílang, Shekem ayirlo duuna Moreh lokke kumsuko esing delo pííto. Delo longe delo Kanaan ami kídíe among delo yébomdo. 7Delo Ruutum bí Abramme lengkan sudola poto, “Nok otíng-oyinlo sim among sim ngo biyé.” Depeila Ruutum bí lengkansunam legape Abram delo rungguko Ruutum keepe píbito. 8Delokke bí Bethel lokke sanggodan díítumlo gíto, delokke bík tombuem Bethelke anggodan delokke Ai doolungke sanggodan pénsamlo holíkpala, Ruutum keepe rungguko píla, Ruutum ke amínem yidgeto. 9Delokrongem Abram bí among delokke sokkodan, Negeb danpe entoku.
Ijipt Amolo Abramke Yéname
10Kanaan among delo dírí-kenoe kato. De yagoyape ila Abram bulu Ijipt amope gíto. 11Ijipt amolo píngaduem bík mime Saraime poto, “No mime kamponako. 12Edílo Ijipt ami kídíe nom kaayédí, bulu ‘bíkke ménge,’ emla ngom mokala nom turmoyé. 13Depeila no ngokke bírme emla manmílo, nok legape ngom turmola aiyope ngom kaarík-tatríksuyé.” 14Abram buluke Ijiptlo píírodem, Ijipt ami kídíe Saraime kamporupe kaato. 15Edílo Ijipt lokke ruutum kídíe kaatodí, delo Pharaohme Saraike kampodem bulu popala, mimedem Pharaohke ekum delo langaato. 16Mime delok legape, Pharaohbí Abramme ai-kampope kaarík-tatríkla, gooru, mér sobén, gado delokke béérang kídíemlang uut simon daadiloope bigulto. 17Idola Saraike legape Ruutum bí Pharaoh melang roja ekum delokke ami kídílo pesorunam kinamko melíkto. 18Delo Pharaohbí Abramme tomla sipe poto, “Kape no ngome sikepe ikan? Mimesi nokke ménge emla kape ngom pomatone? 19No kape, ‘Bí ngok bírme,’ emla ngome mimepe lamokan? Menape nok mimesim laasula no gígétoku.” 20Delo Pharaohbí ami kídíem políkla, bíkke mimedemla ato-siro tabudem ila bím gílen motoku.
Nke Ahọpụtara Ugbu A:
KEYUM KERO 12: adiBSI
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.