San Marcos 11
11
Jerusalén phobor ee Jesús dubimatarr
(Mt. 21:1-11; Lc. 19:28-40; Jn. 12:12-19)
1Jesús ich khapeen dʉi mamua durrsĩ Olivo anʉm gaai naaimajim aajem, phobor numí ãba dakha nʉm khĩirphee. Mag phobor numí ãba dakha narr thʉ̃r, ãb Betfagé ajim, maagwai ãbakhai Betania. Maig durrsĩ gaai nʉmua ich khapeen numí thʉ̃rkha auwi pʉyaagpamua magjim aajem:
2—Cha maach khĩirphee phobordam sim ee ereubaadet ajim anʉm. Nau chi phobor ee dub nʉm aig pãrau burrodam pa gaai jʉ̃ kherʉm ooimaju. Mag burrodam gaai chan agtha ni ãbmuajã waaidʉba khitʉm. Ma pãrau ẽerwia aipidut ajim anʉm. 3Ãbmua khãijã beewi pãachig, “¿Khanthee jãg nemchaai pãrau ẽer arraag ẽkha nʉ?” a jeeubaawai, sĩi ithũu irig, mʉ igwia, mua ig chiraawaita arrum, mamʉ deeu ũmaai jopcha deen beeju a jaaubat ajim anʉm.
4Maimua chadcha ereu phobaadewia, amachig jaautarrjo burrodam khʉd bigaau puertdi dub nʉm dakha o jʉ̃ kherʉm oobaimaawai, sĩi ẽer auwimajierram aajem. 5Magbaawai aig õor narr khʉʉnau amag, —¿Pãar khanta jãig jãg nʉma, jamag pãrau chikham nemchaai ẽer arrú? ajierram anʉm.
6Magbaawai Jesuu amachig jaaupʉitarrjo jaaubaawai ʉdʉraa warag amag arrpijierram aajem. 7Mag chadcha warrwi Jesús sim aar pabaimaawai chi khapeenau amach khajũa ʉ̃r joothʉ jũajemua chi burro phõpá ʉ̃r theer sĩujierram aajem. Magbaawai Jesús ag ʉ̃r waaidʉbaadejim aajem. 8Magbaawai õor khapan i dʉi wedurarr khʉʉnau amach khajũa ʉ̃r joothʉ jũa narr ẽerkhanaa, i maju khʉd ee theerkhamam dʉi jũrr ãaur khʉʉnaujã khʉd bigaau papiujom bʉbreunaa, agjo i maju ee werphogkha majierram aajem.
9Mag i mam dʉi õor pom i na pos wetmaawai i ẽudeejã agjo khapaana pʉʉrthʉmajim anʉm. Mag õor pom sĩi wetum khʉʉnau serereugmamua mag naajim anʉm:
“Ʉucha abarm Ẽwandam, ich mʉʉta pʉchdeu pʉch jũrr pʉibarmʉu. Ijom khʉʉn chan chukhum. 10Pua maar Reikhamkhĩir pʉiju a jaaujerr chadcha pierrumgui” aajeejim anʉm. “¡Ʉucha abarm Ẽwandam! Warr jooi David reikha sĩerrjo ichta jũrr Reikhaju khaphʉ nʉm gaaimua, pʉrʉg ʉu abarm anʉm. Ʉ̃gtharm magwe onee aju aai nʉmgui” aajeejim anʉm, Jesús tho iekha nʉmua.
11Mag wetumua Jerusalén phobor ee barimajierram aajem. Mag barimawia, Aai i jeeujem diig mawia, ag ee dubwia, dijã thumaa eerpa phʉʉrdʉpʉiwia, deeu oberbaadejim aajem. Mag oberbaadewia ya edau kheeuraa aadem ee Betaniaag petajim aajem, ich khapeen doceem dʉi.
Jesuu higo phuapitarr
(Mt. 21:18-19)
12Ag noram mag phobor Betania anʉm eemua Jerusalenag wetumua Jesús jãsoo aadejim aajem. 13Mag i jãsoo nʉrrʉmta warpmua pabʉ higo anʉm epõo khʉd bigaau dʉnʉm oo athajim anʉm. Magbaa aar dakha oon majim aajem, ag gaai chi nemjõ ya chi wawam nʉmpii awia. Pari ag chee jaar khaba arr aawai ni por ãbjã ag gaai oobajim aajem. 14Mag ichdeu ag gaai por ãbjã ooba abaawai chi pabʉʉgta wounagamjo, —Pʉch jãg sim gaaimua mʉg atagjã ich jãg cheba sĩerrajugui ajim anʉm.
Irua mag iekhatarrjã i khapeenau ũrjierram aajem.
Aai i jeeujem degmua Jesuu õor jʉrkhʉʉitarr
(Mt. 21:12-17; Lc. 19:45-48; Jn. 2:13-22)
15Maimua deeu Jerusalén phobor ee barchewia, Aai i jeeujem di aar manaa ooimaawaijã, sĩi Aai i jeeujem degta nem peerwai õor pom pos sereu wejom ooimajim anaabá. Magbaa Jesuu mag nem per narr khʉʉn thum dawag jʉrkhʉʉinaa ag ee õrag phatkhon cambie narr khʉʉn mes dʉi dubur per narr khʉʉn mespa jẽkhʉt sĩepʉimajim anaabá. 16Magnaa tag iwiir ãbamʉgjã Aai i jeeujem deg nem inag dʉi dichpibajim aajem. 17Maimua amag, —Pãrau khaphʉ naabá ajim anʉm, Ẽwandamau ich iek phã pʉarr gaai, “Mʉg diin sĩi durrpierram khʉʉnau beewi ag ee Aai i jeeujem diiu” a sim. Mag simta pãachdeuta ag ee nem parhẽpag per nʉmua sĩi chikham khũguurjem dikha wai naabma a iekhajim aajem, ich Jesuu.
18Jesuu mag iekhabarm phadnaan pornaanau Moiseeu Ẽwandam iek phã pʉarr jawaag chi machnaan dʉimua ũrbaawai, amach appai biirdʉwi, iekhawi, “Jãga akhiin maadeu jãg Jesús thõopʉikhamgui” anaajim aajem. Mamʉ irua nem jaau sim ũrwi thumaam khʉʉnau i igar narr aawai ũmaai deeu ãsie khĩirjuajeejim anaabá, mag i igar nʉm khʉʉnau jũrr amach dʉita meeukhaju khĩirjuwia. 19Mamʉ amau mag khĩirju nʉm ee, ya edau kheubaadee Jesús ich khapeen dʉi mag phobor eemua warag amachta chawag wetjim aajem.
Jãga Ẽwandamag jeeuju aai nʉ
(Mt. 21:20-22)
20Maimua ag noram deeu Jesuu ich khapeen dʉi ich ag khʉd ee wetumua oowai mag irua iekhatarr higo sĩi chi khaar aram magwe phuhu thʉnaajim anʉm. 21Mag phuu thʉnʉm oobaawai Pedroou, —Maestro, pʉde oobá, pua tag chepiba jaautarr higo bʉjã sĩi phua thʉnʉmgui ajim anʉm.
22Magbaawai thumaam khʉʉnagta Jesuu magjim aajem:
—Pãach nem wawaag iekhaawai chadcha Ẽwandamau pãachdeu jaaubarmjo apiju khĩirjunaata iekhabat ajim anʉm. 23Mua chadcha pãrag mag chirʉm: Ãbmua khãijã durrsĩigta wounagamjo iekhabaawai chadcha ichdeu jaaubarmjo ich ipierraa aju khĩirjunaata “Jãigmua mawia jũrr phũas eeta dʉnʉʉubaimá” akhiin, chadcha Ẽwandamau ichdeu mag iekhabarmjo apijugui ajim anʉm, ichdeu mag iekhabarmjo Ẽwandamau chadcha magpiju khĩirjunaata iekha sĩewai.
24Maimua ĩchab, —Pãachdeu Ẽwandamag nem ig nʉm jeeuwai chadcha irua pãachig deeju khaphʉnaa ya pãach jua ee wai nʉmjota jeeumʉn, magan chadcha irua pãrag pãachdeu nem ig nʉm deeb khaba deejugui ajim anʉm. 25Maimua pãachdeu Ẽwandamag jewaagpaawai pãach garmua wa pãach khapeenau khãijã pãach dʉi khaigba nʉm khai, agdaujo perdón jeeuwia, tag magʉm iek igba warag khĩir okhoopʉiwia, magba arrjo am dʉi dau parii abat ajim anʉm. Pãrau magmʉn ĩchab maach Aai ʉ̃gthar chirʉmʉgjã pãrau pãach pekau chugpaapi jeeubaawai irua chugpaapʉiwia tag pãach dʉi magʉm iek bʉ̃ʉrjã igbajugui ajim anʉm. [ 26Pari pãrauta pãach khapeen wir aig perdonaabam chan, maach Aai ʉ̃gthar chirʉmuajã ich agjo pãar pekau chugpaabamgui a jaaumajim aajem amag.]
Jesús jua theeg
(Mt. 21:23-27; Lc. 20:1-8)
27Maimua deeu Jesús Jerusalén phobor ee barchewia Aai i jeeujem deg dubjim aajem. Mag dubwi agtha ierr simta, i aig phadnaan chi porkha nʉm khʉʉn beejierram aajem, Ẽwandam iek Moiseeu phã pʉarr jawaag ithee chi machnaan dʉi judionaan Asamblea eem khʉʉnpa. 28Makhʉʉnau beewia irig, —¿Khai thowiata jãg mʉig nem per narr khʉʉn pua dawag jʉr werppʉijĩ? ¿Khaíuta jãg pʉrʉg pʉchta nem iek theeg apijĩ? Marag jaaubá aichejierram anʉm irig.
29Ichig mag jeeubaicheewaita jũrr ich Jesús garmua amag, —Magan muajã ĩchab pãrag jeeu ookhimgui ajim anʉm. Mua jeeubarm pãrau mʉrʉg jaaumʉn, magan muajã ich agjo pãrag jaauju, khai thowiata mua jãg nem wau chitʉ́. 30Maimua ichdeupai, Nacha mʉrʉg jaaubat ajim anʉm: ¿Khaíuta Juan pʉijĩ õor por choo nʉrramkhĩir; Ẽwandamauta pʉijĩ wa sĩi mʉg jẽb gayam khʉʉnau ajĩ? ajim anʉm.
31Amachig mag jeeubaawai sĩi warag jaaujujã khaugba, amach wir aigpai iyʉʉ nʉmua, —Maadeu irig, “Juan õor por choomien Ẽwandamauta pʉijim” akhiin, jũrr irua maachig, “Magʉmta, ¿khan jãgwia pãrau irua jaau nʉrrarr ʉkhabajierrá?” ajugui ajim anʉm. 32Wa magba maadeu irig, “Juanan sĩi õrau pʉiwiata jãg nʉrrajim” akhiinjã, jũrr phoborpienta maach dʉi meeukhajugui ajim anaabá, amau chadcha Juan õor por choomieu Ẽwandam iekta jaau nʉrraajerr khaphʉ narr aawai.
33Mag amach appai jaauju khaugba iyʉʉ naawia warag Jesuug, —Marau pod jaauju khaugbamgui ajierram anʉm.
Magbaawai jũrr ich Jesús garmua amag, —Mua pãrag nem jeeutarr pãrau mʉrʉg jaauba aawai muajã pãrag jaaubamgui ajim anʉm, khai thowiata mua mʉg nem wau chitʉ́.
Nke Ahọpụtara Ugbu A:
San Marcos 11: noaA
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2011, Wycliffe Bible Translators, Inc. All rights reserved.