San Marcos 10
10
Jesuu jaauwai pod dich ʉʉi pʉaju khabam aajem
(Mt. 19:1-12; Lc. 16:18)
1Jesús mag Capernaum phobor eemua deeum durr Judeaag mawia jũrr dojã Jordán igaau edau obeerjemʉg petajim aajem. Mag amach ee pabaimam khaug auwi ich aig õor pooma pos aicheewai ichdeu ag na õrag jaaujerrjo mag õor pom thʉnʉmʉg Ẽwandam iek jaaubaadejim aajem. 2Mag nʉm ee fariseonaan i aig beejierram aajem. Makhʉʉnau juau ogthom Jesús imeraa pʉr awaag awi irig jeeumamua, —¿Chadchata pua oowai maach emkhooinau dich ʉʉi pʉaju aai nʉ wa pʉaju khaba nʉ? a jeeujierram anʉm.
3Ichig mag jeeubaawai jũrr ich Jesús garmua amag, —Moiseeu Ẽwandam iek phã pʉarr gaai, ¿khan a jaau sĩwi? ajim anʉm.
4Magbaa amachdeu, —Moiseeu jaauwain maadeu dich ʉʉi pʉaju aai nʉm a jaau pʉajim aajem. Sĩita ʉʉi pʉagpaawai wajapha ẽsap phãnaa ag gaai, “Ya mua pʉ pʉa chirʉm” a jaauju aai nʉmgui ajierram anʉm.
5Magbaawaita Jesuu amag, —Pãade khĩu ũrbat ajim anʉm. ¿Pãrau khaphʉ nʉ, khan gaaimua Moiseeu mag phã pʉajĩ? Irua mag phã pʉatarran, pãach jʉ̃g theeg sĩsidʉm gaaimuata mag phã pʉajimgui ajim anʉm, chadcha. 6Pari warrgarwe ich Ẽwandamau maach ompaawaijã emkhooi ʉʉi dʉita ompaajimgui ajim anʉm. 7Magtarr aawaita emkhooi ich ʉʉi dʉi pabaademʉn ich dennaan kha ogdʉajemgui ajim anʉm, ya ich ʉʉi dʉita ãba nʉrraag. 8Ya magbarm aigmuan warran agdaujo amach appai naajerrta õor ãbpaimjo ich mag nʉisiejem. Ya mag nʉisim chan ya tag amach ãhãbdo nʉrrjee aba, õor ãbpaimjo nʉisiejem. 9Mag warrgarwejã ich Ẽwandamauta mag papitarr aawai pod iwiir ãbmuajã i ichaaur awi dich õor pʉaju khaba nʉmgui ajim anʉm Jesuu amag.
10Maimua magtarr khur deg paaukhawijã chi khapeen garmuata deeu ich ag iekpai irig jeeu naajim anʉm. 11Mag ichig jeeubaawaita Jesuu amag, —Ich ʉʉi pʉawia deeum ʉʉita au simʉn magan pekauta wau simgui ajim anʉm, ich ʉʉi chaar khabam dʉita mag sĩewai. 12Wa magba chi ʉʉirau khãijã ich jaai pʉawia deeum emkhooita aumʉn magan agjo pekauta wau simgui ajim anʉm, ich jaai chaar khabam dʉita sĩewai.
Jesuu chaain kõit iekhatarr
(Mt. 19:13-15; Lc. 18:15-17)
13Mag nʉm ee õrau Jesús aig amach chaain waibee thʉnʉisijim aajem, am gaai pʉrnaa am kõit Ẽwandamag jeeumkhĩir. Pari mag jũrram khʉʉnau chaain waibebeekham oowi jũrr chi Jesús khapeenauta chi aibee nʉm khʉʉnag meeurrau sĩujierram aajem, tag aibeepimaaugau. 14Mamʉ amau mag õrag meeukha iekha nʉm oobaawaita Jesuu jũrr amachigta agjo meeurraunaa, —Ideu õrag amach chaaindam mʉ aig waibeepibat ajim anʉm. ¿Khanthee pãrau amag beepiba jaau nʉ? Chi jooin awiajã chamʉ khʉʉn chaainjo mʉ iek ʉkhakharrso ʉkha nʉm khʉʉnta mʉg jẽb gaaijã ʉu wenʉrrawia ʉ̃gtharjã onee wenʉrrabajup ajim anʉm. 15Mamʉ chi ʉ̃gthar oberju khĩirju nʉm khʉʉnaujã mʉkhʉʉn chaain denjo ʉkhabam chan pod oberbamgui ajim anʉm.
16Mag iekhapʉinaa, Jesuu am dakhĩir warag chi chaain ich jua ee jiirkha aunaa, am por ʉ̃r jua ausĩunaa, am kõit wajapha Ẽwandamag jeeumajim aajem.
Woun ãb phatkhon paraam Jesús dʉi iyʉʉ athurtarr
(Mt. 19:16-30; Lc. 18:18-30)
17Maigmua Jesús chawag maagpam ee, woun ãb i aig khaphig beejim aajem. Mag beewia i khĩirphee kanieu phõbkhachewia irig magchejim anʉm:
—Maestro, pʉʉta chadcha maestro ajapham aawai pʉrʉg jewaan beejim: ¿Mua khani jãgju aai chirʉ́ ʉ̃gthar oberaag? Mʉrʉg jaaubá ajim anʉm.
18Magbaawai Jesuu irig, —¿Khanthee pua mʉrʉg chi ajapham a sĩ? Õor ajapham chan chukhum. Ajaphamʉn ãba Ẽwandamta ich appai ajapha sĩerrʉmgui ajim anʉm. 19¿Pua khaphʉ sĩebá ajim anʉm, Ẽwandamau ich iek Moiseeg phãpitarr gaai: “Oob dich õor khabam dʉi khapes am; oob õor thõom; oob nem jĩgkham; oob chikham eugarjã seukha nem ĩgkham; oob seukha chikhamnaanjã khũgurm; maimua pʉch dennaanjã jãsene abá” a sim?
20Magbaawai chi woun mag irig jeeuchetarrau —Maestro, mʉch bʉ̃rʉʉwe mag pua jaaubarm thum mua ʉʉrkha chitabahab ajim anʉm.
21Mag wounau mag iekhabaawai Jesuu i dau ee aug khaug paraa eerpanaa irig, —Mamʉ agtha pua nem khĩir ãb wauju waaur wai sĩebahab ajim anʉm. Pʉch diig mawia, nem thum pʉchdeu wai sim perkhʉʉipʉinaa, mag phatkhon jũrr dau aphʉʉ khitheem khʉʉnag thum jigbapʉi ajim anaabá. Maimuan chadau mʉ ẽudee pidú ajim anʉm, chadcha mʉ dʉi chitam khõsi chirʉm khai. Pua magmʉn ʉ̃gthar pawiajã bʉ̃ʉrjã augcheba phatkhon khãai nem ajapham pomta wai chirsijugui ajim anʉm irig.
22Jesuu ichig mag iekhabaawai warre okhĩirjuu ich diig petajim anaabá, chadcha phatkhon paraam arr aawai. 23Ichdeu mag nem jaaubarm ipierraa amaaugau warag okhĩirjuu petam oowi, ich bigaau narr khʉʉn khĩir eerpa phʉʉrdʉnaa, ich dʉi ogdʉba wenʉrrarr khʉʉnagta, —Keena, pãade oobat ajim anʉm. Phatkhon paraam khʉʉnta Ẽwandam chi Porkha sim aar oberaagan, chadcha thethe simgui ajim anʉm.
24Jesuu mag iekhabarm ũrwia warre jʉ̃gderraa aphobaadejim anaabá. Pari magwi deeu ich Jesuupai amag, —¡Aay, chaaina! Ar phatkhon ithee wʉrpa aajem khʉʉnta Ẽwandam chi Porkha sim aar oberaagan, chadcha phithur sĩerrʉmgui ajim anʉm. 25Phatkhonpanta ʉ̃gthar Ẽwandam chi Porkha sim aar oberju khãyau, camello pom jãg maach wounaan khãaijã ʉ̃rpai sĩerrʉmta phithurg chukhu nobeeu kach ee thoogar ober dichjugui ajim anʉm.
26Jesuu mag jaaubaawai chará warag jʉ̃gderraacha nʉm iekhau jũrr amach eepai wir aig amach khapeenag, —Mag khai, magan ¿khaita peerdʉagáwa? anaajim aajem.
27Magbaa Jesuu amag eerpanaa, —Õragan chadcha phithurgma ajim anʉm, mag ũurwai. Mamʉ Ẽwandamag chan bʉ̃ʉrjã phithurg chukhu simgui ajim anʉm.
28Magbaawai Pedroou irig, —Maraun chad maach nem wai narrjã ewag khĩirjuba, thum phepʉawi pʉ dʉi ogdʉba wenʉrrabma ajim anʉm.
29Magbaa jũrr ich Jesuu magjim anʉm:
—Pedro, mua chadcha mag chirʉm: Ar mʉ gaaimua wa mʉ iek jaaum khõchgau khãijã amach di, amach eeugpeen, amach ʉ̃phʉʉin, amach dennaan, amach ʉʉi, amach chaain, wa amach nemjĩir khãijã khũchpaim ithee werpʉpʉakham khʉʉnagan, 30mʉg jẽb gaai agtha nʉwejã amach eeugpeen, amach ʉ̃phʉʉin, amach ãd, amach chaain, amach nemjĩirpa thum mʉ gaaimua okhoomarr khãyaujã ʉ̃r warag ag atcha deejugui ajim anʉm. Ajap õrau am dau aug wauwiajã mag wenʉrrʉmʉn chadau, mʉg atagjã durr iiur gaai mʉch dʉita ich mag wenʉrramkhĩir mʉch aarchata phe aujugui ajim anʉm. 31Pari mag ed ãaur khʉʉn ar mʉig eegar aawai amachta chikham khãaijã ʉ̃rʉʉcha nʉm aajerr khʉʉnta ʉ̃gthar Ẽwandam aar paaukhaimaawaijã jũrr serbiibacha aajerrjoo nʉisijugui ajim anʉm. Maimua jũrr ar mʉ gaaimua chikhamnau serbiibag pheejerr khʉʉnta jũrr warm khʉʉn khãaijã ʉ̃rʉʉcha nʉisijugui a jaaumajim aajem.
Õrau ich thõoju Jesuu jaautarr
(Mt. 20:17-19; Lc. 18:31-34)
32Maigmua phobor Jerusalenag khʉdau ma sim ee majim aajem, ich khapeen dʉi deeum khʉʉnpa. Mag wetumua ich Jesuuta por garcha am na maa ajim anʉm. Mamʉ mag chi ẽudee wetmarr khʉʉnan thãar paraata wenʉrrajim aajem, ich Jesuucha ag nawe õrau ich thõoju jaautarr ya khaphʉ narr aawai. Mamʉ mag am thãar paraa wenʉrrʉm Jesuu khaphʉ sĩerr aawai, ich dʉi ogdʉba wenʉrraajerr khʉʉn doce khĩet thʉ̃rkha auwia Jerusalén phobor eem khʉʉnau ich dʉi khaigba aju jaaumamua magjim aajem:
33—Pãrau khaphʉ nʉm, maach Jerusalenag wetum; nau maach mam barbaimaawai mʉch chi Emkhooi Iewaa mʉg chirʉmʉn thethemnaanag mʉ pʉr deejugui ajim anʉm. Magbaawai makhʉʉnau jũrr maach meeun khabam khʉʉnag mʉ thõopi jaauwi durr chaauram khʉʉn jua ee mʉ thʉsĩepʉijugui ajim aajem, makhʉʉnaujã mʉ dʉi amachdeu ampierr amkhĩir. 34Magbaawai makhʉʉnau mʉ wau iekhanaa, mʉ jʉ̃gadaujã wʉnaa, mʉ gaaijã icho thunaa, amachdeu am aig mʉ dʉi awia, ãbmiecha paawai amau mʉ thõopʉijugui ajim anʉm. Pari mag amau mʉ thõowiajã khãai thãrjup nʉm ee deeu mʉ iiu phiidʉjugui a jaaujim aajem.
Santiagoou Juan dʉimua Jesuug amach khĩir jãsenkhapi narr
(Mt. 20:20-28)
35Mag wetum ee jooi Zebedeo chaainau, ajapcharan Santiagoouma Juan dʉimua irig, —Maestro, marau pʉrʉg nemdam jeeum ig naajimgui ajim anʉm. ¿Pua maar khĩir jãsenkhawi maachdeu jeeubarmjo abaju khai? ajierram aajem.
36Magbaa Jesuu amag, —¿Pãrau jãgata mua pãach dʉi apim khõsi nʉma? ajim anʉm.
37Magbaawai amachdeu irig, —Marau pʉrʉg jaaum ig nʉmʉn mʉg atag pʉchta thumaam khʉʉn Porkha beewi mʉg durr thum jʉ̃abaadeewaijã maar numiim khʉʉnagta pʉch bigaau juppibá ajierram anʉm, pʉch dʉi iek theeg amkhĩir: ãb pʉch juachaar gar, maimua ãb pʉch juawe gar.
38Magbaawaita ich Jesús garmua amag, —Pãrau chan sĩi pãachdeu nem jeeu nʉmjã khaugbata nʉmgui ajim anʉm. ¿Pãrau khĩirjuawai mag pãachta warm khʉʉn khãaijã ʉ̃rpai aag chikhamnau pãach dau aug wau nʉmjã mʉ denjo ãwatwi mʉ thõm edjã mʉ dʉi thõju aai nʉ? ajim anʉm amag.
39Magbaawai chi Santiagoou Juan dʉimua, —Eera, marau ãwatbajup ajierram anʉm.
Mamʉ magbaawaita Jesuu amag, —Pãrau chadcha õrau pãach dau aphʉʉ wau nʉmjã ãwatwi mʉ thõbarmjo thõma ajim anʉm. 40Pari magbarm gaaimuapai chan mag mʉch juachaar gar wa juawe gar khãijã mʉch dʉi ãba juppiju chan mua pod jaauju khaba chirʉmgui ajim anʉm, Ẽwandamauta ichdeu khap jaauju aawai.
41Mamʉ mag Santiagoou Juan dʉimua amach dakhĩir Jesuug magbaawai chi khapeen diez narr khʉʉnau jũrr am dʉita meeukha naajim anaabá. 42Mamʉ magbaawai Jesuu amach thum ãbam aig thʉ̃rkha auwia amag magjim anʉm:
—Pãrau meraajã khaba nʉm, chadcha sĩi mʉg jẽb gaai õor porkhawi amachdeuta gobernaajem khʉʉnaun amachta chi pornaan aawai iek theeg nʉm awia amach khãai jua eegpaim khʉʉn dʉi amachdeu ampierr aajem. 43Pari jũrr pãrau pod am denjo magju khaba nʉm, pãach eepai. Magju khãai ãbmua khãijã pãach eepai ichta thumaam khʉʉn khãai ʉ̃rʉʉ am khõsi sim khai, magan jũrr ich garmuata ich khapeenau nem mag abaawaijã am ipierr nʉnʉʉu aju aai simgui ajim anʉm. 44Maagwai ar ichta ʉ̃gthar pawiajã Ẽwandamau ich garcha juppi ahau apim khõsi sim khai, magan sĩi ichta parhoobam khʉʉn chogkhaju aai simgui ajim anʉm. 45Mʉ pãar khãai Emkhooi Iewaakha chirʉmjã mag sĩi mʉch garmua chikham chogaagjã beebajim. Mʉ beetarran, sĩi chikhamnag mʉch chogamkhĩirta beejimgui ajim anʉm, mag chitʉmua chikham jua machgau thõwi mag thõbarm gaaimua õor pom sĩi amach pekau ee preso sĩsidʉmjo nʉm khʉʉn obeerkhapäain.
Jesuu Bartimeo dau monaaupʉitarr
(Mt. 20:29-34; Lc. 18:35-43)
46Mag wetumua Jericó phobor ee barimajierram aajem. Maig khũchpai naawia deeu am ereubaadem dʉi õor pom wetjim aajem. Maimua ya am phobor eemua oberwi wetumta khʉd bigaau woun ãb dau khĩsu khitʉm Bartimeo anʉmta õor ereu dich nʉm khʉʉnag nemdam jeeuwai oo kherʉm ooimajierram aajem. Mag woundam jooi Timeo anʉm iewaa ajim aajem. 47Mag dau khĩsu khitʉmua ich dakha Jesús Nazaretpierr dichmam khaug athaawai ähäakhamua, —Jesús, pʉʉta rey David khachitarr ag chaain ewagam khʉʉn Iewaau marau nʉ narr. Mʉ ap chitʉm mʉ dau ee aug khaugbahur aajeejim anʉm, ich dau monawaan beemkhĩir.
48Mag chi dau khĩsu khitʉmua ähäa khabaadeewai Jesús dʉi õor wetmarr khʉʉnau irig meeurrarrau aajeejim anʉm, khĩupamkhĩir. Mamʉ magbaawai chará warag thet ähäakhamua, —Jesús, pʉʉta rey David khakhitarr ag chaain ewagam khʉʉn Iewaau marau nʉ narr. Mʉ ap chitʉm mʉ dau aug khaugbahur aajeejim anaabá.
49Jesuu mag ähäakham ũr athaawai dʉnʉisiwia chi dau khĩsu khitarr awaan mapijim aajem. Magbaawai chadcha i awaan wetwi chi wettarr khʉʉnau irig, —¡Khĩirdam ubʉ phiidʉbaad! Jesuu pʉ thʉ̃r sĩebahab. I aar marrau ajierram anʉm.
50Ichig magbaawai ich ag bʉrre ich khajũa ʉ̃r joothʉ jũa sĩerr barwerppʉiwi phiidʉ dʉnʉisinaa Jesús aar petajim aajem. 51Mag chadcha ich aar dʉnʉʉubaimaawai Jesuu irig, —¿Khani pua mʉrʉg pʉch dʉi apim khõsi chirʉ́? a jeeujim anʉm.
Magbaa chi daudam khĩsu khitʉm garmua jũrr irig, —Maestro, muan pʉrʉg mʉch dauta monaaupʉipim khõsi chirʉmgui ajim anaabá.
52Magbaawai Jesuu irig magjim anʉm:
—Chadcha muata pʉch dau monaauju khaphʉ khĩirju chirarr gaaimua ʉu pʉ monaau chirsim. Ya pʉ pʉch diig maju aai chirʉmgui ajim anʉm.
Irua mag iekhabarm bʉrre chadcha dau eerdʉ sĩsiwi ich bi eem daujo daujã wajaug sĩsijim anaabá. Mag ich dau monaaubapäaiwai warag i dʉi petajim aajem.
Nke Ahọpụtara Ugbu A:
San Marcos 10: noaA
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2011, Wycliffe Bible Translators, Inc. All rights reserved.