 If you would like a copy of this version please contact info@davaraudiobibles.org

Surgujia New Testament, CC-BY-SA-4.0, The Love Fellowship. Surgujia New Testament Audio Bible, CC-BY-SA-4.0, Davar Partners International, The Love Fellowship, 2023.

Surgujia New Testament

SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.

तब ओ समय परमेश्वर कर आत्मा हर यीशु ला जंगल मे ले गईस ताकि शैतान ले ओकर परीक्षा होए। ओहर चालीस दिन, अउ चालीस राएत निराहार उपवास रहिस, तब यीशु ला भूख लागिस। तब परखे बाला शैतान हर लिघे आए के ओकर ले कहिस, “अगर तय परमेश्वर कर बेटा हस, त कहे दे कि ये पखना हर रोटी बईन जाए।” यीशु हर जवाब देहिस, “लिखल आहे,
मैनसे केबल रोटी ले ही नही,
लेकिन हर एक बचन ले जेहर परमेश्वर कर मुह ले हिकलथे, जीवित रही।”
तब शैतान हर यीशु ला मन्दिर मे ले गईस, अउ मन्दिर कर कंगूरा पर ठड़वईस, अउ ओकर ले कहिस, “अगर तय परमेश्वर कर बेटा हस, त अपन आप ला खाल्हे गिराए दे; काबर कि लिखल आहे, ‘ओहर तोर बिषय मे अपन स्वर्गदूत मन ला हुकूम देही, अउ ओहर तोला हाथो-हाथ उठाए लेही; कहो एसन झिन होए कि तोर गोड़ मे पखना ले चोट लगही।’” यीशु हर ओकर ले कहिस, “ये भी लिखल आहे, ‘तय प्रभु अपन परमेश्वर कर परीक्षा झिन कर।’”
फिर शैतान हर ओला एक ढेरेच ऊचा पहार मे ले गईस अउ सबेच जगत कर राएज अउ ओकर बैभव ला दिखाए के ओकर ले कहिस, “अगर तय गिर के मोला जोहारबे, त मैहर ये सबेच ला तोला दे देहू।” तब यीशु हर ओकर ले कहिस, “हे शैतान दुरिहा होए जा, काबर कि लिखल आहे, ‘तय प्रभु अपन परमेश्वर ला जोहार, अउ केबल ओकरेच उपासना कर।’”
तब शैतान हर यीशु कर लिघे ले चईल गिस, अउ देखा, स्वर्गदूत मन हर आए के यीशु कर सेवा करे लागिस।


जब यीशु हर एला सुनिस कि यूहन्ना पकड़वाल गईस है, त यीशु हर गलील कती चईल देहिस। अउ यीशु हर नासरत नगर ला छोएड़ के कफरनहूम नगर मे जेहर झील कर किनारे जबूलून अउ नप्ताली कर देश मे है, जाए के रहे लागिस; ताकि जे बचन ला यशायाह अगमजानी कर द्वारा कहल गए रहिस, ओहर पूरा होए,
“जबूलून अउ नप्ताली कर देश,
झील कर किनारे ले यरदन नदी कर ओ पार, दूसर जाएत कर गलील परदेस
जे लोग मन अन्धार मे बैइठे रहिन, ओमन मन बड़खा ज्योति देखिन; अउ जेमन मरे कर देश मे अउ छाए मे बैइठे रहिन, ओमन पर ज्योति चमकिस।”
ओ समय ले यीशु हर प्रचार करे बर अउ ये कहे बर शुरू करिस, “मन फिरावा काबर कि स्वर्ग कर राएज हर लिघे अईस है।”


ओहर गलील परदेस के झील कर कगरे फिरत यीशु हर दुई भाई मन ला मने कि शमौन ला जेहर पतरस कहलात रहिस, अउ ओकर भाई अन्द्रियास ला झील मे जाल फेकत देखिस; काबर कि ओमन मन हर मछुवारा रहिन। यीशु हर ओमन ले कहिस, “मोर पाछू मे चईल आवा, त मैहर तुमन ला मैनसे मन ला धरे बाला बनाहु।” ओमन तुरतेच जाल मन ला छोएड़ के यीशु कर पाछू होए लेहिन।
अउ हुवा ले आगू बईड़ के, यीशु हर अउ दूई भाई मन ला मने कि जब्दी कर बेटा याकूब अउ ओकर भाई यूहन्ना ला देखिस। ओमन मन अपन दाऊ जब्दी कर संग डोंगा मे अपन जाल मन ला सूधारत रहिन। ओहर ओमन ला भी बुलईस। ओमन मन तुरतेच डोंगा अउ अपन दाऊ ला छोएड़ के ओकर पाछू होए लेहिन।


यीशु सबेच गलील परदेस मे फिरत अउ ओमन कर अराधनालय मे उपदेश करत अउ राएज कर सुसमाचार प्रचार करत अउ लोग मन के सबेच नियर कर बिमारी अउ कमजोरी मन ला दुरिहा करत रहिस। अउ सबेच सीरिया देश मे यीशु कर चर्चा बगेर गिस, अउ लोग मन सबेच बिमारी मन ला जेमन कई मंधे कर बिमार अउ दुख मे रहिन, अउ जेमे प्रेत आत्मा रहिस, अउ मिर्गी मन अउ लकवा कर रोगी मन ला ओकर लिघे लानिन, अउ ओहर ओमन मन ला चंगा करिस। अउ गलील परदेस, दिकापुलिस, यरूशलेम शहर, यहूदिया परदेस अउ यरदन नदी कर पार ले भीड़ कर भीड़ यीशु कर पाछू होए लेहिन।

Geere nke a ntị मत्ती 4