Génesis 24
24
Jix Seyle Yistil Naj Isaac Yu Abraham
1Caw wal icham winajxa naj Abraham tuꞌ, jaꞌ Jehová jix yakꞌ syaaxilal yibꞌan masanil tzet ey yul skꞌabꞌ naj. 2Jaꞌ yet jun cꞌual jix yawte naj Abraham jun eyoc yilomaloj smulnail, jix yalon tet jaxca tiꞌ:
—Aoc ja kꞌabꞌ yalan jin xubꞌ tiꞌ, 3catuꞌ cha wakꞌon can ja tiꞌ sattaj Jehová, Naj sDiosal satcan cꞌal txꞌotxꞌ txꞌotxꞌ, tol man oj ja sey yistil naj jin cꞌaal xol ebꞌ a Canaán, bꞌey caan jon ecꞌ tiꞌ; 4yuxan jata bꞌey jin conobꞌ, chi too ja sey junoj yistil naj jin cꞌaal tiꞌ, bꞌey xol ebꞌ eyto wu jin bꞌa yetoj, ẍi naj Abraham tuꞌ.
5Jix takꞌwi naj yilomal mulnail tuꞌ jaxca tiꞌ:
—Ta cꞌam chi tit ix wetoj: ¿Tzet chi wute pax oj? ¿Sowalil mi chi wiꞌtoj naj ja cꞌaal tiꞌ bꞌey titnaj jaach tuꞌ? ẍi naj.
6Jix takꞌwi naj Abraham tuꞌ jaxca tiꞌ:
—Cꞌamaj, cꞌam ojabꞌ cha wiꞌtoj naj jin cꞌaal tiꞌ tituꞌ. 7Jaꞌ Jehová, sDiosal satcan, Naj jix jin iꞌon eltej bꞌey sna jin mam cꞌal bꞌey jin conobꞌ bꞌey ecꞌnaj jin, catuꞌ yakꞌnaj can stiꞌ yakꞌon jun txꞌotxꞌ tiꞌ tet ebꞌ wicꞌaal. Jacꞌalaꞌ Naj oj ẍejtej yángel ja sattaj, yet watxꞌ oj ilcha yistil naj jin cꞌaal tiꞌ ja wu tituꞌ. 8Ta tol jaꞌ ix ix tuꞌ cꞌam chi yal scꞌul chi tita, cha wiꞌ can el ja bꞌa yin jun kꞌane tiꞌ; yuxan cꞌam cꞌaltaꞌ chi skeꞌ ja wiꞌontoj naj jin cꞌaal tiꞌ tituꞌ, ẍi naj Abraham.
9Jix lawi tuꞌ xin, jix yaon octoj skꞌabꞌ jun yilomal smulnail tuꞌ yalan xubꞌ naj Abraham tuꞌ, jix yakꞌon can stiꞌ, tol chi sjije masanil tzet jix yal tet naj. 10Jix lawi tuꞌ xin, catuꞌ jix sicꞌon el wan saꞌbꞌeal caw watxꞌ, ey tet Abraham, jix yiꞌontej laoncꞌon noꞌ camello yet chi yaon oc wan saꞌbꞌeal tuꞌ yibꞌan noꞌ, catuꞌ jix yiꞌontoj naj bꞌey sconobꞌ naj Nahor, bꞌey yul yet Mesopotamia.
11Jaꞌ yet jix apni oc jun yakꞌomal servil tuꞌ bꞌey stiꞌel conobꞌ, yet lalanxa yey numomoj, jix xew naj yetoj noꞌ camello bꞌey stiꞌ jun kꞌobꞌ jaꞌ tituꞌ, yutol jaꞌ yet junjun yeycꞌualil chi el cꞌaltoj ebꞌ ix ix iꞌo jaꞌ. 12Jaꞌ yet tuꞌ jix txali naj tet Jehová, jix yalon naj yin xa jaxca tiꞌ: Jaach Jehová jin Diosal, sDiosal jaach pax Abraham naj chi wakꞌ servil, chin kꞌan ey jaach tol watxꞌ ojabꞌ chi eloc jun jin chejbꞌanil tiꞌ, catuꞌ cha txꞌoxon ja watxꞌcꞌulal tet naj chi wakꞌ servil tuꞌ. 13Chin cancan stiꞌ jun jaꞌ ucꞌbꞌal jaꞌ tiꞌ, yajbꞌan chi jul ebꞌ ix kꞌopo a conobꞌ tiꞌ jul iꞌo jaꞌ. 14Toloj wal chi el yin ja cꞌul tol jaꞌ ix kꞌopo oj jul yiꞌatej jaꞌ yetoj smooc, oj walon tet ix tol chi yakꞌ jaꞌ ix wuqꞌue, manaj cꞌal ey jin oj yakꞌ jaꞌ ix, toloj yakꞌ pax ix yucꞌ noꞌ jin camello tiꞌ. Queytuꞌ oj yun snaꞌcha el wu tol watxꞌ jaach tet naj chi wakꞌ servil, jaꞌton jun ix sicꞌbꞌil el ja wu, yet chi oc ix yistiloj naj Isaac, yutol caw jijem cꞌal naj ey jaach.
15Cꞌamto chi lawi xali naj, catuꞌ jix yilon naj sjul jun ix kꞌopo, eyatoj smooc ix sjolom xicꞌ, jaꞌton ix Rebeca scutzꞌin naj Betuel. Jaꞌ naj Betuel tuꞌ, jaꞌton scꞌaal Nahor yetoj ix Milcá; yuẍtaj naj Abraham naj Nahor tuꞌ. 16Jaꞌ ix Rebeca tuꞌ caw sakꞌal yili ix, caw kꞌopo sicꞌlebꞌil, cꞌamto winaj chi yiꞌle. Jix eytoj ix yul jun kꞌobꞌ jaꞌ tuꞌ, yet chi yiꞌon atej jaꞌ, catuꞌ jix yakꞌon no smooc tuꞌ. 17Catuꞌ jix too naj yin ani scꞌatan ix, jix yalon tet jaxca tiꞌ:
—Chin kꞌan ey jaach, akꞌ niꞌoj jaꞌ jaꞌ ey yul ja mooc tuꞌ wuqꞌue, ẍi naj tet ix.
18—Ucꞌ jaꞌ xin, ẍi ix.
Yin eymanil jix yaon ey smooc ix tuꞌ, jix yuqꞌuen jaꞌ naj yu ix. 19Jaꞌ yet jix lawi yuqꞌuen jaꞌ naj tuꞌ, jix yalon ix Rebeca jaxca tiꞌ:
—Oj wakꞌ cꞌal pax jaꞌ yucꞌ noꞌ ja camello tiꞌ, jatacꞌalaꞌ jantaj chi yucꞌ noꞌ, ẍi ix.
20Yin jun txolan jix yaey jaꞌ ix yul jucubꞌ bꞌey chi yucꞌ cꞌaltaꞌ jaꞌ noꞌ noꞌ, ecꞌal el jix bꞌet ix yiꞌatej jaꞌ tuꞌ, masantaꞌcꞌal jix yucꞌ jaꞌ noꞌ masanil. 21Jaꞌ naj yakꞌomal servil tuꞌ, tucꞌal tꞌanan oc naj yin ix. Cꞌam cꞌal tzet chi yal naj tet ix, asan tol chi snaꞌ naj, tol oj colwa Jehová yetoj naj, yet oj ilcha oc yistil naj Isaac yu naj. 22Jaꞌ yet jix xew yuqꞌuen jaꞌ noꞌ camello tuꞌ, jix yiꞌon atej jun chꞌen colkꞌabꞌe tol oro cꞌal eloj, ey mi wajebꞌoj gramo yalil chꞌen. Jix yaon oc naj yin xaam ix, catuꞌ jix yaon oc caabꞌ chꞌen brazalete tol oro cꞌal eloj, ey mi junoj diez gramo yalil chꞌen. 23Jix yalon naj jaxca tiꞌ:
—Yuwal dios ey jaach, al ey jin mac ey jaach yet, tala cꞌuxan colan chin can wey bꞌey sna ja mam tuꞌ yet jun akꞌbꞌal tiꞌ, ẍi naj tet ix.
24Jix yalon ix tet naj jaxca tiꞌ:
—Scutzꞌin jin naj Betuel, scꞌaal Nahor yetoj ix Milcá. 25Jaꞌ bꞌey cu na jon, colan bꞌey chach weyi. Ey pax bꞌey watxꞌ slow noꞌ ja camello tiꞌ, ẍi ix.
26Jaꞌ yet jix yabꞌen naj jaxca tuꞌ, catuꞌ jix ey kaan naj sat txꞌotxꞌ, catuꞌ jix txali, jix yalon yu diosalil tet Jehová. 27Jix yalon jaxca tiꞌ: Al-le ojabꞌ watxꞌ kꞌane yin Jehová, sDiosal Abraham, naj chi wakꞌ servil. Caw chi colwa yetoj, ey scamcꞌulal yin, catuꞌ chin yiꞌon bꞌey yul bꞌe tiꞌ masantaꞌcꞌal xol ebꞌ yican naj chi wakꞌ servil tiꞌ, ẍi naj.
28Jaꞌ Rebeca tuꞌ, jix too ix yin ani yu stoo yalon ix tet xutx, yet chi yalon masanil tzet jix yal naj chejabꞌwom tuꞌ. 29Ey jun sno ix chi yij Labán, eyman jix too lemna naj bꞌey jaꞌ ucꞌbꞌal jaꞌ tuꞌ yet chi too iꞌletej jun naj winaj tuꞌ yu, 30yutol jix yiloc naj chꞌen colkꞌabꞌe cꞌal chꞌen brazalete eyoc yin skꞌabꞌ ix yanabꞌ tuꞌ. Catuꞌ jix yabꞌen pax naj tzet jix yal ix, yuxan jix too Labán tuꞌ bꞌey eyecꞌ naj ẍejabꞌ Abraham tuꞌ. 31Jix yalon jaxca tiꞌ:
—Toon wetoj bꞌey jin na, tol jaꞌ Jehová jix jaach iꞌon jul yin tzalacꞌulal bꞌey cu conobꞌ tiꞌ jon. Waꞌnebꞌilxa bꞌey oj jaach weyoj, yetoj bꞌey oj low noꞌ ja camello tiꞌ, ẍi naj Labán.
32Jaxca ton wal tuꞌ xin, jix yun stoo naj chejabꞌwom tuꞌ bꞌey na, jaꞌ Labán tuꞌ jix colwa yiꞌon el yijatz noꞌ camello tuꞌ. Jix yakꞌon sloꞌbꞌe noꞌ camello naj. Yin eymanil jix yiꞌtej jaꞌ yet chi xꞌaon el yajan naj chejabꞌwom tuꞌ, yetoj ebꞌ jaꞌjun yetoj naj.
33Jaꞌ yet jix eltej sloꞌbꞌe ebꞌ xin, jix yalon naj chejabꞌwom tuꞌ jaxca tiꞌ:
—Jain tiꞌ man to oj jin lowoj; tol sowalil oj wal can jin chejbꞌanil, ẍi naj.
—Kꞌanabꞌan xin, al ja chejbꞌanil tuꞌ, ẍi Labán.
34Jix yalon ẍejbꞌanil naj tuꞌ jaxca tiꞌ:
—Jain tiꞌ ẍejabꞌ jin naj Abraham. 35Caw ey syaaxilal Jehová yul skꞌabꞌ naj, caw bꞌeom naj sicꞌlebꞌil. Ey smeꞌ naj, ey swacax, ey scamello, ey sbꞌuru, ey chꞌen oro caw ey stumin naj, ey cꞌal pax ebꞌ yakꞌomal servil naj. 36Jacꞌalaꞌ pax oj, jaꞌ ix Sara yistil naj chi wakꞌ servil tuꞌ, caw ixnamil ix xa yet jix ali jun yuneꞌ. Jaꞌ masanil tzet ey tet naj, yet cꞌal oc naj cꞌaale tuꞌ. 37Jaꞌ naj chi wakꞌ servil tuꞌ, jix yalaꞌ tol chi wakꞌ jin tiꞌ yin jin jijen ẍejbꞌanil, catuꞌ jix yaloni: Ma skeꞌ yiꞌon yistil naj jin cꞌaal tiꞌ xol ebꞌ ix a Canaán bꞌey caan jin ecꞌ tiꞌ. 38Yu jun tuꞌ xin, tol chi too ja sey yistil naj jin cꞌaal tiꞌ xol ebꞌ eyto wu jin bꞌa yetoj. Jaꞌ tituꞌ chach toi, ẍi naj ey jin. 39Jix walon tet naj jaxca tiꞌ an: Jaꞌ ix ix chi too wiꞌ tuꞌ, ta cꞌam chi yoche ix chi tita. 40Jix takꞌwi naj ey jin jaxca tiꞌ: Jain tiꞌ jijem cꞌal chi wute jin bꞌa tet Jehová. Jaꞌ Naj oj ẍejtoj yángel ja wetoj, yuxan watxꞌ cꞌal oj yun yeloc apnoj jun ja chejbꞌanil tiꞌ, catuꞌ cha wiꞌontej junoj yistil naj jin cꞌaal tiꞌ xol ebꞌ eyto wu jin bꞌa yetoj tuꞌ. 41Asan ta tol jaꞌ ebꞌ wican tuꞌ cꞌam chi yatej scutzꞌin tuꞌ ja wetoj xin, cꞌam tzet cha naꞌ, cha wiꞌ can el ja bꞌa yin jun bꞌey cha wakꞌcan ja tiꞌ ey jin, ẍi Abraham tuꞌ ey jin.
42Jaꞌ yet jix jin jul bꞌey stiꞌ jun kꞌobꞌ jaꞌ tuꞌ, catuꞌ jix jin txali, jix walon jaxca tiꞌ: Jaach Jehová cu Diosal, sDiosal jaach Abraham, ta yel ey jaach oc wetoj, catuꞌ watxꞌ oj yun yeloc jun jin chejbꞌanil tiꞌ, 43chi wal ey jaach tinaniꞌ xin, yajbꞌan ey jin ecꞌ bꞌey stiꞌ jun kꞌobꞌ tiꞌ, jaxa oj yunne, tol jaꞌ tet ix kꞌopo oj jul iꞌo jaꞌ, oj wal tet ix jaxca tiꞌ: Akꞌ niꞌoj jaꞌ jaꞌ eeytoj yul ja mooc tuꞌ wuqꞌue. 44Catuꞌ oj yalon ix: Ucꞌ jaꞌ xin, catuꞌ oj yuqꞌuen pax jaꞌ noꞌ ja camello tiꞌ, ẍi ojabꞌ ix ey jin. Jaꞌton wal ix tuꞌ jix ja sicꞌ eloj yet chi oc yistiloj scꞌaal naj chi wakꞌ servil tuꞌ, jin chi yin jin txa. 45Eyto wal slawi jin txali, catuꞌ jix apni oc ix Rebeca yetoj smooc eyatoj sjolom xicꞌ, catuꞌ jix eytoj ix iꞌo atej jaꞌ, catuꞌ jix walon tet ix jaxca tiꞌ: Tol chi yakꞌ jaꞌ ix wucꞌ an. 46Yin eymanil jix yaon ey smooc ix, jix yalon ix: Ucꞌ jaꞌ xin, catuꞌ chi wakꞌon pax jaꞌ yucꞌ noꞌ ja camello tiꞌ, ẍi ix. Jaxca tuꞌ xin jix yakꞌ ix jaꞌ wuqꞌue, catuꞌ jix yakꞌon pax jaꞌ ix yucꞌ noꞌ jin camello. 47Catuꞌ jix jin kꞌanlen tet ix: ¿Mactxequel ey jaach scutzꞌin? jin chi tet ix. Jix yalon ix ey jin: Scutzꞌin jin naj Betuel, scꞌaal naj Nahor yetoj ix Milcá, ẍi ix. Catuꞌ jix waon oc jun chꞌen chꞌen jaxca colkꞌabꞌe yin xaam ix, catuꞌ jix waon pax oc junjun chꞌen brazalete yin junjun skꞌabꞌ ix. 48Jix lawi tuꞌ xin, jix jin ey kaanoj, jix walon jin watxꞌ kꞌane yin txail tet Jehová, tol jaꞌ jix oc cꞌal wetoj yet jix jin tit cꞌal yul-laj bꞌe. Watxꞌ cꞌal jix yun jin tita, yet chi jul wiꞌontoj yistil scꞌaal Abraham, naj ey jin ẍejabꞌ tuꞌ, bꞌey je xol jaex yican jex naj tiꞌ. 49Jaꞌ tinaniꞌ xin, kꞌanabꞌanwej. ¿Watxꞌ mi oj je yute je cꞌul yin naj ey jin ẍejabꞌ tuꞌ? Ta cꞌamaj xin, alwej pax oj, yet watxꞌ oj jin naꞌ tzet oj wunne, ẍi naj chejabꞌwom tuꞌ.
50Jix lawi tuꞌ, jix yalon Labán yetoj Betuel:
—Masanil wan tiꞌ jaꞌ bꞌey Jehová chi tita, jaon tiꞌ cꞌamxa tzet watxꞌ kalon ey jaach. 51Il ton abꞌ ix Rebeca tiꞌ la, tiꞌ ey ix, iꞌtoj ix, to ojabꞌ ix yistiloj scꞌaal naj cha wakꞌ servil tuꞌ, jaxca wal jix yun snaꞌbꞌalne el Jehová, ẍi ebꞌ.
52Jaꞌ yet jix yabꞌen naj yakꞌomal servil Abraham tuꞌ xin, jix ey kaan sattaj Jehová yu yalon yu diosalil. 53Yin eymanil jix yiꞌatej ecꞌaloj saꞌbꞌeal oro, cꞌal plata, cꞌal pichile, jix yakꞌon tet ix Rebeca cꞌal tet sno ix cꞌal tet xutx ix. 54Catuꞌ jix low naj yetoj ebꞌ naj jaꞌjun yetoj tuꞌ, catuꞌ jix can ebꞌ yet jun akꞌbꞌal tuꞌ. Jaꞌ yet jix kꞌinibꞌi a yet junxa cꞌual xin, jix a waan naj chejabꞌwom tuꞌ, jix yaloni:
—Jaꞌ tinaniꞌ xin, chejwejtoj ix Rebeca wetoj bꞌey sna naj chi wakꞌ servil tuꞌ an xin, ẍi naj.
55Jix takꞌwi naj sno ix, cꞌal xutx ix, jix yalon ebꞌ jaxca tiꞌ:
—Can ojabꞌ ix laonebꞌojxa cꞌu ketoj jon, catuꞌ oj toj ix ja wetoj, ẍi ebꞌ tet naj.
56Catuꞌ jix takꞌwi naj chejabꞌwom tuꞌ:
—Manche jin je tenoc tucanoj. Yutol jaꞌ Jehová ey cꞌal oc wetoj, yuxan watxꞌ cꞌal jix yun yeloc jun jin chejbꞌanil tiꞌ. Chaꞌ jin wejtoj bꞌey sna naj chi wakꞌ servil tuꞌ tinaniꞌ, ẍi naj.
57Catuꞌ jix yalon ebꞌ jaxca tiꞌ:
—Awtele ojabꞌ ix kꞌopo tuꞌ xin, oj kabꞌwej tzet ẍi ix, ẍi ebꞌ.
58Jix awtele ix Rebeca tuꞌ, jix skꞌanle yabꞌ ebꞌ tet ix:
—¿Chim yal ja cꞌul chach too yetoj jun naj winaj tiꞌ? ẍi ebꞌ.
—Jaaꞌ, chin to an, ẍi ix.
59Jaxca ton tuꞌ jix yun yaletej ix Rebeca yu ebꞌ, yetoj jun ix ix jix ilon chꞌibꞌoj, jix tit naj yakꞌomal servil Abraham tuꞌ yetoj ebꞌ jaꞌjun yetoj. 60Catuꞌ jix yalon watxꞌ kꞌane ebꞌ yibꞌan ix Rebeca jaxca tiꞌ:
Yakꞌ ojabꞌ syaaxilal Jehová ja wibꞌan, oj jaach oc xutxoj ecꞌaloj smillonal oj ánima. Jantaj ja wuneꞌ oj aloj, jaꞌ oj akꞌon eyqꞌuey ebꞌ conobꞌ chi jowi oc ja win, ẍi ebꞌ tet ix Rebeca.
61Jix lawi tuꞌ xin, jix atoj ix Rebeca yibꞌan noꞌ camello, yetoj ebꞌ chi akꞌon servil ix, jix oc tzajan ebꞌ yintaj naj yakꞌomal servil Abraham tuꞌ. Jaxca ton tuꞌ jix yun yiꞌontoj ix Rebeca naj chejabꞌwom tuꞌ, catuꞌ jix too ix.
62Jal naj Isaac xin, xax meltzotej naj bꞌey jun kꞌobꞌ jaꞌ chi yij sbꞌi, Naj Iquis Chin Iloni. Jaꞌ tituꞌ ey sna yul yet Négueb. 63Jaꞌ yet numomixa yeyi, cꞌuxan cꞌal eeltej naj paẍal yinlaj sna, jix yiloni tol ey wan noꞌ camello chi tita. 64Jacꞌalaꞌ pax ix Rebeca jix too tꞌananoj, jix yilontoj ix yin naj Isaac, catuꞌ jix eytej ix yibꞌan noꞌ camello tuꞌ. 65Jix skꞌanlen ix tet naj ẍejabꞌ Abraham tuꞌ jaxca tiꞌ:
—¿Mactxequel jun winaj chi tit cu sattaj tiꞌ? ẍi ix.
Catuꞌ jix yalon naj chejabꞌwom tuꞌ tet ix:
—Jaꞌton naj chi wakꞌ servil tuꞌ, ẍi naj. Catuꞌ jix yiꞌon eytej skꞌoxil sjolom ix, jix smajchen ey sat ix yetoj.
66Jaꞌ naj yakꞌomal servil tuꞌ jix alon tet naj Isaac, masanil tzet jix yun yeloc apnoj ẍejbꞌanil naj tuꞌ. 67Catuꞌ jix iꞌletoj ix yu naj Isaac tuꞌ bꞌey yul sna waꞌnebꞌil a yetoj kꞌap, bꞌey sna ix Sara, jaꞌton ix camom xutx naj, catuꞌ jix nupi naj yetoj ix, caw wal chi camcꞌulnele ix Rebeca tuꞌ yu Isaac. Queytuꞌ jix yun yecꞌ el scuscꞌulal naj yu scamichal xutx.
Pilihan Saat Ini:
Génesis 24: knj
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2016, Wycliffe Bible Translators, Inc. All rights reserved.