Génesis 23
23
Scamichal Ix Sara
1Jaꞌ ix Sara ey 127 abꞌil skꞌinal. 2Jix cam ix bꞌey conobꞌ Quiriat-arbá, chi yij cꞌal pax Hebrón yul yet Canaán. Caw wal jix okꞌ naj Abraham yu scamichal ix Sara tuꞌ, jix oc xacꞌal can naj yin cuscꞌulal yu ix. 3Jix yakꞌ can smimanil yetbꞌi naj Abraham tuꞌ, catuꞌ jix too naj bꞌey ebꞌ Hitita, ebꞌ caan bꞌey jun txꞌotxꞌ tuꞌ, jix yalon tet ebꞌ jaxca tiꞌ:
4—Caxcꞌal mi txꞌoj conobꞌal weoc je xol tiꞌ, toloj wal chi el yin je cꞌul je txonon niꞌoj je txꞌotxꞌ tiꞌ ey jin, yet watxꞌ jaꞌ titiꞌ chin mujcan eytoj smimanil ix wistil tiꞌ, ẍi naj tet ebꞌ.
5Jix takꞌwi ebꞌ Hitita tuꞌ tet Abraham jaxca tiꞌ:
6—Jaach icham winaj, abꞌ tzet oj kal ey jaach, jaach tiꞌ caw miman ja weloc apnoj cu xol jon, yuxan chi skeꞌ cha mujcan smimanil ix ja wistil tiꞌ bꞌey junoj smujbꞌanil ebꞌ camom, junoj caw watxꞌ yili cha wilaꞌ. Cꞌam junoj jon cꞌam chi cu chaꞌ ja muj smimanil ix ja wistil tuꞌ titiꞌ, ẍi ebꞌ tet naj.
7Jaꞌ naj Abraham tuꞌ, jix a linanoj, jix ey noan sattaj ebꞌ yet chi xꞌoxon eloj tol ey yeloc apnoj naj yul sat ebꞌ. 8Jix yalon jaxca tiꞌ tet ebꞌ:
—Ta caw yel che yoche chin muj smimanil ix wistil tuꞌ titiꞌ, alwej tet naj Efrón, yuninal Sóhar, 9tol chi xon chꞌen jolan chꞌen naj bꞌey Macpelá ey jin, bꞌey scawilal stiꞌlaj xꞌotxꞌ naj. Chi skeꞌ jin toolanen tet naj yal cꞌal jantaj stool, jaxca wal tuꞌ, wet chi yun can oc jun bꞌey chi mujle camom je xol bꞌey jun txꞌotxꞌ tiꞌ, ẍi Abraham tuꞌ.
10Chotan pax ecꞌ naj Efrón xol ebꞌ yet conobꞌ tuꞌ. Jix yalon tet Abraham tiꞌ yin ipeal, yet watxꞌ chi yabꞌ ebꞌ eyecꞌ tituꞌ, yetoj ebꞌ chi oc bꞌey stiꞌ smajil jun conobꞌ tuꞌ. Jix yalon jaxca tiꞌ:
11—¡Jaach icham winaj! chi wal ey jaach, tol jaꞌ jun jolan chꞌen tuꞌ, yetoj txꞌotxꞌ txꞌotxꞌ tuꞌ, tucꞌal chin saꞌ txꞌotxꞌ ey jaach an. Jaꞌ ebꞌ naj wet conobꞌ tiꞌ, testigo chi yun can oc ebꞌ naj, yutol tucꞌal chin saꞌ txꞌotxꞌ ey jaach, catuꞌ chi skeꞌ ja mujon can ja wistil tuꞌ tituꞌ, ẍi naj.
12Jaꞌ naj Abraham tuꞌ, jix ey noan sattaj ebꞌ ánima tuꞌ junelxa. 13Jix yalon jaxca tiꞌ tet naj Efrón yetoj sattaj ebꞌ ánima tuꞌ masanil:
—Chin oc tean ja win, tol cha chaꞌ wal stool txꞌotxꞌ, catuꞌ oj jin mujon ix wistil tuꞌ, ẍi naj.
14Jix takꞌwi pax naj Efrón tet Abraham tuꞌ:
15—Jaach icham winaj, jaꞌ jun txꞌotxꞌ tuꞌ, ey 400 siclo chꞌen tumin plata#23:15 Jaꞌ jun siclo txenne yalil yintaj nan onza. eyoc yin txꞌotxꞌ. Jaꞌ jun tumin tuꞌ, cꞌam yeloc apnoj cu xol tiꞌ jon. ¡Asan tol chi too ja mujcan eytoj smimanil ix ja wistil tuꞌ! ẍi naj.
16Jix ẍaꞌ scꞌul naj Abraham tuꞌ stoolanen txꞌotxꞌ txꞌotxꞌ tuꞌ, jaxca jix yun yalon naj Efrón sattaj masanil ebꞌ Hitita tuꞌ. Jix yechen naj Abraham 400 siclo chꞌen tumin plata tuꞌ, tzꞌajan jix yun yalil chꞌen jaxca yet ebꞌ txonwom. 17Jaxca ton wal tuꞌ jix yun yiꞌon can oc txꞌotxꞌ xꞌotxꞌ naj Efrón naj Abraham, txꞌotxꞌ Macpelá scawilal txꞌotxꞌ yet naj Mamré, cꞌal chꞌen jolan chꞌen cꞌal teꞌ teꞌ. Jix yiꞌcan oc naj Abraham tuꞌ masanil. 18Yet xa naj Abraham jun txꞌotxꞌ tuꞌ. Masanil ebꞌ naj Hitita yaman ecꞌ tituꞌ, cꞌal yetoj masanil ebꞌ chi octoj bꞌey smajil jun conobꞌ tuꞌ, testigo jix yun can oc ebꞌ yin jun wa kꞌane tuꞌ.
19Jix lawi tuꞌ xin, jix smujon smimanil yistil Abraham tuꞌ, bꞌey chꞌen jolan chꞌen, bꞌey txꞌotxꞌ Macpelá tuꞌ, bꞌey scawilal txꞌotxꞌ yet naj Mamré, jacꞌal oc chi yij pax Hebrón, bꞌey yul yet Canaán. 20Jaxca tuꞌ jix yun xonon cantoj txꞌotxꞌ txꞌotxꞌ cꞌal chꞌen jolan chꞌen ebꞌ naj Hitita, yet watxꞌ chi oc can smujbꞌaniloj scamom naj Abraham yetoj ebꞌ yicꞌaal.
Pilihan Saat Ini:
Génesis 23: knj
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2016, Wycliffe Bible Translators, Inc. All rights reserved.