Génesis 22
22
Jix Akꞌle Porobꞌal Naj Abraham Yu Jehová
1Jix ecꞌ jun tiempoal, jix akꞌle porobꞌal naj Abraham yu Jehová. Jix awtele naj yu, catuꞌ jix takꞌwi naj jaxca tiꞌ:
—Jaach Waawil, ti ey jin an, ẍi naj:
2Jix yalon Jehová tet Abraham jaxca tiꞌ:
—Iꞌtoj naj Isaac, jun kꞌetxan ja cꞌaal tol camcꞌulnebꞌil ja wu, cha wiꞌtoj bꞌey txꞌotxꞌ Moria, jaꞌ yet chach apni oc bꞌey ẍumuc jun wonan tuꞌ, catuꞌ cha wakꞌon tzꞌaꞌ naj yin xaambꞌal ey jin, bꞌey jun wonan oj jin txꞌox ey jaach tuꞌ, ẍi Jehová tet naj.
3Jaꞌ yet jix kꞌinibꞌi a yet junxa cꞌual, caw sebꞌ jix a waan naj Abraham, jix yaon oc stzꞌuum jun sbꞌuru naj, jix stzokꞌon el teꞌ siꞌ yet chi tzꞌaꞌ teꞌ yetoj xaambꞌal tuꞌ. Jix too bꞌey jun wonan jix yal Jehová tet, catuꞌ jix yiꞌontoj Isaac jun scꞌaal tuꞌ yetoj, yetoj pax cawan yakꞌomal servil. 4Jaꞌ yet yox cꞌual tuꞌ, jix yilontoj naj Abraham jun txꞌotxꞌ wonan naat eyaoj. 5Jix lawi tuꞌ, jix yalon naj tet ebꞌ naj yakꞌomal servil jaxca tiꞌ:
—Cananwej can titiꞌ yetoj noꞌ bꞌuru tiꞌ, jal jin yetoj naj jin cꞌaal tiꞌ, oj cu toj cꞌal niꞌojxa, yet chi too kiꞌon ey cu bꞌa tet Jehová. Chi lawi tuꞌ, catuꞌ oj cu meltzo pax tej je cꞌatan junelxa, ẍi naj Abraham tuꞌ tet ebꞌ naj.
6Jix lawi tuꞌ, jix yaon atoj Abraham teꞌ siꞌ yibꞌan sjolom xicꞌ naj Isaac tuꞌ, jix yiꞌontoj skꞌakꞌ cꞌal snawax, catuꞌ jix too ebꞌ scawanil. 7Txenne to wal chi too ebꞌ, jix yalon naj Isaac tuꞌ tet smam jaxca tiꞌ:
—Mamin, ẍi naj.
—¿Tzet cha wal jaach cꞌaal? ẍi Abraham.
—Ilaꞌ tol iꞌbꞌil oc teꞌ cu siꞌ, cꞌal cu kꞌakꞌ. ¿Bꞌeytuꞌ eyoc pax noꞌ meꞌ oj oc yin cu xaambꞌal tuꞌ? ẍi Isaac.
8Jix yalon Abraham jaxca tiꞌ:
—Jaꞌ Dios oj akꞌon noꞌ meꞌ oj oc yin cu xaambꞌal tuꞌ jaach jin cꞌaal, ẍi naj tet scꞌaal tuꞌ.
Catuꞌ jix bꞌey cꞌal stoo ebꞌ sattaj. 9Jaꞌ yet jix apni oc ebꞌ bꞌey jix yal Dios tuꞌ, jix swaꞌne a jun yet xaambꞌal naj Abraham, catuꞌ jix swaꞌne atoj teꞌ siꞌ tuꞌ yibꞌan. Catuꞌ jix skꞌalon ey jun scꞌaal tuꞌ, jix yaon atoj yibꞌan teꞌ siꞌ eyatoj yibꞌan jun yet xaambꞌal tuꞌ. 10Jaꞌ yet jun txolan tuꞌ, jix yiꞌon a chꞌen nawax naj Abraham yet chi yakꞌon cam scꞌaal tuꞌ yin xaambꞌalil, 11jaꞌ yet jun txolan tuꞌ, jix yabꞌeni tol jaꞌ yángel Jehová chi awi eytej bꞌey satcan tuꞌ:
—Abraham, Abraham, ẍi tet naj.
—¿Tzet ja chi, jaach Waawil? ẍi naj.
12Jix yalon jun yángel Dios tuꞌ jaxca tiꞌ:
—Manche ja makꞌ cam naj ja cꞌaal tuꞌ. Jaꞌ tinaniꞌ wotajxa tol ey yeloc apnoj Dios yul ja sat, ilaꞌ tol bꞌejan ja cꞌul ja wakꞌon jun kꞌetxan ja cꞌaal tuꞌ, ẍi jun ángel tuꞌ.
13Catuꞌ jix meltzotoj tꞌanan naj Abraham yintaj, jix yilontoj tol ey jun noꞌ icham meꞌ locan can oc yucꞌaꞌ xol jun teꞌ qꞌuix, catuꞌ jix too jininoj yiꞌontej noꞌ meꞌ tuꞌ, jix yakꞌon tzꞌaꞌ naj yin xaambꞌalil yin sqꞌuexeloj scꞌaal tuꞌ. 14Jix lawi tuꞌ, jix yakꞌon can yij sbꞌi jun txꞌotxꞌ tuꞌ naj Abraham jaxca tiꞌ: Jaꞌ Jehová chi akꞌon tzet sowalil chi oqui, ẍi, yuxan chi tocꞌal yal ebꞌ ánima tinaniꞌ: Jaꞌ bꞌey txꞌotxꞌ wonan yet Jehová, chi yakꞌ tzet sowalil chi oqui, ẍi ebꞌ.
15Jix kꞌanabꞌ pax eytej Jehová tet Abraham yet scaelal:
16Jix yalon jaxca tiꞌ: Jain Jehová jin chi walaꞌ: Yutol jix ja jije ja wunen jun tiꞌ, catuꞌ ma jaach xiw ja wakꞌon jun kꞌetxan ja cꞌaal tiꞌ ey jin, yuxan jain caw chi wakꞌcan jin tiꞌ ey jaach, 17tol chi wakꞌcan jin yaxilal ja wibꞌan, tol oj wakꞌ chꞌibꞌ sbꞌisil ebꞌ ja wicꞌaal. Jaxca wal sbꞌisil weycan bꞌey satcan, jaxca pax yarenail stiꞌ ja mar, queytuꞌ oj yun sbꞌisil ebꞌ; catuꞌ oj yakꞌon eyqꞌuey ebꞌ jaꞌ wicꞌaal tuꞌ, ebꞌ chi jowi oc yin ebꞌ. 18Yutol jix ja jije cꞌal tzet jix walaꞌ, yu jun tuꞌ, masanil conobꞌ yul yibꞌankꞌinal tiꞌ oj ẍaꞌ jin yaxilal ebꞌ tiꞌ ja wu, ẍi Jehová tet Abraham.
19Jix lawi tuꞌ xin, jix meltzo naj Abraham yetoj naj Isaac bꞌey ey can ebꞌ cawan ebꞌ yakꞌomal servil tuꞌ, junne jix yun smeltzotej ebꞌ, jix apni oc ebꞌ bꞌey Beerseba, jaꞌ tituꞌ jix caey cꞌal ebꞌ.
Ebꞌ Yuninal Nahor
20Jaꞌ yet jix bꞌey cꞌaltoj tiempo xin, catuꞌ jix yabꞌen skꞌumal naj Abraham, tol eyxa waxajwan yuninal Nahor naj yuẍtaj yetoj ix Milcá. 21Us sbꞌi naj bꞌabꞌel unin, Buz sbꞌi naj scaabꞌ unin, Quemuel sbꞌi naj yox unin, jaꞌton smam naj Aram. 22Catuꞌ jix ali pax Quésed, Hazó, Pildás, Idlaf cꞌal Betuel. 23Jaꞌ Betuel tuꞌ, jaꞌton smam ix Rebeca; jaꞌton waxajwan yuneꞌ ix Milcá yetoj Nahor, naj yuẍtaj Abraham.
24Eyto canwan xa scꞌaal naj Nacor tuꞌ yetoj junxa ix scaabꞌ yistil, jaꞌton ix Reumá, jaꞌton ebꞌ tiꞌ: Teba, Gáham, Tahas cꞌal Maacá.
Pilihan Saat Ini:
Génesis 22: knj
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2016, Wycliffe Bible Translators, Inc. All rights reserved.