मात्ति 7
7
आरु फाट्टुर लाब्नेनुम्चिम्
(लुका ६:३७-३८,४१-४२)
1येसुङा फेरि लोडुचे, “आरु फाट्टुर लाब्नेनुम्चिम्, हिड्डेउङ् माङ्हाङ्ङा चा खानि फाट्टुर मालाबिन्गा॥ 2पोङ्भोने खानिङा आरु फाट्टुर आलाबुम्चिम् गाड्डे डोक् माङ्हाङ्ङा चा खानि फाट्टुर मालाबिटि॥ हिट्नुङ् खानिङा खोना छिक्माङा आछिक्टुमुङ् आपिडुम्चिम्चिम्गा हिट्ना छिक्माङा डोक् छिक्टुङ् खानि चा माङ्हाङ्ङा मापिडिटि॥#मारकुस ४:२४ 3हिट्नुङ् पोङ् आरु याप्मिङाना उमिक्ङि लिसाना खासिप्पा आनिसुटुना, टरो आप्पे कामिक्ङि लिगाना सिङ् ओकोङ्रोबोम्बाक् पोङ् आनिसुन्ना? 4आप्पे कामिक्ङिना सिङ् ओफेङ्गेलेक् आनिसुन्ना भोने, खोड्डे पारिक् कासाइबाङाना उमिक्ङिना खासिप्पा ‘खोलो, खोलो कामिक्ङिना खासिप्पा होट्नाबिनाँ’ पिक्सा आलोडुटुना॥ 5हाउ निङ्ग्वा ओमाक्पाचि, पाइला खानि आप्पे मिक्ङि लिसाना सिङ् ओकोङ्रोबो होट्टानुम्, हिट्नुङ् एडोक् खानि साइबाङाना उमिक्ङिना खासिप्पा होप्मा लोङ्सा पारचिन्दा आनिसुम्टुम्॥
6“सेङ्सेङ्गा थोक्चि कोछुबाचि पिनेनुम्चिम्, पोङ्भोने हिट्नागा खान्लेङ् भाप् ओआप्युजायुङ् मापाट्युक्॥ हिट्नुङ् फाक्चि टोकानाङि खानि मोति लेप्नेनुम्, पोङ्भोने हिट्नागाँ उन्चि लाङ्ङा ओयेप्टुडिसुटु॥#७:६ याहुदिचिङा कोछुबा चिम्मा उफुट्टुचिगा डागा, हिट्नुङ् फाक्उम्बाक् आसुद्दो नुङ् ओलोडुचिगा॥
बिन्टिङाना बारे
(लुका ११:९-१३)
7“नाक्टानि खानिङा आटोगुम्टुम्, कोलानुम् खानिङा आटुबुम्टुम्, माङ्हाङ्लोक् घुवार नाक्टानुम् उन्ङा घुवार माफाडिटि॥ 8पोङ्भोने ओनाग्गा टेप्मा सोब्बेङा ओटोगुटु हिट्नुङ् खोना खोनाँ ओकोलुटु हिट्नागाँ उटुबुटु, हिट्नुङ् खोना नाक्युक्ना, हिट्ना लाउङ्सा माङ्हाङ्ङा ढुवारिक् ओङ्सुबिडुटु॥ 9खानि माड्डे खोना उप्पाङा उइछा चालेपा नाक्टे भोने लुङ्गेॽवा पिडुटुना टे? 10हिट्नुङ् ङासा नाक्टे भोने ओप्पु पिडुटुना टे? 11नाड्डेउङ् खानि ओभेन्गा याप्मिचि आलिसि चा खानि छाचि लोङ्सा आम्टेप्मा नुगा थोक्चि आपिडुम्चिम्गा भोने, टोनालोग्ङिना खानि माङ्हाङ् टोकुबाङा उन्लोक् कानाक्बाचि लोङ्सा आम्टेप्मा औधि नुगा थोक् पिडुचिचि॥
चिफिप्ना ढ्वारि हिट्नुङ् फिप्ना लाम्बो
(लुका ६:३१; १३:२४)
12“हिट्नुङ् याप्मिचिङा खानि खोड्डे पारिक्ना चाट्ला मामेट्टि नुङ् चाहाब् आलिसिटिना, खानिङा चा हिट्नागा हिड्डे डोक् मेट्टानुम्चिम्॥ पोङ्भोने ना डोक् मोसाङा छेप्टुना धारमाबिधि हिट्नुङ् माङ्काटाचिङा मालोडिगा मुलि रिङ् ए॥#लुका ६:३१
13“चुबुरुक्ना ढुवारिक्लाम्मा भिट्रा लिगानि, पोङ्भोने ठेना ढुवारिक् हिट्नुङ् ठेना लाम्बोङा योनालोग्लेङ् आखाट्युक्, हिट्नुङ् ना लाम्बो भिट्रा उलिग्गा जोम् उलियुक्॥ 14टरो चिफिप्ना ढ्वारि हिट्नुङ् फिप्ना लाम्भोङा लाट्निना चोलाङि आखाट्युक्, टरो ना आड्डिक् टुक्ना ए, हिट्नुङ् ना लाम्बो उलाम्टिगा खाट्टिप्मा एरोक् उलियुक्॥
सिङ् उघुङ्मा लोक् टुल्फुल
(लुका ६:४३-४६; १३:२५-२७)
15“माङ्जोगा माङ्काटाचिलाम्मा ओछेक्छेक् लिसानिउङ् युङानि, हिट्नागा टे भाराउम् सोजो ठुँबा गाड्डे उनिङ्युङ् खानि सोरि ओटायुक्, टरो हिट्नागाउम्टे ब्वाँसो गाड्डेगा डोक् उलियुक्॥ 16हिट्नागाँ ओचोगुगा टोॽवालाम्मा डोक् खानिङा मिसेन् आनिसुम्चिम्चिम्॥ साङा चा टिउँबा बारिलाम्मा आङ्गुर उसा उफिगुन्ना हिट्नुङ् साक्टिङ्राक् उभुङ्मालाम्मा वामाखोक्पोङाना उसा उफिगुन्ना॥ 17हिड्डेउङ् साप्राङ् लिसाना सिङ् उघुङ्माङि साप्राङ् लिसाना टुल्फुल डोक् केङ्युक्, झिक्रिक्का लिसाना सिङ् उघुङ्माङि हिडेना डोक् टुल्फुल केङ्युक्॥ 18हिट्नुङ् साप्राङ् लिसाना उघुङ्माङा जाखाम् लिसाना टुल्फुल केङुन्ना, हिट्नुङ् सेक्रेक्ना लिसाना सिङ् उघुङ्मा साप्राङ् लिसाना टुल्फुल केङुन्ना॥ 19हिड्डेउङ् ओचेट्नुलोक् टुल्फुल ओकेङुन्गा सोब्बे सिङ् उभुङ्माचि ओडाङ्बाङा टाङुचिचि हिट्नुङ् मिङि उडुडिसुटु॥#मात्ति ३:१०; लुका ३:९ 20नाड्डेउङ् डोक् हिट्नागा माङ्जोगा माङ्काटाचि नुङ् उन्चि टोॽवालाम्मा डोक् खानिङा मिसेन् आनिसुम्चिम्चिम्॥#मात्ति १२:३३
21“आङा ‘टाङ्बा, टाङ्बा,’ याङ्ओलोगा ख्वाप्पाङा टोनालोग्ङिना मुलुक्ङि लिग्मा ओटोगुन्ना॥ टरो टोनालोग्ङि युङ्ना आङाना पाबाङाना उनिङ्ग्वा गाड्डे टोॽवा काचोक्बाचिङा एरोक् टोनालोग्ङिना मुलुक्ङि लिग्मा ओटोगुटु॥ 22हिट्ना बेला जोम् याप्मिचिङा आङा नाड्डे याङ्ओलोयुक्, ‘टाङ्बा, टाङ्बा, पाक् आन्याँ कानिङ्ङि माङ्हाङ्लाम्माना रिङ् माट्नेयाट्निम्मि टे? कानिङ् लाडुमाउङ् ओचाफेन्गा रिमेट्चि होट्टुमुङ् रिक्नेयाट्निम्मि, हिट्नुङ् कानिङ्ङि डोङ् ठोङ्डिगा टोॽवाचि चोग्नेयाट्निम्मानि टे?’ 23हिट्नुङ् आङा हिट्नागा पारचिन्दा लोडुङ्चिङ्चिङ्, ‘हाउ, ओभेन्गा टोॽवा काचोक्बाचि, आङा खानि खोना बेला चा मिसेन् निनेन्गेट्निन्गा, आङालाम्मा खाडाजानि!’#छाम्लोमा छाप्ला ६:८
इप्पोक् पाङ्ङाना ओजाग् बारे
(लुका ६:४७-४९)
24“हिड्डेउङ् आङा माट्टुङ्ना रिङ् काखेम्बा हिट्नुङ् हिड्डे गाड्डे काचोक्बा याप्मिम्बाक् बोल्लेउ लिङ्गेॽवा उठुङ्ङि पाङ् काचोक्बा ओठोना लिसाना याप्मिलोक् हिट्ना टोङ्सुङ्टुङ्॥ 25व्हेट् टायाउङ् भोल उङ्से, हिट्नुङ् हिॽवा हुन्डारि फेन्डे हिट्नुङ् हिट्ना पाङ् माइधा लेम्सुए, टरो चा हिट्ना पाङ् होट्नेयाट्नि, पोङ्भोने हिट्ना पाङ्ङाना ओजाग् बोल्लेउ लिङ्गेॽवा उठुङ्ङि चोक्बालाक् डाना॥ 26टरो आरिङ् खेम्सुङ् चा हिड्डे चोक्निना याप्मिम्बाक् खाम्सेरेॽवा उठुङ्ङि पाङ् काचोक्बा ठोनाबा याप्मिलोक् टोङ्सुङ्टुङ्॥ 27ठेना व्हेट् टायाउङ् भोल उङ्से, हिट्नुङ् हिट्नि हिॽवा हुन्डारि फेन्डे हिट्नुङ् हिट्ना पाङ् माइधा लेम्सुए, हिट्नुङ् हिट्ना पाङ् होडाउङ् ठेना जाखाम् लिसे॥”
28येसुङा नागा रिङ् माप्मा हिडुङ् उन्ङा हिसिक्टुचिगा रिङ् ओखेम्सुङ् जोम् याप्मिचि डोङ् ओठोङ्डे॥ 29पोङ्भोने उन्ङा याहुदि धारमाबिधि काहिसिक्बाचि गाड्डे माखाक्, टरो ठेना आधिकारलोक् हिसिक्टुचिगा डागा॥#मारकुस १:२२; लुका ४:३२
Pilihan Saat Ini:
मात्ति 7: APH
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2023, Wycliffe Bible Translators, Inc. and Nepal Bible Society
