Matáyɔ 11
11
Yoáni-Mɓatisi aéteki ɓakpa mɔtɛ á Yéso
(Ɔna phɔtɔ Lók 7.18-35)
1Ɓî Yéso ɗágɔɓi phɛá á ɓagoigi nɛkɛ nkama na ɓaɓɛ (12), áɔmɛɛa wa, áoga ɔphɛa na goisaga á ɓakpa ka ntanga-nji ɗanga-ɗanga á kekanga ndɔɔ.
2Cɔ, Yoáni ɗátú ka mekakɔ. Kó, áɔɔ́ka mbino á ekuma ndea Kiísito. Mpɔ, áǒteka ka ɓagoigi mɔtɛ á Yéso, 3ka usia akɛ ɓe: «Oɓɛ aámbé otókeni óbikɛ? Ɓémɓondeɛgɛ goto nkpa ɓaangbo?» 4Yéso áǒsikisia te: «Gǎni ɓóngoɗeɛ Yoáni nyɔngɔ nde ɓɔɔ́ki na nnde ɓɔɔni: 5Ɓakeíme-íme ɓáɔnaphi, ɓaɗɔti ɓátambi ánjá, ɓato á sǔ ɓáesokosei, ɓaɗakekanigi-kecue ɓáɔ́kaphi, ɓasí ɓájujúki ka kukuwa, ɓato á ɓuyɛnɛ ɓáɔ́ki Mbino-Ánjá#Ɔna Isa 5.5-6; 61.1. 6Maseye ka nkpa nde káɗeketɛku ɓeekea nɛkɛ ka nyɔngɔ ani.»
7Ɓî ɓagoigi ndea Yoáni ɓásikianigi, Yéso áokpanga yɔnga ka phɔa Yoáni ka usɛsɛ á ɓakpa ɓe: «Eke nde ɓotóge kɔɔnjia ka nkanda? Manganga nde maphopho aoɗengisa? 8Cɔ, eke nde ɓotóge kɔɛnjia? Nkpa nde aɔ́li ngɔ́mbɛ ánjá? Ɓakpa nde ɓáɔ́li ngɔ́mbɛ ánjá, ɓáiki gǎkɛ k'éndu á ɓaamɛ. 9Cɔ, eke nde ɓotóge kɔɛnjia? Mɔtu-nyɔngɔ ndea Mokonga? Eya, nenóngoɗi ɗoni gea, anyɛ́nyi mɔtu-nyɔngɔ ndea Mokonga. 10Nga, Yoáni aámbé ɓáɗundu nyɔngɔ akɛ suɓi á Ɓuku á Mokonga gea: ‹Nenteki ntɔmigi-mbinɔ nɛmɔ mosá akɔ, aɓɔngisiagande aphe mosá akɔ#Ɔna Mkɔ 3.1.› 11Nenóngoɗi ɗoni gea, nna na nkpa nde aɓɔkɔtɛani ka mokonda nde n'aangbóngbó phɛɛ kɔnyɛ́nya Yoáni-Mɓatisi. Nkpa nde a gǎkɛ abɔbɔa phɛɛ ka koɓoamɛ ndea na koba, aámbé aangbóngbó kɔnyɛ́nya yɛ.
12Kpanga ka matú ndɔ Yoáni-Mɓatisi ɗáphɛi na ka kɛ̌kɛnde, ɓakpa ɓáoyombokisa koɓoamɛ ndea na koba, na ɓato á ɓukpɛkpɛ ɓáunge ɓáokaɓa suganea í. 13Ɓaɔtu-nyɔngɔ ndea Mokonga ɓɔbu, n'ɛɔphi ndea Mósa, ɓátɔ̌migi tɔ nyɔngɔ á koɓoamɛ ka gǎ jua ka matú ndea Yoáni. 14Aoɓá na ɓokondi ɓeekea akɛ, Yoáni aámbé ande Elía mmbé ɗáɓáyɔngi ka phɔa akɛ gea abikande. 15Cɔ, mmbé ana kecue, ambe áɔ́kɛ!
16Někengeanisande ɓato á k'ɛɓɔkɔti nde n'eke? Ɓákengeani na ɓaniki na ɓáiki ka ntanga, na ɓáǒtoɓea ɓadaɓɔ: 17‹Ɓenósúi mbengu, ɓókoɓinɛ! Ɓeoemba embɔ á kekusa, ɓókoɓɛ n'oiɔ!› 18Cɔ, Yoáni ɗábiki, ɗákáoeaga na noa. Ɓakpa ɓâ ndiu ogea te, ana ɓansombo. 19Muna-Nkpa abiki, aoeaga na noa, ɓági te: ‹Ɔnani, nkpa nde ande nto á osǎ na nto á ɓoita, ande dakɛ na ɓaphendisigi manjanja na ɓato á ɓojeɗe!› Cɔ, kɔɓɔɔngɛ ndea Mokonga a gǎkɛ ɔɔnɛkana base k'ékuma nde aɔtɔtɔkisa.»
Ntanga-nji nde ɓáyé ɓeekea á Yéso
(Ɔna phɔtɔ Lók 10.13-15)
20Mpɔ Yéso áokpanga yeya á ɓato á ka ntanga-nji ɗanga-ɗanga nde ɗági ketangaɔ ásii kau nga, ɗáɓákákěti tambea aɓɔ ájeɗe. Aogea: 21«Ngomi ka ɓato á ka Koajíni! Ngomi ka ɓato á ka Bɛtɛsaída! Nga, ɗátúoɓá ketangaɔ ndɔ ɗágeani mɔtɛ-anu, ɗátú ogeana ka Tílɔ na Sidɔ́na, ámbé ɓakpa á ka nji ndɔ ɗáɓáɔ́li ngɔ́mbɛ á kekusa na bisa á ebǔ ka mɔ̌ aɓɔ ka phangia base gea ɓákěti tambea aɓɔ ájeɗe#Ɔna Isa 23.1-18; Ɛjɛ 26; Yɔɛ́li 4.4-8; Amo 1.9-10. 22Ka nyɔngɔ índɔ unge nenóngoɗi gea, esa á tena á nyɔngɔ, nyɔngɔ nɛnu aɓande akpɛ kɔnyɛ́nya nnde á Tílɔ na Sidɔ́na.»
23«Cɔ, ɓenu ɓato á ka Kapɛɛnaúmu, ɓooúba te, ɓotáiande na koba? Ɓánodidisande sua nji á ɓasí. Nga, ɗátú oɓá ketangaɔ ndɔ ɗágeani mɔtɛ-anu, ɗátú ogeana ka Sɔdɔ́ma, ámbé nji ndɔ ɗátú phɔ́ tɔ ɓei na ka kesande. 24Ka nyɔngɔ índɔ unge nenóngoɗi gea, esa á tena á nyɔngɔ, ɓátenande nyɔngɔ ínɛnu akpɛ kɔnyɛ́nya nnde á Sɔdɔ́ma.»
Maseye ka ɓato á měma édidisa
(Ɔna phɔtɔ Lók 10.21-22)
25Ka matú ndɔ, Yéso áɔyɔnga ɓe: «Abɛ, Mɔkɔta á na koba na mokonda, nekobebi phɛɛ nga, kema nde ɔsɔmi ka ɓato á kɔɓɔɔngɛ na ɓaúbaphi#Ɔna 1 Ɓkt 1.17-29, obisi ú base ka ɓaniki ɓábɔbɔa. 26Eya, Abɛ! Nnde ɗókondi aungɔ.»
27«Abɛ ɗámopi kema bui. Nna na nkpa nde aomúba Miki, na nna tɔndɔ Abɛ. Nna na nkpa nde aomúba Abɛ, na nna tɔndɔ Miki, phɔtɔ na ɓunde Miki akondi áephangiɛ Abɛ base.»
28«Bikani mɔtɛ-amɔ ɓenu ɓɔbu íɓunde ɓootambaga na nkumba áɗokǒ, eme nenophande múmbiɔ. 29Kumbani nkumba áɗoko nɛmɔ na ɓógoɛgɛ ɓɔphɛi nɛmɔ nga, eme neaphɔngɔ na měma édidisa. Kaɓondɔ, ɓenu sasanu ɓoúmbiande#Ɔna Yɛɛ 6.16. 30Moangɔ nde nenóangei nna akpɛ, na nkumba nde nenóphande aáphǒ.»
Pilihan Saat Ini:
Matáyɔ 11: KMW
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2021, Wycliffe Bible Translators, Inc.
