Mataayo 3

ɄYoohani ʉMwozi ahwanda alʉmbɨɨlɨle

(Maalʉko 1:1-8; Luuka 3:1-18; Yoohani 1:19-28)

1ɄYeesu lwa‑ali hu Nazaleeti, ahafumiiye ʉmuntu ʉmo ʉyo itaawa lyakwe ahali yʉ Yoohani ʉMwozi. Ʉmuntu ʉyo ahalolɨɨshe mu lʉʉgwa ʉlwa hu mukowa ʉgwɨ Yudeeya. Ahalʉmbɨlɨlaga ahagaga, 2“Lambaji na huzileshe ɨmbiibhi zyenyu, pɨpo ʉwumwɨnɨ ʉwa hu mwanya#3:2 Ʉwumwɨnɨ ʉwa hu mwanya hwa huje, ʉwumwɨnɨ ʉwa Ngʉlʉbhɨ. Bhaazya Maalʉko 1:15; Luuka 4:43. Nantele, bhaazya izwi Wumwɨnɨ ʉwa Ngʉlʉbhɨ hu Ngalulanyo ɨyɨ Mazwi aMajenu hu malishilo wɨ shitaabu ɨshi. wupalamiiye.” 3ɄYoohani ʉyo ya yʉʉyo ahayangwaga nʉ Ngʉlʉbhɨ ashilile hwa nʼkuwi waakwe#3:3 nʼkuwi waakwe Ʉnʼkuwi wa Ngʉlʉbhɨ hwa huje ʉmuntu ʉyo ahubhabhʉʉzya abhantu ɨnongwa zya zifuma hwa Ngʉlʉbhɨ. ʉYesaaya huje,

“Ʉmʼmomvi ʉnʉ ya yʉʉla ahayilʉmbɨlɨlaga mu lʉʉgwa huje,

‘Lilɨnganyaaji idala lya Mwɨnɨ,

mugolosyaje idala lyakwe.’ ”#Bhaazya Yesaaya 40:3.

4ɄYoohani ahakwataga amenda agɨ mawooya agɨ hanu ya bhayiga ngamiya, ahahwipinyaga ni‑ilamba ɨlyɨ nkwembe mu nʼsana gwakwe.#3:4 ɄYoohani ahali akwata amenda ɨgo gahalɨngɨɨne nanshi amenda ga‑ahakwataga ʉnʼkuwi ʉEliya. Bhaazya 2 aBhamwɨnɨ 1:8. Ɨshalye shaakwe shahali nzije nʉ wʉʉshi. 5Abhantu abhinji bhahamʼmwɨnzɨlaga afume hwi‑ibooma ɨlyɨ Yelusaleemu na hu mukowa gwonti ʉgwɨ Yudeeya na mu mbali zyonti ɨzya hunshɨnjɨ yi‑isooho ɨlyɨ Yolodaani. 6Bhahalambaga na huzileshe ɨmbiibhi zyabho, wope ahabhozyaga mwi‑isooho ɨlyɨ Yolodaani.

7Leelo ʉmwene ʉYoohani lwa waalola aBhafalisaayo na Bhasadukaayo#3:7 aBhafalisaayo na Bhasadukaayo Bhaazya izwi Bhafalisaayo ni‑izwi Bhasadukaayo hu Ngalulanyo ɨyɨ Mazwi aMajenu hu malishilo wɨ shitaabu ɨshi. bhahumʼmwɨnzɨla hu winji huje abhoozye, ahabhabhʉʉzya ahaga, “Amwɨ muli bhabhiibhi nanshi ɨnzoha!#3:7 Amwɨ muli bhabhiibhi nanshi ɨnzoha Mu njango ɨyɨ Shiyunaani ɨsimbwilwe huje, Amwɨ muli mpaapo yɨ nzoha. ABhayahuudi bhahazilolaga ɨnzoha huje, zyɨ mbiibhi tee. Nantele, zimemile amalenga tee ashile ɨhanu ɨzyɨnjɨ. Bhaazya ʉWandilo 3:1-15. Muyiga mugashɨmbɨla ʉlufundo lwa Ngʉlʉbhɨ lwa lwahayɨnza, hwi‑idala ɨlya hwozewe sinta alambe hu lyoli? 8Ɨnjendo zyenyu zilolesyaje huje mulambile na huzileshe lwonti ɨmbiibhi zyenyu. 9Muleshe asɨɨbhe huje, ‘Tiponile hu nongwa ya maama weetu ʉAbulahaamu.’#3:9 Tiponile hu nongwa ya maama weetu ʉAbulahaamu ABhayahuudi bhahajile saga bhahayilongwa, pɨpo bhaana bha Abulahaamu, ʉyo ahali asaluliilwe nʉ Ngʉlʉbhɨ. ɄNgʉlʉbhɨ ahanʼsaluuye ʉAbulahaamu abhe wandilo wa bhantu bhaakwe aBhayahuudi. Bhaazya izwi Abulahaamu hu Ngalulanyo ɨyɨ Mazwi aMajenu hu malishilo wɨ shitaabu ɨshi. Lyoli ɨhubhabhʉʉzya, ʉNgʉlʉbhɨ abhajiiye hugagalulanye amawe ɨga abhe bhaana bha Abulahaamu! 10Ɨshi, ʉNgʉlʉbhɨ ahwibhɨɨshɨle nzɨɨla ayazye abhantu bha saga bhabhomba ɨnyinza, nanshi ʉmuntu wa‑akhɨɨte ɨntemo na hwibhɨɨshe nzɨɨla ateme amakwi. Ɨshi nkashele ikwi saga lihwela amantongooni aminza, litemwa na‑ataagwe mu mwoto.

11Anɨ ɨhubhoozya amwɨ na mɨnzɨ abhonesye huje mulambile hu mbiibhi zyenyu. Leelo ʉyo wa‑ahwɨnza hwisinda lyanɨ ali ni‑ikhone hunshile anɨ. Anɨ saga ɨhondɨɨye abhe nʼkalwe waakwe huje ɨngasatula ɨnkusa zyɨ ndaatʉ zyakwe.#3:11 ɨngasatula ɨnkusa zyɨ ndaatʉ zyakwe Nkashele ʉnʼjenu atʉʉha mu nyumba, ʉnʼkalwe ahamʼmwawulaga ɨndaatʉ na humʼmwozye amanama gaakwe. Ɨmbombo ɨyo yahali ya nʼkalwe ʉwa pa nsi tee. Ʉyo ahayihubhoozya nʉ Mʼpepo ʉMʼfinjile na hu mwoto. 12Ʉmwene ahayihubhabagulanya abhagolosu na bhabhomba mbiibhi#3:12 bhabhomba mbiibhi Bhaazya izwi Bhabhomba mbiibhi hu Ngalulanyo ɨyɨ Mazwi aMajenu hu malishilo wɨ shitaabu ɨshi. nanshi ʉmuntu wa‑agulusya ɨngano pa lubhʉngʉlʉ. Abhʉngaanya ɨngano na huyibhɨɨshe mu shanga, leelo ameelelo ahugapemba mu mwoto gwa saga guzima nka lumo.”

Ahwozewe hwa Yeesu

(Maalʉko 1:9-11; Luuka 3:21-22)

13Ɨpo ʉYeesu ahafiha pi‑isooho ɨlyɨ Yolodaani afume hu mukowa ʉgwɨ Galilaaya huje, ayoozewe nʉ Yoohani ʉMwozi. 14Leelo ʉmwene ʉYoohani ahalɨnga huje akhaane. Ahamʼmʉʉzya ʉYeesu ahaga, “Ɨshi, zili wɨlɨ huje aawe ʉyɨnze hwaliinɨ? Anɨ nɨɨnɨ ɨhwanziwa ahwozewe naawe.” 15ɄYeesu ahamʼmwamula ahaga, “Aawe ʉbhombe ɨsho, pɨpo tihwanziwa hugabhombe gonti gaala ʉNgʉlʉbhɨ ga‑ahwanza.” Ɨpo ʉYoohani ahɨɨtɨha, ahamʼmwozya.

16Hu habhaazyo ɨho ʉYeesu lwa woozewa, ahazʉbha afume mu mɨnzɨ. Pɨnɨɨpo lwene ɨmwanya yahiiguha, ahanʼnola ʉMʼpepo wa Ngʉlʉbhɨ ahwiha pa mwanya yaakwe nanshi ɨnkʉnda. 17Ɨpo izwi afume hu mwanya lyahaga, “Ʉnʉ Mwana waanɨ ʉnʼkʉndwe, ahungwɨzya ʉmwoyo.”

Pilihan Saat Ini:

Mataayo 3: SBK

Sorotan

Berbagi

Salin