Matayo 14

Ikuya ramwa Yohana Mubadisi

(Mrk 6:14-29; Luk 9:7-9)

1Itungo rasëë Herode mutëmi në munyughu agategheeya ukumu wamwa Yesu. 2Uvii, agavëëra atumami vakwe, “Muntu uyuu unë Yohana Mubadisi, wafëtyaa ufuma gwa akuyi, gusoko ësëë nguu ya makura ëgutenda mwëmo mukhatë akwe.”

3Herode agamuroghoa Herodia, mukhema amwa Filipo muunaakwe. 4Yohana agamwëëra Herode, “Itinoneye veve uduva na mukhema wasuu. Gusoko ësëë Herode agamukwata Yohana, agamutunga mënyororo na umutëëra ugeresa.” 5Herode agafenja umuuragha Yohana, ëgweeso agaooghofa antu gusoko gwa antu Yohana na munyagëdaghu. 6Musigunkuu a ufafwa kunë Herode, muncha amwa Herodia agiisa usonge a aghenyi. Herode agayanjisiwa, 7faka agavëka ukhani gwa girafëa umufa muncha wasuu intu gëkaku nëuguromba. 8Mweeso, kunu ugusoseeywa na yiu wakwe, agaromba, “Mpaa afaa mwihari itwe ramwa Yohana Mubadisi.” 9Mutemi agoona uvavi, ëgweeso gusoko a irafëo rakwe na gusoko a aghenyi vasaa nënaa vëëmumalëwa, agaraghëëya afewe. 10Uvii, Herode agamutuma muntu, agamukigita itwe Yohana nënaa wëë ugeresa. 11Itwe rakwe rëgeetwa mwihari, vëgamufa muncha wasuu mweesonoo agamutoera yiu wakwe. 12Asëywi vamwa Yohana vëgaja vëgauhora mwëërë wakwe vëgauvëka. Vëgeenda umufa Yesu sayu.

Yesu uguvafa malëwa antu maghana anjou ataano

(Mrk 6:30-44; Luk 9:10-17; Yoh 6:1-14)

13Yesu nënaa wahanga sayu ësëë, agahegha faafo gwa masua, agenda mweeso imwene fana naa gutie muntu. Ëgweeso antu nënaa vahanga sayu, vëgawuka gwa mughuu ufuma umujini vëgamuhonga. 14Uvii, nënaa watununta umpeo a irambo agoona mwirundo üküü wa antu, agavaonëa uvavi, agavaforya arue vawe.

15Nënaa aa mpëndë, asëywi vakwe vëgamwendea vëgamwëëra, “Afaa unë mu mbugha, na matungo endaa. Uvii, vanyaghwisye antu vende uvijiji vëghure malëwa.” 16Yesu agavakhanëa, “Aja ti vija vionyeeywe gwende, nyee vafi malëwa.” 17Ëgweeso veesonoo vëgamwëëra, “Sese gukweti mëkaate ëtano gutufu nanë somba ivëë.” 18Yesu agavëëra, “Ndetei afaa.” 19Agavaraghëëya antu vikhee mumahwa. Faafo agamëhora mikaate ëtaano ësëë nanë somba ëyoo ivëë, agararaara gunto girunde, agamurumba Muungu. Uvii agamëvegha mëkate ësëë, agavafa asëywi vakwe veesonoo vëgavafa antu. 20Antu voong'e vëgala, vëgikuta. Asëywi vëgahaangwëëya manyinyanguko vëgijuya makafu ikumi na avëë. 21Antu voong'e nëvëgala naa aghosya vëkhondie maghana anjou atano, gwa udëa uvavarya akhema nanë ang'enya.

Yesu ugwendeenda gunto a majë

(Mrk 6:45-52; Yoh 6:16-21)

22Mugënyafaafo, Yesu agavëëra asëywi vakwe, vënatëe masua, vëtongeree gitumbë ra irambo itungo nënaa mweeso uguvanyaghwisya antu. 23Nënaa waanyaghwisya, aganatëa ugëtanto mweeso imwenedu usarëa. Nënaa aa mpëndë, mweeso naa wëëkuuko imwene, 24na itungo rësëë masua ësëë naa afikaa fifë mukhatëkhatë a irambo ëgweeso naaëvukie kunu ëgufeempuka gusoko mpefo naa ëgumëfëmba na umesucha unyuma.

25Utiku, nënaa gwahumbeera gwera, Yesu agaveendea asëywi ugwendeenda gunto a majë. 26Asëywi vakwe nënaa vamwoona ugwendeenda gunto a majë vëgingëwa na wova, vëgahanya, “Mufuma gwa arungu!” Vëgakurya mukindo gwa wova. 27Gënyafaafo, Yesu agarëghëtya inaawe, “Riki unë nene. Mutaoghofee!” 28Fetero agamwëëra, “Müküü, nësa unë veve tutë, nkhanëa nene nëendeende gunto, a majë nëje kunë vee,” 29Yesu agamwëëra, “Arë, njuu.” Uvii, Fetero agika ufuma mumasua ësëë, agëndeenda gunto a majë, agamwendea Yesu. 30Ëgweeso nënaawatang'ana na mpefo nënaa ëkunkie, agooghofa, agaandya uyagheera mumajë agakuta gwa ruri, “Müküü, ntyoa!” 31Faafo, Yesu agaghoora mukhono wakwe, agamukwata na umwëëra, “Vee munya uhuvëi nëunyuui! Asikë nëaja wahangaa wisaghasaghëi?” 32Uvii, vëganatëa mumasua, na mpefo ëgarika. 33Voongë nënaa vëëmumasua vëgamutungamëa vëgamukurya, vëgahanya, “Tutë veve wëë Mwana wamwa Muungu.”

Yesu uguvaforya arue uGenesareti

(Mrk 6:53-56)

34Vëganankëa irambo vëgafika ung'e a uGenesareti. 35Antu va kuuko nënaa vamumanya vëgatanantya sayu goong'e mumatumbë asaa. Uvii, vëgamweetea Yesu arue voong'e, 36vëgamunëna avayanjëye vëtenie gutufu ifëndo ra isaa rakwe, voong'e nëvëgamutenia vëgafora.

Pilihan Saat Ini:

Matayo 14: RIMRC

Sorotan

Berbagi

Salin