Rut 1
1
Moab nacionman Elimelec ëwanqan
1Israel nacionćhö juezkuna mandayanqan witsanmi alläpa mallaqnë käqan. Tsëmi Judá trïbu runakuna täkuyanqan Belén markapik uk runa warminta tsurinkunata pushakurkur Moab nacionman#1.1 Moab nacionqa ishkë ćhunka (20) lëwanömi Belén markapik käqan. Moab nacionpik masta musyanëkipaq liyinki Génesis 19.37; Números 22—24; Deuteronomio 2.9; 23.3-6; Jueces 11.17. ëwaköqan. 2Tsë runapa shutinmi Elimelec käqan. Warminpa shutinmi käqan Noemí. Tsurinkunapa shutinkunam Mahlónwan Quilión käqan. Pëkunam Judáćhö Belén markapik Efrata casta runakuna kayäqan. Moabman ćhëkurmi tsëćhö täkuyäqan.
3Moab nacionćhö Elimelec wañuskiptinmi Noemí viüdayar ishkan wamrallankunawanña qepäyäqan. 4Tsë wamrankuna jövinyaskirmi Moab nación shipashkunawan ćhurakäyäqan. Quiliónpa warminpa shutinmi käqan Orfa. Mahlónpa warminpa shutinñam käqan Rut. Moab nacionćhö ćhunka wataña täkïkarmi 5Mahlónwan Quiliónpis wañukuyäqan. Qosan wamrankunapis wañuskiyaptinmi Noemíqa apallanña qepäqan.
Rutwan Noemí Belénman kutiyanqan
6Moab nacionćhö këkarmi Noemí musyäqan Israel runakunaman Teyta Dios bendicionninta ćhuraptin mikï chumaq wayunqanta. 7Tsëmi ishkan waćhqunkunata pushakurkur Moab nacionpik Judáman kutiköqan.
8Ëwëkäyanqanćhömi waćhqunkunata ñëqan: “Mamëkikunapa wasinman kutikuyë. Ñoqatawan wamräkunata alli rikäyämanqëkipik Teyta Dios qamkunatapis yanapëkuyäshunki. 9Tsënölla Teyta Dios yanapëkuyäshunki uk runawan ćhurakar alli kawayänëkipaq”.
Tsëpikmi waćhqunkunata despidikur mutsäqan. Tsëmi waćhqunkuna alläpa llakirnin waqar 10ñiyäqan: “Manam kutikuyätsu. Markëkiman qamwan ëwakushun” ñir.
11Noemíñam ñëqan: “Kuyashqa wawalläkuna, kutikuyë. ¿Imapaqñatan qatiräyämankipis? Ëwashqapis manam wamräkuna kanqañatsu wiñayaptin täkuyänëkipaq. 12Wasikikunaman kutikuyë. Ñoqaqa ćhakwasñam kä. Manañam runawan yapë ćhurakäshaqñatsu. Kanan paqas runawan puñur qeshyaq tikraptëpis 13shuyaräyankimanraqku wamrä yuriskir jövinyanqanyaq. Manam qosannaqllaqa qepäyankimantsu. Wamräkunatawan qosätapis Teyta Dios qećhumaptinmi alläpa llakishqa këkä. Qamkuna ñoqawan ëwar ñakayaptiki masraqmi llakikushaq”.
14Tsënö ñiptinmi waćhqunkuna alläpa waqayäqan. Waqëkäyanqanpikmi Orfaqa suegranta mutsëkur wasinpa kutiköqan. Rutqam suegranwan qepäqan. 15Ruttañam Noemí ñëqan: “Waćhqu masikipis markëkikunaman kutikïkanñam. Markëkikunaćhöqa diosnikikunapis kanmi. Qampis pëllawan yanaqänakur kutikuyë” ñir.
16Rutñam ñëqan: “Mamë, imata ñimaptikipis manam dëjashqëkitsu. Ñoqaqa qam ëwanqëkipam ëwashaq. Mëćhöpis täkunqëkićhömi täkushaq. Markëkim markä kanqa. Diosnikim Diosnë kanqa. 17Mëćhöpis qam wañunqëkićhömi ñoqapis wañushaq. ¡Kawëkarraq dëjaskirniki ëwakuptëqa mana llakipämar Teyta Dios castigamätsun!”
18Tsënö ñiptinmi Noemíqa imatapis ñëqanñatsu. 19Tsëmi ishkan ćhäyäqan Belénman. Ćhäyaptinmi llapanpis kushikuyäqan. Warmikunapis uknin ukninmi: “¡Noemími kutimushqa!” ñiyäqan.
20Tsëñam Noemí ñëqan: “Kananqa amaña Noemí#1.20a Noemí ñinanqa kushishqa ñinanmi. ñiyämëñatsu. Tsëpa rantinqa Mara#1.20b Mara ñinanqa ayaq ñinanmi. Hebreo runakunaqa ima ñakëpis päsaptin vïdan ayaq kanqantam ñipäkoq. ñiyämë, llapanpaq munëniyoq Teyta Dios alläpa castigamanqanpik. 21Këpik ëwakuyaptë qosäpis wamräkunapis y imëkäkunapis käqanmi. Kananqa alläpa waktsayashqam kutimushkä. Llapanpaq munëniyoq Teyta Dios tsënö castiguëkämaptinqa amaña Noemí ñiyämëñatsu” ñir.
22Tsënömi Moab nacionpik waćhqun Rutwan Noemí kutikuyäqan. Pëkunam Belénman ćhäyäqan cebäda cosëcha qallariykaptin.
Pilihan Saat Ini:
Rut 1: qcgPB
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2022, Wycliffe Bible Translators, Inc. All rights reserved.