Mata 21

Kunna ge walay nde ge Zeso ne Jerusalem diŋ

Mrk 11.1-10; Luk 19.28-44; Yoh 12.12-19; Eza 12.6

1Zeso mage na nda ge ame hateya ma yan-na guwa ge suwal ga̰a̰l Jerusalem. Sok ge àa dee ya ge njal ge ɔwara oliv ma do̰o̰ no ne pagal digi kin̰a go, ndwa mbo waɗ Betfaje diŋ, suwal van ge no Jerusalem ziya, teme na nda ge ame hateya ma zi, 2jan num go: Ḛ mbo ge suwal van ge no ge nè ndwa nga diŋ yà, bàŋ go velgeteg, ḛ mà seɗ kwar na̰ vwalla se, ge na van na ziya go, ḛ saa num, ḛ gene num ya mbi ta. 3Kaɗɗa ndu mà ele ḛ fare a̰me ya, ḛ mà gwan ge ne janna go: A Bagezok ɓyare num ne, ge sok mbe go, mà n̰a ḛ mboya ge num. 4Fare mbe dee ya keeya ndwa huy fare janna ge ndu ge zwagre Dok wa ne ma:

5«Ḛ jin̰a nda ge suwal ga̰a̰l Siyo̰ diŋ-ge ma go:

Ḛ kuwa, gan ga̰a̰l yan ja ḛ ta no,

Suul lɔlɔgwaɗ kàɗɗa kwar na̰ pagal digi,

Ge kwar van pagal, kwar van na̰,

Kaŋ kogor ge in kaŋ dṵṵl.»#Eza 62.11.

6Nda ge ame hateya ma mbo, àa kee ge mojo̰o̰ Zeso ho maa na wa mbe go. 7Àa gene kwar na̰ mage na van ya jwàg. Guwa̰, àa kan maa ba̰a̰ ma ge num guwa̰ digi, àa ee Zeso kaɗ na pe num pagal me. 8Ge sok mboya go, nda gḛḛ ge ɓase nɔnɔg ma buwal zige ma zen maa ba̰a̰ ma ge vin̰a pul go, gegene ma chal ɔwara tok ge tɔgwal ma ya, àa tiɗ num ge vin̰a pul go me. 9Nda kaɗ ne ndwa zḛḛ cùb, gegene ma kaɗ ge ne guwa̰ go me. Àa ka oyya digi ndaal go:

«Hosana, gan ga̰a̰l Daviɗ Baŋ

Dok ke wa tare ge ndu ge mbo ya

Ge dḭḭl ge Bagezok ne pagal.

Hosana, Dok ge pḭḭ ma zì yà ge.»#Mkm 118.25-26.

10Sok ge Zeso wuwa ya Jerusalem diŋ, suwal ga̰a̰l mbo ya haɗ digi go giliw, nda ɗege ele ta go: Ndu mbe no ɗaa, a huɗi ne de? 11Ɓase ma ka gwan ge num janna go: A Zeso ndu ge zwagre Dok wa ge suwal Nazareɗ ge no suwa ge Galile ne go ne.

Nda yanna ge zok ge Dok ne zì ya zum

Mrk 11.15-19; Luk 19.45-48; Yoh 2.13-22

12Guwa̰, Zeso waɗ ge zok ge Dok ne zì yà, yan nda ge ka ee kaŋ yaɗɗa mage num ge yaɗ kaŋ ma ya zum peɗ. Pugi taabul ge nda ge eya bware ma way ma ya se, dol kaŋ kàɗɗa ge nda ge yaɗ tugtug gezi ma way ma se me. 13Jan num go: Njaŋe ge maktub ge Dok ne zì go: «Àa mbo tol mbi zok go, zok kee kaɗeya. Ɗaŋɗe, ḛ me ɗe, ḛ seŋe ne ya sok way ta ge chala ma way no.»#Eza 56.7.

14Sok mbe go, ɓaal mage giɗi ma mbo ya zok ge Dok ne zì ge ne ta, ne sḛ zon num me. 15Sok ge Yahuɗ ma ga̰a̰l ge nda ge kee tuwaleya ma way mage nda ge hate eeya ge Moyiz ne ma kuwa ne kaŋ keeya ge ajab mbe ma, ge nda jabso oyya ge àa ka oyya ge zok ge Dok ne mbe zì go: Hosana, Daviɗ Baŋ, num laa vḛḛne gaw. 16Àa jan ne go: Mo za̰a̰ fare ge àa jan mbe ma go ɗer ɓade? Zeso gwan ge num janna go: O̰o̰ ḛ be isi maktub ge Dok ne sok ge jan go: «Mo nuusi vin̰a nuusi ge go, koo nda jabso mage num ge pam wa go ge ma uware mo to de?»#Mkm 8.4. 17Guwa̰, n̰a num, waɗ ge suwal ga̰a̰l diŋ ya zum mbo suwal Betani, ndwa go ka dwam ya mbe go.

Wa vḛḛneya ge Zeso ne ge fere pagal

Mrk 11.12-14, 19-26; Luk 13.6-9

18Kin̰are aaram, sok gwan-na ge suwal ga̰a̰l Jerusalem diŋ go, camal wan ne. 19Kuwa fere mḛḛya ge vin̰a kin̰a go, kun ne ta zì yà, ɗaŋɗe, seɗ go ne gàa ma ne ɗeŋew, jan fare ge ne pagal go: A gaa no mbo zḛḛ, mo daa gwan tol ndwa to baɗ. Ge sok mbe go gaw, fere mbe fin̰a huyum. 20Sok ge nda ge ame hateya ma kuwa kaŋ mbe ma go, àa kee ajab, àa ele ta go: Daa kee pe gyana fere mbe wa fin̰a vun go gaw de? 21Zeso gwan ge num janna go: Fareba mbi jan ḛ ne no, kaɗɗa ḛ ge hoɗ fareba, ḛ tumri ta to me ɗe, ḛ mbo kee kaŋ ajab ge mbi ngay ne no fere ta ɗeŋew to, ɗaŋɗe, sok ge ḛ mbo jan njal ge ɔwara oliv ma do̰o̰ no ne pagal digi mbe ya go: Ndage tene ge sok mbe no go, mbo dol tene ge mam ga̰a̰l nuwam se yà, ano mbe mbo kee go tem. 22Kaɗɗa ḛ ge hoɗ fareba, ḛ mbo seɗ kaŋ ge diige pe peɗ ge ḛ mbo ele ne ya, sok kee kaɗeya go.

Fare eleya ge pool ge Zeso no ge ne pagal

Mrk 11.27-33; Luk 20.1-8

23Guwa̰, Zeso waɗ ge zok ge Dok ne zì yà, ɗege hate nda. Ga̰a̰l ge nda ge kee tuwaleya ma way mage Yahuɗ ma ga̰a̰l ge ɗeme num ma gwan ta ya ne ta zì guwa, àa ele ne go: Mo see vin̰a ge kee kaŋ mbe ma ge huɗi ta de? A huɗi ho̰ mo pool ge kee num ne de? Zeso gwan ge num janna go: 24Mbi sḛ waɗme, mbi mà ele ḛ fare ɗu, mà kaɗɗa ḛ gwan ge mbi vinna ya ɗe, mbi mà jan ḛ ge ma̰ pool ɗoo, mbi kee kaŋ mbe ma no de. 25A huɗi ho̰ Yohana vin̰a ge kee nda baptem ne, a Dok koo nda duwana ma de? Sok mbe go, àa ɗege pee ta ta buwal zì, àa ka janna go: Mà kaɗɗa nè gwan ge ne vinna ya go: A Dok ho̰ ne vin̰a ne, mà jan nè no go: Ge dape ḛ wa hoɗ fareba ge ne ta to de? 26Kaɗɗa nè mà janna go: «See ne ge nda duwana ma ta», ɓase ma mà ɗege nè pagal. Ago, num sḛ ma peɗ ge kuwaya go Yohana ndu ge zwagre Dok wa ne. 27Go mbe no, àa gwan ge Zeso janna go: I wan pe to. Ne sḛ gwan jan num go: Mbi sḛ waɗme, mbi jan ḛ go, mbi see pool mbe ge kee kaŋ mbe ma ge dii de to me.

Fare sḭḭ ge van son ge zi ma way

28Zeso gwan jan num go iya: Ḛ dwaɗɗa fare no pagal gyana de? Ndu a̰me ɗu kaa ge van ma zi, mbo ya ge zḛḛge ta, jan ne go: Mbi van, màno, mbo kee tèmel ge gaaso ge on̰or ne zì. 29Ne van mbe gwan ge ne janna go: Mbi ɓyare to. Guwa̰ swag, eya fare, mbo gaaso mbe. 30Ndu mbe mbo ya ge na van ge zi ta, hoɗ ne na wa ge mojo̰o̰ na jin̰a na van ge zḛḛge go. Ne sḛ gwan na ba janna go: Mbi mbo mbo baa, ɗaŋɗe, mbo gaaso mbe to. 31Ge num ge zi mbe ma buwal zì, a huɗi ke laa ɓyareya ge na ba nee ne de? Àa gwan ge ne janna go: A ge zḛḛge. Zeso jan num go: Fareba mbi jan ḛ ne no, nda ge chal siyal mage nda zaab ge zam ta ma mbo waɗ muluk ge Dok ne zì ḛ ndwa zḛḛ. 32Ago Yohana mbo ya ngay ḛ vin̰a ge temel taɗ, ḛ be hoɗ fareba ne ta to. Ɗaŋɗe, a nda ge chal siyal mage nda zaab ge zam ta ma vare gwan hoɗ fareba ne ta ne zoo, ajo̰o̰ ḛ kuwa kaŋ mbe ma ge ḛ ndwa puy, ḛ be seŋe ta se ndwa hoɗ fareba ne ta to.

Fare sḭḭ ge nda ge kee tèmelgaaso on̰or ma way

Mrk 12.1-12; Luk 20.9-19; Eza 5.1-7

33Zeso gwan jan num go, ḛ za̰a̰ fare sḭḭ a̰me ge ɗogle no: Ndu a̰me ɗu ɗḭḭ on̰or, vê ne zì ge gulum no, câ tugul ge njal zì ge ɓerse on̰or pe no, ɗû acagaɗa ge haal ge gaaso mbe pe koyya no me. Guwa̰, hon nda ge kee tèmel gaaso on̰or ma ne wanna, dol tene mbo gɔswal kaal ndiɗ. 34Sok ge sok hel on̰or mbiya, teme na dore ma ge nda ge kee tèmel gaaso on̰or mbe ma ta yà, ndwa go num ame na na on̰or ndwa ya. 35Nda ge gaa on̰or mbe ma wan ne nda ge tèmel mbe ma, àa iyal ge ɗu, àa hun gegene, àa mbal ge taa gezi ge njal. 36Go mbe no, gwan teme na nda ge tèmel ge ɗogle ma ya gḛḛ waɗe nda ge na teme num ya wal ma. Nda ge gaa on̰or mbe ma kee num yal ge mojo̰o̰ àa kê ge wal mbe ma go ca. 37Ge guwa̰ dwab, teme na van ge son ge num ta yà, ka dwaɗɗa go: Ajo̰o̰ a mbi van ne gaw ɗe, àa mà hon ne hormo nde. 38Ɗaŋɗe, sok ge nda ge kee gaaso on̰or tèmel ma kuwa ne van ya mboya, àa jan ta ta buwal zì go: A ndu ge zam ne joo ne no, ḛ mbo nè ya, nè hṵṵ ne, ne joo mbe wa gaa nè. 39Sok mbe go, àa wa̰a̰ ne no, àa mbo ge ne ge gaaso on̰or guwa̰ zum yà no, àa hṵṵ ne gezi no. 40Zeso ele ga̰a̰l ge nda ge kee tuwaleya ma way mage Yahuɗ ma ga̰a̰l ge ɗeme num ma go: Ge sego mà kaɗɗa go ndu ge gaaso on̰or mbe mbo ja no, kee num mbe ge kee gaaso on̰or tèmel mbe ma gyana de? 41Àa gwan ge ne janna go: Mbo puu num mbe ma gezi be kuwa a̰se, hon na gaaso on̰or mbe wanna ge nda ge kee gaaso on̰or tèmel ge ɗogle ma tok go, ge mbiya hon ne, ne ne ndwa, sok ge siyal ma go tetem. 42Zeso jan num go:

«Ḛ be isi ge Njaŋeya ge Dok ne zì go:

Njal ge nda ge sin zok ma doo ne gezi,

A ne gaa ya njal ge gag ge zok keŋ pe ne,

Ano mbe mbo ge Bagezok ta ya,

A kaŋ ajab ne ge nè kuwa ne no.»#Mkm 118.22-23.

43A ge fare mbe ma no pe, mbi jan ḛ no go: Àa mbo ame muluk ge Dok ne mbe ge ḛ tok go, àa hon ne rusu ge ɗogle ge mbiya tol van ge kwaɗa ma ge muluk mbe pe. 44Ndu ge diige ge mbo deɗ-ɗa ge njal mbe pagal, mbo hal na sok ma kɔkɔcwa, kaɗɗa ne dee ge ndu pagal ne me ɗe, mbo roɗ ne gezi njaɗaɗ me. 45Guwa̰ ge ga̰a̰l ge nda ge kee tuwaleya ma way mage Farisi a̰me ma see go Zeso ke na fare sḭḭ mbe ma ge maa pagal, 46àa ɗege ɓyare vin̰a ge ee maa tok ne pagal, ɗaŋɗe, àa ka chiya voo ge ɓase ge nɔnɔg ma pe, ge dape, ɓase mbe ma ka ndil Zeso ge ndu ge zwagre Dok wa go.

Pilihan Saat Ini:

Mata 21: kiaGRB

Sorotan

Berbagi

Salin