Mata 16

Farisi ma ɓyare kaŋ ngayya a̰me

Mrk 8.11-21; Mat 12.38-42

1 Farisi mage Saduki a̰me ma mbo ya Zeso ta ele ne fare ndwa hee ne pe. Àa jan ne go, ne ke kaŋ ngayya a̰me ɗu ge ee maa kuwaya go, ne pool mbe mbo ge Dok ta ya. 2Ɗaŋɗe, Zeso gwan ge num janna go: Sok ge gyala din se, pḭḭ kaɗ kàal, ḛ jan go: Sok kaɗ kin̰are karaŋ. 3Sok yan-na aaram hewow, ḛ jan go: Mam mà suwa, ago pḭḭ digi pisil ngingil. Ḛ kuwa kaŋ ge pḭḭ digi ma buwal vaaya ɗag, ɗaŋɗe, ḛ ge pool ge kuwa kaŋ ngayya ge sok ge màno ne ma buwal vaaya to wa! 4Ḛ ge doŋ pe ge màno mbe go ma, ḛ nda ge kee sone mage mbo laa ɓyareya ge Dok ne pagal to ma, ḛ gwan ɓyare kaŋ ngayya a̰me ge Dok ta ya! Gaa ɗeŋew go, àa kê ḛ kaŋ ngayya ge àa dee kê ndu ge zwagre Dok wa Jonas ne pe. Guwa̰ ge jin̰a num fare mbe go, n̰a num, dol tene mboya.

Kuwaya to ge nda ge ame hateya ma way

5Sok haa mbo mangaɗam ga̰a̰l wa lee gene ya go, Zeso nda ge ame hateya ma vyale ya be hee dupḛ ma ge maa tok go. 6Guwa̰ ge àa dee yà, Zeso jan num go: Ḛ koy ta kwaɗa ge jìn̰al hore ge Farisi mage Saduki ma way ta. 7Ne nda ge ame hateya ma ka ele ta ge ta buwal zì go, jan fare mbe go, ge nè ɔwabe dupḛ ma ya ge nè tok go to pe de. 8Zeso kuwa go num jan ta fare go ta buwal zì, jan num go: Ge dape, ḛ wa ka jan ta ge ta buwal zì go: Ne ge i he dupḛ ya i tok go to pe de? Hoɗ fareba ge ḛ ḛ zane hoɗege ba! 9Ḛ wan fare mbe ma pe to iya de? Ḛ dwaɗ fare ge dupḛ ge nuwan̰ ge àa vaa nda dudubu nuwan̰ ma num ma, pe ge gaa ma, ḛ kwate num digi gwal pul gyana ga de? 10Koo ge dupḛ ge ɓỳala ge àa vaa nda dudubu ndà ma num, pe ge gaa ma, ḛ kwate num digi gwal pul gyana ga me de? 11Ḛ kuwa ya ge sego, fare ge mbi daa jin̰a ḛ, ne be fare ge dupḛ ma way pagal to kade, ɗaŋɗe, mbi jin̰a ḛ go: Ḛ koy ta kwaɗa, ge jìn̰al hore ge Farisi mage Saduki ma way ta. 12Ge sok mbe go, nda ge ame hateya ma kuwa go, ne daa jin̰a maa fare be ge fare ge koy ta ge jìn̰al hore ge dupḛ ne pagal to, ɗaŋɗe, ge hateya ge Farisi mage Saduki ma way ta.

Piyer fare ge jin̰a ne zum waŋ ge Zeso pe

Mrk 8.27-30; Luk 9.18-21

13Guwa̰, Zeso ɗege mbo ge suwa ge Sezare ge Filib ne yà ɓanna ge na nda ge ame hateya ma. Sok ge àa dee yà, ele num fare mbe no: Nda jan go zum ge mbi, Van ge Ndu ne pe gyana tem de? 14Àa gwan ge ne janna go: A̰me ma jan go go, mo Yohana ba ge kee nda baptem ne, gegene ma go, mo Eli ne, ge ɗogle ma me ɗe, mo Jeremi koo ɗu ge nda ge zwagre Dok wa ma buwal zige ne. 15Zeso ele num go, ḛ sḛ ma jan go, mbi huɗi ne de? 16Simo̰ Piyer gwan ge ne janna go: Mo Krist, ndu ge Dok taa nee ne, Dok Ba ge hon nda ndwa Van. 17Sok mbe go, Zeso jan ne go: Laa saal ge mo pe, Simo̰ ge Jonas van, ago, a be ndu duwana tâ mo fare mbe ne to, a mbi Ba ge no pḭḭ ma zì yà. 18Ge sego, mbi jan mo go: Mo dḭḭl Piyer ndwa go njal, mbi mbo kwate ɓase ge ambi ma ge njal mbe pagal. Koo sok kàɗɗa ge nda ge swày ma way pool go fyalag ge kee num a̰me mbo kaɗ to. 19Mbi mbo hon mo lakle ge muluk ge Dok ne wa ma: Kaŋ ge mo mbo tele ne ya ge suwa pagal, mbo kaɗ teleya ge Dok ta pḭḭ ma zì yà. Kaŋ ge mo mbo hage ne vin̰a ya ge suwa pagal, mbo kaɗ hageya ge Dok ta pḭḭ ma zì yà me. 20Guwa̰, Zeso hoɗ na nda ge ame hateya ma na wa ndaa kaka go, ne kaa ge num jin̰a ndu a̰me go na Krist, ndu ge Dok taa nee ne to.

Zeso wuwage na swày mage na tanna

21Sok mbe go, Zeso ee pe ben na nda ge ame hateya ma fare pe zum kɔn̰al waŋ, ne mbiya go, na mbo Jerusalem, na za̰a̰ yal gḛḛ ge Yahuɗ ma ga̰a̰l ge ɗeme num ma, ga̰a̰l ge nda ge kee tuwaleya ma way mage nda ge hate eeya ge Moyiz ne ma tok go, na see swày, dwam taa guwa̰, na ta̰a̰ digi me. 22Guwa̰, Piyer wan ne ya zum gezi caɗ, ɗege mḛḛre ne go: Ɓyare go mo jin̰a fare ge go mbe ma to, Dok cage mo, Bagezok! Ne kaa ge fare ge go mbe see mo to. 23Ɗaŋɗe, Zeso seŋe tene se, jan Piyer go: Wa̰a̰ tene gezi yà kaal ge mbi Saytan! Mo kaŋ chal ko ne ge mbi pe, ago mo dwaɗɗa ma be dwaɗɗa ge Dok ne ma ne to, ɗaŋɗe, àa dwaɗɗa ge nda duwana ma way ma ne.

Kàre Zeso pe fare ge guwa ne to

24Guwa̰, Zeso jan na nda ge ame hateya ma go: Kaɗɗa ndu ɓyare mbo ya ge mbi pe go, ne duwa tene to, ne he dṵṵl ge in na kaŋre, ne kàre mbi pe me. 25Ago, ndu ge diige ge mbo kaɗ-ɗa ka kwacware tene ge ndwa ge na ne, mbo ban ne gezi. Ɗaŋɗe, ndu ge diige ge mbo hon tene ya gezi, ge mbi pe, mbo seɗ ndwa ge fareba. 26Kaɗɗa ndu duwana seɗ kaŋ gan ge suwa pagal ma ya mɔɗwag, kaɗ go ne ban ndwa ge na ne gezi no, mbo mbaa ne ge da de? Koo mbo hon da ge mbiya ɗoo, wa gwan seɗ ndwa ge na ne mbe ya de? 27Ago, Van ge Ndu ne mbo mbo ya ge pateya ge na Ba ne zì ɓanna ge na malayka ma. Ge sok mbe go, mbo poɗ ndu ge diige ge ne fare keeya pagal tem. 28Fareba mbi jan ḛ ne no: Nda ge no ge sego sok mbe go ma, a̰me ge num buwal zige ma mbo suu to, zḛḛ ge go num kuwa Van ge Ndu ne mbo ya kee muluk ge nda duwana ma pagal.

Pilihan Saat Ini:

Mata 16: kiaGRB

Sorotan

Berbagi

Salin