MATIUS 11
11
E Yohanes Bwi Babwim Ipic atewosomef ow
(Luk. 7:18-35)
1Bare. Yesus jirmec e amamkawi ow dua belas ajiwar ajirimkurumef ara, aramat ipic atakam mamememtamam, bacacapiomam, e sotop kotain kotain ajisosef.
2Yohanesam penjara cem aman cowocemapmepaw, aram e Kristus aemefas atakam jen ajief. E Yohanes masirin, e amamkawi ow, aramat ipicpu atewosomef. 3E owam jonow aramat ipic atowfes. “Or e Allah atewenamcow ipic aranew? Dar wun ipic bwenaw manmok bofe aranew?” Inim aefes. 4Yesus masirin, “Caram baysosey. Wunam e jen ajimokomasam, e apormokomasam, atakam Yohanes mamotawey. 5‘Manmok kapi ow, manmok atereymes. Bwey jini ow ajarmes. Penyakit kusta ow, dam orom aememames. Jen biri ow, jen ajimes. Damir ow ajaworsitmes. Ow e Atakam Akat e pok opok ow acacapiomames. 6E Yesus mamkawi bakorompim opok ow, asan akat aemapmes.’ Inim mameey.” Yesus inim aeef.
7E Yohanes mamkawi ow ajisosfes ara, Yesus e Yohanes atakam e ow arke aotawef. “Car e cem opok asan, ucim pok manmok batiw ajisosfokom? Car, fo, firko bawawarim manmok batiw ajisosfokomnew? 8Car ucim pok bapor ajisosfokom? Pakaian akat ajimomef ipic bapor ajisosfokomnew? Jakaperey. E pakaian akat ajimomames ow, raja cem aman aemapmes. 9Car ucim pok bapor ajisosfokom? Allah atakam botaw ipic bapor ajisosfokomnew? Owoman. Ca nat, jakaperey. Allah atakam botaw ow, kanim ara. E Yohanes nat, awut ara. 10E Alkitab e aramat ipic inim atakam atawmar ara: ‘Jakaperey. Dor e doratemen batam ipic bap atewosomcimin. Or masirin asep ara. Aramat ipic e ajarcem bwey asan akenemtiwcema.’ E Alkitab inim aema. 11Atakamnak ara, e Yohanes Bwi Babwim Ipic, bare awut ara. E wun cepes ajispetiwfes ow, kanim ara. E nat, e Onam Op Pemerintah Asan aemapmes kanimnakap ow, bare awut ara. E Yohanes masirin, kanim ara. 12E Yohanes acacapiomef jofayam, wow ajiwaram, jokmen ow e Onam Op Pemerintah ajamkawimes ow ajurusumawiris. E jokmen ow, e Onam Op Pemerintah ajumnemporawiris. 13E Allah atakam botaw ow aeapomfes surat takasam, e Musa tulis aeapomef Jirmecam, e aenawcesas atakam ara. E surat takas, e Yohanes acacapiomef jofay ajiwaras ara. 14E suratam e Elia bwenaw, atakam atawfes. Bare, Yohanes e Elia araman. Car e atawfes atakam asicimamokomnew? 15Jen fo ow a atakam jen bajices.
16Awaniemames ow ucimas awcaworaram? Dor eras ucim atakam atawcey? Bare, awapes ow, pasar asan bemap jiwi awcawor ara. E jiwi, e atow akac bwe jiwi, atakam awut aamtawcemes. 17‘Dar em car emekurumtamfenom. Ca nat, di badi opokut. Daram awan bwec abwecfenom. Ca nat, bwec opokut.’ E jiwi inim aecemes. 18E Yohanes aenawef ara, ar amosam, anggur bwiam, ban opok. Ow nat, ‘E ipic jak aman, bare dat ara.’ Inim aemes. 19E Asmat Anakat Ajaworemef Ipic aenawef nat, ar amosam, bwiam, anawiri. Ow nat, ‘Jakaperey. E ipic amos paknam ipic ara. Aram jokmen bwi jayic ipic ara. Ar pemerintah uang batawanimtam kerja owam, dosa owam, ajowow ipic ara.’ Inim aemes. Allah bi binip nat, umuton cowok ara. Ow e Allah aemamaras apormesnew, ar a atakam, atakamnak apormes.” Yesus inim aeef.
Kota arke ow e adosa bak bapayem opok
(Luk. 10:13-15)
20Bap ara, Yesus e wun kota arke, junum bweas awut arke aemef. Asep ara masirin, ar e kota ow e adosa bak bapayem opok aporef, ar jiman e ow aafef. 21“E ca kota Korasim ow ajurusapcomokom. E ca kota Betsaida owam ajurusapcomokom. Dor junum bweas awutut carasan aemof. E nat, ow inim junum bweas awutut, e kota Tirusam, e kota Sidonam, aemfes ayaw, bare e ow tareynakut, dosa bak emcapayemfes. Aram kus junuk emcaakfes. Aram se emcafifes. 22Ca nat, jakaperey. E Allah, ow siksa bwem jofay aenawcow, ar e Tirus owam, e Sidon owam, siksa kanim inim aemcema. Ar nat, siksa awutut car aemceman. 23Ca Kapernaum owa. Allah car asicimcemannew? Opokut. Ar car daniwis aamceman. Dor junum bweas awutut carasan aemof. E nat, ow inim junum bweas awutut kota Sodom aemfes ayaw, e kota, wow ajiwaram awames. 24Ca nat, jakaperey. E Allah, ow siksa bwem jofay aenawcow, ar e Sodom capinmi ow siksa kanim inim aemcema. E nat, ar siksa awutut car aemceman.” Yesus inim aeef.
“Caram do enawcan”
(Luk. 10:21-22)
25-26E jofayam ara, Yesus atakam atawef. “Diwi. Or e onam opam, e capinmiam, aomomamem. O nat, eras e bi binip umuton owam, e amsom owam, acukumomfem, wunam eras jiwi kanim aporomtamfem. Oram inimas bwem akat aemfem. Bare, doram terima kasih atakam or aotawmin.” Inim aeef.
27Yesus masirin, Allah atiw amsom ow, bare opok ara. Aricipic cowok, e atiw amsom ara. Aricipic amsom owam, bare opok ara. Atiw cowok, e aricipic amsom ara. E atiw e aricipic wun ow baporomtam, akat aema. E owam aricipic amsom ara.
28“Ca wun ow, bare juturas atawmokom. Inimas car dam jipi aemamokom. Caram do enawcan. Doram ses ban car atetamcimin. 29E doratakam ji eey. Do mamkawi mamememey. Inimas car ses aancomokom. Bare, do jak jirow ipic ara. Doram dorma batawsicim opok ipic ara. 30E jirmec ajirimaminasam, bare dasas ara.” Yesus inim aeef.
Pilihan Saat Ini:
MATIUS 11: LAICNS
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
