Matyu 14
14
Maipanggep ito pannakatey nito Juan nga Mammautisar
Mar. 6:14-29; Luk. 9:7-9
1Ket itun, to Ari He̍rude̍s nga agturay ka Galilya, nadamag na met ya maipanggep e̍ Je̍sus. 2Ket to ari, nagkagi met kadiya eb-ebbonen na maipanggep e̍ Je̍sus, nga kinunen na, “Igina mettas yan to Juan nga Mammautisar. Nagungar mettin! Itu ya gapu na nga uwed iyan nga toley ya pannakabalin nga mangariman kadiya agten kadiyan nga nadamag tida,” kunen na.
3Agten ngarud iyan to kinunen nito Ari He̍rude̍s, ta itun pekkem, nipatkem na met to Juan, se̍ na pinaibalud nga sipupungu. Agten ngarud iyan to winangel nito He̍rude̍s ito Juan gapu ito He̍rudyas nga asawa met niya kabsat na nga Pe̍lipe̍. 4Ta to Juan, nibagbaga na ngamin e̍ Ari He̍rude̍s itun, nga pe̍yeng na nga kinunen nga, “Bekken ngarud nga nalinteg ya winangel mu, nga inasawam yan nga babey,” kinunen na met itun. 5Ket to Ari He̍rude̍s, gabay na nga ipapatey kuma to Juan. Ngem madi na pekkem pinapatey itun, ta mansing kadiya toltoley, gapu ta nibilang da nga isa nga mammadtu ne̍ Apu Diyus to Juan.
6Ket ya napasamac itun, ito nadatngan to algew nga panangilagip da ito pannakaiyanac nito Ari He̍rude̍s, nipabuya niya babey nga anac nito He̍rudyas ya panagsala na iya sangu diya sangaili. Ket nagustuwan nga unay nito Ari He̍rude̍s to panagsala nito balasang. 7Itu nga nagsapata met to Ari He̍rude̍s, nga nikari na ito balasang, nga orey nagan na kanu nga adngen nito balasang, ket e̍cde̍ na kanu ngarud.
8Ket to ina nito balasang, nisuru na ngarud ya adngen na, itu nga kinunen nito balasang ito Ari He̍rude̍s, “E̍cde̍m kuma iyaken ita ngi nin ya ulu ne̍ Juan nga Mammautisar, nga maipay ka bande̍hadu,” kunen na met.
9Ket linumdaang ngarud to ari yin. Ngem gapu ito sapata na, se̍ gapu met iya kauwed dito sangsangaili na itun, nibilin na ngas nga matungpal kanu to inadeng nito balasang. 10Itu nga nibon na ngarud ya nawe̍ nangputul iya ulu nito Juan ito nakaibaludan. 11Ket ne̍lbe̍t na ngarud met to ulu nito Juan, nga naipay ka bande̍hadu, se̍ naiyawat met ito balasangin. Ket to balasang, nipen na met ito ina nan.
12Ket dito pasurut nito Juan, nawe̍ da inalac ya bangkay na, se̍ da nitamen. Ket se̍ da nawe̍ nipadamag e̍ Je̍susin.
To panangpakan ne̍ Je̍sus ka nasuruc nga
lima nga ribu nga toley
Mar. 6:30-44; Luk. 9:10-17; Juan 6:1-14
13Ket ito nadamag ne̍ Je̍sus yan, pimanaw antuni nin, ket awan nibulun na kadito toltoley. Nagbangka nga nawe̍ iya lugar nga awan matagtagitoley na. Ket ito naemmuwan diya toltoley yan, nawe̍ da ngarud simurut igina, nga nanalan da iya ginet nga naggayat kadiya il-ili da. 14Ket ito nakagacdang nge̍ Je̍susin, nasingen na dito nakad-adu nga toley. Ket naasiyan igida, ket pinalaing na diya agsakit igida.
15Ket ito gumidamin, imadenni dito adalan na igina, ket kinunen da, “Away met idi, ket gumidam mettin. Papanawem kuma ngin diya toltoley, tasun mawe̍ da kuma ngumina ka kanen da kadiya purpuruc,” kunen da.
16Ket kinunen ne̍ Je̍sus, “Madi da met masapul nga pumanaw. Dakayu lugud a, ya mangpakan igida,” kunen na.
17Ket kinunen da ngarud igina, “Awan makan tida idi, malacsid ngas ya lima nga bukel nga tinapay se̍ duwa nga lames,” kunen da.
18Ket kinunen na manin, “E̍lbe̍t nu da idi edyan ku,” kunen na. 19Ket nibilin ne̍ Je̍sus nga agtugew kanu diya toltoley ito karuutan. Ket nimet ne̍ Je̍susin dito lima nga tinapay se̍ duwa nga lames. Limangad ka langit ket nagkararag nga nagyaman e̍ Apu Diyus, se̍ na pinisepisey dito tinapay, se̍ na ne̍cde̍ kadito adalan na. Ket dito adalan, niwaras da kadito toltoley. 20Ket dito toltoley, nangan da ngarud nga amin, ket nabsug da met. Ket kalpasan na, inurnung da dito nabuna nga napisey, ket napnu met gayam ya sangapulu ket duwa nga lacba. 21Ket ya bilang dito manacman nga lalaki ngas nga nangan itun, ket aglima nga ribu, nga madi pe̍ naibilang diya babey se̍ diya eb-ebbing.
To pananalan ne̍ Je̍sus iya sap-ew niya danum
Mar. 6:45-52; Juan 6:15-21
22Kalpasan niyan, bayat nito panangpaawir ne̍ Je̍sus kadito toltoley, pinilit na dito adalan na nga aglugan da ito bangka, nga dumelmang da nga mon-ona ngem igina ito baybayin. 23Ket kalpasan nito panangpaawir na kadito toltoley, nanang-at nga is-isa ka tageytey, nga nawe̍ nagkararag. Ket ito gumicbet tin, uwed pekkem nge̍ Je̍sus nga agis-isa ito tageytey. 24Ket to bangka nga nagluganan dito adalan, uwed met itun iya deyyu iya gacdangin. Ket narigatan da kadiya dadackel nga palungin, ta masarubnga da ngamin ya belluut. 25Ket ito pumarbangunin, nawe̍ nge̍ Je̍sus ito edyan da, nga manmanalan met iya sap-ew nito baybay. 26Ket ito nasingen dito adalan nge̍ Je̍sus nga manmanalan iya sap-ew niya danum, napalaus met ya ansing da, ket “Be̍law!” kinunen da met, ket nagkekerre̍s da ngarudin iya ansing da.
27Ngem sigida nga nagkagi nge̍ Je̍sus igida, nga kinunen na, “Madi kayu mansing, ta iyaken met! Madi kayu madanaganin,” kunen na.
28Ket kinunen ne̍ Pe̍dru, “Apu, no pudnu nga ikew, bilinen nac kay ngarud nga manalan iya sap-ew niya danum nga mawe̍ iya edyan mu,” kunen na.
29Ket kinunen met ne̍ Je̍sus, “Umbe̍t ka ngarudin!” kunen na met.
Ket dinumsag ngarud nge̍ Pe̍dru ito bangka ngin, ket manmanalan met iya sap-ew nito danum nga mawe̍ e̍ Je̍sus. 30Ngem ito nadlaw ne̍ Pe̍dru ya kinabileg nito belluut, nansing ngarudin, ket mangrugi nga lumned din. Itu nga ne̍cre̍s na nga kinunen, “Isalakan nac kay, Apu!” kunen na.
31Ket sigida nga ginaw-at ne̍ Je̍sus nga inalac kin, ket kinunen na, “Nakapsut met ya panamatim! Ape̍ nga nagduwaduwa ka?” kunen na. 32Ket ito limugan dan ito bangka, nagtalna met to belluutin. 33Ket dito adalan na nga uwed ito bangka, nagdaydayaw da ngarud e̍ Je̍sus, nga kinunen da, “Pudnu met nga ikew ya Anac ne̍ Apu Diyus!” kunen da.
To panangpalaing ne̍ Je̍sus enna Ge̍ne̍sare̍t
Mar. 6:53-56
34Ket ito nakadelmangin nge̍ Je̍sus se̍ dito adalan na, simanglad da ka Ge̍ne̍sare̍t. 35Ket ito nailasin dito toltoley antuni nge̍ Je̍sus, nipadamag da ya kauwed na kadiya amin nga sakup niyan nga lugar. Ket nipen da igina amin nga agsakit. 36Ket nipacpakaasi da nga no mabalin, orey se̍cde̍ngen da kuma nge̍ Je̍sus, orey no yan nas gayad niya luput na. Ket amin nga nakase̍cde̍ng, ket napalaing da met.
Pilihan Saat Ini:
Matyu 14: YBT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 1990 New Tribes Mission, Sanford, FL 32771-1487, USA.
Printed in the Philippines.
