Matyu 13
13
To pangngarig maipanggep iya agmulmula
Mar. 4:1-9; Luk. 8:4-8
1Ket iyan mettas nga algew, pimanaw nge̍ Je̍sus ito baley, ket nawe̍ nagtugew iya pingit nito baybay. 2Ket gapu ta adu diya toltoley nga naguurnung iya edyan ne̍ Je̍sus, nawe̍ ngarud nagtugew iya isa nga bangka nga uwed antuni. Ket dito toltoley, nagsisikad da iya gacdang.
3Ket adu ngarud dito nibagbaga na igida gapu kadiya pangpangngarig na itun. Kinunen na, “Uwed toley nga nawe̍ nagmula. 4Ket ito agiwarwaris ka eggic kin, uwed da bukel nga nagdessag iya dalan, ket nawe̍ met kinan diya sibudin. 5Uwed da met pe̍ bukel nga nagdessag iya edyan pinas nga e̍teng ya ginet iya sap-ew na. Ket dagus da nga timubu, ta bekken nga nauneg ya ginet na. 6Ket ito siminagin, naleyley da ngarud. Ket nacrit da mettin gapu ta madi nakauneg nga unay diya gamut da. 7Uwed da pe̍ duduma nga bukel nga nagdessag iya karuutan nga uwed rasi na. Ket ito dimackel dito ruut, liniyungan da met dito mula ngin. 8Ket uwed da met duduma nga bukel nga nagdessag iya napaw-is nga ginet. Ket didi nga bukel, ito nagbalin da nga mula ngin, namisic da ka adu. Ket uwed diya imadu ka sangagasut, uwed pe̍ diya imadu ka ennem nga pulu, se̍ uwed met pe̍ diya imadu ka tellu nga pulu.
9“Dakayu nga uwed pannakaawat na, tandaanan nu kuma ngarud yan,” kunen na.
Maipanggep kadito pangngarig ne̍ Je̍sus
Mar. 4:10-12; Luk. 8:9-10
10Ket kalpasan na, imadenni e̍ Je̍sus dito adalan na, nga nagsaludsud da igina nga kinunen da, “Ape̍ nga agpangpangngarig ka no mangisuru ka kadiya toltoley?” kunen da.
11Ket kinunen na igida, “No dakayu, napalubusan kayun nga makaawat kadiya nauneg nga adal nga di pekkem naipakaemmu kadiya duduma maipanggep iya panangituray niya Nailangitan. Ngem no igida, bekken nga maipalubus nga maipakaawat didi igida. 12Ta ya toley nga uwed pannakaawat nan, madgaan pekkem, tasun nawadwad ya naipakaawat igina. Ngem ya awan pannakaawat na, maipac met igina orey diya pagpagarupen na nga maawatan na. 13Itu nga diya pangngarig ya pangisuruc kadiya toltoley, ta no igida, orey masingen da, madi da met malasin. Ket orey denggen da, madi da met magicna winno maawatan. 14Ket iyan nga kasasaad da, pakatungpalan nito padtu nito mammadtu nga Isayas ito kinunen na,
‘Pe̍yeng kayu nad nga aggigicna,
ngem pulus nga madi kayu met makaawat.
Pe̍yeng kayu nad nga makaskasingen,
ngem pulus nga madi kayu met makalasin.
15Ta kimapsut mettin
ya pannakaawat didi nga toley,
se̍ narigat ya pannakagicna dan,
se̍ nagkulinget dan.
Ta no bekken nga agten iyan,
kaynun no malasin da ya masingen da,
se̍ natarus igida ya magicna da,
se̍ maawatan da ya panunuten da,
ket kaynun no sumoli da iyaken
tasun agasac da,’
kunen nito Isayas itun.
16“Ngem dakayu, nagasat kayu ngarud, ta malasin nu met ya masingen nu, se̍ maawatan nu ya magicna nu. 17Tutu ngarud met nga adu dito mammadtu se̍ dito nalinteg nga toley itun nga nagkalikagum nga makasingen kuma idi nga masingsingen nu ita, ngem madi da met nasingen. Ket nagkalikagum da met pe̍ nga makagicna kuma idi nga magicgicna nu ita, ngem madi da met pe̍ nagicna.”
Ya kaipapennan nito pangngarig maipanggep iya agmulmula
Mar. 4:13-20; Luk. 8:11-15
18“Itu nga maawatan nu kuma ngarud ya kaipapennan nito pangngarig maipanggep iya agmulmula. 19Agten idi ya banag na: Ya toley nga makagicna iya damag maipanggep iya nadiyusan nga panangituray ngem madi na maawatan ya banag na, ket arig nga umbe̍t ya diyablu nga managdacdake̍c nga rabsuten na ya kagi nga nagicna nito toley. Itu ya maiyarig kadito bukel nga naiwaris iya dalan. 20Ket dito bukel nga naiwaris ito edyan pinas nga e̍teng ya ginet iya sap-ew na, itu ya kaiyarigan niya toley nga makagicna iya kagi ne̍ Apu Diyus, ket dagus na nga awaten nga siaanggem. 21Ngem gapu ta arig nga mula nga awan nauneg nga gamut na, bekken met nga napaut. Ta no uwed rigat winno pannakairurumen na gapu iya panamati na iya kagi ne̍ Apu Diyus, ket dagus met nga maiyaw-awanin. 22Ket dito bukel nga naiwaris iya karuutan nga uwed rasi na, itu ya maiyarig iya toley nga makagicna iya kagi ne̍ Apu Diyus, ngem awan met pagbanagan niya kagi ne̍ Apu Diyus igina. Ta maabac ya pannakabalin na igida, gapu kadiya pakasikuran iya biyag nga idi se̍ iya panagtarigagay na ka kinabacnang. 23Ket dito bukel nga naiwaris iya napaw-is nga ginet, itu ya maiyarig iya toley nga makaawat iya kagi ne̍ Apu Diyus nga nagicna na. Ket itu ya arig nga mula nga mamisic. Ket uwed met diya mamisic ka sangagasut, se̍ uwed da mamisic ka ennem nga pulu, se̍ uwed pe̍ duduma nga mamisic ka tellu nga pulu,” kunen na.
To pangngarig maipanggep kadiya mula se̍ ruut
24Uwed manin isa nga pangngarig nga inistorya ne̍ Je̍sus igida, nga kinunen na, “Ya panangituray niya Nailangitan, ket maiyarig iya isa nga toley nga nawe̍ nagiwaris ka nabaru nga eggic nga trigu iya lapug na. 25Ngem iya name̍nsan iya panagtutudug toley, nawe̍ ya gumurgura igina, ket nagiwaris met ka bukel ruut nga dake̍c ito nakaiwarisan nito eggic nga trigu, se̍ pimanawin. 26Itu nga ito dimackel se̍ nagdawa dito mula ngin, malasin met pe̍ yin dito ruut. 27Ket diya tagabu nito akin-kuwa ito lapug, nawe̍ da ngarud kinunen igina, ‘Apu, bekken kadi nga nabaru nga eggic nga trigu to niwaris mu ito lapug mu? Ape̍ nga uwed dake̍c nga ruut nan?’ kunen da.
28“Ket kinunen na igida, ‘Wangel met niya isa nga gumurgura iyaken yan,’ kunen na.
“Ket kinunen ngarud dito tagabu na igina, ‘Gabay mu no mawe̍ kami bellaten?’ kunen da.
29“Ngem kinunen na, ‘Bay-an nu pekkem nga bellaten, ta kaynun no maisangasipdut diya mula nga trigu kadito ruut. 30Orey no agbulun da ngas pekkem nga dumackel agingga nga panaggagani yin. Ket nad no panaggagani yin, ibilin ku nad kadiya aggani nga bellaten da nga mona dito dake̍c nga ruut, se̍ da pesten, ta maipoor da ngasin. Ket kalpasan na, ya bisic nga trigu ya ganiyen dan, se̍ da italipen iya alang kun, kunec nad met,’ kunen nito akin-kuwa.”
To pangngarig maipanggep iya tekkut nga bukel
Mar. 4:30-32; Luk. 13:18-19
31Ket uwed manin isa nga pangngarig nga inistorya ne̍ Je̍sus igida nga kinunen na, “Ya panangituray niya Nailangitan, maiyarig iya isa nga tekkut nga bukel niya kayu nga mustasa, nga nimula niya isa nga toley iya lapug na. 32Ket ya bukel mustasa, itu ya katekkutan nga bukel nga maimula. Ngem no dumackel ya kayu nan, ket agbalin nga kadackellan kadiya maimulmula nga para rikadu, ta agbalin nad met nga kayu win, ket pagsucbutan met diya sibud diya sangsanga na.”
To pangngarig maipanggep iya pangpablad
Luk. 13:20-21
33Uwed manin isa nga pangngarig nga inistorya ne̍ Je̍sus igida, nga kinunen na, “Ya panangituray niya Nailangitan, maiyarig met iya pangpablad nga nimet niya isa nga babey, nga nilauc na ka sangapulu nga salup nga are̍na. Ket pinablad na met amin nga nakailaukan na.”
Ya gapu dito pangngarig ne̍ Je̍sus
Mar. 4:33-34
34Amin diyan nga nisuru ne̍ Je̍sus kadito toltoley, nisuru na ka pangngarig. Ngarud, awan met nisuru na igida no di yas naipangngarig. 35Agten iyan to winangel na tasun matungpal kuma ngin to naipakagi ito mammadtu, ito kinunen na,
“Pangpangngarig nad ya istoryaec,
ket ibagac nad diya banbanag
nga madi pekkem naipakaemmu
nanipud ito pannakaparsuwa niya lubung,”
kunen nito mammadtu.
Ya kaipapennan nito pangngarig maipanggep
kadiya mula se̍ ruut
36Ket itun, pinanawan ne̍ Je̍sus dito toltoley yin, ket simoli nga imuneg ito baley. Ket dito adalan na, nawe̍ da imadenni igina nga kinunen da, “Ipatarus mu kay dakami ya kaipapennan nito pangngarig maipanggep kadiya dake̍c nga bukel ruut iya lapug,” kunen da.
37Ket kinunen ne̍ Je̍sus, “To nagiwaris ka nabaru nga eggic, ket itu ya Anac nga Naipatoley. 38To lapug, itu ya lubung ngi. To nabaru nga eggic, itu diya toley nga agpaituray iya nadiyusan nga panangituray. Ket dito dake̍c nga ruut, itu diya toley nga agpaituray iya diyablu nga managdacdake̍c. 39Ket to gumurgura nga nagiwaris kadito dake̍c nga ruut, ket ya diyablu met. To panaggani, itu ya panagpatingga nidi nga timpu. Ket dito naggani, itu diya anghe̍le̍s.
40“Ket ya panagpatingga nad nidi nga timpu, kaiyarigan mettas nito pannakabellat se̍ pannakaipoor dito dake̍c nga ruut. 41Ta ibon nad niya Anac nga Naipatoley diya anghe̍le̍s na, ket ipac da nad ngarud iya pagiturayan na diya amin nga pakabasulan toley se̍ amin diya managdacdake̍c, 42se̍ ipisuc da nad diyan iya pagapuyan. Ket diya uwed antuni nga edyan, agberrit se̍ agngaretnget da ngarud. 43Ngem diya nalinteg nga toley nga iturayan nad niya Ama da, masingen nad met ya dayaw da, nga arig da nga sirnac niya darang niya sinag. Ket dakayu nga uwed pannakaawat na, tandaanan nu kuma ngarud yanin.”
To pangngarig maipanggep iya naaskuran nga kinabacnang
44“Agten idi pe̍ ya panangituray niya Nailangitan: Ket maiyarig met iya naikorob nga kinabacnang nga naaskuran niya isa nga toley iya isa nga lapug. Ket to toley, ginaboran na ngarud manin to naaskuran na nga kinabacnang. Ket siaanggem ngarudin, ket nawe̍ na nilaku ya amin nga sansanicwa na, ket ngininaan na to lapugin nga edyan nito kinabacnang nga naaskuran na.”
To pangngarig maipanggep iya pe̍rlas
45“Ket kaiyarigan manin niya panangituray niya Nailangitan ya agten idi: Uwed isa nga aglaclaku nga agsapsapul kadiya napapaw-is nga pe̍rlas. 46Ket ito uwed naaskuran na nga isa nga nakapatpateg nga pe̍rlas, nawe̍ na ngarud nilaku ya amin nga sansanicwa na, ket ngininaan na to pe̍rlas.”
To pangngarig maipanggep iya iket
47“Ket kaiyarigan manin niya panangituray niya Nailangitan ya panagkalap ka lames. Ta diya agkalap, nisalwag da ya iket da iya baybay, ket nadumaduma ngarud diya kita lames nga nacna ngin. 48Ket ito napnu to iket tin, nigacdang diya nagkalap. Ket ito nagtutugew dan, pinaglalasin da diya nabaru se̍ diya dake̍c nga uwed ito iket. Ket diya nabaru, inurnung da nga nipisuc kadiya papayan da. Ngem diya dake̍c, nitemsit da ngasin. 49Ket agten ngarud nad iyan ya panagpatingga nidi nga timpu, ta diya anghe̍le̍s, rumwar da nad nga isibna da diya dake̍c nga toley kadiya nalinteg. 50Ket itemsit da ngas nad diya dake̍c iya pagapuyan. Ket diya uwed antuni nga edyan, agberberrit se̍ agngaretnget da ngarud,” kunen na.
To pangngarig maipanggep kadiya kabarbaru se̍ nadaan nga banbanag
51Ket kinunen ne̍ Je̍sus kadito adalan na, “Maawatan nu kad ya kaipapennan diya amin diyan nga pangngarig?” kunen na.
Ket, “Bo, a,” kunen da nga nisungbat.
52Dikad pe̍ kinunen na manin igida, “Nabaru met no agten iyan, ta agten kayun kadiya manursuru iya Linteg Hudyu no nagbalin dan nga pasurut iya maipanggep iya panangituray niya Nailangitan. Ket iya tunggal manursuru nga agten iyan, maiyarig da met iya makin-kuwa iya isa nga baley nga uwed duwa nga kita diya nabaru nga banbanag nga mairuwar na, nga gayat iya pagitaltalipnan na. Ket didi nga nabaru nga banbanag, kabarbaru diya duduma, ket nadaan diya duduma,” kunen na.
To panangumsi dito iNasare̍t e̍ Je̍sus
Mar. 6:1-6; Luk. 4:16-30
53Ket ito nalpas ne̍ Je̍sus nga inistorya diyan nga pangpangngarig, pimanaw antuni nin. 54Ket ito nakadateng ito mismu nga ili na, nawe̍ nangisuru kadiya toltoley iya gigimungan da. Ket nasdaawan da ngarud iya panangisursuru na, ket kinunen da met, “Awac kid ya namettan niyan nga toley iya agten iyan nga sirib se̍ iya agten iyan nga pannakabalin na nga agariman ka nakaskasdaaw? 55Di met anac nito allawagi yan? Di met e̍ Marya ya ina na? Se̍ kabsat na met de̍ Santiyagu, Huse̍, Simon se̍ e̍ Hudas? 56Bekken kad nga kailiyan tida mettas dito amin nga kakabsat na nga babey? Dikad pe̍ awac ngarud ya namettan na ka amin diyan nga kinalaing na?” kunen da. 57Ket iya agten iyan, inumsi da ngas met.
Ket e̍ Je̍sus, kinunen na met igida, “Mapadayawan ngarud ya isa nga mangaskasaba, malacsid iya mismu nga ili na, se̍ kadiya kabbalay na,” kunen na. 58Ket iya agten iyan, e̍teng ngas diya nakaskasdaaw nga inariman ne̍ Je̍sus antuni, gapu ta di da met gabay ya mamati.
Pilihan Saat Ini:
Matyu 13: YBT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 1990 New Tribes Mission, Sanford, FL 32771-1487, USA.
Printed in the Philippines.
