LUKE 22
22
Ikpɔ oku ye mme scribe Eyom usuŋ Ndiwot Jesus
(Mt 26.1-5; Mk 14.1-2; Jn 11.45-53)
1EKEM usɔrɔ uyo eke leaven miduhe, emi ekerede passover, ekpere. 2Ndien ikpɔ oku ye mme scribe ekeyom usuŋ nte mmɔ ekpasaŋade ewot Enye, koro mmɔ efehede mbio-obio.
Judas Ada Jesus Ayak Ɔnɔ Mme Ikpɔ Oku Ye Mme Etubom Mbon-Ekɔŋ
(Mt 26.14-16; Mk 14.10-11)
3Edi Satan oduk ke esit Judas, emi ekotde ekadian Iscariot, emi edide owo kiet ke otu mbet duopeba. 4Ndien enye adaha aka ekeneme nneme ye ikpɔ oku ye mme etubom mbon-ekɔŋ, abaŋa nte edisaŋade ada Enye ayak ɔnɔ mmɔ. 5Mmɔ edat esit, enyuŋ ediomi ndinɔ enye okuk. 6Enye onyime, onyuŋ oyom eti ifet ndida Enye nyak nnɔ mmɔ, ke ini mbio-obio miduhe.
7Ekem osim usen uyo eke leaven miduhe, eke enyenede ndiwot passover ke esit. 8Ndien Jesus osio Peter ye John ɔdɔŋ, ete, Eka ekenam passover ebeŋe enim enɔ nnyin, man nnyin idia. 9Edi mmɔ ete Enye, Ke mmɔŋ ke oyom inam ŋkpɔ ebeŋe inim? 10Enye ɔdɔhɔ mmɔ ete, Sese, ke ini mbufo edidukde ke obio, owo eke obiomde abaŋ mmɔŋ eyesobo ye mbufo; etiene enye eduk ke ufɔk eke enye edidukde. 11Enyuŋ edɔhɔ enyene-ufɔk ete, Andikpep ɔdɔhɔ fi ete, Ubet isen odu mmɔŋ, eke ndidiade passover ye mbet Mi? 12Ndien enye eyewut mbufo akwa ubet enyɔŋ, emi ema ekediɔŋ ema: etim ŋkpɔ do ebeŋe. 13Mmɔ eka, enyuŋ ekut nte Enye ɔkɔdɔhɔde mmɔ; ndien etim passover ebeŋe.
14Ndien ke ini ekemde, Enye ɔsuhɔre etetie ye mme apostle. 15Ndien enye ɔdɔhɔ mmɔ ete, Ke ɔkɔdɔŋ Mi ɔkpɔsɔŋ ndidia passover emi ye mbufo, ndien ndikpa mkpa: 16koro mmɔdɔhɔ mbufo nte, Ndidiaha enye aba, tutu enye ɔwɔrɔ osu ke Obio Ubɔŋ Abasi. 17Ekem Enye emen cup, ndien ke ama ɔkɔnɔ ekɔm, ɔdɔhɔ ete, Eda emi edeme ke otu idem mbufo: 18koro mmɔdɔhɔ mbufo nte, Ɔtɔŋɔde ke emi ndiwɔŋke aba mfri vine tutu Ubɔŋ Abasi edi. 19Enye onyuŋ emen uyo, ndien ke ama ɔkɔnɔ ekɔm, obuŋ, ɔnɔ mmɔ, ete, Emi edi ikpɔhidem Mi eke enɔde kabaŋa mbufo: enam emi nditi Mi. 20Enye anam kpa ntre ye cup, ke ini mmɔ ediade ema, ete, Cup emi edi Obufa Ediomi ke iyip Mi, emi eduɔkde kabaŋa mbufo. 21Edi sese, ubɔk andida Mi nnɔ odu ye Ami ke okpokoro. 22Koro Eyen Owo ke ɔnyɔŋ kpa nte ekenimde: edi eyedɔdiɔk ɔnɔ owo oro edidade Enye ɔnɔ. 23Ndien mmɔ etɔŋɔ ndineni eneni ke otu idem mmɔ, ete, mme anie owo ke otu mme imɔ edinam ŋkpɔ emi.
24Ndomo-idem onyuŋ otibe ke otu mmɔ, ete, mme ekpebat anie ke otu mme imɔ nte andikpon-ŋkan. 25Edi Jesus ɔdɔhɔ mmɔ ete, Ndidem mme Gentile ekara mmɔ; enyuŋ ekot mmɔ emi enyenede odudu ndikara mmɔ, ete Mme anam-ufɔn. 26Edi inyeneke ndidi ntre ye mbufo: yak enye emi okponde akan ke otu mbufo akabare etie nte eyenɔwɔŋ; enye emi onyuŋ edide etubom akabare etie nte anam-utom. 27Koro anie owo edi andikpon-ŋkan? ndi enye emi etiede ke itie-udia, mme enye emi adade mbet? nte idige enye emi etiede ke itie-udia okpon akan? edi Ami ndu ke otu mbufo nte enye emi adade mbet.
28 Mbufo edi mmɔ emi ekesɔŋɔde eda ye Ami ke idomo Mi; 29kpa nte Ete Mi okonimde Obio Ubɔŋ ɔnɔ Mi, 30kpasuk ntre ke Ami nnyuŋ nnim nnɔ mbufo nte edia ŋkpɔ enyuŋ eŋwɔŋ ŋkpɔ ke okpokoro Mi ke Obio Ubɔŋ Mi; mbufo eyenyuŋ etie ke ebekpo ekpe ikpe enɔ mme esien Israel duopeba.
Jesus Ɔdɔhɔ Ke Peter Eyekaŋ Enye
(Mt 26.31-35; Mk 14.27-31; Jn 13.36-38)
31 Simon, Simon, sese, Satan ekebeŋe mbufo ɔbɔ, man asak mbufo nte ibokpot: edi ŋkekpe ubɔk nnɔ fi, 32nte mbuɔt-idem okubɔhɔ fi: ndien afo ŋko, ke ini editɔŋɔde ntak akabare, sɔŋɔ nditɔ-ete fo idem. 33Edi Peter ɔdɔhɔ Enye ete, Ɔbɔŋ, mmonyime nditiene Fi ŋka ke ŋkpɔkɔbi ye mkpa. 34Edi Jesus ete, Peter, ndɔhɔ fi nte, Ekikɔ idikpɔkke mfin emi tutu afo akaŋ utim ikata ete imɔ idiɔŋɔke Mi.
35Enye onyuŋ ɔdɔhɔ mmɔ ete, Ke ini ŋkosioŋode mbufo ndɔŋ utom nte, ekukama ekpat-okuk ye ekpat-udia ye ikpa-ukot, nte ŋkpɔ ama anana mbufo? Mmɔ ebɔrɔ ete, Ŋkpɔ inanake. 36Ndien Enye ɔdɔhɔ mmɔ ete, Edi ke emi, owo eke enyenede ekpat-okuk emen, onyuŋ ada ekpat-udia ŋko; owo eke minyuŋ inyeneke ofut, yak enye anyam ekura edep. 37Koro ndɔhɔ mbufo nte, Se ekewetde ete, Ebat Enye esin ke otu mme abiat-ibet, enyene ndiwɔrɔ nnɔ Mi: koro mme ŋkpɔ eke eketiŋde ebaŋa Mi enyene ndisu. 38Ndien, mmɔ edɔhɔ Enye ete ɔbɔŋ sese, ofut iba mi, ndien Enye ɔdɔhɔ mmɔ ete, Ekem adaŋoro.
39Ekem Enye ɔwɔrɔ aka ke Obot Olive nte ido Esie edide; mbet Esie enyuŋ etiene Enye. 40Ndien ke ini osimde ebiet oro, Enye ɔdɔhɔ mmɔ ete, Ebɔŋ akam ebeŋe ete mme imɔ ikuduk ke idomo. 41Ndien Enye esehere ɔkpɔŋ mmɔ adaŋa nte ubɔk iyurɔ kiet; onyuŋ ɔtɔŋɔ edɔŋ ɔbɔŋ akam ete, 42Ete, edieke Afo onyimede, men Mi cup emi fep: edi okudi nte Ami nnyimede, yak edi nte Afo oyimede. 43Edi angel oto ke heaven ɔbiɔŋɔre Enye ke iso ndisɔŋɔ Enye idem. 44Ndien Enye oduk ke ɔkpɔsɔŋ eŋwan, onyuŋ ɔdɔdiɔŋ ɔsɔŋɔ ɔbɔŋ akam: ndien ibibiak Esie etie nte mme ntɔi iyip eke etɔide ke isɔŋ. 45Ndien Enye adaha ke akam etiene mbet Esie okut nte mmɔ edede ɔnɔ mfuhɔ, onyuŋ ɔdɔhɔ mmɔ ete, Nsinam mbufo edede? 46Edaha ke enyɔŋ ebɔŋ akam, mbak mbufo ediduk ke idomo.
Mbon Ekɔŋ Emum Jesus
(Mt 26.47-56; Mk 14.43-50; Jn 18.3-11)
47Ke adaŋemi Enye osuk etiŋde ntem, sese, otu owo edi, ndien owo kiet ke otu mbet duopeba, emi ekerede Judas, ada mmɔ usuŋ: ndien enye asaŋa ekpere Jesus, ete itim Enye inua. 48Edi Jesus ɔdɔhɔ enye ete, Judas, nte ada ntim-inua ada Eyen Owo ɔnɔ? 49Edi ke ini mmɔ emi edude ye Enye ekutde se iyomde ndiwɔrɔ, mmɔ ete Enye, Ɔbɔŋ me nnyin isio ofut? 50Ndien owo kiet ke otu mmɔ ekpi owo akwa oku, osibe enye utɔŋ nnasia efep. 51Edi Jesus ɔbɔrɔ ete, Eyak etre adaŋa oro. Ndien Enye otuk utɔŋ owo oro, anam enye ɔfɔn, 52Edi Jesus ɔdɔhɔ ikpɔ oku, ye mme etubom temple, ye mbiowo emi edide ndimum Enye, ete, Nte mbufo emewɔŋɔ edi, ye ofut ye eto nte ŋkpɔ eke ebinede owo ŋwo? 53Ke adaŋemi ŋkodude ye mbufo ke temple ke usen ke usen, mbufo inyanakere ubɔk iyom ndinam Mi ŋkpɔ: edi emi edi ifet mbufo ye eke odudu ekim.
Peter Akaŋ Jesus
(Mt 26.57-58,69-75; Mk 14.53-54,66-72; Jn 18.12-18,25-27)
54Edi mmɔ emum Enye, eda eka ekoduk ke ufɔk akwa oku. 55Edi Peter etiene nsan-nsan. Ke adaŋemi mmɔ ema ekabara ikaŋ ke ufɔt esit okure, enyuŋ esuhɔre etie ɔtɔ kiet, Peter etetie ke ufɔt mmɔ. 56Ndien eyen-aŋwan kiet okut nte enye etiede ewebe ikaŋ, onyuŋ owuk enyin ese enye, ete, Owo emi okonyuŋ odu ye Enye. 57Edi enye akaŋ, ete, Ŋwan owo, ndiɔŋɔke Enye. 58Ndien ke ekpri ini ebede, owo eŋwen okut enye, onyuŋ ɔdɔhɔ ete, afo nde edi owo mmɔ kiet. Edi Peter ɔdɔhɔ ete, Owo, ndige. 59Ekem ke adaŋa nte hour kiet ama ekebe, owo eŋwen ɔsɔŋɔ uyo ɔdɔhɔ ete, Ke akpanikɔ owo emi okonyuŋ odu ye Enye: koro enye edide eyen Galilee. 60Edi Peter ɔdɔhɔ ete, Owo, mfiɔkke se afo ɔdɔhɔde. Ndien idaha oro, kpasuk ke adaŋemi enye osuk etiŋde ntem, ekikɔ ɔkpɔk. 61Ndien Ɔbɔŋ ɔwɔŋɔre ese Peter, Peter onyuŋ eti ikɔ Ɔbɔŋ, adaŋa nte Enye ɔkɔdɔhɔde ete, afo eyekaŋ Mi utim ikata mfin, ndien ekikɔ edikpɔk. 62Ndien enye adaha ɔwɔrɔ akatua eyet eti-eti.
Mme Mmɔ Emi Ekpemede Jesus Esak Enye Nsahi, Enyuŋ Emia Enye
(Mt 26.67-68; Mk 14.65)
63Ekem mmɔ emi ekpemede Jesus esak Enye nsahi, enyuŋ emia Enye. 64Mmɔ eda ŋkpɔ ebɔp Enye enyin, enyuŋ ebup Enye ete, Siak enyiŋ owo eke oyibide Fi. 65Mmɔ enyuŋ etiŋ ediwak ikɔ esuene efen edian Enye. 66Ndien ke ini eyo esierede, mbiowo obio esop idem ɔtɔ kiet ye ikpɔ oku ye mme scribe; mmɔ enyuŋ eda Enye eduk ke akwa esop mmɔ, ete, 67Edieke Afo edide Christ, sian nnyin. Edi Enye ɔdɔhɔ mmɔ ete, Ŋkpetetiŋ nnɔ mbufo, mbufo idinimke ke akpanikɔ; 68onyuŋ edieke mbupde mbufo mbume, mbufo idibɔrɔke. 69Edi ɔtɔŋɔde ke ŋkpɔ emi ama ebe, Eyen Owo eyetie ke ubɔk nnasia odudu Abasi. 70Ndien mmɔ kpukpru ete, Nte Afo edi Enye Abasi naŋa? Enye ete mmɔ, mbufo emetim etiŋ ete ndi Enye. 71Mmɔ ete, Nnyin iyom nso ye ntiense efen? nnyin ke idem nnyin imokop ikɔ ke inua Esie.
Pilihan Saat Ini:
LUKE 22: ENA
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Efik Old Bible With Sectional Headings © Bible Society of Nigeria, 2013, 2019.
