Matthew 17

Mêl inthûlna

(Mk 9:2-13; Luk 9:28-36)

1Sûnruk suole chu Jisua'n Peter le a lâibungngei Jacob le John a tuong ngeia, an theivaiin muol insângna a se pui ngeia.#2 Pet 1:17-18 2An mit muchungin Jisua mêl a hong inthûla: a mâi nisa angin a hong vâra, a puonsilngei khom ântêrrakin ahong cheka. 3Male ruoisingei inthum han Moses le Elijah ngeiin Jisua an chongpui an mua. 4Hanchu Peter'n Jisua kôm, “Pumapa, hitaka om hih ei ta rangin idôra asa mo ni zoi! Nu nuomin chu puon-in inthum sin ka ta, nangma rang inkhat, Moses rang inkhat male Elijah rang inkhat,” a tia.

5Ala chonglâitakin, sûm vârin ajuong mukhu ngeia, sûmlâi renga rôl ajuon ringa, “Ama hih ka Nâipasal moroitak, a chunga ku mulungtâiriem ani, a he rangâi roi!”#Aph 22:2; Bal 18:15; Lap 2:7; Isa 42:1; Mat 3:17; 12:18; Mk 1:11; Luk 3:22 a tia.

6Ruoisingei han rôl hah an rietin chu, an chi rai sikin pila an inbokraka. 7Jisua an kôm a honga, a tôn ngeia, “Inthoi roi, chi no roi,” a tipe ngeia. 8Masikin an ena, Jisua telloiin chu tute adang mu mak ngei.

9Muol chung renga an juong chumin chu, Jisua'n an kôm, “Miriem Nâipasal hih thina renga ânthoinôk mâka chu nin neinun mu hih tute ril no roi,” tiin chong a pêk ngei zoi.

10Male ruoisingei han Jisua kôm, “Ithomo Balam minchupungeiin Elijah a juong bak rang ani, an ti?”#Mal 4:5 tiin an rekela.

11Jisua'n, “Adiktakin Elijah a juong bak rang ani,” male “jâttin ama'n cherêl let a tih. 12Hannirese, nangni ki ril, Elijah chu a juongsai piel kêng ani zoi, mingeiin lei riet mak ngei, an nunuom an lei lo zoi. Ma angdênin Miriem Nâipasal khom an nunuom an lo rang ani,”#Mat 11:14 tiin a thuona.

13Male ruoisingeiin Baptispu John chungroi an kôm a misîr ani, ti an hong riet zoi.

Jisua'n ramkhori sûr pasalte a mindam

(Mk 9:14-29; Luk 9:37-43)

14Mipui ngei kôm an kîr nôkin chu mi inkhat Jisua kôm a honga, a makunga khûkinbilin, 15male “Pu, ka nâipasal chunga inriengmu roh! Ama chu risangol invei ania, a tuong ok zoia, voizet mo meia le tuia ânlet zoia. 16Nu ruoisingei kôm ko hong tuonga, aniatachu mindam thei mak ngei,” a tia.

17Jisua'n, “Kho anga iemnaboi rai le mi dikloi mo nin ni zoi! Idôr sôt mo nin kôm ko om rang? Idôr sôt mo nangni ko donsui thei ranga? Pasalte hah ko kôm hong tuong roi!” a tia. 18Jisua'n ramkhori hah chong a pêka, male pasalte sûng renga hah a hong jôkpaia, ma zoratak han a dam kelen zoi.

19Male ruoisingei hah Jisua kôm an honga, “Ithomo keinin te ramkhori hah kin rujûlpai theiloi?” tiin mi riet loiin an rekel chiena.

20Jisua'n an kôm, “Taksônna ahundôr nin dônloi sika ani.” “Adiktakin nangni ki ti, taksônna ancham ru te dôr nin dônin chu hi muol kôm hin, ‘Hi renga hih soson vânthon roh!’ tîng nin ta, inthon atih. Neinun nâm nin thothei let rang ani!#17:20 Miziek senkhatngei chu archang 21 na an bôksa: Aniatachu chubaithona le bungêiin vai kêng hi anga hih chu rujûlpai thei ani; tinon chu itên ni thei mak (Mk 9:29 en roh).#Mat 21:21; Mk 11:23; 1 Kor 13:2 21Aniatachu, hi anga hih chu chubaithona le bungêi tinôn chu itên rujûlpai thei nimak,” tiin a thuona.

Jisua a thina rang roi a misîr nôkna

(Mk 9:30-32; Luk 9:43-45)

22Ruoisingei hah an rêngin Galilee rama munkhatin an hong suokin chu, Jisua'n an kôm, “Miriem Nâipasal hih mingei kuta min sûrin om a ta, 23anni han ama that an tih; aniatachu sûnthum suole chu aringin kaithoiin om a tih,” a tia.

Ruoisingei chu beidong takin an om zoi ani.

Biekin chôiruol chôi roi

24Jisua le a ruoisingei Capernaum an hong tungin chu biekin chôiruol rusuongpu ngeiin Peter kôm an honga, “Nangni Minchupu hin biekin chôiruol a chôi ngâi mo?”#Jôk 30:13; 38:26 tiin an rekela.

25Peter'n “A chôi ngâi,” tiin a thuona.

Peter hah insûnga a lûtin chu, Jisua'n a lei rokôk masa, “Simon kho angin mo ni mindonlam? Hi rammuola rêngngei kôm hin tumo choîtumngei aninônchu chôiruolngei a chôi ngâi? A ramsûngmingei mo, ramdangmingei mo?”

26Peter'n, “Ramdangmingei,” tiin a thuona.

Jisua'n, “Asa, mahah aomtie chu a ramsûngmingei chu an chôi nâng mak, tiin chong a mele ani. 27Aniatachu hi mingei mulunghoiloi rang hi nuom mak me. Masikin dîla senla rukuoi vavôr roh. Nga no thok masatak bâia han nangma le keima rang biekin chôiruol rukbak rang sumthîr man ni tih. Mahah hong chôi inla, ei chôitum hah an kôm pêk ngei roh,” a tia.

Pilihan Saat Ini:

Matthew 17: SAKNT

Sorotan

Berbagi

Salin