Mataos 10
10
Yesʉs lé epɛh ompʉn ewʉm e l'oba
(Markus 3.13-19; Lʉkas 6.14-16)
1No ó Yesʉs a ze jebe Esama le ompʉn ewʉm e l'oba be, ntɔʼ dwe be nkul ó, bé dwihɨ bʉr bɨbɨbla mɨsisim le etiʼ mɨsyoblʉ mimyɛh myé a be e mosyɛb nkʉ bɨjyɛm ɨ.
2Mɨlʉmlʉ mo Yesʉs ewʉm e mɨmba myaa ó mi: waa efoʼ, Simɔn ndɨ ejebɔ ó, Pyɛr ɨ, bé e ncyom we Andreas, Jacques, mwan mo Zebede, le ncyom we Yʉanes; 3Filip bé e Bartelemi, Tomas bé e Mataos, mʉr a taare be nwɨa tœa ɛ, Jacques, mwan mo Alfe bé e Tade#10.3 É tɔɔlʉ mo Lʉkas, Tade, nye ejebɔ ó, Yʉdas, mwan mo Jacques., 4Simɔn, mʉr Kanan, bé e Yʉdas Iskariot, mʉr a be ó, nye ókɛha nye e.
5Esama le ompʉn ewʉm e l'oba onɨ ó Yesʉs a lomo, nye osi lɛɛ be ó: «Laa ó, bɨn toʼ boo bʉr o ndɨ abe oYʉden ɨ, nkʉ é bɨnkana bɨ bʉr o Samari, 6fuo to ga yɛɛ boo bwa b'Ɨzraɛl, é bɨntœme mu si pɔhba, to dim ɨ. 7Zi e zi, dɨʼe tuno ga ó: “Jɔʼ Zyɛm ócyel jwɨ̀ʼa ye cyecye e, yé mu ó kunokuno le epyal ɔɔ!” 8Tiʼɨ ga mɨsyoblʉ. Pɛ̀hɛ ga bʉr é mofoo. Pɛʼɛ ga sa ndɨ elœʼ mɨzɨzam é mih mo Zyɛm ɨ. Dwihɨ ga moleme. Bɨn bɨ bi, abwam. Dweʼ ga nteme, abɛma. 9Mʉr anʉa ga mɨsaŋ mɨ gol, nkʉ myaa mɨ nkoho mɔn, dam be dih e kaba é mɨmpɨʼ min. 10Mʉr anʉa ga myah é cyen yi, nkʉ e bɨdur bɨba, nkʉ opia be osilpah oba, nkʉ fumo, ebe, syɛl mosa, nye ejala le edweŋɔ mode me.
11«É bɨnkana le mokwar bɨn bé óni ɨ, taara dî ga nkʉ yé e mbi mʉr lé ejala le ebɨlan e bɨn tɨʼ ɨ. Bɨn bé à di é mbɛr we, bɨn e boo nɔɔ, to pyal é jɔʼ bɨn bé ólaa tɨʼ ɨ. 12ǃBɨn si ni mbɛr waa nɛʼɛ, lɛŋɨ ga e bʉr o mbɛr waa ó: “Motala, mé diʼe é bɨn!” 13ǃƗ bʉr o mbɛr waa si bɨlan e bɨn mbi ndɨ ejala nɛʼɛ, motala mɨn, mé liʼɨ é sama yɔɔ é jɔʼ bɨn bé ólaa, to e. Yé be ó, bé abɨlan e bɨn no nɛʼɛ, motala mɨn maa, mé óbula ze kœb bɨn. 14ǃƗ mʉr si be, amɛʼle bɨlan e bɨn é guu mbɛr, nkʉ é yʉʉ nkana, le amɛʼle joʼo lwib yin nɛʼɛ, é jɔʼ bɨn mu lé eduho é mbɛr waa nkʉ é nkana yaa ɛ, bɨn bé à tɨ koho dih. 15Me elɛɛ bɨn cyecye ó nɛɛ: é dobo le etiʼ e mɨlɔb, bʉr o Sodɔm e Gomɔr, bé aŋa bul kabɔ bɨntɨʼa mpʉ bʉr o kwar waa.»
Motɨɨ lé etiibe e tíila ɛ
(Markus 13.9-13; Lʉkas 12.11-12; 21.12-19)
16«Mbe ga: mɨ lomo bɨn mpʉ bɨntœme teme onkœœ! No ó, diʼe ga ncye! Cɨa ga mpʉ onyʉa. Bɨn bé à tala mɨleme mpʉ mopɨba. 17Bɨn bé à di ncye, ebe, bʉr, bé óto e bɨn é mompʉm mo otamabʉr mɔɔ, to pur bɨn gʉ, le efuura bɨn mɨmbihe é mompah mɨnjwɨʼla mɔɔ. 18Bé óto e bɨn é mih mo ongoman le mɨnjwɨɨbʉr é lɔb wam. Bɨn bé ósaŋɔ no ó, bɨn nkʉʼ gʉa lɛɛ ocyecye bɨn lé egʉa é lɔb wam ɨ, bɛɛ ndwe e bʉr o ndɨ abe oYʉden ɨ, lé ejoʼo. 19ǃBé si naʼ bɨn mobo é nyʉl, to e bɨn é mompah mɨlɔb nɛʼɛ, asyɛl ga ba e bɨn bʉr o tɨ, tiibe e nkar bɨn bé ófuo monyʉl mɨn e tɨʼ ɨ. Asyɛl ga ba, tiibe e mbi mokan bɨn bé ólɛɛ ɛ. Sa elɛɛ, yé ódweŋɔ bɨn tɨʼ é jɔʼ gwar yaa. 20Ebe, ntʉʼ bɨn bé ólwib. Sisim Sɔŋ win óntɨh bɨn ɨ, nye ó ngo lwib é bɨn.
21«Mɨɔ ókɛha mɨɔ ó, bé jʉʼo nye. Sɔŋ ókɛha mwan we. Bwan, bé óbene mojwɨ̀ʼa mo obyɛl bɔɔ, le esa ó, bé jʉŋɔ. 22Bʉr bɨbɛh, bé ónwim bɨn é lɔb wam. No ó, waa ódihbe, to pyal é l'esie e, nyiha ó ngo tiʼe. 23ǃBé si tíile bɨn é yiʼ nkana nɛʼɛ, bɨn bé à kpɛɛ, to é yʉʉ fih. Me elɛɛ bɨn cyecye ó nɛɛ: bɨn l'apa kumo bɨnkana bɨ lal Ɨzraɛl bibyɛh, Mwan mo Mʉr ópyal.
24«Mpʉn álaa yeʼle we é duu; syɛl mosa alaa masa we. 25Mpʉn saʼ mpʉ yeʼle we; syɛl mosa saʼ mpʉ masa we. No ó ndɨ ejala. Lʉ mbɛr bʉr pa taare jwɨrɔ die ó, Belzebul#10.25 «Belzebul», lé ó lʉʉ die mo Satan., a dwɛʼra e bʉr o mbɛr bʉr waa! Bé óka jwɨrɔ mie ndɨ é laŋle bebe e!»
Ajoʼo ga bʉa e bʉr
(Markus 8.38; Lʉkas 9.26; 12.2-9)
26«Ebe no, ajoʼo ga bʉa e bʉr, ebe, sa yiyɛh ndɨ é l'efo e, yé ógwiha. Sa yiyɛh ndɨ fela ɛ, yé ókʉ gʉŋɔ. 27Sa me lé elɛɛ bɨn é l'edurʉ ɨ, bâʼla lɛɛ ga ye é moho é kpɛŋlɛm. Sa mʉr ónyimla bɨn é l'egwal ɨ, cyɛba ga kʉ mie, bɨn bé à tuno ye. 28Ajoʼo ga bʉa e bʉr. Bé dam jʉ bɨn é nko paʼ bɨpuno. Bɛɛ bé abe e nkul esa bɨn sɔʼɔ é nko paʼ sisim. Laa ó, bɨn joʼa bʉa e be, fuo joʼo ga bʉa yɛɛ e Zyɛm, waa ndɨ e nkul esa ó, nyʉl le sisim bibyɛh, byé toʼ, to dwè é Bɨ-siʼe e. 29Bé ebɛma baatɔlɔ oba ó, para gwar. Dam be no, abe e l'atɔlɔ ngwar ndɨ e nkul ekur si, abe é gwɨma mo Sɔŋ win. 30Nteme, Zyɛm, nye egʉa tolɔɔ mɨkoho mɨ mpuo ndɨ bɨn é mɨlʉ ɨ. 31Ebe no, ajoʼo ga bʉa. Bɨn bé é bul buo dime, laa buobuo baatɔlɔ!
32«Ebe no, ǃɨ mʉr si kuro bɨr, gban me é mih mo bʉr nɛʼɛ, mɛm nteme, me ógban nye é mih mo Sɔŋ wam ndɨ é jobo kʉ ɨ. 33Sa gwar, ǃɨ mʉr si lɛɛ é pyɛldweh ó, nye agʉa me nɛʼɛ, me ólɛɛ nteme ó, nye a baabe mpʉn wam, sa nɨ é mih mo Sɔŋ wam ndɨ é jobo kʉ ɨ.»
Yesʉs a ze ó, ze nkam bʉr mɨlʉ
(Lʉkas 12.51-53)
34«Abuʼla ga ó, me a ze ó, lé eze sa ó, bʉr o si nwaʼ diʼe é motala. Me a bé aze gba motala paʼra wɔɔ. Me a ze ó lé eze timle fòŋ! 35Ebe, me a ze bɛʼ ó, “soho bé e sɔŋ, esehe bé e nyɔŋ, njyɛl bé e mpɔmlʉ mʉma. 36Mʉr ókœb-kœb bʉr o dɔm ó, njɨ é bɛn ye tʉŋlʉ#10.36 Dwɛʼa Michée 7.6..”»
«Me du ó Yesʉs» nye ó, go nkɛŋɨ klos yo
(Markus 8.34-35; Lʉkas 9.23-24; 14.26-27)
37«Waa lé ekpɛl sɔŋ, nkʉ nyɔŋ, laa bim nye ndɨ ekpɛl me e, nye é dwɛhba, ajala e me. Waa lé ekpɛl ma soho we, nkʉ sile we, laa bim nye ndɨ ekpɛl me e, nye é dwɛhba. Nye ajala e me. 38Waa ndɨ ankɛɛ klos ye, du me e, nye é dwɛhba. Nye ajala e me. 39Waa lé ekʉ ka saa ó njɨ ekamle e tiʼ ye e, nye ódimle ye. Waa lé emɛʼle ó, nye fuo dimle tiʼ ye é lɔb wam ɨ, nyiha óbaʼle ye.»
Myɛna
(Markus 9.37, 41; Lʉkas 9.48; 10.16; Yʉanes 13.20)
40«Mʉr bɨlan e bɨn mbɨmbɨa ɛ, nye ebɨlan e me. Waa lé ebɨlan e me e, bɨlan ó e mʉr a ntɨh me e. 41ǃƗ mʉr si bɨlan e ngwiha mɨlɔb mbɨmbɨa é dia ngwiha mɨlɔb nɛʼɛ, mʉr waa óbi mbi myɛna lé edweŋɔ ogwiha o mɨlɔb ɨ. ǃƗ mʉr si bɨlan e cɨcyel mʉr é mih mo Zyɛm ebe ocɨcyel we waa nɛʼɛ, mʉr waa óbi mbi myɛna lé edweŋɔ ocɨcyel o bʉr ɨ. 42Me elɛɛ bɨn cyecye ó nɛɛ: ǃɨ mʉr si dwe waa ndɨ é bul twaʼbe é l'esama le ompʉn bam, dam be njɨ bele modibe motala gwar e gwar ebe syɛɛ nye lé esea me mpʉ mpʉn wam nɛʼɛ, mʉr waa óbi mpaŋ myɛna me.»
Pilihan Saat Ini:
Mataos 10: ozmBad
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2002, Wycliffe Bible Translators, Inc. All rights reserved.
