మత్తయి 12

బక్తి కెర్తి దీసి రిసొ యేసు సంగిలిసి

(మార్కు 2:23-28; లూకా 6:1-5)

1జా పొదులె, #12:1 ఎత్కి సెన్వర్ యూదుల్‍క బక్తి కెర్తి సెలవ్ కడ దీసి జయెదె. జా దీసి జోవయించ సబ గెరలె గెచ్చ, దేముడుచ కొడొ సూన కెర, ఎత్కి అదికారుమ్ తిలొ దేముడుక బక్తి కెరుల. జోక ‘యెహోవ’ మెన నావ్ తయెదె. జా దీసి ‘కిచ్చొ కామ్ కెర నాయ్’ మెన జో ఎత్కి అదికారుమ్ తిలొ దేముడు సంగిలిస్‍క యూదుల్‍చ వెల్లెల మాన్సుల్ ప్రెజల్‍క జాడు వయడ్లి రితి కెర కామ్ నే కెర్తిస్‍చి రిసొ ఒగ్గర్ ఆగ్నల్ అఁవ్వి ఉచర అస్తి. ఇన్నె, దొన్ని ఎన్నులు కోడ్లిస్‍క ‘కామ్’ మెన నింద కెర్తతి.సెలవ్ కడన్లి దీస్‍తె, యేసుచి సిస్సుల్, పంటొ పికిలి బుఁయి వాట్ గెతె తిల. జలె, యేసుచ సిస్సుల్‍క చూ కెర్తికయ్. జా వాట్ సొడిచి పికిలి పంటొచ ఎన్నులు దొన్ని కోడ కంక దెర్ల. 2జలె, పరిసయ్యుల్ సగుమ్‍జిన్, జేఁవ్ సిస్సుల్ కెర్లిసి దెక కెర, “ఆదె, #12:2 ఎత్కి అదికారుమ్ తిలొ దేముడు ఒగ్గర్ పూర్గుమ్ పొది సంగిలి రితి, యూదుల్ ముక్కిమ్‍క సెన్వర్ దీసి సబతె గెచ్చ బోదన సూన బక్తి కెరుల, చి కిచ్చొ కామ్ కెర్తి నాయ్. కామ్ నే కెర్తి ఆగ్న ప్రెజల్ నే పిట్టయ్‍తి రితి, జోవయించ వెల్లెల మాన్సుల్, కన్కారుమ్ పఁవ్స, ప్రబు సంగిలి కంట అన్నె ఒగ్గర్ ముద్దొ కెర్తతి.బక్తి కెర్తి సెలవ్ కడన్లి దీసి కెరుక నాయిమ్ నెంజిలిసి తుచ సిస్సుల్ కెర్తతి” మెన యేసుక గోల కెర్తికయ్, 3జో జోవయింక ఇసి మెలన్: “పూర్గుమ్ తిలొ దావీదు రానొ, జోక చి జో తెన్ తిలసక చూ కెర్తికయ్, జో కెర్లిస్‍చి రిసొ తుమ్ సదు కెర్సు నాయ్ గే? 4కిచ్చొ కెర్లిసి మెలె, దేముడుచి గుడితె జో పెసిలన్, చి ఒత్త తిల పూజర్లు అర్పితుమ్ దిల పోడియొ కయ్‍ల. జేఁవ్ పోడియొ పూజర్లు కంక జయెదె, గని అన్నె కో కంక జయె నాయ్. జో కి, జో తెన్ తిలస కి జా కంక నాయిమ్ నెంజిలె కి జేఁవ్ కయ్‍ల. 5పడ్తొ, ఎత్కి బక్తి కెర్తి సెలవ్ కడన్లి దీసి, దేముడుచ పూజర్లు దేముడుచి గుడితె సేవ కెర్తతి. జా సేవక ‘కామ్. సుద్ది దీసి పిట్టవ గార్ కెర్తతి మెన ఉచరుక జయెదె జలెకి, పాపుమ్ నెంజె’ మెన మోసే పూర్గుమ్‍చొచి అత్తి రెగిడ్లి దేముడుచ #12:5 తెలుగు బైబిల్‍తె ధర్మశాస్త్రమ్ మెలె, మోసేచి అత్తి దేముడు రగ్డయ్‍లి ఆగ్నల్ మెన అమ్ జానుమ్. ఈంజ కొడొ ఎత్కి బైబిల్‍తె అగేచి పాఁచ్ పుస్తకుమ్‍తె రెగ్డయ్ జా అస్సె. ఈంజ దెకవుక మెన కుపియ బాసతె నొయి ప్రమానుమ్‍తె మోసే పూర్గుమ్‍చొచి అత్తి రెగిడ్లి దేముడుచ ఆగ్నల్ మెన రగ్డవ అస్సె.ఆగ్నల్‍తె తిలిసి సదు కెర్సు నాయ్ గే? 6జలె, ఆఁవ్ తుమ్‍క సంగితిసి కిచ్చొ మెలె, దేముడుచి గుడిచి కంట వెల్లొ సుదొ ఇన్నె అస్సె.

7‘తుమ్ కిచ్చొ కెర్తిసి అంక ఆస మెలె, బలి దెతిసి నాయ్, గని మాన్సుల్‍క కన్కారుమ్ దెకితిసి’

మెన తెదొడి సంగిలి కోడు తుమ్ అర్దుమ్ కెరంతదు జలె, పాపుమ్ నే కెర్ల ఈంజేఁవ్ సిస్సుల్‍క ‘పాపుమ్ కెర్ల’ మెన, నింద కెర్తదు నాయ్. 8సెలవ్ కడన్లి దీసిచి ఉప్పిరి ఆఁవ్ మాన్సు జా జెర్మున్ అయ్‍లొసొక అదికారుమ్ అస్సె.” మెన, జేఁవ్ పరిసయ్యుల్‍క యేసు సంగిలన్.

ఆతు లంబిలొసొక యేసు చెంగిల్ కెర్లిసి

(మార్కు 3:1-6; లూకా 6:6-11)

9యేసు ఒత్త తెంతొ గెచ్చ, జా కపెర్నహూమ్ పట్నుమ్‍తెచి సబ గెరి పెసిలొ. 10ఓదె, ఆతు లంబ గెలొసొ ఎక్కిలొ ఒత్త తిలన్. జేఁవ్ పండితుల్, కి, జో బాద తిలొ మాన్సు అస్సె మెన దెక కెర, యేసుక నేరిమ్ వయడుక ఉచర, “సెలవ్ కడన్లి దీసి ఏక్ బాద తిలొ మాన్సుక చెంగిల్ కెరుక నాయిమ్ గే, నాయ్?” మెన జోక పుసిల. 11జో జోవయింక, “తుమ్‍చితె కేన్ మాన్సుక జలెకు ఎక్కి మెండ జవుస్ తిలెగిన, జా మెండ బక్తి కెర్తి సెలవ్ కడన్లి దీసి ఏక్ గొయితె సేడ తిలెగిన, జో ఎజొమాని జాక జా గొయి తెంతొ కడె నాయ్ గె? 12జలె, మెండచి కంట మాన్సు ఒగ్గర్ విలువ. జాకయ్, సెలవ్ కడన్లి దీసి కి మాన్సుక చెంగిల్ కెరుక నాయిమి” మెన జబాబ్ దా, 13యేసు జో ఆతు లంబిలొసొక దెక, “తుచి ఆతు చంపొ కెరు” మెలన్. జో మాన్సు ఆతు చంపొ కెర్లన్, చి ఈంజొ ఆతు బేగి అన్నెక్ చెంగిల్ తిలి ఆతుచి రితి చెంగిల్ జలి. 14గని యేసు దస్సి కెర్తికయ్, పరిసయ్యుల్ కిచ్చొ కెర్ల మెలె, బార్ జా కెర, యేసుక కీసి మారుక గే కుట్ర ఉచరన లట్టబన్ల.

15జేఁవ్ పరిసయ్యుల్ ఉచర్లిసి యేసు జానెచి రిసొ, ఒత్త తెంతొ ఉట్ట గెలన్. ఒగ్గర్ ఒగ్గర్‍జిన్ జనాబ్ జోచి పట్టి గెల, చి జోవయింతె జొర్జొ తిలస ఎత్కిజిన్‍క జో చెంగిల్ కెర, 16“అంచి రిసొ తుమ్ కేనె తెర్లె ఒత్త సంగ నాయ్” మెన, జేఁవ్ ప్రెజల్‍క ఆడ్ర దిలన్. 17ఈంజ ఎత్కి కిచ్చొక జర్గు జలి మెలె, దేముడుచ కబుర్లు సంగిలొ యెసయా పూర్గుమ్‍చొచి అత్తి సంగిలి కోడ్ నెరవెర్సుప జతి రిసొయి.

18“ఈంజొ, ఆఁవ్ నిసాన్ల అంచొ సేవ కెర్తొసొ, ఈంజొ ఆఁవ్ ప్రేమ కెర్లొసొ, చి రిసొ అంక పూర్తి సర్దసంతోసుమ్. ఇనాచి పెట్టి అంచి ఆత్మ తియిఁదె, చి ‘యూదుల్ నెంజిల మాన్సుల్ కి రచ్చించుప జంక జయెదె’ మెన సూనఎదె. 19ఈంజొ పోటి జయె నాయ్. గగ్గొల్ జయె నాయ్, అన్నె, గవురుమ్ ఆనన్‍తి రితి వీదులె గట్టిఙ లట్టబ జోచి అవాడ్ సూనయె నాయ్. 20జలె, ఆకర్ దీసిక సత్తిమ్ తెన్ ఎత్కిక పరిచ్చ కెర తీర్పు కెర, సిచ్చల్ గే బవుమానల్ గే దెతి ఎద, కామ్‍క నెంజిలి పీరి గండక జో మోడ కెర వెంట గెల్తి నాయ్. సరిపుచుప జతి ఉజిడి నే దెతి వత్తి జో నే విజవ దెవుల. 21పడ్తొ, ఇనాచి నావ్‌చి తెడి యూదుల్ నెంజిలస దయిరిమ్ జా ఆస జవుల”

మెన, దేముడు సంగిలి కోడు నెరవెర్సుప జలి.

యేసుక పండితుల్ దూసుప కెర్లిసి

(మార్కు 3:20-30; లూకా 11:14-23; 12:10)

22తెదొడి బూతుమ్ దెర్లి రిసొ గుడ్డి జా గుల్లొ జా తిలొ మాన్సుక ఒత్త తిల మాన్సుల్ యేసుతె కడ ఆన్‍తికయ్, యేసు జోక చెంగిల్ కెర్లన్. జో మాన్సు లట్టబుక దెర్లొ చి అంకివొ డీసిల. 23ఇస్సె జలి రిసొ, ప్రెజల్ ఎత్కి ఆచారిమ్ జా, “ఈంజొ యేసు కొన్సొ? దావీదు రానొచి సెకుమ్‍తె జెర్ముక తిలొ రచ్చించుప కెర్తొసొ ఈంజొ ఏక్ వేల జయెదె గే?” మెన లట్టబ్‍క దెర్ల.

24పరిసయ్యుల్, జా కోడు సూన కోపుమ్ జా. “బూతల్‍క రానొ జలొ బయెల్జెబూల్‍చి నావ్ తెన్ ఈంజొ బూతల్‍క ఉదడ్తయ్” మెన గోసక సంగిల. 25గని జేఁవ్ ఉచర్లిసి యేసుక జానెచి రిసొ, ఇసి మెలన్. “కేన్ జవుస్ రాజిమ్‍తెచ మాన్సుల్, జోవయింక జెఁవ్వి విరోదుమ్ జా వర్స వర్స జా యుద్దుమ్ కెరన్లె, జా రాజిమ్ పాడ్ జా గెచ్చెదె. కేన్ పట్నుమ్ జవుస్ కేన్ గేరు జవుస్ మాన్సుల్ వర్స వర్స జా జోవయింక జెఁవ్వి విరోదుమ్ కెరన్లె, జా పట్నుమ్ జవుస్, గేరు జవుస్ టీఁవొ జయె నాయ్. 26దస్సి, సయ్‍తాన్‍చక సయ్‍తాన్ ఏక్ వేల ఉదడ గెలెగిన, జోవయింక జొయ్యి యుద్దుమ్ కెర్తయ్, జోవయింక జొయ్యి యుద్దుమ్ కెర్లె, జోచి రాజిమ్ కీసి జా టీఁవొ జయెదె? 27ఆఁవ్ ఏక్ వేల బయెల్జెబూల్‍చి నావ్ తెన్ బూతల్‍క ఉదడ్లెగిన, తుమ్‍చ సిస్సుల్ కచి నావ్ తెన్ ఉదడ్తతి? బూతల్‍క ఉదడ్త తుమ్‍చయ్ సిస్సుల్ అంచి రిసొ తుమ్‍క తీర్పు సంగుతు! 28దేముడుచి సుద్ది తిలి ఆత్మసెక్తిక ఆఁవ్ బూతల్‍క ఉదడ గెల్తసి జలె కచితుమ్ దేముడుచి రాజిమ్ తుమ్‍తె అప్పె పాఁవ జా అస్సె.

29“అన్నెక్ టాలి ఉచర, కిచ్చొ మెలె, కేన్ జవుస్ బలుమ్ సుదొచి గెరి పెస జోచి ఆస్తి దెర గెచ్చుక చోరు ఉచర్లెగిన, తొలితొ జో చోరు జో బలుమ్ సుదొక నే బంద తిలెగిన, చోరుక నెత్రె. జో బలుమ్ సుదొక తొలితొ బందిలెగిన, గెరిచి సామన్ జో చోర గెలుక జయెదె” మెన సంగిలన్.

30దస్సి సంగ, యేసు అన్నె, “కో అంచి పచ్చెన జయె నాయ్ గే, అంక విరోదుమ్ జా అస్సె, చి అంచి రాజిమ్‍తె జేఁవ్ బెదిత్ రితి కో అంచి తెన్ మాన్సుల్‍క ఆనె నాయ్ గే అంచి మందక చెదుర్ప కెర్తయ్.

31“జలె, ఆఁవ్ తుమ్‍క సంగితిసి కిచ్చొ మెలె, ఎక్కిక పిట్టవ మాన్సుల్ కెర్త పాపల్ దూసెనల్ ఎత్కి జోవయింక చెమించుప కెరుక జయెదె. గని, దేముడుచి సుద్ది తిలి ఆత్మక దూసుప కెర్తిసి చెమించుప జయె నాయ్. 32కో గడియ బమ్మ జా ఆఁవ్ మాన్సు జా జెర్మున్ అయ్‍లొసొచి రిసొ అన్మానుమ్ కోడ్ లట్టబెదె గే, జోవయింక చెమించుప కెరుక జయెదె. గని దేముడుచి సుద్ది తిలి ఆత్మక కో దూసుప కెరుల గే, ఈంజ ఉగుమ్‍తె కి జా ఉగుమ్‍క కి చెమించుప జతి నాయ్.

33“రూక్‍చి పండ్లు చెంగిల్‌చి జలె, జా రూకుక చెంగిల్ మెన ఒప్పన. రూక్‍చి పండ్లు గర్చి జలె, జా రూకుక గర్చొ మెన ఒప్పన. రూక్‍చి పండ్లు దెకిలెగిన, జా రూకుక చెంగిల్ గే, గర్చొ గే చినుక జయెదె. 34పెట్టి అయివొచి రితి విస్సుమ్ తిల మాన్సుల్, తుమ్. తుమ్‍చి పెట్టి విస్సుమ్ తిలి రిసొ తుమ్ కీసి చెంగిల్‌చి లట్టబుక జయెదె! పెట్టితె తిలి బుద్దిచి కొల్ది చోండి లట్టబెదె. 35చెంగిల్ మాన్సు జోచి చెంగిల్ బుద్ది బెర్తుచి కొల్ది చెంగిల్‌చి బార్ కెరెదె. గర్చొ మాన్సు జోచి పెట్టిచి విస్సుమ్‍చి బెర్తుచి కొల్ది విస్సుమ్ బార్ కెరెదె. 36ఆఁవ్ తుమ్‍క సంగితిసి కిచ్చొ మెలె, ఈంజ లోకుమ్‍చ ఎత్కిక వెల్లి తీర్పు కెర్తి దీసిక మాన్సుల్ లట్టబ్లి ఎత్కి కామ్‍క నెంజిలి కోడుచి రిసొ నేరిమ్ వయుల. 37తుమ్‍చ కొడొ తుమ్‍చి పెట్టి తిలిస్‍క సాచి జలి రిసొ నీతి సుదొ గే, నెంజిలె పాపుమ్ సుదొ గే బార్ కెరెదె.” మెలన్.

జేఁవ్ యూదుల్ అన్మానుమ్ జలిస్‍చి రిసొచి తీర్పు

(మార్కు 8:11-12; లూకా 11:29-32)

38తెదొడి పరిసయ్యుల్ చి మోసే తెన్ దేముడు దిలి ఆగ్నల్ సికడ్తస సగుమ్‍జిన్ యేసుక, “గురుబాబు, దేముడుచి అదికారుమ్ తుక అస్సె మెన రుజ్జు దెకయ్‍తి వెల్లి కామ్ ఏక్ అప్పె కెరు. దెకుమ్‍దె” మెన యేసుక సంగిల. 39గని, జో జోవయింక కిచ్చొ జబాబ్ దిలన్ మెలె, “ప్రబుక నిదానుమ్ నెంజ లంజెబుద్ది పాపుమ్‍బుద్ది జల తుమ్ ఈంజ కాలుమ్‍చ మాన్సుల్, రుజ్జు దెకయ్‍త కమొక కోర్‍ప జతసు. అంచి అదికారుమ్ దెకయ్‍తి రిసొ ఎక్కి పిట్టవ, కేన్ వేర కామ్ కెర దెంక నెంజె. జా రుజ్జుచి కామ్ కీసిచి జయెదె మెలె, దేముడుచ కబుర్లు పూర్గుమ్ సంగిలొ యోనాక జర్గు జలిస్‍చి రితి జయెదె. 40మెలె, యోనా కీసి తిర్రతి అందరె మెద్దెనె సముద్రుమ్‍చి వెల్లి మొస్సొచి పెట్టి తిలన్ గె, దస్సి, మాన్సు జా జెర్మున్ అయ్‍లయ్ ఆఁవ్ తిన్ని అందర్లు తిన్ని మెద్దెనె బుఁయి తెడి తయిందె. 41అన్నె, ఈంజ లోకుమ్ ఎత్కిక వెల్లి పరిచ్చ కెర్తి దీసిక, తుమ్ ఈంజ కాలుమ్‍చ అన్మానుమ్ జల యూదుల్ కి, యోనా బోదన కెర్ల నీనెవె పట్నుమ్‍చ ప్రెజల్ కి, బెద టీఁవొ జా, జేఁవ్ తుమ్‍క ‘గర్చ’ మెన రుజ్జు దెకవుల. కిచ్చొక మెలె, జా పట్నుమ్‍చ మాన్సుల్ యోనా కెర్లి బోదన సూన కెర, జేఁవ్ కెర్ల పాపల్‍చి రిసొ దుకుమ్ జా, నంపజా, బుద్ది జల. ఈందె, యోనాచి కంట వెల్లొ తుమ్‍చి నెడిమి అస్సె. 42పడ్తొ, వెల్లి తీర్పు కెర్తి జా దీసిక, దచ్చెన దేసిమ్‍చి పూర్గుమ్ తిలి రాని ఎక్లి ఈంజ కాలుమ్‍చ మాన్సుల్ తెన్ టీఁవొ జా, తుమ్‍క ‘గర్చ’ మెన రుజ్జు దెకయెదె. కిచ్చొక మెలె, పూర్గుమ్ జా రాని ‘సొలొమోను రానొ సంగితి బుద్దిచి కోడు సూనిందె’ మెన, ఒగ్గర్ ఒగ్గర్ దూరి తెంతొ అయ్‍లి. గని, ఈందె, సొలొమోనుచి కంట వెల్లొ సుదొ తుమ్‍చి నెడిమి అస్సె.

43“ఏక్ మాన్సుక బూతుమ్ దెర తిలెగిన, జా బూతుమ్ జో మాన్సుచి తెంతొ ముల దా తత్తిచి రిసొ టాన్ చజన, బయిలె గెచ్చ బుల్తె తయెదె, గని, టాన్ నే దొర్కు జలి రిసొ, 44జో ఉచరన, ఆఁవ్ ముల దిలొ గెరి అన్నె గెచ్చిందె మెన, జా గేర్ విడి అస్సె మెన, జా గెర్‍చొ మాన్సు వడ్డవ కెర సుబ్రుమ్ కెర అస్సె మెన దెక కెర, 45అన్నె గెచ్చ, జాచి కంట గర్చ సత్తు బూతల్‍క పట్టి కడ ఆనెదె, చి జేఁవ్ ఎత్కి జో మాన్సుచి తెడి పెస కెర, ఒత్తయ్ బస జవుల. జాచి రిసొ, జో మాన్సుక అగ్గెచి కంట, ఆకర్‍క ఒగ్గర్ అల్లర్ తయెదె. గర్చి బుద్దిచి ఈంజ కాలుమ్‍చ మాన్సుల్ తెన్ దస్సి జయెదె.” మెన, యేసు బోదన కెర్లన్.

46యేసు ప్రెజల్‍క అన్నె బోదన కెర్తె తతికయ్, ఈందె, జోచి అయ్యసి బావుడ్సివొ జా కెర, ‘జో తెన్ లట్టబుమ్‍దె’ మెన వీదె టీఁవొ జా తిల. 47#12:47 గ్రీకు బాస తెన్ ఈంజ మత్తెలి తొలితొ రెగిడ్ల సగుమ్ పుస్తకల్‍తె 47 కోడు తయె నాయ్.తెదొడి ఎక్కిలొ “ఈందె, తుచి అయ్యది తుచ బావుడ్దివొ తుచి తెన్ లట్టబుక మెన వీదె టీఁవ అస్తి” మెన యేసుక సంగిలన్. 48జోక సంగిలొ మాన్సుక యేసు “కొన్సి అంక అయ్య, కొన్స అంక బావుడ్లు జవుల గే జాన్సు గే?” మెన సంగ, 49జోచి సిస్సుల్ తిలి పక్క ఆతు చంప కెర, “ఈందె, అంచి అయ్య, అంచ బావుడ్లు. 50కిచ్చొక మెలె, పరలోకుమ్ తిలొ అంచొ దేముడు అబ్బొ సంగిలి రితి కో కెరుల గే, జెఁవ్వి అంచ బావుడ్లు, అంచ బేనివొ, అంచి అయ్య” మెన సంగిలన్.

Pilihan Saat Ini:

మత్తయి 12: KEY

Sorotan

Berbagi

Salin