JUAN 2
2
Kasal sa Cana
1Sa ikatlo nga adlaw may kasal sa Cana sa Galilea, kag ang iloy ni Jesus yadto didto; 2si Jesus man gin-agda sa kasal, upud ang iya mga gintoton-an. 3Sang nagkulang ang alak, ang iloy ni Jesus nagsiling sa iya, “Wala sila sing alak.” 4Kag si Jesus nagsiling sa iya, “Babayi, ano bala ang imo sa akon? Wala pa mag-abut ang akon takna.” 5Ang iya iloy nagsiling sa mga sologoon, “Ang bisan ano nga isiling niya sa inyo buhata ninyo.”#Gen. 41:55. 6Karon may anum ka tadyaw nga bato nga napahamtang didto, nga sa kinabatasan sang mga Judio sa pagpaninlo, nga ang tagsatagsa nagasulud sing duha ka pulo ukon katloan ka galon. 7Si Jesus nagsiling sa ila, “Pun-a ninyo sing tubig ang mga tadyaw.” Kag ginpuno nila sila tubtub sa bibig. 8Nagsiling sia sa ila, “Sanduka ninyo karon, kag dalha ini sa manugtatap sang sinalosalo.” Gani gindala nila ini. 9Sang natilawan sang manugtatap sang sinalosalo ang tubig nga karon nangin-alak, kag wala makahibalo kon diin ini nagikan (bisan nga ang mga sologoon nga nagsanduk sang tubig nakahibalo), ang manugtatap sang sinalosalo nagtawag sa nobyo 10kag nagsiling sa iya, “Ang tagsa ka tawo nagabutang sing una sang maayong alak; kag sang nakainum sing tama ang mga tawo, ugaling ang kubus nga alak; apang natago mo ang maayong alak tubtub karon.” 11Ini, ang nahauna sang iya mga tanda, ginhimo ni Jesus sa Cana sa Galilea, kag nagpahayag sang iya himaya; kag ang iya mga gintoton-an nagtoo sa iya.
12Sa tapus sin nagdolhog sia pa Capernaum,#Mat. 4:13. upud ang iya iloy kag ang iya mga utud kag ang iya mga gintoton-an; kag wala sila magpabilin didto sing madamung adlaw.
Ang Pagtinlo sang Templo
(Mat. 21:12-17; Mar. 11:15-19; Luc. 19:45-48)
13Malapit na ang Pascua#Ex. 12:1-27. sang mga Judio, kag si Jesus nagtaklad pa Jerusalem. 14Nakita niya sa templo ang mga nagabaligya sing mga baka kag mga carnero kag mga salampati, kag ang mga manugbaylo sang cuarta nga nagapatikang. 15Kag naghimo sia sing putik nga lubid, kag ginsobol niya ang tanan gikan sa templo, lakip ang mga carnero kag ang mga baka; kag gin-ula niya ang cuarta sang mga manugbaylo kag ginpamaliskad ang mga latok nila. 16Kag sa mga nagbaligya sang mga salampati nagsiling sia, “Kuhaa ninyo ining mga butang diri; dili ninyo paghimoon ang balay sang akon Amay nga balay nga balaligyaan.” 17Ang iya mga gintoton-an nakadumdum nga nasulat, “Ang kakugi tungud sa imo balay magahalunhun sa akon.”#Sal. 69:9. 18Niyan ang mga Judio nagsabat sa iya, “Ano bala nga tanda ang mapakita mo sa amon sa paghimo mo sini?” 19Si Jesus nagsabat sa ila, “Gub-a ninyo ining templo, kag sa tatlo ka adlaw akon patindugon ini.”#Mat. 26:61; 27:40; Mar. 14:58; 15:29. 20Niyan ang mga Judio nagsiling, “Sa kap-atan kag anum ka tuig gintukud ining templo, kag patindugon mo bala ini sa tatlo ka adlaw?” 21Apang nagpamolong sia sang templo nga iya lawas. 22Busa sang nabanhaw sia, ang iya mga gintoton-an nakadumdum nga nagpamolong sia sini; kag nagtoo sila sa kasulatan kag sang polong nga nasiling ni Jesus.
Si Jesus Nakahibalo sang Tanan nga Tawo
23Karon sang didto sia sa Jerusalem sa piesta sang Pascua, madamu ang nagtoo sa iya ngalan sang nakita nila ang mga tanda nga ginhimo niya; 24apang si Jesus wala magsalig sang iya kaugalingon sa ila, 25bangud nga nahibaloan niya ang tanan nga tawo kag wala nagkinahanglan sing bisan sin-o nga magsaksi nahanungud sa tawo; kay sia gid nakahibalo sang yara sa tawo.
Pilihan Saat Ini:
JUAN 2: ABHIL82
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Ang Biblia ©1982 Philippine Bible Society
