San Mateo 16

Kaꞌan ndia fariseo xiꞌin Jesús ña na sa ra iin ña täan kuni ndia

1Ra saa ndixaa sava ndia fariseo xiꞌin ndia saduceo nuu Jesús, ña kuni ndia kotondoso ndia ra, ra saa ndikaꞌan ndia xiꞌin ra, ña na sa ra iin ña xituꞌun kuni ndia, ra saa ke kandixa ndia ra ña tiꞌvi Ndioxi ra xaa ra. 2Ndi su suꞌva va tu kachi Jesús xiꞌin ndia:

―Ndoꞌo, ra vaꞌa va ndakuni ndo kii, saa chi te kuaa, ra suꞌva va kachi ndo: “Vaꞌa ni koo ñuu vichin chi vaꞌa ni kaa ndivi”, kachi ndo. 3Ra chi ixtiaan tu kachi ndo saa: “Vichin ra ndiee ni kuun savi, saa chi tiaa ni ndikaa viko ndivi, ra iin ña ñaa kaa”, kachi ndo. ¡Ra na chiꞌña tuꞌun va kuvi ndo! Saa chi vaꞌa va ndakuni ndo kii, ¿ra nichuun küvi kundaa tu ini ndo xiꞌin ña ^xa Ndioxi nuu ña yuuvi yoꞌo tiempo vichin? ―kachi Jesús xiꞌin ndia.

4Saa ndikaꞌan ka ra kachi ra saa:

―Yuvi ñaꞌa, na xïin kandixa Ndioxi ndee tiempo vichin, ra kuni na kuni na iin ña xituꞌun, ndi su ndia nii ña sä yu kuni na, chi ndia taꞌan ña ndoꞌo ra Jonás, ra ndikaꞌan ndoso tuꞌun Ndioxi xinaꞌa va ke sa yu kuni na ―kachi Jesús.

Ndia saa ra ndakoo ra ndia, ra ndakiꞌin ra kuaꞌan va ra.

Kaꞌan Jesús ña na köo yo ta kuꞌva iyoo ndia fariseo

5Ra te ndixaa ndia itaꞌan xiꞌin Jesús, chi inka xiyo yuꞌu mini kan, ra saa ndakuꞌun ini ndia ña kuäꞌan ixta xiꞌin ndia kuxi ndia. 6Ra saa ndikaꞌan Jesús xiꞌin ndia kachi ra saa:

―Kotoꞌni ndo, ra kuenda ni koo ndo xiꞌin ixan iyá ña kuu ndavi ndia fariseo, ra saa tu xiꞌin ndia saduceo va ―kachi ra xiꞌin ndia.

7Saa xaꞌa ndia ^ndakani ini ndia, ra kaꞌan ndia xiꞌin taꞌan ndia kachi ndia saa:

―Ña köo ixta niꞌi va yo ke, kachi ra saa xiꞌin yo ―kachi ndia.

8Ra kundaa va ini Jesús ña ^kaꞌan ndia xiꞌin taꞌan ndia, saa ndikaꞌan ra xiꞌin ndia kachi ra saa:

―¿Nichuun kaꞌan ndo xiꞌin taꞌan ndo ña köo ixta niꞌi ndo? ¡Ra nichuun ndaku ni ini ndo, ña xïin ndo kandixa ndo! 9¿Ra a nii loꞌo vi ke küvi kundaa ini ndo? ¿Ra a xa naa kuvi va ini ndo ña sakuxi yu uꞌun mil yuvi, xiꞌin uꞌun loꞌo ixta? ¿Ra ndixaa ka tuká sakutu ndo xiꞌin ña nindoo ndoso? 10¿Ra a ndaküꞌun tu ini ndo ña sakuxi yu kumi mil yuvi, xiꞌin takua uxa loꞌo ixta? ¿Ra ndixaa ka tuká sakutu ndo xiꞌin ña nindoo ndoso? 11¿Ra nichuun kundäa ni ini ndo ña kaꞌan yu xiꞌin ndo? Saa chi süvi xaꞌa ña köo ixta niꞌi ndo ke kaꞌan yu, chi xaꞌa ixan iyá ña kuu ndavi ndia fariseo xiꞌin ndia saduceo va ke kaꞌan yu, ña vaꞌa na kondiaa ndo mii ndo nuu chiñu kiꞌvi ña xa ndia ―kachi Jesús xiꞌin ndia. 12Ra saa vi ke kundaa ini ndia, ña süvi ndixa xaꞌa ixan iyá ña kuu ndavi ndia fariseo xiꞌin ndia saduceo, ña chikaa na xiꞌin ixan ixta vaꞌa ke ndikaꞌan Jesús xiꞌin ndia, chi xaꞌa ña ^sañaꞌa ndia xiꞌin xaꞌa chiñu ña xa inaꞌa ndia xa va ndia ke ndikaꞌan ra xiꞌin ndia.

^Ndakuni ra Pedro Jesús ña kuu ra seꞌe Ndioxi

13Ra ta ndixaa Jesús chi ñuu Cesarea ña ndikun ndiaa ñuu Filipo, ra saa nindakatuꞌun ra ndia itaꞌan xiꞌin ra kachi ra saa:

―¿Yoo kuvi yuꞌu ra xaa yoꞌo, kachi yuvi xaꞌa yu? ―kachi ra xiꞌin ndia.

14Ra saa ndakuiin ndia kachi ndia saa xiꞌin ra:

―Sava na kaꞌan kachi na saa, ña kuu kun ra Juan ra sakuchi yuvi; ra sava tu na kaꞌan ña kuu kun ra Elías va; ra inka tu na kaꞌan ña kuu kun ra Jeremías va; ra sava tu na kaꞌan ña kuu kun ndia iin ra ndikaꞌan tuꞌun yuꞌu Ndioxi xinaꞌa va ―kachi ndia xiꞌin Jesús.

15Ra saa nindakatuꞌun ra ndia kachi ra saa:

―Ra ndoꞌo tu, ¿yo kuvi yuꞌu, tuvi ndo? ―kachi ra xiꞌin ndia.

16Ra saa ndakuiin ra Simón Pedro kachi ra saa:

―Tata, yoꞌo kuvi seꞌe Ndioxi ra tiaku, ra xa̱à kun ña sakaku na yuuvi yoꞌo ―kachi ra xiꞌin Jesús.

17Ra saa ndakuiin Jesús kachi ra saa xiꞌin ra:

―Vaꞌa ni ^kee kun, Simón, seꞌe ra Jonás, saa chi süvi na yuuvi yoꞌo kuvi na nditaxi ña xinituni yoꞌo ndaꞌa kun, ña vaꞌa kundaa ini kun, chi Tata yu Ndioxi ra iyoo ndivi va kuvi ra taxi ña ndaꞌa kun. 18Ra yuꞌu tu, kaꞌan xiꞌin kun vichin, ña ndakunani kun Pedro. Ra tuꞌun “Pedro” yoꞌo, ra “yuu” va ke kachi ña. Ra sata yoꞌo ke kata yu yuvi na ndikun yuꞌu, ra ndia nii ñaꞌa kuchüun sandiꞌi xaꞌa na, ra nii ña ndii ña xaꞌni yuvi kuchüun sa tiaa nuu na. 19Ra ndaꞌa yoꞌo ke taxi yu yave, ña ndakuiña yeꞌe nuu xaꞌndia Ndioxi chiñu. Ra takundiꞌi ñaꞌa ña chikuꞌni kun nuu ña yuuvi yoꞌo, ra kunuꞌni tu ña ndivi va, ra takundiꞌi tu ñaꞌa ña ndaxi kun nuu ña yuuvi yoꞌo, ra ndaxi tu ña ndivi va ―kachi Jesús xiꞌin ra Pedro.

20Ra saa xaꞌndia Jesús chiñu nuu ndia itaꞌan xiꞌin ra, ña na ndatüꞌun ndia xiꞌin ndia nii yuvi, ña kuu ra seꞌe Ndioxi, ra tiaku, ra ^xaa sakaku na yuuvi yoꞌo.

Kaꞌan Jesús ndia kuꞌva ke ndoꞌo ra ta xa ná kuvi ra

21Ra saa xaꞌa Jesús ndatuꞌun ra xiꞌin ndia itaꞌan xiꞌin ra, ña xiniñuꞌu kuꞌun ra ñuu Jerusalén, ra ndia xikuaꞌa, xiꞌin sutu ndia kunaꞌnu nuu ndia sutu, xiꞌin ndia maestro sañaꞌa ley Ndioxi, ra sandoꞌo ni ndia ra, ra kaꞌni ndia ra, ndi su kii uni ndatiaku va ra ―kachi ra xiꞌin ndia. 22Ra saa tava siin ra Pedro Jesús, ra xaꞌa ra kaꞌan ra xiꞌin ra kachi ra saa:

―Tata, ¡chikäa ini kun ña ñaa, chi ndia nii kii ndöꞌo kun saa! ―kachi ra.

23Saa ndikokuiin Jesús, ra ndikaꞌan ra xiꞌin ra Pedro kachi ra saa:

―¡Kuatiaꞌa nuu yu, timiaꞌa!, chi ri kuni sandakava yuꞌu va kuvi kun, saa chi yoꞌo, ra süvi chiñu Ndioxi ke ndiꞌi ini kun xaꞌa sa kun, chi ña xa na yuuvi yoꞌo va ke ndakani ini kun xaꞌa ―kachi Jesús xiꞌin ra.

24Ra saa ndikaꞌan Jesús xiꞌin ndia itaꞌan xiꞌin ra kachi ra saa:

―Tu ndia ndo kuni kundikun yuꞌu, ra xiniñuꞌu ^kaꞌndia ini ndo xaꞌa mii ndo, ra ndakasoko ndo cruz ndo ra kundikun ndo yuꞌu. 25Chi takundiꞌi yuvi, na kuni sakaku mii nuu ña yuuvi yoꞌo, kuvi na ndiꞌi xaꞌa va, ra takundiꞌi tu na xiin ndataxi mii ña ndoꞌo na xaꞌa yuꞌu, kuvi na niꞌi kutiaku va. 26Ra vaꞌa ni na koo takundiꞌi va ñaꞌa ña iyoo nuu ña yuuvi yoꞌo nuu yuvi, ndi su tu na sandoñuꞌu tu na nima na, saa ra köo vaꞌa yaꞌvi ndiaa vi ña. Ra ndia nii tu ñaꞌa küvi kuniñuꞌu na ña chaꞌvi na xaꞌa ña niꞌi na kutiaku nima va na. 27Chi yuꞌu, ra xaa yoꞌo vichin, ra ndiko yu kixi yu xiꞌin ndiee Tata yu, xiꞌin na tatun ra, ra saa ke ndachaꞌvi yu ta iin ta iin na yuuvi yoꞌo xaꞌa chiñu ña ^xa na, ra ta kuꞌva iyoo mii chiñu ña ^xa na, saa ke koo tu yaꞌvi na sa va yu. 28Ra ña ndixa ke kaꞌan yu xiꞌin ndoꞌo, ndia ndee yoꞌo vichin, chi saa kúú tiaku ka va ndo, ra kuni nuu va ndo ña xaꞌa yuꞌu, ra xaa yoꞌo ña kaꞌndia yu chiñu ―kachi Jesús xiꞌin ndia.

Pilihan Saat Ini:

San Mateo 16: mxvNT

Sorotan

Berbagi

Salin